ᐋᖅᑭᐅᒪᑎᑦᑎᔨ - ᖃᓄᐃᓕᐅᖅᑐᖃᕋᔭᕐᒪᑦ ᐅᖃᐅᓯᖃᖅᑐᖄᓪᓚᓚᐅᖅᑎᓪᓗᒍ?
ᒪᓕᒐᓕᐊᖑᓯᒪᔪᑦ ᐋᖅᑭᒃᑕᐅᓯᒪᖕᒪᑕ ᐱᔪᓐᓇᐅᑎᖃᖅᑐᓂᒃ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂᒃ ᓈᒻᒪᒃᑐᓂᒃ ᐱᕕᖃᖅᑎᑦᑎᔪᓐᓇᖅᖢᑎᒃ ᖃᐅᔨᓴᖅᑕᐅᑎᑦᑎᓗᑎᒃ ᑕᒻᒪᖅᓯᒪᔪᓐᓃᖅᑎᑦᑎᓗᑎᒡᓗ ᖃᓄᑐᐃᓐᓇᑦᑎᐊᖅ ᐱᕋᔭᒍᑕᐅᔪᓂᒃ ᐅᖃᐅᓯᐅᔪᓂᒃ. ᓈᒻᒪᒋᔭᕐᓂᒃ ᐋᖅᑭᒃᑕᐅᕌᓂᙱᑉᐸᑦ ᐊᐃᑉᐸᖓᓂᒡᓗ ᐅᖃᐅᓯᖃᒃᑲᓐᓂᕋᓱᒡᓗᑎᑦ, ᐋᖅᑭᐅᒪᑎᑦᑎᔨ ᖃᐅᔨᓴᓯᒋᐊᖃᕋᔭᖅᐳᖅ.
ᐋᖅᑭᐅᒪᑎᑦᑎᔨ ᐃᒪᐃᓕᐅᕈᓐᓇᕐᒥᔪᖅ:
- ᓈᒻᒪᙱᓕᐅᕈᑕᐅᔪᒥᒃ ᖃᓄᖅᑑᕋᓱᒋᐊᖃᕋᔭᖅᑐᖅ
- ᐱᔾᔪᑕᐅᔪᖅ ᑐᓐᓂᖅᑯᑎᒋᓗᓂᐅᒃ ᐊᓯᖔᖏᓐᓄᑦ ᓈᒻᒪᙱᓕᐅᖅᑐᓂᒃ ᑲᒪᔨᐅᔪᓐᓇᖅᑐᓄᑦ
- ᓯᕗᓪᓕᖅᐹᒥ ᖃᐅᔨᓴᖅᑕᐅᖁᔨᑲᑕᒐᓱᓚᐅᕋᓗᐊᕐᓗᑎᑦ, ᐃᓱᒪᓕᐅᕆᓗᑎᑦ ᖃᐅᔨᓴᖅᑕᐅᔭᕆᐊᖃᕐᒪᖔᑦ ᖃᐅᔨᓴᖅᑕᐅᙱᒃᑲᓗᐊᕐᓗᓂᓘᓐᓃᑦ
- ᐱᔾᔪᑕᐅᔪᖅ ᑐᓐᓂᖅᑯᑎᒋᓗᒍ ᐊᓯᖏᓐᓄᑦ ᐱᔪᓐᓇᐅᑎᓕᖕᓄᑦ, ᓲᕐᓗ ᐸᓖᓯᒃᑯᓐᓄᑦ.
ᐋᖅᑭᐅᒪᑎᑦᑎᔨ ᐱᔪᓐᓇᕐᓂᖃᑦᑎᐊᖅᑐᖅ ᖃᐅᔨᓴᕈᓐᓇᑦᑎᐊᖅᖢᓂ ᑲᑎᖅᓱᐃᔪᓐᓇᖅᖢᓂᓗ ᖃᐅᔨᔾᔪᑕᐅᓯᒪᔪᓂᒃ.
