ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ ᑎᓕᓯᔪᖅ ᓄᖅᑲᖅᑎᑕᐅᖁᔨᓪᓗᓂ ᑎᑭᖃᑦᑕᖅᑐᓂᒃ ᓄᓇᕗᒻᒧᑦ ᐃᓚᐃᓇᖏᑦ ᑎᑭᒍᓐᓇᖅᑎᑕᐅᓗᑎᒃ
ᐱᕙᓪᓕᐊᔪᑦ ᑐᓴᕋᑦᓴᑦ
ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ ᑎᓕᓯᔪᖅ ᓄᖅᑲᖅᑎᑕᐅᖁᔨᓪᓗᓂ ᑎᑭᖃᑦᑕᖅᑐᓂᒃ ᓄᓇᕗᒻᒧᑦ ᐃᓚᐃᓇᖏᑦ ᑎᑭᒍᓐᓇᖅᑎᑕᐅᓗᑎᒃ
ᐃᖃᓗᐃᑦ, ᓄᓇᕗᑦ (ᒫᑦᓯ 23, 2020) – ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᑎᓕᓯᒍᑎᒥᒃ ᓄᖅᑲᖅᑎᑕᐅᖁᔨᓪᓗᓂ ᐃᓘᓐᓇᑲᓴᖏᓐᓂᒃ ᑎᑭᑉᐸᑦᑐᓂᒃ ᓄᓇᕗᒻᒧᑦ.
“ᑐᑭᓯᓇᖅᓯᕙᓪᓕᐊᑐᐃᓐᓇᕐᖓᑦ ᐃᓱᓕᑦᑕᕐᕕᓕᐅᖅᑕᐅᒋᐊᖃᕐᓂᖓᓂᒃ ᑎᑭᖃᑦᑕᕐᓂᐅᔪᑦ ᓄᓇᕗᒻᒧᑦ ᓴᐳᒻᒥᔭᐅᖁᓪᓗᒋᑦ ᓄᓇᕗᒻᒥᐅᑦ ᓄᕙᔾᔪᐊᕐᓇᒥᒃ COVID-19,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ. “ᓱᓕ ᓇᓗᓇᐃᖅᑕᐅᓯᒪᖃᙱᒃᑲᓗᐊᖅᑎᓪᓗᒍ ᓄᕙᔾᔪᐊᕐᓇᖅᑖᖅᓯᒪᔪᓂᒃ ᓄᓇᕗᒻᒥ, ᖄᒃᑲᓐᓂᖓᒍᑦ ᖃᓄᐃᓕᒋᐊᕈᑎᖃᖅᓯᒪᔪᒍᑦ ᐃᓱᓕᑦᑕᕐᕕᐅᓕᐅᕆᓪᓗᑕ ᑎᑭᒍᓐᓇᖅᑐᓂᒃ, ᓱᒃᑲᐃᓪᓕᒋᐊᖅᑕᐅᖁᓪᓗᒍ ᓯᐊᕐᒪᒍᓐᓇᕐᓂᖓ.”
ᐱᒋᐊᕐᓗᓂ ᓇᒡᒐᔾᔭᐅᓕᖅᑭᒥ, ᒫᑦᓯ 24 11:59 ᐅᓐᓄᓴᒃᑯᑦ:
ᓄᓇᕗᒻᒥᐅᑐᐊᑦ ᐱᒻᒪᕆᐅᔪᓂᓪᓗ ᐃᖅᑲᓇᐃᔮᓖᑦ ᑎᑭᒍᓐᓇᕐᓂᐊᖅᑐᑦ ᓄᓇᕗᒻᒧᑦ.
