ᑎᖑᒡᓗᖕᓇᕐᓂᕐᒧᑦ A-ᒧᑦ ᖃᐅᔨᓴᕈᑎᑦ − ᓄᑖᙳᕆᐊᖅᓯᓂᕐᒧᑦ ᑭᒃᑯᑐᐃᓇᕐᓄᓪᓗ ᐋᓐᓂᐊᓕᕇᒃᑯᑎᓄᑦ ᑲᐱᔭᐅᕝᕕᒃ
ᐃᓄᐃᑦ ᐋᓐᓂᐊᓕᖁᔭᐅᙱᖦᖢᑎᒃ ᑐᓴᖅᑕᐅᔪᒃᓴᖅ
ᑎᖑᒡᓗᖕᓇᕐᓂᕐᒧᑦ A-ᒧᑦ ᖃᐅᔨᓴᕈᑎᑦ − ᓄᑖᙳᕆᐊᖅᓯᓂᕐᒧᑦ ᑭᒃᑯᑐᐃᓇᕐᓄᓪᓗ ᐋᓐᓂᐊᓕᕇᒃᑯᑎᓄᑦ ᑲᐱᔭᐅᕝᕕᒃ
ᑎᖑᒡᓗᖕᓇᕐᓂᖅ A ᑲᔪᓯᔪᖅ ᐃᒡᓗᓕᒑᕐᔪᖕᒥᑦ. ᐃᒡᓗᓕᒑᕐᔪᖕᒥ ᐋᓐᓂᐊᕕᒃ ᒪᓂᒪᑎᑦᑎᓂᐊᖅᑐᑦ ᑎᖑᒡᓗᖕᓇᕐᓂᕐᒧᑦ A-ᒧᑦ ᐋᓐᓂᐊᓕᕇᒃᑯᑎᓂ ᑲᐱᔭᐅᓂᕐᓂᒃ ᐊᑭᖃᙱᑦᑐᒥ ᓄᓇᓕᖕᒥᐅᓕᒫᓄᑦ ᑲᐱᔭᐅᔪᒪᔪᓄᑦ. ᐃᓄᓕᒫᓄᑦ ᑲᐱᔭᐅᖃᑦᑕᕐᓂᖅ ᐱᓇᓱᐊᕈᓯᕐᒥ ᐃᖏᕐᕋᓂᖃᕐᓂᐊᖅᑐᖅ 1-ᒥ 5-ᒧᑦ ᐅᓐᓄᒃᓴᑯᑦ, ᓇᒡᒐᔭᐅᒥ ᐅᓪᓗᑐᐃᓐᓇᕐᒧᑦ ᑎᑭᓪᓗᒍ, ᐊᓯᔾᔨᖅᑕᐅᓚᐅᙱᓐᓂᖓᓂ.
ᐃᓛᒃᑰᖅᑐᑦ ᐊᕐᕕᓂᓕᖕᓂ ᑕᖅᑭᖃᖅᑐᑦ ᐅᖓᑖᓄᓪᓘᓐᓃᑦ ᐃᒡᓗᓕᒑᕐᔪᖕᒥᐅᑦ ᓱᓕ ᑲᐱᔭᐅᓚᐅᙱᑦᑐᑦ ᐅᕝᕙᓘᓐᓃᑦ ᑎᖑᒡᓗᖕᓇᕐᓂᖃᓚᐅᙱᑦᑐᑦ A−ᒥᒃ ᑲᐱᔭᐅᖏᓐᓇᓪᓗᐊᖅᑐᑦ ᐋᓐᓂᐊᓕᕇᒃᑯᑎᒥᒃ.
ᐅᑯᐊ ᑲᐱᔭᐅᓯᒪᙱᑦᑐᑦ ᑲᐱᔭᐅᔭᕆᐊᖃᖅᑐᑦ ᖃᓂᓛᒃᑯᑦ:
- ᐃᒡᓗᖃᖅᑎᐅᔪᑦ ᖃᓂᒋᔭᖏᓐᓂᒡᓗ ᐊᒃᑐᐊᓂᓖᑦ (ᐃᓚᒋᓪᓗᒋᑦ ᐸᐃᕆᔩᖅ ᐸᖅᑭᔩᓪᓗ);
- ᓄᑕᖅᑲᑦ ᐃᓕᓐᓂᐊᖅᑏᓪᓘᓐᓃᑦ ᐃᖅᑲᓇᐃᔭᖅᑏᓪᓗ ᐃᓕᓐᓂᐊᕐᕕᖕᒥ ᐸᐃᕆᕕᖕᓂᓪᓗ;
- ᓄᑕᖅᑲᑦ ᐊᕐᕕᓂᓕᖕᓂᑦ ᑕᖅᑭᓕᖕᓂᑦ 18-ᓄᑦ ᐅᑭᐅᓕᖕᓄᑦ;
- ᐃᓛᒃᑰᖅᑐᑦ 60 ᐅᖓᑖᓂ ᐅᑭᐅᓖᑦ; ᐊᒻᒪ
- ᑕᐃᒃᑯᐊ ᐊᐅᓪᓚᑲᑕᒃᑐᑦ ᐃᒡᓗᓕᒑᕐᔫᑉ ᐃᓗᐊᓄᑦ ᓯᓚᑖᓄᓪᓘᓐᓃᑦ (ᐱᙳᐊᕆᐊᖅᑐᖅᑎᓪᓗᒋᑦ, ᑭᐱᙳᐃᔭᖅᑎᓪᓗᒋᑦ, ᐋᓐᓂᐊᕕᓕᐊᕐᓗᑎᒃ ᐊᐅᓪᓚᖅᐸᒃᑐᑦ).
