Havaktingit

You are here

Tipaakuq Inighaittuq Hamani - Higaaruiqtughannguqtut

Januali 16, 2014

Tuhaayaghat

Tuhaqtitaunariqtughat

Tipaakuq Inighaittuq Hamani - Higaaruiqtughannguqtut

IQALUIT, NU (January 16, 2014) – Kavamatkut Nunavunmi Havakviat Aanniaqtuliqiyit higaaruiquliqtut higaayuktunik atuqpaktuniklu tipaakunik hamani aviktuqhimayumi tajja "higaaruiqtughannguqtut." Pingahuuliqtut ukiut kavamatkut imaa "Tipaakuq Inighaittuq Hamani" ilihimaquiliqtut.

Nunallaat Nunavunmi tamaat quviahuutiginiaqtaat taapkua "Tipaakuq Inighaittuq Hamani" taapkualu Kanatami Higaaqtailiyughat Upluutait aallatqiingnik hulilukaaqtillugit atuqtillugit January 19-mit – 25-mut, 2014.

"Tipaakuqtuqtut Nunavunmi amirnainnaunngittuq aanniaqtailiniqmut. ‘Kukiittirnaqtuq hivunighaptingnit’ aanniqhipluni ilaptingnik, nunaqatigiingnit, ilitquhirnik maniutiptingniklu," uqaqtuq Nunavunmi Aanniaqtuliqiyit Ministaat Monica Ell. "Nunavunmiut naklighaannginnanngittut, tammaivallialiqtugut inuttiavangnik tipaakuqtuqnirmut. Higaaruiqtughannguqtut. Higaaruiqniq aturuiqniqlu tipaakunik ayurnaqtuq, kihimi taimaaqpaliqtughauyugut. Tipaakuqtuyuktut taimaaquyauvaktut. Imaatut uvaptingnut aanniaqtailinnaqtuq."

Ukiumi atuqtumi, "Tipaakuq Inighaittuq Hamani" ilihimaquiyut tipaakuqtuyuktunik taimaa uuktuqlutik "Higaaruiqtughannguqtunut" akimanahuaqlutik. Inuit higaaruirumayut tipaakuqturuirumayut tatqiqhiut March 2014 atuqtillugu, akimanahuarniat aittuutinik, aullaarutighaniklu $5,000-taalanik qaritauyaniklu MacBook Pro-mik. "Higaaruiqatigiiktut" ikayuqtiita akimanahuarniaqtullu iPad mini-mik. Ilauyumayut uuktuinnarialgit talvani www.timetoquit.ca talvaniluuniit www.nuquits.gov.nu.ca. Uuktuutit naunaitkutallu titiraqaqvikkut tuyuqtauniat tamangnut aimavingnut Nunavunmi hailiyaulutiklu nunallaat munaqhiqarviinit. Akimayut taiyauniaqtut April-mi.

Ukiumi atuqtumi, kavamatkut ilavalliayut ikayuqtighanik higaaruirahuaqtunut ahiillu tipaakuqtuyuktunik. Akiittut hivayautikkut ikayuqtighat hivayainnarialgit upluq tamaat talvani angmaumayut 24-nik ikaarninik Nunavut Higaaruiqvianit, 1-866-368-7848, ayuiqhahimayut ikayuqtit uqaqatigiinnarialgit qaritauyakulluuniit talvani www.nuquits.gov.nu.ca January 20-mi aullaqtirahuat.

Naunaiqhiyumaguvit huliyunik nunallaarnit, hivayaqlugu munaqhiqarvik qaritauyakkut takuluguluuniit www.nuquits.gov.nu.ca taapkualuuniit Havakviat Aanniaqtuliqiyit qaritauyakkuurutait www.gov.nu.ca/health.

"Higaaruiqtughannguqtut" akimanahuaqtunut naunaitkutait, maliktaghallu, hailiyauniaqtut talvani www.timetoquit.ca January 20-mi aullaqtirlutik.

###

Tuhaqtittiyit hivayautaat:

Ron Wassink

Tuhaqtittiyit Havaktiat

Havakvianit Aanniaqtuliqiyit

867-975-5710

rwassink@gov.nu.ca