ᐅᖃᓚᐅᑎᓯᐅᑏᑦ

You are here

ᐃᖃᓗᓕᕆᓂᕐᒧᑦ ᓇᑦᑎᓕᕆᓂᕐᒧᓪᓗ ᐱᓕᕆᐊᒃᓴᐃᑦ

ᐅᑯᐊ ᐃᖃᓗᓕᕆᔨᑦ ᓇᑦᑎᓕᕆᔨᓪᓗ ᐱᓕᕆᕝᕕᖕᒥᐅᓄᑦ ᐱᓕᕆᐊᕆᔭᐅᖃᑦᑕᖅᑐᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓇᑦᑎᓕᕆᓂᐅᑉ ᒥᒃᓵᓄᑦ ᓄᓇᕗᒻᒥ, ᐅᕗᖓ ᑕᑯᒋᐊᕐᓗᑎᑦ www.sealingnunavut.ca

ᑮᓇᐅᔾᔭᒃᓴᕋᓱᒃᐸᒃᑐᓄᑦ ᐃᖃᓗᓕᕆᓂᕐᒧᑦ ᖃᖓᑦᑕᐅᑎᖏᓐᓄᑦ ᐃᑲᔪᖅᑕᐅᔾᔪᑎᑦ

ᑖᓐᓇ ᐱᓕᕆᐊᖅ ᓂᐅᕐᕈᑎᖃᕋᓱᒃᐸᒃᑐᓂᒃ ᐃᖃᓗᒐᓱᒃᑎᓂᒃ ᐊᖑᓇᓱᒃᑎᓂᒡᓗ ᐃᑲᔫᑕᐅᕗᖅ ᐱᒡᒍᓴᐅᑎᔪᓐᓇᖁᓪᓗᒋᑦ ᖃᓪᓗᓈᓃᑦᑐᓂᒃ ᓴᓇᕝᕕᖕᓂ ᓂᐅᕐᕈᑎᒃᓴᖏᑕ ᖃᖓᑦᑕᐅᑎᖏᑕ ᐊᑭᖏᓐᓂᒃ ᑮᓇᐅᔭᖃᖅᑎᑦᑎᓗᑎᒃ ᓄᓇᕗᑦ ᓯᓚᑖᓄᑦ. ᖃᖓᑦᑕᐅᑎᖏᑕ ᓇᑉᐸᓪᓗᐊᖏᑦ ᐊᑭᓕᖅᑕᐅᔪᓐᓇᑐᐃᓐᓇᕆᐊᖃᖅᐳᑦ ᐃᖃᓗᖕᓄᑦ ᓂᐅᕐᕈᑎᒃᓴᓄᑦ ᓄᓇᓕᖕᓂ ᓄᓇᕗᒻᒥ, ᐊᒻᒪᓗ ᑕᕆᐅᕐᒥᐅᑕᓂᒃ ᐃᖃᓗᖕᓂᑦ ᓄᓇᓕᖕᓂᙶᖅᑐᓂᒃ ᖃᓪᓗᓈ ᓄᓇᓕᐸᐅᔭᖓᓄᑦ. ᑖᓐᓇ ᐃᑲᔪᖅᑕᐅᔾᔪᑎ ᑐᕌᖓᓪᓗᐊᑕᕐᓂᖓᓄᑦ ᑮᓇᐅᔭᓂᒃ ᐊᑐᓗᐊᙱᓐᓂᖅᓴᐅᔪᓐᓇᖁᓪᓗᒋᑦ ᓂᐅᕐᕈᑎᖃᕋᓱᒃᐸᒃᑐᑦ ᐃᖃᓗᒐᓱᒃᑎᑦ ᖃᓪᓗᓈᓄᑦ ᓂᐅᕐᕈᑎᒃᓴᓄᑦ, ᐃᑲᔫᓯᐊᑦ ᑐᕌᖓᙱᑉᐳᑦ ᐃᖃᓗᐃᑦ ᖃᖓᑦᑕᐅᑎᖏᓐᓄᑦ ᐃᖃᓪᓕᐊᕐᕕᐅᔪᒥ ᓄᓇᓕᖕᓄᐊᕋᓱᒡᓗᒍ ᑲᒪᒋᔭᐅᓂᐊᖅᑐᓄᑦ ᐊᒻᒪ/ᐅᕝᕙᓘᓐᓃᑦ ᐊᓯᐊᓄᐊᖅᑕᐅᓂᐊᖅᑐᓄᑦ, ᐅᕝᕙᓘᓐᓃᑦ ᐃᓛᒃᑯᑦ ᓂᕆᔭᒃᓴᓄᑦ (ᓲᕐᓗ ᓂᐅᕐᕈᑎᒃᓴᐅᙱᓪᓗᑎᒃ) ᓄᓇᕗᒻᒥ ᓄᓇᕗᑦ ᓯᓚᑖᓂᓘᓐᓃᑦ.

