ᓄᓇᑦᓯᐊᒥ ᓄᓇᕗᒻᒥᓗ ᓯᕗᓕᖅᑏᑦ ᐱᓕᕆᖃᑎᒌᒃᐳᑦ ᓇᐹᖅᑐᖃᙱᑦᑐᒥ ᑐᒃᑐᓂᒃ ᐊᐅᓚᑦᑎᔪᑦ

ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪ ᓄᓇᒥᐅᑕᓂᑦ ᐊᑐᖅᑐᒃᓴᓂᑦ ᓄᓇᑦᓯᐊᒧᑦ, ᓴᐃᓐ ᑖᒻᓴᓐ, ᐱᓕᕆᖃᑎᖃᖅᖢᓂ ᒥᓂᔅᑕ ᐊᕙᑎᓕᕆᓂᕐᒧᑦ ᔫ ᓴᕕᑲᑖᕐᒥᑦ, ᑲᑎᒪᑎᑦᑎᓚᐅᖅᐴᒃ ᓇᐹᖅᑐᖃᙱᑦᑐᒥᑦ ᑐᒃᑐᐃᑦ ᐊᐅᓚᑕᐅᓂᖏᑕ ᒥᒃᓵᓄᑦ ᐱᓇᓱᐊᕈᓯᐅᑉ ᓄᙳᐊᓂ. ᑲᑎᒪᔪᑦ ᐅᖃᐅᓯᖃᒃᑲᓐᓂᓚᐅᖅᐳᑦ ᐊᐃᕐᕆᓕ 2019-ᒥ ᐱᓕᕆᐊᖑᓚᐅᖅᑐᒥᑦ ᖁᕐᓗᖅᑑᖅ, ᓄᓇᕗᒻᒥ.

ᑲᑎᒪᖃᑕᐅᓚᐅᕐᒥᔪᑦ ᓄᓇᑦᓯᐊᒥᙶᖅᑐᑦ ᑭᒡᒐᖅᑐᐃᔩᑦ Tłı̨chǫ ᒐᕙᒪᖓᓂᙶᖅᑐᑦ, ᔭᓗᓇᐃᒥ ᐊᓪᓚᐃᑦ ᓄᓇᖃᖅᑳᖅᓯᒪᔪᓂᑦ, Łutsel K'e ᐊᓪᓚᐃᑦ ᓄᓇᖃᖅᑳᖅᓯᒪᔪᓂᑦ ᐊᒻᒪ North Slave ᐊᓪᓚᐃᑦ ᑲᑐᔾᔨᖃᑎᒌᓂᑦ. ᐃᓚᐅᓚᐅᕐᒥᔪᑦ ᓄᓇᕗᒻᒥ ᐊᐅᓚᑦᑎᖃᑎᒌᑦ ᐱᓕᕆᖃᑎᒌᑦ ᓄᓇᕗᑦ ᑐᙵᕕᒃᑯᓐᓂᙶᖅᑐᑦ, ᕿᑎᕐᒥᐅᑦ ᐊᕕᒃᑐᖅᓯᒪᔪᓂ ᐆᒪᔪᓕᕆᔨᑦ ᑲᑐᔾᔨᖃᑎᒌᑦ ᐊᒻᒪ ᖁᕐᓗᖅᑐᕐᒥ ᐊᖑᓇᓱᒃᑐᓕᕆᔨᒃᑯᓐᓂ. 

ᓯᕗᓕᖅᑏᑦ ᐅᖃᐅᓯᖃᓚᐅᕆᕗᑦ ᖃᓄᖅ ᑐᓴᐅᒪᖃᑎᒌᑦᑎᐊᓕᒃᑲᓐᓂᕈᓐᓇᕐᒪᖔᑦ ᐊᐅᓚᑦᑎᓗᑎᒡᓗ ᐆᒪᔪᓂᒃ ᐊᐅᓚᑦᑎᖃᑎᒌᑦ ᐱᓕᕆᖃᑎᒌᓂᑦ ᓱᓕ ᐱᓕᕆᖃᑎᒌᖕᓂᐊᖅᑎᓪᓗᒋᑦ ᐃᑲᔪᖅᑐᐃᖃᑕᐅᓗᑎᒃ ᓄᖑᕋᐃᓗᐊᖅᑕᐃᓕᒪᓂᕐᒧᑦ ᐅᑎᖅᑎᑦᑎᕙᓪᓕᐊᓂᕐᒧᓪᓗ ᐊᑕᐅᓯᐅᙱᑦᑐᒧᑦ ᑭᒡᓕᒋᑎᑕᐅᔪᒧᑦ ᑐᒃᑐᖏᓐᓂᒃ, ᐱᓗᐊᖅᑐᒥ ᕿᙵᐅᑦ ᑐᒃᑑᔮᖅᑑᓪᓗ ᑐᒃᑐᖏᑦ.  