ᖃᐅᔨᓴᖅᑕᐅᕌᓂᒃᐸᑦ, ᐋᖅᑭᐅᒪᑎᑦᑎᔨ ᐱᕙᒌᔭᕋᔭᖅᐳᖅ ᑎᑎᕋᖅᓯᒪᓗᓂ ᐅᖃᐅᓯᕆᔭᖓ ᑕᐃᒫᕐᓗᓂᐅᒡᓗ ᐱᖁᔨᕗᖔᓕᐅᕐᓗᓂᓗ. ᐃᓄᒃ ᐅᖃᐅᓯᖃᖅᑐᖅ ᑕᕐᕋᖓᓐᓂᒃ ᐱᑎᑕᐅᓇᔭᖅᐳᖅ ᐅᖃᐅᓯᐅᔪᕐᓗ ᐃᓄᖕᓄᑦ ᑐᓴᖅᑕᐅᓗᓂ, ᑭᓯᐊᓂ ᐋᖅᑭᐅᒪᑎᑦᑎᔨ ᐃᓱᒪᒋᔭᖃᑐᐊᖅᐸᑦ ᐱᔾᔪᑎᖃᑦᑎᐊᕐᓂᖓᓄᑦ ᑕᐃᒪᐃᓕᐅᖅᑕᐅᔪᓐᓇᙱᓐᓂᕋᕐᓗᓂᐅᒃ. ᐋᖅᑭᐅᒪᑎᑦᑎᔨ ᑕᐃᒫᖅᐸᑦ ᐱᕋᔭᒃᑐᖃᓚᐅᕐᓂᖓᓂᒃ ᐱᖁᔨᕗᖔᓕᐅᕐᓗᓂᓗ, ᐊᒃᑐᐊᔪᑦ ᒥᓂᔅᑕᐃᑦ ᑐᓴᖅᑎᑕᐅᔭᕆᐊᖃᕋᔭᖅᐳᑦ ᐅᓪᓗᑦ 21 ᖃᓄᐃᓕᐅᖅᑕᐅᔪᖃᕐᓂᐊᕐᒪᖔᑦ (ᑲᒪᒋᔭᐅᔾᔮᙱᒻᒪᖔᓪᓘᓐᓃᑦ) ᓴᖅᑭᑕᐅᓗᑎᒃ ᐱᖁᔨᕗᖔᓕᐊᕆᔭᐅᔪᑦ.
| ᐋᖅᑭᐅᒪᑎᑦᑎᔨ ᐱᔾᔪᑕᐅᔪᒥᒃ ᖃᐅᔨᓴᕈᒪᙱᑉᐸᑦ, ᑎᑎᕋᖅᓯᒪᔪᓂᒃ ᐱᔾᔪᑎᓂᒃ ᓴᖅᑭᑦᑎᔭᕆᐊᖃᕋᔭᖅᑐᖅ ᐃᓕᖕᓄᑦ ᐊᒻᒪ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓐᓄᑦ. |
ᐊᓄᓪᓚᒃᓯᖅᑕᐅᔭᕆᐊᖃᕋᔭᖅᐳᖓ ᐱᕋᔭᒍᑕᐅᔪᒥᒃ ᐅᖃᐅᓯᖃᐅᔭᕈᓗᒃᑯᒪ?
ᒪᓕᒐᖅᑎᒍᑦ ᐋᖅᑭᒃᑕᐅᓯᒪᔪᖃᙱᑦᑎᐊᖅᑐᖅ ᐃᓄᖕᒥᒃ ᐊᓄᓪᓚᒃᓯᕆᐊᖃᕐᓂᕋᖅᓯᒪᔪᒥᒃ ᓴᖅᑭᑦᑎᐅᔭᕈᓗᒃᐸᑦ ᐱᕋᔭᒍᑕᐅᔪᒥᒃ ᐊᑭᓖᔭᕆᐊᖃᖅᑐᖃᕋᔭᖅᑐᖅ $10,000.