ᐃᖃᓗᓕᕆᓂᕐᒧᑦ ᐱᕙᓪᓕᐊᑎᑦᑎᓂᖅ ᐊᔾᔨᒌᙱᕈᓘᔭᖅᑐᓪᓗ ᐱᓕᕆᐊᒃᓴᑦ

ᑖᓐᓇ ᐱᓕᕆᐊᖅ ᑮᓇᐅᔭᓂᒃ ᐃᑲᔫᓯᐊᖅᑖᖅᑎᑦᑎᕙᒃᐳᖅ ᐱᓕᕆᐊᒃᓴᓄᑦ ᓴᙱᒃᑎᒋᐊᕈᑎᒃᓴᓂᒃ, ᐱᕙᓪᓕᐊᔾᔪᑎᒃᓴᓂᒃ, ᐊᔾᔨᒌᙱᕈᓘᔭᖅᑐᑦ ᓄᓇᕗᑦ ᐃᖃᓗᓕᕆᕝᕕᖏᓐᓂ. ᐃᑲᔪᖅᑐᐃᖃᑦᑕᖅᐳᑦ ᖃᐅᔨᓴᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᖑᑎᑕᐅᔪᓂᒃ ᐊᑯᓂᐅᔪᖅ, ᑮᓇᐅᔭᓕᐅᕋᓱᒡᕕᖕᓂ ᐃᑲᔫᑕᐅᓂᐊᖅᑐᓂᒃ, ᐊᒻᒪ ᐃᑲᔫᑕᐅᖕᒥᓗᓂ ᓇᖕᒥᓂᓕᖕᓄᑦ, ᑲᑐᔾᔨᖃᑎᒌᓄᑦ, ᐃᓄᓪᓄᓪᓗ ᐃᖃᓗᓕᕆᓂᕐᒧᑦ ᐱᕙᓪᓕᐊᑎᑦᑎᔪᓐᓇᑐᐃᓐᓇᕆᐊᓕᑦ ᐊᔾᔨᒌᙱᕈᓘᔭᖅᑐᓪᓗ ᐱᓕᕆᐊᖑᑎᑕᐅᔪᑦ.