ᐅᑯᐊ ᐅᖃᐅᓯᐅᓚᐅᖅᑐᑦ:

• ᕿᒥᕐᕈᔭᐅᔪᑦ ᒫᓐᓇ ᓄᓇᕗᒻᒥ ᓄᓇᑦᓯᐊᒥᓗ ᐊᐅᓚᑦᑎᖃᑎᒌᑦ ᑲᑎᒪᔨᖏᓐᓄᑦ ᑐᒃᓯᕋᐅᑎᑦ ᐊᑐᓕᖁᔭᐅᔪᓪᓗ ᑐᒃᑐᓂᑦ ᐊᐅᓚᑦᑎᓂᕐᒧᑦ
• ᖃᓄᐃᑉᐸᓪᓕᐊᓕᕐᓂᖏᑦ ᕿᙵᐅᒻᒥ ᑐᒃᑐᖏᓐᓂᒃ ᐊᐅᓚᑦᑎᖃᑎᒌᓄᑦ ᖃᓄᐃᓕᐅᕈᑕᐅᔪᓂᑦ, ᐅᑯᓂᖓᓗ ᕿᙵᐅᑦ ᑐᒃᑐᖏᓐᓂ ᐅᖃᐅᔾᔪᐃᔨᑦ ᑲᑎᒪᔨᕋᓛᖏᑦ ᐊᒻᒪ ᕿᙵᐅᑦ ᑐᒃᑐᐃᑦ ᓇᒦᓐᓂᖏᓐᓂᒃ ᐸᕐᓇᐅᑦ
• ᑐᒃᑐᑕᐅᔪᓐᓇᖅᑐᑦ ᐊᐅᓚᑕᐅᓂᖏᑦ ᓄᓇᑦᓯᐊᒥ ᓄᓇᕗᒻᒥᓗ
• ᐊᒪᕈᕐᓂᒃ ᐊᐅᓚᑦᑎᓂᕐᒧᑦ ᐱᒋᐊᕈᑎᒃᓴᓄᑦ ᐱᓕᕆᐊᖑᔪᑦ ᐊᒻᒪ ᑲᑐᔾᔨᓪᓗᑎᒃ ᑐᒃᓯᕋᐅᑎᓕᐅᖅᑕᐅᓵᓚᐅᖅᑐᖅ ᐊᒪᕈᕐᓂᒃ ᐊᐅᓚᑦᑎᓂᕐᒧᑦ ᐅᑭᐅᒃᑯᑦ ᓇᒦᓐᓂᖏᓐᓂᒃ ᕿᙵᐅᒻᒥ ᑐᒃᑑᔮᖅᑑᓪᓗ ᑲᓇᖕᓇᖓᓂ ᑐᒃᑐᖏᑦ
• ᐊᐅᓚᑕᐅᓂᖓᓂᑦ ᑐᑭᓯᐅᒪᓂᖕᒧᑦ ᑎᑎᖅᑲᒥᑦ ᓇᐹᖅᑐᖃᙱᑦᑐᒥᑦ ᑐᒃᑐᐃᑦ ᑖᒃᑯᖕᓇᖓ ᓄᓇᑦᑎᐊᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓂᒡᓗ.

ᑕᒪᕐᒥᒃ ᐊᕙᑎᓕᔨᒃᑯᑦ ᒥᓂᔅᑕᖏᑦ ᐃᓕᓴᖅᓯᓚᐅᖅᐳᑦ ᓇᐹᖅᑐᖃᙱᑦᑐᒥᑦ ᑐᒃᑐᐃᑦ ᓴᐳᔾᔭᐅᓯᒪᔪᑦ ᑲᑐᔾᔨᓗᑎᒃ ᑲᒪᒋᔭᐅᔭᕆᐊᖃᕐᒪᑕ ᐊᖏᖅᓯᒪᔭᕆᐊᖃᖅᖢᑎᒃ ᐊᒻᒪ ᖃᓄᐃᓕᐅᖅᑎᑦᑎᓗᑎᒃ ᐱᓕᕆᖃᑎᒌᒃᑐᑦ, ᐊᔾᔨᒌᙱᑦᑐᓂᑦ ᑭᒡᒐᖅᑐᐃᕕᐅᔪᓂᑦ. ᑐᓴᐅᒪᖃᑦᑕᐅᑎᖃᑦᑕᕆᐊᖃᖅᐳᑦ ᑲᑎᒪᕙᒡᓗᑎᒡᓗ ᑖᔅᓱᑐᓇᖅ ᐃᑲᔪᖅᑐᐃᖁᓪᓗᒋᑦ ᐅᑎᖅᑎᑕᐅᕙᓪᓕᐊᓇᓱᒃᑐᑦ ᓄᖑᕋᐃᙱᔅᓲᔭᕋᓱᒃᖢᑎᒃ ᑐᒃᑐᖁᑎᑦᑎᓐᓂ.