-ᒧᑦ ᑎᑭᓪᓗᒍ. ᑖᓐᓇ ᑕᐃᔭᐅᔪᖅ ᐱᓕᕆᔾᔪᓯᖅ ᐊᑭᓂᐊᖅᑕᐅᔪᖅ ᐃᓚᓕᐅᔾᔨᓯᒪᓪᓗᓂᓗ ᖃᓄᑐᐃᓐᓇᑦᑎᐊᖅ ᐱᓕᕆᔾᔪᓯᕐᓂᒃ, ᓯᕘᕋᓵᕈᑎᓂᒃ ᐅᕝᕙᓘᓐᓃᑦ ᓄᖅᑲᖔᖅᑎᑦᑎᓚᐅᑲᒍᒪᔪᒥᒃ, ᐃᖅᑲᓇᐃᔮᖓᓂ ᐊᔪᕐᓇᙱᓐᓂᖅᓴᒧᐊᖅᑕᐅᓗᓂ, ᐊᓂᑕᐅᓗᓂ, ᓴᒃᑯᑕᐅᓗᓂ, ᐊᓂᑕᐅᓗᓂ, ᐃᓕᕋᓵᖅᑕᐅᓗᓂ, ᑎᓕᐅᖅᑕᐅᓗᓂ, ᐊᓂᑕᐅᓗᓂ, ᑳᓐᑐᓛᒋᔭᐅᔪᒥᒃ ᓄᖅᑲᖅᑎᑦᑎᓗᓂ ᐱᔾᔪᑕᐅᔪᕐᒧᓪᓗ ᐊᒃᑐᐊᙱᑦᑎᐊᕐᓗᓂ, ᒪᓕᒐᖅᑎᒍᑦ ᐊᑭᕋᖅᑐᕐᓗᓂᐅᒃ ᑲᒪᒋᔭᐅᓕᖅᑎᖔᕐᓗᓂᐅᒃ, ᐊᑭᓖᑎᑦᑎᓗᓂ ᐊᓯᖏᓐᓂᒡᓘᓐᓃᑦ ᐊᑭᓖᑎᑦᑎᔭᕆᐊᖃᙱᑦᑎᐊᖅᑐᖅ ᓈᒻᒪᙱᓕᐅᕈᑕᐅᓕᕐᓗᑎᒃ ᐃᓄᖕᒧᑦ ᐱᕋᔭᒃᖢᓂ ᐱᕋᔭᖕᓂᕆᓚᐅᖅᑕᖓᓄᑦ ᓴᖅᑭᑕᐅᔪᓄᑦ ᑕᐃᔅᓱᒧᖓ ᐃᓄᖕᒧᑦ ᐅᕝᕙᓘᓐᓃᑦ ᑕᐃᓐᓇ ᐃᓄᒃ ᐃᑲᔪᓚᐅᕐᓂᖓᓄᑦ ᖃᐅᔨᓴᖅᑕᐅᑎᓪᓗᒍ ᓴᖅᑭᑕᐅᔪᖅ ᐊᓯᒥᓄᑦ.
ᐋᖅᑭᐅᒪᑎᑦᑎᔨᒧᑦ ᐅᖃᐱᓗᒍᓐᓇᖅᑐᑎᑦ ᐅᒃᐱᕈᓱᑐᐊᕈᕕᑦ ᐱᔾᔪᑕᐅᓇᓱᒋᑐᐊᕈᕕᑦ ᐱᓕᕆᐊᒧᑦ ᐊᑭᓂᐊᖅᑕᐅᓇᓱᒋᓗᑎᑦ. ᐋᖅᑭᐅᒪᑎᑦᑎᔨ ᖃᐅᔨᓴᓯᒋᐊᖃᕋᔭᖅᐳᖅ ᐅᖃᐱᓘᑕᐅᔪᒥᒃ ᐱᕋᔭᒍᑕᐅᔪᒧᑦ ᖃᐅᔨᓴᕐᓂᕆᖅᑲᐅᔭᖓᑕ ᐊᔾᔨᑦᑎᐊᖓᓂᒃ.
ᖃᐅᔨᓴᖅᑕᐅᓂᖅ ᐃᓱᓕᓕᖅᑎᓪᓗᒍ, ᐋᖅᑭᐅᒪᑎᑦᑎᔨ ᐅᖃᐅᓯᐅᔫᑉ ᑕᕐᕋᖓᓂᒃ ᑐᓂᓯᔭᕆᐊᖃᕋᔭᖅᑐᖅ ᐅᑯᓄᖓ:
- ᐃᓄᖕᒧᑦ ᐅᖃᐱᓘᑎᖃᓚᐅᖅᑐᒧᑦ
- ᐃᓄᒃ ᐱᔮᕆᓪᓗᓂ ᐊᑭᓂᐊᕋᓱᓚᐅᖅᑐᖅ
- ᐃᖅᑲᓇᐃᔭᖅᑎᐅᑉ ᐅᖃᐱᓘᑎᖃᓚᐅᖅᑑᑉ ᐊᖓᔪᖅᑳᖓᑕ ᑐᒡᓕᐊᓄᑦ ᐅᕝᕙᓘᓐᓃᑦ ᒥᓂᔅᑕᖓᓐᓄᑦ
- ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓐᓄᑦ
- ᐊᓯᖏᑦ ᒥᓂᔅᑕᐃᑦ ᐋᖅᑭᐅᒪᑎᑦᑎᔨᒧᑦ ᓈᒻᒪᒐᓱᒪᒋᔭᐅᑐᐊᖅᐸᑕ
ᐋᖅᑭᐅᒪᑎᑦᑎᔨ ᐅᖃᐱᓘᑕᐅᔪᒥᒃ ᑭᖑᓪᓕᖅᐹᒥᒃ ᐋᖅᑭᒃᓯᒃᐸᑦ ᐊᑭᓂᐊᕈᑕᐅᓇᓱᒃᑐᖅ ᐊᑐᓕᕐᓂᕋᕐᓗᓂᐅᒃ, ᓈᒻᒪᒋᔭᐅᔪᓂᒃ ᐅᖃᐅᔾᔪᖅᓱᖅᑕᐅᔭᕆᐊᖃᖅᐳᖅ ᐃᓄᒃ ᐱᕋᔭᓚᐅᖅᑐᖅ ᖃᓄᐃᓕᓚᐅᕐᓂᖓ ᒪᓕᒃᑕᐅᓗᓂ ᓈᒻᒪᒋᓪᓗᐊᖅᑕᖓᓐᓂᒃ ᐱᓕᕆᐊᖑᔭᕆᐊᖃᖅᐳᖅ ᐊᓯᖏᓪᓗ ᐱᓕᕆᐊᒃᓴᑦ ᐱᖁᔨᕗᖔᓕᐊᖑᓗᑎᒃ ᐋᖅᑭᐅᒪᑎᑦᑎᔨᒧᑦ ᑲᒪᒋᔭᐅᔾᔪᑕᐅᔪᓐᓇᕐᓗᑎᒃ ᖃᓄᑐᐃᓐᓇᖅ ᐊᓯᐅᔨᔭᓄᑦ ᓱᕋᒃᑕᐅᔪᓄᓪᓘᓐᓃᑦ ᐊᒃᓱᕉᑕᐅᔪᑦ ᐃᓄᖕᒧᑦ ᐅᖃᐱᓗᒃᓯᒪᔪᒧᑦ.
ᐊᓯᖏᑦ ᐱᓕᕆᐊᖑᖁᔭᑦ ᐋᖅᑭᐅᒪᑎᑦᑎᔨᒧᑦ ᐱᓕᕆᐊᖑᙱᑉᐸᑕ, ᐊᖓᔪᖅᑳᑉ ᑐᒡᓕᐊ ᐊᒻᒪ ᒥᓂᔅᑕᐃᑦ ᑐᓂᓯᔭᕆᐊᖃᖅᐳᑦ ᑐᑭᓯᓇᖅᑐᒥᒃ ᐋᖅᑭᐅᒪᑎᑦᑎᔨᒧᑦ ᐅᖃᐅᓯᖃᕆᐊᖃᖅᐳᑦ ᐊᓯᖏᓐᓂᒃ ᐱᓕᕆᐊᒃᓴᓂᒃ, ᐱᑕᖃᕆᐊᖃᖅᐸᑦ, ᐱᓕᕆᐊᖑᓇᔭᕐᒪᖔᑕ ᑭᐅᔾᔪᑕᐅᓗᑎᒃ ᐱᖁᔨᕗᖔᓕᐊᓄᑦ.
ᐃᓱᒪᓕᐅᕆᒃᐸᑦ ᑭᓯᐊᓂ ᓈᒻᒪᙱᓐᓇᔭᕐᓂᖓᓂ, ᖃᐅᔨᓴᖅᑕᐅᑎᓪᓗᒍ ᓴᖅᑭᓚᐅᖅᑐᑦ ᐊᑭᓂᐊᖅᑕᐅᔪᓄᑦ ᖃᓄᐃᓕᐅᖅᑕᐅᓚᐅᕐᒪᖔᓪᓗ, ᖃᓄᐃᓕᐅᓚᐅᙱᒻᒪᖔᓪᓗ, ᑭᐅᔾᔪᑕᐅᓗᑎᒃ ᐱᖁᔨᕗᖔᓕᐊᓄᑦ ᐃᓚᓕᐅᔾᔭᐅᓂᐊᖅᑐᑦ ᐋᖅᑭᐅᒪᑎᑦᑎᔨᐅᑉ ᐊᕐᕌᒍᓕᒫᖅᓯᐅᑦ ᐅᓂᒃᑳᖓᓐᓂᒃ.
ᐋᖅᑭᐅᒪᑎᑦᑎᔨ ᐃᓱᒪᓕᐅᕆᒃᐸᑦ ᓴᖅᑭᑕᐅᓚᐅᖅᑐᖅ ᐱᕕᒡᔪᐊᖑᒋᙱᓪᓗᓂᐅᒃ, ᒥᓂᔅᑕ ᐃᖅᑲᓇᐃᔭᖅᑎᒧᑦ ᐅᖃᐅᔾᔪᖅᑐᐃᔭᕆᐊᖃᕋᔭᖅᐳᖅ.