ᐊᒥᕐᓂᒃ ᐊᑭᓕᖅᓱᐃᓂᕐᒧᑦ ᐱᓕᕆᐊᒃᓴᑦ

ᑖᓐᓇ ᐱᓕᕆᐊᖑᔪᖅ ᒐᕙᒪᒃᑯᓐᓂ ᐱᔨᑦᑎᕋᐅᑎᐅᕗᖅ ᐃᑲᔫᑕᐅᓪᓗᓂ ᐊᖑᓇᓱᒃᑎᑦ ᓂᐅᕐᕈᑎᖃᖅᐸᒃᑐᑦ ᐊᒥᕐᓂᒃ ᐊᑭᑐᓗᐊᙱᓪᓗᑎᒃ ᕿᓯᖕᓂᒃ ᓂᐅᕐᕈᑎᖃᕈᓐᓇᖁᓪᓗᒋᑦ. ᕿᓯᖕᓂᒃ ᓂᐅᕐᕈᑎᖃᖅᐸᒃᑐᑦ ᑖᔅᓱᒧᖓ ᐱᓕᕆᐊᒧᑦ ᐃᓚᒋᔭᐅᓛᖑᖃᑕᐅᕗᖅ ᓴᖅᑭᑎᑕᐅᓚᐅᖅᖢᓂ ᓴᖅᑭᑎᑦᑎᒃᑲᓐᓂᖁᓪᓗᒋᑦ ᓄᓇᕗᒻᒥ ᕿᓯᖕᓂᒃ ᑮᓇᐅᔭᓕᐅᕋᓱᒃᐸᒃᑐᑦ ᐊᒻᒪ ᐊᖑᓇᓱᒃᑏᑦ ᑮᓇᐅᔭᖅᑖᖅᑎᑕᐅᖃᑦᑕᖁᓪᓗᒋᑦ ᑕᐃᒪᙵᑦ ᓂᐅᕐᕈᑎᖃᕈᓐᓇᐃᓪᓕᑎᑕᐅᓚᐅᖅᑎᓪᓗᒋᑦ 1980 ᐱᒋᐊᓕᓵᖅᑎᓪᓗᒍ. ᑖᓐᓇ ᐱᓕᕆᐊᖑᔪᖅ ᐊᓯᐅᔾᔭᐃᒃᑯᑎᐅᔪᓐᓇᖅᐳᖅ ᐊᖑᓇᓱᒃᑎᓄᑦ ᓯᕗᓂᐊᒍᑦ ᐊᑭᓕᖅᑕᐅᕙᒡᓗᑎᒃ, ᕿᓰᑦ ᐊᑭᖃᓪᓚᕆᖁᓪᓗᒋᑦ. ᑎᓕᐅᕈᑕᐅᒃᑲᓐᓂᖅᖢᓂ ᕿᓰᑦ ᑕᒪᕐᒥᒃ ᐊᑐᖅᑕᐅᖃᑦᑕᖁᓪᓗᒋᑦ ᐊᖑᓇᓱᒃᑎᓂᑦ ᐱᔭᐅᔪᓐᓇᖅᑐᑦ.

ᒥᖅᑯᓖᑦ ᖃᖓᑦᑕᐅᑎᖏᓐᓄᑦ ᐃᑲᔫᑎᑦ ᐱᓕᕆᐊᒃᑯᑦ

ᐊᕙᑎᓕᕆᔨᒃᑯᑦ ᓄᑖᒥᒃ ᐱᓕᕆᐊᖃᓕᕐᒪᑕ ᐊᑭᓖᔪᓐᓇᖅᖢᑎᒃ ᖃᖓᑦᑕᐅᑎᓂᒃ ᖁᐊᖑᔪᓄᑦ ᐊᒪᖅᑯᑦ ᐊᒥᖏᓐᓄᑦ ᓂᐅᕕᖅᐸᒃᑐᓄᑦ ᓄᓇᕗᑦ ᓯᓚᑖᓂᑦ. ᑖᓐᓇ ᐱᓕᕆᐊᖅ ᑐᕌᖓᓗᐊᙳᐊᖅᑐᖅ ᐊᖑᓇᓱᒃᐸᒃᑐᓄᑦ ᐊᐅᓪᓚᖅᑎᑦᑎᔭᕆᐊᖃᖅᐸᒃᑐᓄᑦ ᐱᓕᕆᐊᖑᓯᒪᖏᑦᑐᓄᑦ ᐅᕝᕙᓘᓐᓃᐃᑦ ᖁᐊᖑᔪᓄᑦ ᐊᒪᖅᑯᑦ ᐊᒥᖏᓐᓄᑦ ᓂᐅᕕᖅᐸᒃᑐᓄᑦ ᖃᓪᓗᓈᓂ ᑲᓇᑕᐅᑉ ᓂᒋᖅᐸᓯᐊᓂᑦ.