ᐅᖃᐅᓯᐅᔪᑦ

"ᓇᐹᖅᑐᖃᙱᑦᑐᒥ ᑐᒃᑐᒋᔭᕗᑦ ᐱᑕᖃᕈᓐᓃᖅᐸᓪᓕᐊᕗᑦ, ᑕᒪᑦᑕᓗ ᐱᓕᕆᖃᑕᐅᔭᕆᐊᖃᖅᐳᒍᑦ ᓴᐳᑎᓇᓱᒡᓗᒋᑦ. ᑲᑎᓪᓗᑕ ᐆᒪᔪᓂᑦ ᐊᐅᓚᑦᑎᖃᑎᒌᒡᓗᑕ, ᐱᕙᓪᓕᐊᑎᑦᑎᓂᐊᖅᐳᒍᑦ ᑲᑐᔾᔨᓗᑕ ᐊᔪᙱᓐᓂᑦᑎᓐᓂ ᓴᙱᒃᑎᒋᐊᖅᑎᑦᑎᓗᑕ ᐱᓕᕆᐊᕆᕙᒃᑕᑦᑎᓐᓂ ᐊᑕᐅᑦᑎᒃᑯᑦ ᓇᓗᓇᐃᖅᓯᓇᓱᒡᓗᑕ ᑐᒃᑐᐃᑦ ᓱᓕ ᓂᕿᒋᓪᓚᕆᖕᓂᑦᑎᓐᓂ, ᐃᓕᖅᑯᓯᕆᓪᓗᑎᒍᑦ ᐊᒻᒪ ᐃᓅᓯᕆᔭᐅᓛᕆᓪᓗᑎᒃ ᓯᕗᕚᒃᓴᑦᑎᓐᓄᑦ."

ᓴᐃᓐ ᑖᒻᓴᓐ, ᓄᓇᑦᓯᐊᒥ ᒥᓂᔅᑕᕆᔭᐅᔪᖅ ᐊᕙᑎᓕᕆᓂᕐᒧᑦ ᐊᒻᒪ ᓄᓇᒥᐅᑕᓂᑦ ᐊᑐᖅᑐᒃᓴᓂᑦ

"ᑐᒃᑐᐃᑦ ᐃᓕᖅᑯᓯᑦᑎᓐᓄᑦ ᐱᒻᒪᕆᐅᓂᖃᓪᓚᕆᒃᐳᑦ ᐊᖑᓇᓱᒃᑕᐅᓪᓚᕆᒃᐸᒃᖢᑎᒡᓗ ᓄᓇᕗᒻᒥ ᓄᓇᑦᓯᐊᒥᓗ − ᐃᓄᐃᑦ ᐅᓄᖅᑐᑦ, ᑐᒃᑐᓄᑦ ᐊᓇᐅᒪᔾᔪᑎᖃᖅᓯᒪᕗᑦ. ᑕᒪᐃᓐᓂᒃ ᐊᕕᒃᑐᖅᓯᒪᔪᓂ ᓴᙱᔪᒥᒃ, ᐱᓕᕆᖃᑎᒌᒃᑐᓂᒃ ᐆᒪᔪᓂᒃ ᐊᐅᓚᑦᑎᔾᔪᑎᖃᖅᐳᑦ ᐃᓄᐃᑦ ᐊᒻᒪ ᐊᐅᓚᑦᑎᔨᐅᖃᑎᕗᑦ ᑐᙵᕕᒋᓪᓗᒋᑦ. ᓱᓕ ᐱᓕᕆᖃᑎᒌᖕᓂᐊᖅᐳᒍᑦ ᓄᖑᕋᐃᓗᐊᖅᑕᐃᓕᒪᓗᑕ ᑲᒪᒋᓗᒋᓪᓗ ᑲᑐᔾᔨᓪᓗᑕ ᑐᒃᑐᖁᑎᑦᑎᓐᓂᑦ ᐊᕙᑎᑦᑎᓐᓂᒃ ᑲᒪᑦᓯᐊᓂᖅ ᐱᔾᔪᑎᒋᓪᓗᒍ."

