ᐅᖃᓚᐅᑎᓯᐅᑏᑦ

You are here

ᓄᓇᓕᑦᑕ ᐊᑐᖅᐸᒃᑕᖏᓐᓂᒃ ᐋᖅᑭᒃᓯᓇᓱᐊᕐᓂᖅ

ᓄᓇᓕᑦᑕ ᐊᑐᖅᐸᒃᑕᖏᓐᓂᒃ ᐋᖅᑭᒃᓯᓇᓱᐊᕐᓂᖅ 

ᓄᓇᕗᑦ ᐊᕙᓗᔭᐅᓯᒪᕗᖅ 2-ᒥᓕᐊᓐᑲᓴᑦᑎᐊᑦ ᑭᑉᐹᕆᒃᑐᑦ ᒦᑕᓂᒃ, 33,000 ᐅᖓᑖᓂ ᐊᖏᕐᕋᖃᖅᖢᑎᒃ 25-ᓂᑦ ᓄᓇᓕᖕᓂ ᐃᓄᒋᐊᖕᓂᖏᑦ 130-ᒥᑦ ᐱᒋᐊᖅᖢᓂ 6,699-ᑲᓴᑦᑎᐊᓄᑦ ᑎᑭᖦᖢᒍ.

ᓄᓇᓕᐅᑉ ᐃᓗᐊᓃᑦᑐᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ 

ᓄᓇᕗᒻᒥ 25-ᓂᒃ ᓄᓇᓕᒃᑕᖃᖅᐳᖅ ᐅᑭᐅᖅᑕᖅᑑᑉ ᓄᓇᖓ ᐊᑕᖏᖅᖢᒍ 20-ᐳᓴᓐᑦ ᑲᓇᑕᐅᑉ ᓄᓇᖓᓃᖦᖢᓂ. ᓄᓇᓖᑦ ᐊᑐᖅᐸᒃᑕᖏᓐᓂᒃ ᐊᐅᓚᔪᓐᓇᐅᑎᖃᖅᑎᑦᑎᔨᐅᔪᑦ ᓄᓇᓕᖕᓄᑦ ᓄᓇᕗᒻᒥᐊᒃᓱᕈᕐᓇᖅᑐᒻᒪᕆᐊᓘᕗᖅ - ᐅᖓᓯᒌᒃᑑᑎᐅᓪᓗᑎᒃ, ᐃᓄᒋᐊᒃᓯᕙᓪᓕᐊᑐᐃᓐᓇᖅᖢᑎᒃ, ᐃᒡᓗᒃᓴᐃᑦ ᓴᓇᔭᐅᔭᕆᐊᓖᑦ ᐊᑭᑐᔪᒻᒪᕆᐊᓘᕗᑦ ᐊᒻᒪ ᐱᔨᑦᑎᕋᐅᑎᓂᒃ ᐱᓕᕆᖃᑎᒌᒍᓐᓇᙱᓐᓂᖅ ᑕᒪᕐᒥᒃ ᓄᖅᑲᖓᔾᔪᑕᐅᓕᖅᐸᒃᐳᑦ ᓄᓇᓖᑦ ᐊᑐᖅᐸᒃᑕᖏᓐᓂᒃ ᐊᐅᓚᔪᓐᓇᐅᑎᖃᖅᑎᑦᑎᔨᐅᓇᓱᒃᖢᑎᒃ ᐃᓕᖅᑯᓯᑐᖃᑦᑎᓐᓂᒃ, ᐊᕙᑎᑦᑎᓂᒃ ᐊᒻᒪ ᑮᓇᐅᔭᓕᐅᕈᑎᒋᔭᕆᐊᓕᖕᓂᑦ ᓄᓇᓕᖕᓂ ᐃᑲᔪᖅᑐᐃᔪᓂᒃ. 