ᐅᖃᕐᕕᒋᓗᒋᑦ ᐆᒪᔪᕐᓂᐊᖅᑎᓯ ᖃᐅᔨᒃᑲᓐᓂᕈᒪᒍᔅᓯ ᖃᓄᖅ ᑕᐃᒃᑯᐊ ᐃᑲᔫᑎᑦ ᐊᑐᖅᑕᐅᔪᓐᓇᕐᒪᖔᑕ ᓄᓇᓕᔅᓯᓐᓂ.

ᓄᓇᕗᒻᒥ ᐃᖃᓗᓕᕆᓂᕐᒧᑦ ᐊᔪᕈᓐᓃᖅᓴᖅᑎᑦᑎᔨᑦ

ᓄᓇᕗᒻᒥ ᐃᖃᓗᓕᕆᓂᕐᒧᑦ ᐊᔪᕈᓐᓃᖅᓴᖅᑎᑦᑎᔨᑦ ᐱᒻᒪᕆᐅᓪᓗᑎᒃ ᐊᑯᓂᐅᔪᒥ ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐱᓕᕆᐊᖑᑎᑕᐅᕗᖅ ᐃᓄᖕᓂᒃ ᓄᓇᕗᒻᒥ ᐃᑲᔫᑕᐅᓪᓗᓂ ᐃᖅᑲᓇᐃᔮᖃᑦᑎᐊᖁᓪᓗᒋᑦ ᑮᓇᐅᔭᓕᐅᕈᑎᒃᓴᖃᑦᑎᐊᖁᓪᓗᒋᓪᓗ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᒻᒥ ᓴᖅᑭᑎᑕᐅᓯᒪᔪᓂᑦ ᐃᖃᓗᓕᕆᕝᕕᖕᓂ. ᐃᓕᓐᓂᐊᖅᑏᑦ ᐱᕙᒌᔭᖅᑕᐅᖃᑦᑕᖅᐳᑦ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓄᑦ, ᒪᑯᓂᖓᓗ ᒥᑭᓐᓂᖅᓴᒥᑦ ᐅᒥᐊᕐᒥᒃ ᐊᖁᑦᑕᕆᐅᖅᓴᓂᖅ, ᐃᒪᕐᒨᖅᑐᓂᒃ ᐊᐅᓚᐅᓯᕆᔨ, ᐃᖃᓗᓕᕆᔨᓄᑦ ᓇᐅᑦᑎᖅᓱᖅᑎ, ᑮᓇᐅᔭᓕᕆᔨ, ᐅᒥᐊᕐᒥ ᓇᐅᑦᑎᖅᓱᖅᑎ, ᓂᖅᖠᐅᖅᑎ, ᐊᐅᓚᑦᑎᐊᕆᐊᓕᖕᓂᒃ ᓇᐅᑦᑎᖅᓱᖅᑎ, ᐊᒻᒪ ᐅᒥᐊᕐᔪᐊᕐᒥ ᓴᓗᒻᒪᖅᓴᐅᔨ (ᐱᒋᐊᕐᓂᖓ ᑕᕆᐅᕐᒧᐊᓚᐅᖅᑎᓐᓇᒍ ᐃᓕᓐᓂᐊᒐᒃᓴᖅ). ᐃᓕᓐᓂᐊᒐᒃᓴᐃᑦ ᐊᓂᒍᐃᔪᓂᒃ ᐊᓯᖏᓐᓂᒃ ᐅᒥᐊᒃᑯᑦ ᐃᖅᑲᓇᐃᔮᒃᓴᓂᒃ ᐱᓇᔪᒍᓐᓇᖅᑎᑦᑎᑐᐃᓐᓇᕆᐊᓖᑦ ᓴᖅᑭᑎᑦᑎᓗᑎᒡᓗ ᐃᒃᑲᑦᑐᒥ ᐃᖃᓗᒐᓱᒡᕕᖕᒥ ᓄᓇᒥᓂ.