ᔫ ᓴᕕᑲᑖᖅ, ᓄᓇᕗᒻᒥ ᓯᕗᓕᖅᑎ ᐊᒻᒪ ᒥᓂᔅᑕ ᐊᕙᑎᓕᕆᓂᕐᒧᑦ

ᓱᓕᔪᑦ

• ᕿᙵᐅᑦ ᑐᒃᑐᖏᑦ 2018-ᒥᑦ ᓇᓚᐅᑦᑖᖅᑕᐅᓚᐅᖅᓯᒪᕗᑦ 8,200-ᖑᓇᓱᒋᔭᐅᓪᓗᑎᒃ, 98-ᐳᓴᒥᑦ ᐅᓄᕈᓐᓃᖅᐹᓪᓕᖅᓯᒪᓪᓗᑎᒃ 1986-ᒥᓂᑦ. ᑐᒃᑑᔮᖅᑑᑉ ᒋᖓᖕᓇᖓᓂ ᑐᒃᑐᖏᑦ ᐅᓄᕈᓐᓃᖅᐹᓪᓕᖅᓯᒪᕕᒡᔪᐊᕆᕗᑦ, 50-ᐳᓴᒥᑦ ᐊᕐᕌᒍᓂᑦ ᐱᖓᓱᑐᐃᓐᓇᕐᓂᑦ.
• ᐅᓄᖅᑐᓂᑦ ᐱᔾᔪᑎᖃᕈᓐᓇᖅᑐᑦ ᑐᒃᑑᖃᑎᒌᑦ ᐅᓄᕈᓐᓃᖅᐸᓪᓕᐊᔪᑦ, ᐅᑯᓄᖓᓗ ᓯᓚᒧᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᓪᓗ, ᓂᕿᖏᓐᓄᑦ, ᖃᓂᒪᓐᓇᒧᑦ, ᓂᕿᒃᓴᖅᓯᐅᑕᐅᔪᓄᑦ, ᓂᕿᑐᖅᑎᓄᑦ ᐊᒻᒪ ᐱᓕᕆᕙᓪᓕᐊᔪᓄᑦ.  ᑖᒃᑯᐊ ᐅᓄᖅᑐᑦ ᐱᔾᔪᑕᐅᕙᒃᑐᑦ ᐊᓯᔾᔨᕈᓐᓇᙱᑕᕗᑦ ᒐᕙᒪᐅᓪᓗᑕ ᐅᕝᕙᓘᓐᓃᑦ ᐃᓅᓪᓗᑕ.  ᐅᓄᖅᑐᑦ ᖃᓄᐃᓕᐅᕈᑕᐅᔪᑦ ᐱᔾᔪᑎᖃᓪᓗᐊᑕᖅᐳᑦ ᐊᐅᓚᑦᑐᓇᙱᑕᑦᑎᓐᓂᒃ, ᐅᑯᓄᖓᓗ ᐃᓄᖕᓄᑦ ᐊᒃᑐᐃᔾᔪᑕᐅᓲᑦ (ᓂᕿᒃᓴᖅᓯᐅᕐᓂᖅ, ᐱᓕᕆᐊᖑᕙᓪᓕᐊᔪᑦ ᐊᒻᒪ ᐃᑭᑦᑐᑦ ᐊᐅᓚᑕᐅᕙᒃᑐᑦ ᓂᕿᑐᖅᑎᓪᓗ.
• ᓄᓇᑦᓯᐊᒥ−ᓄᓇᕗᒻᒥ ᒐᕙᒪᒃᑯᓐᓂ ᑐᑭᓯᐅᒪᖃᑦᑕᐅᑎᓂᕐᒧᑦ ᑎᑎᕋᖅᓯᒪᔪᑦ ᓇᐹᖅᑐᖃᙱᑦᑐᑦ ᑐᒃᑐᖏᓐᓂ ᐃᑲᔪᖅᑐᐃᕗᖅ ᑲᑐᔾᔨᖃᑎᒌᒃᑐᓂᑦ ᐱᓕᕆᖃᑎᒌᒃᑐᓂᓪᓗ ᐊᑐᖅᑕᐅᔪᓐᓇᖅᑐᓂᑦ ᖃᐅᔨᓴᖅᐸᓪᓕᐊᓂᕐᒧᑦ, ᐊᐅᓚᑦᑎᓂᕐᒧᑦ ᐊᒻᒪ ᐅᑎᖅᑎᑦᑎᕙᓪᓕᐊᓂᕐᒧᑦ ᑲᑐᔾᔨᓪᓗᑕ ᑐᒃᑐᖁᑎᑦᑎᓐᓂ. 
• ᖃᔅᓯᑲᓪᓚᖕᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ ᖃᓄᐃᓕᐅᕈᑕᐅᔪᒪᔪᓂᓪᓗ ᐋᖅᑭᒃᓯᓚᐅᖅᐳᑦ ᐊᐅᓚᑦᑎᔨᐅᖃᑎᒌᓂᑦ ᐱᓕᕆᖃᑎᖃᖅᖢᑎᒃ ᐃᑲᔪᖅᑐᐃᔪᓂᒃ ᐅᑎᖅᑎᕙᓪᓕᐊᓂᕐᒥᒃ ᓇᐹᖅᑐᖃᙱᑦᑐᒥᑦ ᑐᒃᑐᖏᓐᓂᒃ, ᐅᑯᓂᖓᓗ:
  • ᕿᙵᐅᑦ ᑐᒃᑐᖏᑕ ᓇᒦᓐᓂᖏᓐᓂᒃ ᐸᕐᓇᐅᑦ
  • ᑲᒪᒋᓗᒋᑦ ᑐᒃᑐᐃᑦ ᐊᐅᓚᑕᐅᓂᖏᑕ ᐸᕐᓇᐅᑎᖓ ᐅᑯᓄᖓ ᐊᕐᕙᕐᒥᑦ, ᑐᒃᑑᔮᖅᑑᑉ ᐱᖓᖕᓇᖓᓂ ᐊᒻᒪ ᑐᒃᑑᔮᖅᑑᑉ ᑲᓇᖕᓇᖓᓂ ᓇᐹᖅᑐᖃᙱᑦᑐᒥᑦ ᑐᒃᑐᖏᑦ
  • ᑐᒃᑐᓐᓇᓱᒡᕕᐅᔭᕆᐊᖃᙱᑦᑑᑉ ᑭᒡᓕᖓ ᕿᙵᐅᒻᒥ ᑐᒃᑐᖏᑦ ᓂᕿᒃᓴᖅᓯᐅᖅᑕᐅᑦᑕᐃᓕᖁᓪᓗᒋᑦ
  • ᐱᔪᒥᓇᖅᓯᑎᒃᑲᓐᓂᕐᓗᒍ ᐊᒪᕈᕋᓱᖕᓂᖅ
  • ᖃᓄᐃᓕᐅᒃᑲᓐᓂᕐᓂᕐᒧᑦ ᑐᒃᓯᕋᐅᑎ ᐊᒪᖅᑯᓂᒃ ᖃᐅᔨᓴᖅᐸᓪᓕᐊᔪᓂᒃ ᐃᑲᔪᖅᑐᐃᔪᒥᒃ ᐊᐅᓚᑦᑎᓂᕐᒥᓪᓗ

