ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2019ᒥ: ᐃᙱᐅᓰᑦ ᐃᙱᙳᐊᕈᓰᓪᓗ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2019ᒥ: ᐃᙱᐅᓰᑦ ᐃᙱᙳᐊᕈᓰᓪᓗ

ᐃᖃᓗᐃᑦ, ᓄᓇᕗᑦ (ᔭᓄᐊᕆ 31, 2019) – ᕕᕗᐊᕆ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ – ᐃᓄᒃᑐᑦ ᐅᖃᓪᓚᖕᓂᕐᒧᑦ ᑕᖅᑭᖓ. ᑕᒪᑐᒪ ᐊᕐᕌᒎᑉ ᑐᕌᕆᔭᖓ ᐃᙱᐅᓰᑦ ᐃᙱᙳᐊᕈᓰᓪᓗ: ᐱᖅᑯᓯᑐᖃᒃᑯᑦ ᐃᙱᐅᓰᑦ ᐱᓰᓪᓗ. ᓄᓇᕗᒻᒥ ᑕᖅᑭᓕᒫᖅ ᖁᕕᐊᓲᑎᖃᕐᓂᐊᖅᑐᑦ ᐃᓄᒃᑐᑦ ᒪᓕᒻᒥᔪᖅ ᓄᓇᕐᔪᐊᕐᒥᐅᖑᖃᑎᒌᓄᑦ ᓄᓇᕐᔪᐊᕐᒥ ᐊᕐᕌᒍᖓ ᓄᓇᑲᖅᑳᖅᓯᒪᔪᑦ ᐅᖃᐅᓯᖅᑕᖏᓐᓄᑦ.

“ᓄᓇᕗᑦ ᓯᕗᓕᖅᑎᐅᕗᖅ ᑲᓇᑕᓕᒫᒥ ᓄᓇᕐᔪᐊᕐᓗ ᐃᖏᕐᕋᓂᖏᓐᓂ ᓴᐳᒻᒥᓗᑎᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖅᑕᖏᑦ,” ᐅᖃᖅᑐᖅ ᒥᓂᔅᑕ ᑕᐃᕕᑦ ᔪᐊᓇᓯ. “ᐅᖃᐅᓯᖅᑕᕗᑦ ᓴᐳᒻᒥᔭᐅᑎᓪᓗᒋᑦ ᒪᓕᒐᓕᐅᕐᕕᖕᒥ ᐃᑲᔫᑎᖃᖅᑐᖅ ᒐᕙᒪᑦᑎᓐᓂᑦ ᓴᐳᒻᒦᓗᓂ ᖁᕝᕙᓯᒋᐊᖅᑎᑦᑎᓗᓂᓗ ᐱᐅᓂᖓᓂᒃ ᐃᓄᒃᑐᑦ ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᒃᑯᑦ ᓄᓇᕗᓕᒫᒥ.”

ᐃᙱᐅᓰᑦ ᐃᙱᙳᐊᕈᓰᓪᓗ ᐱᖅᑯᓯᑐᖃᒃᑯᑦ ᐊᑐᖅᑕᐅᓪᓗᑎᒃ ᑭᖑᕚᕇᓄᑦ ᐃᓄᖕᓄᑦ ᐊᖓᔪᖅᑳᓄᑦ ᐃᓕᓴᕐᓗᒋᑦ ᓱᕈᓰ/ᓄᑕᖅᑲᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐱᖅᑯᓯᖏᓐᓂᒃ ᐊᒻᒪ ᐅᖃᐅᓯᖅᑕᖏᓐᓂᒃ. ᑖᒃᑯᐊ ᐃᙱᐅᑎᑦ ᐱᓰᓪᓗ ᐃᓚᐅᑎᑦᑎᒐᔪᒃᑐᑦ ᐊᔪᕐᓇᕐᓂᖅᓴᓄᑦ ᑐᑭᓕᐅᕈᑎᓂᒃ ᐃᓄᒃᑐᑦ, ᑎᓕᐅᕆᓗᑎᒃ ᓄᑕᖅᑲᓂᒃ ᐃᓕᑦᑎᖁᔨᓂᕐᒥᒃ ᓴᙱᒃᑎᒋᐊᕐᓗᒍᓗ ᐊᑐᖅᑕᐅᓂᖓ ᐃᓄᒃᑐᑦ ᐊᖏᕐᕋᒥ ᓄᓇᖃᑎᒌᓄᓪᓗ.