ᕿᑐᓕᓴᖅᓯᒪᔪᑦ ᓇᑦᑏᑦ ᕿᓰᑦ ᓄᓇᕗᒻᒥᐅᓄᑦ

ᑖᓐᓇ ᐱᓕᕆᐊᖑᔪᖅ ᐃᑲᔫᑕᐅᕙᒃᐳᖅ ᓄᓇᕗᒻᒥ ᐊᓐᓄᕌᓕᐅᖅᑎᓂᒃ ᐊᒻᒪ ᐊᓐᓄᕌᑦᑎᐊᕙᓕᐅᖅᑎᓂᒃ ᓴᓇᕙᒡᓗᑎᒃ ᐱᕙᒌᔭᖅᓯᒪᔪᓂᒃ (ᕿᑐᓕᓴᖅᓯᒪᔪᑦ) ᓄᓇᕗᒻᒥ ᓇᑦᑎᐅᑉ ᕿᓯᖏᓐᓂᒃ ᐱᔭᒃᓴᐅᓪᓗᑎᒃ ᐊᒥᓕᕆᔨᑦ ᐊᑭᑦᑐᕋᐅᑎᕝᕕᖏᓐᓂ North Bay-ᒥ. ᑖᓐᓇ ᐱᔨᑦᑎᕋᕐᕕᒃ ᑐᕌᖓᕗᖅ ᓄᓇᕗᒻᒥ ᕿᓯᓕᕆᕙᒃᑐᓄᑐᐊᖅ, ᓂᐅᕕᐊᒃᓴᖃᖅᐸᒃᑐᓅᙱᑦᑐᖅ, ᐊᑭᑭᓛᖑᖁᓪᓗᒋᑦ. 10% ᐊᑭᑦᑐᕆᐊᖅᑕᐅᔪᑦ ᓴᓂᐊᒍᑦ (ᐊᑭᑦᑐᕆᐊᔾᔮᙱᖦᖢᓂ), ᓴᓇᔭᐅᔾᔪᑎᖏᑕ ᖄᒃᑲᓐᓂᐊᒍᑦ ᐊᑭᓖᒃᑲᓐᓂᕆᐊᖃᙱᑦᑐᑦ ᐅᕝᕙᓘᓐᓃᑦ ᐊᒦᑦ ᐱᓕᕆᐊᖑᓂᖓᑕ ᐊᑭᖏᑦ. ᖃᖓᑦᑕᐅᑎᖏᑦ ᓄᓇᕗᑦ ᒐᕙᒪᒃᑯᓐᓂ ᐊᑭᓕᖅᑕᐅᖃᑦᑕᖅᐳᑦ. ᐃᓛᓐᓂᒃᑯᑦ ᐊᑭᖏᑦ ᐊᔾᔨᒌᖃᑦᑕᔾᔮᙱᑉᐳᑦ, ᐊᒦᑦ ᐊᑭᖏᑦ ᒪᓕᒃᑕᐅᓗᑎᒃ ᐊᑭᑦᑐᕋᐅᑕᐅᔪᑦ ᐊᓐᓄᕌᓕᐅᖅᑕᐅᔪᓪᓗ ᐊᑭᖏᑦ. ᐱᓕᕆᐊᖑᔫᑉ ᐃᓚᒋᖕᒥᔭᖓ ᐃᑲᔪᖁᓪᓗᒋᑦ ᑲᒪᒋᔭᐅᖃᑦᑕᖅᐳᑦ ᑎᑎᕋᖅᑕᐅᑦᑎᐊᖁᓪᓗᒋᑦ ᐊᑐᐃᓐᓇᕈᖅᑎᑦᑎᕙᒡᓗᑎᒡᓗ ᕿᑐᓕᓴᖅᓯᒪᔪᓂᒃ ᐊᒥᕐᓂᒃ ᑐᓂᐅᖅᑲᐅᑕᐅᓂᐊᖅᑐᓂᒃ ᓄᓇᕗᒻᒥ ᐊᑭᑦᑐᕆᐊᖅᐸᓪᓕᐊᔪᓂᑦ ᑲᒪᒋᔭᐅᕙᓪᓕᐊᔪᓄᑦ ᐊᑐᖅᑕᐅᓂᐊᖅᑐᓂᒡᓗ.