ᐱᓇᔪᒐᓱᒃᑲᓗᐊᖅᑎᓪᓗᒋᑦ, ᓄᓇᕗᑦ ᒐᕙᒪᖓᑦ ᐱᓕᕆᓪᓚᑦᑖᕈᒪᕗᑦ ᐱᒻᒪᕆᐅᔪᓂᒃ ᐱᓕᕆᐊᒃᓴᓂᒃ ᐱᔨᑦᑎᕋᕈᑕᐅᔭᕆᐊᓕᖕᓂᓪᓗ ᑲᔪᓯᑎᑦᑎᑦᑎᐊᖁᓪᓗᒋᑦ ᓄᓇᓕᖕᓄᑦ ᑕᒪᐃᓐᓄᑦ. ᐱᕙᓪᓕᐊᑎᑦᑎᓂᒃᑯᑦ ᐊᑐᖅᑎᑦᑏᓐᓇᕐᓂᒃᑯᓪᓗ ᐃᓚᓕᐅᔾᔨᓗᓂ ᓄᓇᓕᖕᓂ ᑲᔪᓯᑎᑕᐅᔪᓐᓇᖅᑐᓂᒃ ᐸᕐᓇᐅᒻᒥᑦ (ICSP), ᓄᓇᓖᑦ ᓇᓗᓇᐃᖅᓯᓗᑎᒃ ᕿᓚᒻᒥᐅᔪᒃᑯᑦ ᐊᑯᓂᐅᔪᒃᑯᓪᓗ ᓄᓇᓖᑦ ᐊᐅᓚᔪᓐᓇᐅᑎᖏᓐᓄᑦ ᐱᕈᖅᓴᐃᔾᔪᑎᒃᓴᓂᒃ ᓴᖅᑭᑎᑦᑎᔾᔪᑕᐅᓂᐊᖅᑐᓂᒃ ᓴᙱᓂᖅᓴᒥᒃ ᖃᓄᐃᙱᓐᓂᖅᓴᓂᒡᓗ ᓄᓇᓕᖕᓂ. ICSP-ᑯᑦ ‘ᐆᒪᕗᑦ’ ᑎᑎᕋᖅᓯᒪᓪᓗᑎᒃ ᐊᓯᔾᔨᖅᐸᓪᓕᐊᖃᑕᐅᕙᒃᖢᑎᒃ ᓄᓇᖓ ᒪᓕᒃᖢᒍ ᐊᒻᒪ ᓯᕗᓂᒃᓴᑦᑎᓐᓂ ᐱᕈᖅᐸᓪᓕᐊᓂᐊᖅᑐᑦ ᓄᓇᖃᖃᑕᐅᔪᓕᒫᑦ ᑕᐅᑐᖅᑰᖅᑕᖏᓐᓂᒃ ᒪᓕᑦᑎᐊᖁᓪᓗᒋᑦ.

ᐊᖅᑯᑏᑦ 

ᓄᓇᕗᒻᒥ ᐊᖅᑯᑎᑕᖃᙱᒻᒪᑦ ᐊᓯᐊᓄᑦ ᓄᓇᓕᖕᒧᙵᐅᖓᔪᒥᑦ. ᓄᓇᓕᖕᓂ ᐊᖅᑯᑎᓕᒫᑲᓴᐃᑦ ᕿᑯᓕᖅᑕᐅᓯᒪᙱᒻᒪᑕ. ᓄᓇᕗᑦ ᒐᕙᒪᖓᑦ ᕿᒥᕐᕈᕙᓪᓕᐊᕗᖅ ᓯᕗᓂᒃᓴᑦᑎᓐᓂ ᐊᖅᑯᑎᓕᐊᖑᑐᐃᓐᓇᕆᐊᓕᖕᓂᑦ ᐅᑭᐅᖅᑕᖅᑐᒥᙶᕐᓗᓂ ᖃᓪᓗᓈᓄᑦ ᑎᑭᓪᓗᒍ. ᐅᓇ ᖃᓄᖅᑑᕈᑎᒃᓴᓄᑦ ᐃᓱᒪᒃᓴᖅᓯᐅᕈᑕᐅᖃᑕᐅᔪᖅ ᑭᕙᓪᓕᕐᒥ ᒫᓂᑑᐸᒧᑦ ᐊᖅᑯᑎᓕᐊᖑᓇᔭᖅᑐᖅ. 

ᑐᓚᒃᑕᕐᕖᑦ 

ᓄᓇᕗᒻᒥ ᐅᓄᙱᑦᑐᑯᓗᖕᓂᒃ ᐃᒪᒃᑯᑦ ᐊᐅᓚᔪᓐᓇᐅᑎᖃᖅᐳᖅ. ᓄᓇᕗᑦ ᑕᑭᓂᖅᐹᒥᑦ ᓯᒡᔭᖃᖅᐳᖅ ᑲᓇᑕᐅᑉ ᐊᕕᒃᑐᖅᓯᒪᓂᓕᒫᖏᓐᓂ, ᑕᒪᕐᒥᑦᑎᐊᑲᓴᒡᓗ ᓄᓇᓖᑦ ᓯᓈᓃᖦᖢᑎᒃ ᐊᑕᐅᓯᑯᓗᒃ ᑭᓯᐊᓂ. ᑕᒪᓐᓇ ᓄᖅᑲᖓᓕᕈᑕᐅᕙᒃᐳᖅ ᐊᕕᒃᓯᒪᓂᕆᔭᑦᑕ ᑮᓇᐅᔭᓕᐅᕈᑎᒃᓴᕆᔪᓐᓇᖅᑕᖏᓐᓄᑦ, ᐃᖃᓗᓕᕆᓂᖅ ᐊᖏᒡᓕᒋᐊᖅᑎᓪᓗᒍ, ᐊᒻᒪ ᐃᒻᒥᒃᑰᕈᓐᓇᖅᓯᒃᑲᓐᓂᕐᓗᑎᒃ.