ᐃᑲᔪᕐᓗᓂ ᔭᒐᑦᑕᐃᓕᑎᓪᓗᒍ ᑖᓐᓇ ᐱᖅᑯᓯᖅ, ᐃᓕᖅᑯᓯᓕᕆᔨᒃᑯᑦ ᓂᐱᓕᐅᕆᓪᓗᑎᒃ ᐅᓄᖅᑐᓂᒃ 12 −ᓂᒃ ᐃᙱᐅᑎᓂᒃ ᐱᓯᕐᓂᒃᓗ ᐊᑐᖅᑕᐅᓪᓗᑎᒃ ᑐᓴᕋᓐᓈᖅᑎᑦᑎᓛᖅᑐᑦ ᐃᓐᓇᑐᖃᕐᓂᒃ ᐃᓕᓐᓂᐊᖅᑎᑦᑎᔨᓄᓪᓗ. ᕖᕗᐊᕆ ᓄᖑᓕᖅᑎᓪᓗᒍ, ᐊᔾᔨᐅᙱᑦᑐᒃᑯᑦ ᑕᑯᓐᓈᖅᑎᑦᑎᓂᐊᖅᑐᑦ ᐃᖃᓗᖕᓂ, ᐃᙱᐅᑎᓪᓗ ᐱᓰᓪᓗ ᓴᖅᑭᑎᑕᐅᓗᑎᒃ ᑕᕐᕆᔮᒃᓴᑎᒍᑦ, ᓂᐱᒃᑯᑦ, ᕿᓪᓕᖅᑐᓂᒡᓗ ᐊᒻᒪ ᑎᑎᕋᖅᓯᒪᔪᑎᒍᑦ. ᑲᑎᓯᒪᔪᑦ ᑐᓂᐅᖅᑲᖅᑕᐅᓪᓗᑎᒃ ᑕᒪᓐᓇ ᐊᕐᕌᒍ ᐱᒋᐊᓕᓵᖅᑎᓪᓗᒍ ᓄᓇᓕᓕᒫᓄᑦ, ᐃᓚᐅᓪᓗᑎᒃ ᐃᓕᓐᓂᐊᕐᕖᑦ, ᐸᐃᕆᕝᕖᑦ ᕿᒥᕐᕈᐊᒐᖃᕐᕖᓪᓗ, ᐱᑎᑦᑎᓪᓗᑎᒃ ᐃᑲᔪᕈᑎᒃᓴᓂᑦ ᐃᓕᑦᑎᓂᕐᒧᑦ ᐃᓄᒃᑐᑦ ᐊᑐᖅᑎᓪᓗᒍ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ.

ᐊᑏ! ᐃᓄᒃᑑᖅᑕ! ᑕᒪᑦᑕ ᐅᖃᓪᓚᓚᐅᕐᑕ ᐃᓄᒃᑐᑦ, ᖁᕕᐊᓲᑎᒋᓗᒍᓗ ᑖᓐᓇ ᐱᒻᒪᕆᐅᖃᑕᐅᔪᖅ ᐃᓄᓐᓄᑦ ᐃᓕᖅᑯᓯᐅᒻᒪᑦ ᖃᑕᙳᑎᒌᓄᓪᓗ, ᐱᖃᓐᓇᕆᔭᑦᑎᓐᓄᓪᓗ, ᐃᓐᓇᑐᖃᕐᓄᑦ, ᐃᓕᓐᓂᐊᖅᑎᓄᑦ, ᐃᓕᓴᐃᔨᓄᑦ ᐊᒻᒪ ᐃᖅᑲᓇᐃᔭᖃᑎᑦᑎᓐᓄᑦ. ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ, ᖃᐅᔨᒋᐊᕐᕕᒋᔪᓐᓇᖅᑕᑎᑦ , ᐅᕙᓂ www.ch.gov.nu.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐃᓕᓴᐱ ᕌᐳᑦᔅ
ᑐᓴᐅᒪᑎᑦᑎᔨ ᐃᓕᖅᑯᓯᓕᕆᔨᒃᑯᑦ
867-975-5543
@email