ᓄᓇᕗᒻᒥᐅᑦ ᓇᓗᓇᐃᖅᓯᒍᓐᓇᕆᐊᓖᑦ ᓄᓇᕗᒻᒥᐅᑕᐅᓂᕐᒥᓂᒃ ᖃᖓᑕᒍᓐᓇᖅᑎᑕᐅᓂᐊᕈᑎᒃ ᓄᓇᕗᒻᒧᑦ. ᖃᖓᑕᔫᒧᑦ ᐃᑭᓚᐅᙱᓐᓂᖏᓐᓂ ᓄᓇᕗᒻᒨᖅᐸᓪᓕᐊᔪᑦ, ᐊᓯᐊᒎᕐᕕᖃᙱᑦᑐᒃᑯᑦ ᐅᓪᓗᓂᒃ 14-ᓂᒃ ᓇᒻᒥᓂᖅ ᐊᓂᑦᑕᐃᓕᑎᖃᑦᑕᕆᐊᖃᕐᓂᐊᖅᑐᑦ ᐋᑐᕙᒥ, ᐅᐃᓂᐱᒡᒥ, ᐃᐊᑦᒪᓐᑕᓐᒥ ᔭᓗᓇᐃᒥᓘᓐᓃᑦ. ᐃᓱᓕᑉᐸᑕ ᐅᓪᓗᐃᑦ 14, ᖃᓄᐃᒍᑎᖃᙱᑦᑐᑦ ᓄᓇᕗᒻᒥᐅᑦ ᐊᐅᓪᓚᕈᓐᓇᖅᑎᑕᐅᓕᕋᔭᖅᑐᑦ ᐅᑎᕈᓐᓇᕐᓗᑎᒃ ᓄᓇᒥᓐᓄᑦ. ᑕᒪᓐᓇ ᐃᓚᒋᓕᐅᔾᔨᓯᒪᔪᖅ ᐋᓐᓂᐊᕐᕕᓕᐊᖅᑐᑎᒃ ᐊᐅᓚᖅᓯᒪᔪᓄᑦ.
ᐱᒻᒪᕆᐅᔪᓂᒃ ᐃᖅᑲᓇᐃᔮᓖᑦ ᑎᑎᕋᖅᓯᒪᔪᑎᒍᑦ ᐊᖏᖅᑕᐅᓯᒪᒋᐊᓖᑦ ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ ᑎᑭᒍᓐᓇᕐᓂᕋᖅᑕᐅᒍᑎᓂᒃ ᓄᓇᕗᒻᒧᑦ. ᐱᒻᒪᕆᐅᔪᓂᒃ ᐃᖅᑲᓇᐃᔮᓖᑦ ᐅᑎᖅᐸᓪᓕᐊᔪᑦ ᐊᓯᖏᓐᓂᒃ ᑲᓇᑕᒥ ᐊᕕᑦᑐᖅᓯᒪᓂᖏᓐᓂᒃ ᖃᓄᐃᒍᑎᖃᙱᒃᑯᑎᒃ ᐊᖏᖅᑕᐅᓯᒪᓕᕈᑎᓪᓗ ᑎᑭᒍᓐᓇᕐᓂᖏᓐᓂᒃ ᐃᖅᑲᓇᐃᔭᕆᐊᕈᓐᓇᖅᑎᑕᐅᓂᐊᖅᑐᑦ ᐊᐅᓪᓚᕈᓐᓇᕐᓗᑎᓪᓗ ᓄᓇᓕᓐᓄᑦ ᐊᖏᖅᑕᐅᓯᒪᓗᑎᒃ ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᖃᑎᒌᓄᑦ. ᐱᒻᒪᕆᐅᔪᓂᒃ ᐃᖅᑲᓇᐃᔮᓖᑦ ᑲᓇᑕᐅᑉ ᓯᓚᑖᓃᖔᖅᑐᑦ ᓇᒻᒥᓂᖅ ᐊᓂᑦᑕᐃᓕᑎᒋᐊᖃᕐᓂᐊᖅᑐᑦ ᐅᓪᓗᓂ 14-ᓂᒃ ᓄᓇᕗᒻᒧᑦ ᐅᑎᓚᐅᙱᓐᓂᖏᓐᓂ.