ᐊᒥᓕᕆᕝᕕᒃ

ᐊᕐᕌᒍᑕᒫ ᑐᓐᓂᖅᑯᑎᖃᑐᐃᓐᓇᕐᓂᒃᑯᑦ, ᓄᓇᕗᑦ ᒐᕙᒪᒃᑯᑦ ᐃᓚᒋᔭᐅᕗᑦ ᐊᒥᓕᕆᕝᕕᖕᒥ ᑲᓇᑕᒥ, ᐱᓕᕆᐊᒃᓴᖃᖅᖢᑎᒃ ᐅᔾᔨᕆᔭᐅᓕᒃᑲᓐᓂᖁᓪᓗᒋᑦ ᑲᔪᓯᒍᑕᐅᔪᓐᓇᖅᑐᒥᑦ ᐊᑐᑦᑎᐊᕐᓂᕐᒥᓪᓗ ᑲᓇᑕᒥ ᐊᒥᕐᓄᑦ ᐃᑲᔫᑎᒃᓴᓂᒃ. ᕿᓯᓕᕆᔨᑦ ᑲᑎᒪᔨᕋᓛᖏᓐᓄᑦ ᐃᓚᒋᔭᐅᓪᓗᓂ, ᑭᒡᒐᖅᑐᐃᔩᑦ ᓴᖅᑭᑎᑦᑎᕗᑦ ᓄᓇᕗᒻᒥ ᐊᒻᒪ ᐃᓄᐃᑦ ᐃᓱᒪᒋᔭᖏᓐᓂᒃ ᑲᑎᒪᔪᓄᑦ.

ᓄᓇᕘᒥ ᓄᓇᓕᖕᓂ ᐃᒪᒃᑯᑦ ᓇᐅᑦᑎᖅᓱᖅᓯᕙᖕᓂᕐᒧᑦ ᐱᓕᕆᐊᖑᕙᒃᑐᖅ (N-CAMP-ᖑᓂᕋᖅᑕᐅᒋᓪᓗᓂ)

ᑖᓐᓇ N-CAMP-ᖑᓂᕋᖅᑕᐅᔪᖅ ᐊᔪᕈᓐᓃᖅᓴᖅᑎᑦᑎᕙᒃᐳᖅ ᓄᓇᕗᒻᒥᐅᓂᑦ ᐃᖃᓗᖕᓂᑦ ᖃᐅᔨᓴᒐᒃᓴᖅᑖᖅᐸᖕᓂᕐᒥᑦ ᐃᒪᒃᑯᓪᓗ ᓇᐅᑦᑎᖅᓱᖅᓯᕙᖕᓂᕐᒥᒃ. ᓇᓗᓇᐃᒃᑯᑕᓕᖕᓂ ᐊᔪᕈᓐᓃᖅᓴᖅᑎᑕᐅᕙᖕᓂᕐᒧᑦ ᐊᑐᖅᑕᐅᕙᒃᑐᑦ ᑐᙵᕕᖃᖅᑎᑕᐅᕗᑦ ᐱᓕᕆᔾᔪᑕᐅᕙᒃᑐᓄᑦ ᐊᑐᖅᑕᐅᕙᒃᑐᓄᑦ ᐊᓯᖏᓐᓂ ᑲᓇᑕᒥᐅᓂ; ᐊᑐᕈᓐᓇᖅᓯᑎᑕᐅᓯᒪᔪᓄᑦ ᐅᑭᐅᖅᑕᖅᑑᑉ ᖃᓄᐃᓕᖓᓂᕆᔭᒃᑕᖏᓐᓄᑦ ᐃᓚᓕᐅᔾᔨᓯᒪᓪᓗᑎᒡᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.