ᑭᖑᓪᓕᕐᒥ ᕿᙵᐅᑦ ᐊᒻᒪ ᑐᒃᑑᔮᖅᑑᑉ ᑐᒃᑐᖏᓐᓂ ᖃᐅᔨᓴᕈᒪᓪᓗᑎᒃ ᐸᕐᓇᒃᓯᒪᔪᑦ ᔫᓂ 2020-ᒧᑦ.

###

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᖅ:

ᔮᔅ ᓛᖕ
ᑐᓴᐅᒪᔪᓕᕆᔨᒃᑯᓐᓄᑦ ᐊᐅᓚᑦᑎᔨ, ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑐᓴᐅᒪᑎᑦᑎᔨᓄᓪᓗ
ᐊᕙᑎᓕᕆᔨᒃᑯᑦ
ᓄᓇᕗᑦ ᒐᕙᒪᒃᑯᖏᑦ
@email

ᔮᔅᓕᓐ ᐆᓴᓐᐴᒡ
ᐊᐅᓚᑦᑎᔨ, ᑐᓴᐅᒪᖃᑦᑕᐅᑎᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ
ᐊᕙᑎᓕᕆᓂᕐᒧᑦ ᓄᓇᒥᐅᑕᓂᓪᓗ ᐊᑐᖅᑐᒃᓴᓂᑦ
ᓄᓇᑦᓯᐊ ᒐᕙᒪᒃᑯᑦ
@email