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᔪᓯᓂᖃᖅᑐᑦ ᓯᕗᓪᓕᖅᐹᖅᓯᐅᑎᓂᒃ ᐊᐃᑦᑐᕐᓗᐃᑦᑕᐃᓕᒪᓕᕐᒧᑦ ᖃᐅᔨᓴᕈᓐᓃᖅᐸᓪᓕᐊᓂᕐᒧᓪᓗ. ᑖᒃᑯᐊ ᐱᓕᕆᐊᖑᓂᐊᖅᑐᑦ ᐃᓚᖃᖅᑐᑦ ᓇᓗᓇᐃᖅᓯᓂᕐᒥᒃ ᐃᓛᒃᑰᖅᑐᓂ ᐊᑦᑕᕐᓇᖅᑐᒦᑦᑐᓂ, ᐊᑐᐃᓐᓇᐅᑎᑦᑎᓂᕐᒥᒃ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓂᕐᓂᒃ ᑕᐃᒃᑯᓄᖓ ᐊᐃᑦᑐᖅᑕᐅᓯᒪᔪᓄᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᕙᑎᑦᑎᓐᓂᒃ ᖃᓄᐃᖏᑦᑎᐊᕋᓱᐊᖅᑐᓕᕆᔨ ᖃᐅᔨᓴᕐᓂᖃᓚᐅᖅᑐᖅ ᓱᕈᖅᓯᒪᔪᓂ.
ᐅᑯᐊ ᒪᓕᒡᓗᒋᑦ ᑎᖑᒡᓗᖕᓇᕐᒥ A−ᒥᒃ ᐊᐃᑦᑐᕐᓗᐃᑦᑕᐃᓕᒪᔾᔪᑕᐅᔪᓐᓇᖅᑐᑦ:
- ᐅᖃᖃᑎᒋᓗᒋᑦ ᐋᓐᓂᐊᕕᖕᒥᐅᑦ ᐱᔪᒪᓂᕐᒥᒃ ᑎᖑᒡᓗᖕᓂᕐᒧᑦ A-ᒧᑦ ᐋᓐᓂᐊᓕᕇᒃᑯᑎᒥᒃ ᑲᐱᔭᐅᓂᕐᒥᒃ.
- ᐊᒡᒐᑎᑦ ᐅᐊᓴᕐᐸᒡᓗᒋᑦ ᐊᓇᕐᕕᖕᒦᕌᓂᒃᑳᖓᕕᑦ ᖁᐃᖏᓕᓴᕐᓯᐊᓂᒃᑳᖓᕕᓪᓗ, ᓂᕿᓕᕆᓚᐅᖅᑳᖕᓇᒡᓗ ᓂᕆᓂᐊᖅᑎᓪᓗᑎᓪᓘᓐᓃᑦ.
- ᐊᐃᑦᑐᖅᑕᐅᓇᓱᒋᒍᕕᑦ ᑎᖑᒡᓗᖕᓂᖕᒥᑦ A−ᒥᑦ, ᐊᓯᖏᓐᓄᓪᓘᓐᓃᑦ ᓈᙳᓂᖕᓄᑦ, ᓂᕿᓕᕆᑦᑕᐃᓕᒋᑦ ᐃᒥᖅᑎᑦᑎᑦᑕᐃᓕᓗᑎᓪᓘᓐᓃᑦ ᐊᓯᖏᓐᓂᑦ ᐃᓄᖕᓂᑦ.
ᐃᒡᕕᓪᓘᓐᓃᑦ ᐃᒡᓗᒥᐅᖃᑏᓪᓘᓐᓃᑦ ᖃᓂᒪᑲᑕᓕᕈᕕᑦ ᑎᖑᒡᓗᖕᓂᕐᒧᑦ A−ᒧᑦ, ᐋᓐᓂᐊᕐᕕᓕᐊᑲᐅᑎᒋᔭᕆᐊᖃᖅᐳᓯ ᖃᓂᒻᒪᑐᐊᕈᕕᑦ. ᑕᒪᓐᓇ ᐃᑲᔫᑎᖃᕈᓐᓇᖅᑐᖅ ᐊᐃᑦᑐᕐᓗᒃᑕᐅᓯᒪᔪᓄᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓂᕐᓄᑦ ᒫᓐᓇᑲᐅᑎᒋ ᐊᐃᑦᑐᕐᓗᐃᑦᑕᐃᓕᒪᓂᕐᒧᓪᓗ ᑎᖑᒡᓗᖕᓇᕐᓂᖅ A−ᒥᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᑎᖑᒡᓗᖕᓇᕐᓂᕐᒥᒃ, ᐅᕗᙵᕐᓗᑎᑦ: https://www.gov.nu.ca/sites/default/files/hepatitis_a_fact_sheet-in.pdf
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᓴᐃᕋ ᐋᕐᓯᓅ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
@email