ᓄᓇᕗᒻᒥᐅᑦ ᓯᓚᑦᑐᓴᕐᕕᓐᓂ ᐃᓕᓐᓂᐊᖅᑏᑦ ᐃᓚᖏᓪᓗ ᒫᓐᓇᐅᔪᖅ ᐃᓕᓐᓂᐊᖅᑐᑦ ᓄᓇᕗᑦ ᓯᓚᑖᓂ ᐅᓪᓗᓂᒃ 14-ᓂᒃ ᐊᓯᐊᒎᕐᕕᖃᙱᓪᓗᑎᒃ ᓇᒻᒥᓂᖅ ᐊᓂᑦᑕᐃᓕᑎᓯᒪᒋᐊᖃᕐᓂᐊᖅᑐᑦ ᐋᑐᕙᒥ ᐅᐃᓂᐱᒡᒥᓘᓐᓃᑦ, ᐊᑭᓕᖅᑕᐅᓯᒪᔪᒃᑯᑦ ᖃᖓᑕᔫᒃᑰᖅᑕᐅᓛᕐᓗᑎᒃ ᓄᓇᖏᓐᓄᑦ ᐊᖏᕐᕋᖏᓐᓄᑦ. ᑖᒃᑯᐊ ᐃᓕᓐᓂᐊᖅᑏᑦ ᖃᐅᔨᒃᑲᖅᑕᐅᓯᒪᔪᑦ ᐅᐸᓗᖓᐃᔭᖅᑕᐅᓪᓗᑎᓪᓗ ᖃᓄᑎᒋ ᓇᒻᒥᓂᖅ ᐊᓂᑦᑕᐃᓕᑎᒋᐊᖃᕐᓂᕐᒧᑦ.
ᑐᔪᕐᒥᕕᖃᖅᑎᑕᐅᓂᖏᑦ, ᓂᕆᔭᑦᓴᖃᖅᑎᑕᐅᓂᖏᑦ ᐃᓅᔾᔪᑎᑦᓴᖃᖅᑎᑕᐅᓂᖏᓪᓗ ᐊᐅᓪᓚᕆᐊᓕᓕᒫᓄᑦ ᐊᑐᐃᓐᓇᐅᑎᑕᐅᓂᐊᖅᑐᑦ ᓇᒻᒥᓂᖅ ᐊᓂᑦᑕᐃᓕᑎᑕᐅᓂᖏᓐᓂ.
ᖃᒃᑲᓐᓂᖓᒍᑦ, ᑭᒃᑯᓕᒫᑦ ᑲᑎᖃᑦᑕᕐᓂᖏᑦ ᒫᓐᓇ ᑕᐃᒪᐃᒋᐊᖃᕈᓐᓃᖅᑎᑕᐅᔪᑦ.
“ᒫᓐᓇᐅᔪᖅ ᐊᔾᔨᐅᙱᑦᑐᒃᑰᕈᑎᖃᕋᑦᑕ ᖃᓄᓕᒫᖅ ᖃᓄᐃᓕᐅᕈᑎᖃᕆᐊᖃᖅᑐᒍᑦ ᓴᐳᒻᒥᖃᑎᒌᖁᓪᓗᑕ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ. “ᐱᒻᒪᕆᐅᕗᖅ ᑭᒃᑯᓕᒫᑦ ᐊᑑᑎᖃᖁᓪᓗᒋᑦ ᐃᓅᖃᑎᒌᑦ ᐅᖓᓯᒌᖃᑦᑕᖁᓪᓗᒋᑦ ᐆᑦᑑᑏᒃ 2 ᒦᑕᓂᒃ, ᐊᑦᑐᖃᑦᑕᐅᑎᑦᑕᐃᓕᓗᓯ ᐊᑦᑐᖅᑕᐅᓕᖃᑦᑕᕐᓗᒍᓗ ᑮᓇᐃᑦ, ᖁᐃᖅᓱᖃᑦᑕᕐᓗᑎᓪᓗ ᑕᒋᐅᖃᑦᑕᕐᓗᑎᓪᓗ ᐊᐃᓐᓄᑦ. ᐊᑕᖏᖅᑐᑕ ᐃᑲᔪᕈᓐᓇᖅᑐᐃᓐᓇᐅᔪᒍᑦ, ᐃᑲᔪᖃᑕᐅᔪᐃᓐᓇᐅᑕ.”
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᐅᒍᓐᓇᖅᑑᒃ:
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5762
@email
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
867-222-5763
@email