ᑕᒪᓐᓇ ᐱᓕᕆᐊᖑᕙᒃᑐᖅ ᒫᓐᓇ ᒪᕐᕉᖕᓂᒃ ᐊᑐᖅᑕᐅᕝᕕᐅᓂᖃᖅᐸᒃᐳᖅ:

ᐃᖃᓗᓕᕆᓂᕐᒧᑦ ᖃᐅᔨᓴᒐᒃᓴᓂᒃ.
ᐃᒪᕐᒥᐅᑕᓂᒃ ᐆᒪᔪᓂᒃ-ᓇᐅᑦᑎᖅᓱᖅᓯᓂᖅ (ᕿᒥᕐᓗᓕᖕᓂᒃ ᐃᒪᐅᓪᓗ ᐱᐅᓂᖓᓄᑦ ᖃᐅᔨᓴᕐᓂᕐᒥᒃ).

ᑕᒪᓐᓇ ᐊᔪᕈᓐᓃᖅᓴᒐᒃᓴᖅ ᐃᒪᐃᓕᖓᕗᖅ:

ᕿᓚᒻᒥᐅᓇᔭᖅᖢᓂ, ᓄᓇᓕᖕᓂᒃ-ᑕᐅᑐᒐᖃᑦᑎᐊᕐᓗᓂ, ᐊᑐᖅᑕᐅᒐᒃᓴᐅᑦᑎᐊᕐᓗᓂᓗ.
8-ᐸᓗᖕᓂᒃ ᐅᓪᓗᓂᒃ ᐊᑯᓂᐅᑎᒋᓇᔭᖅᖢᓂ: 3-ᓂᒃ ᐅᓪᓗᓂᒃ ᐃᓕᓐᓂᐊᕐᕕᐅᑉ ᐃᒡᓗᕈᓯᐊᓃᓪᓗᓂ 5-ᓂᒡᓗ ᐅᓪᓗᓂᒃ ᑕᖕᒫᖅᓯᒪᕝᕕᖕᒦᓪᓗᓂ ᓄᓇᒥ. 

ᐃᓚᐅᔪᑦ ᐃᓕᑦᑎᕙᒃᐳᑦ ᑕᒪᐃᓐᓂᒃ ᖃᐅᔨᓴᕐᓂᒃᑯᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑯᖃᖏᑦᑎᒍᑦ ᐊᑐᖅᑕᐅᕙᒃᑐᓂᒃ ᑕᕝᕙᙵᑦ N-CAMP-ᒥᑦ ᓄᓇᓕᖕᒥᐅᓂᒡᓗ ᐃᓐᓇᕐᓂᒃ ᐊᔪᕈᓐᓃᖅᓴᖅᑎᑦᑎᔨᓂᒃ, ᐊᓯᖏᓐᓂᓪᓗ ᓄᓇᓕᖕᒥᐅᓂᒃ ᖃᐃᖁᔭᐅᓯᒪᔪᓂᑦ ᐅᖃᓪᓚᒋᐊᖅᑐᖁᔭᐅᓯᒪᔪᓂᑦ. ᑐᓴᖅᑕᐅᔪᒃᓴᐃᑦ ᑎᑎᕋᖅᑕᐅᓯᒪᔪᑦ ᑲᑎᑕᕗᑦ ᒪᓂᒪᑎᑕᐅᕙᒃᐳᑦ ᐃᓚᐅᔪᓄᑦ, ᓄᓇᓕᖕᓄᑦ, ᑭᒃᑯᑐᐃᓐᓇᓄᓪᓗ, ᐅᕘᓇ, www.ncamp.ca.