ᒥᑦᑕᕐᕖᑦ 

ᐊᖅᑯᑎᑕᖃᙱᓐᓂᖓᓄᑦ ᐊᒻᒪ ᐃᒪᒃᑯᑦ ᐊᐅᓚᔪᓐᓇᐅᑎᓂᒃ, ᓄᓇᕗᒻᒥ ᖃᖓᑕᓲᒃᑯᑦ ᖃᓪᓗᓈᓄᙵᐅᔭᕆᐊᖃᖃᑦᑕᖅᐳᑦ.  ᐊᑐᓂᓄᓇᓖᑦ ᒥᑦᑕᕐᕕᖃᕋᓗᐊᖅᑎᓪᓗᒋᑦ, ᓄᓇᓖᑦ ᒥᑭᓐᓂᖅᓴᐃᑦ ᖃᖓᑕᓲᖅᑕᐅᒐᔪᙱᓐᓂᖅᓴᐅᕗᑦ ᐊᖏᓂᖅᓴᒥᒡᓗ ᖃᖓᑕᓲᓂᒃ ᑎᑭᑕᐅᕙᙱᖦᖢᑎᒃ ᐃᑭᒪᕝᕕᒋᔪᓐᓇᖅᑕᖏᓐᓂᒃ. ᑲᓇᑕᐅᑉ ᒐᕙᒪᒃᑯᖏᓐᓂ ᐃᑲᔪᖅᑕᐅᓪᓗᑎᒃ, ᓄᓇᕗᑦ ᐱᕈᖅᑎᑦᑎᓇᓱᒃᐳᑦ ᒥᑦᑕᕐᕖᑦ ᐊᐅᓚᔪᓐᓇᐅᑎᖏᓐᓂᒃ ᓄᓇᓖᑦ ᒥᑦᑕᕐᕕᖏᓐᓂ ᖃᓄᖅᑑᕈᑎᒃᓴᓂᒡᓗ ᕿᒥᕐᕈᕙᓪᓕᐊᓪᓗᑎᒃ.

ᐃᒪᖅ/ᑭᓈᓗᖃᕐᕕᑦ ᑲᒪᒋᔭᐅᓂᖏᑦ/ᐊᒃᑕᕐᕖᑦ ᐊᐅᓚᑕᐅᓂᖏᑦ 

ᓴᓗᒪᔪᒥᒃ ᐃᒪᖃᕆᐊᖃᕐᓂᖅ ᐊᒻᒪ ᐊᒃᑕᖅᑕᐅᕙᓪᓕᐊᔪᑦ ᐊᐅᓚᑕᐅᑦᑎᐊᕆᐊᖃᕐᓂᖏᑦ ᐱᒻᒪᕆᐊᓘᕗᑦ ᓄᓇᓕᒃᐳᑦ ᖃᓄᐃᙱᓐᓂᖅᓴᐅᖁᓪᓗᒋᑦ. ᓄᓇᕗᑦ ᒐᕙᒪᖓᑦ ᐱᕈᖅᑎᑦᑎᓇᓱᖃᑦᑕᖅᐳᑦ ᓄᓇᓖᑦ ᐱᔨᑦᑎᕋᐅᑎᓪᓗᐊᑕᖏᓐᓂᒃ ᓄᓇᓕᖕᓂ ᐃᒪᑦᑎᐊᕙᖃᖅᑎᑦᑎᓇᓱᒃᐸᒃᖢᑎᒃ, ᐃᒪᐅᑉ ᐊᑐᖅᑕᐅᕙᓪᓕᐊᔫᑉ ᑲᒪᒋᔭᐅᕙᓪᓕᐊᓂᖓᓄᑦ, ᐊᕙᑎᑦᑎᓐᓄᑦ ᐊᒃᑐᐃᙱᓐᓂᖅᓴᐅᖁᓪᓗᒋᑦ, ᐊᒻᒪ ᑭᓈᓗᖃᕐᕖᑦ ᐊᑐᖁᓪᓗᒋᑦ ᐊᑑᑎᖃᑦᑎᐊᕐᓂᖅᐹᓂᒃ ᐊᒃᑕᖅᑕᐅᕙᓪᓕᐊᔪᓄᑦ ᐊᐅᓚᑦᑎᔾᔪᑎᓂᒃ. 

ᓄᓇᕗᑦ ᒐᕙᒪᖓᑦ ᐱᓕᕆᐊᖃᒻᒪᕆᒍᒪᕗᑦ ᓈᒻᒪᑦᑎᐊᖅᑐᓂᒃ ᐊᐅᓚᔪᓐᓇᐅᑎᖃᖁᓪᓗᒋᑦ ᓄᓇᓕᖕᓂ ᐱᔨᑦᑎᕋᕈᑕᐅᓪᓗᐊᑕᖅᐸᒃᑐᑦ ᓴᖅᑭᑎᑦᑎᔪᓐᓇᑦᑎᐊᕐᓗᑎᒃ ᑕᒪᐃᓐᓄᑦ ᓄᓇᓕᖕᓄᑦ. ᑭᓈᓗᖃᕐᕕᖕᒧᐊᖅᑕᐅᕙᓪᓕᐊᕙᒃᑐᓂᒃ ᖃᐅᔨᓴᖅᑐᖃᓵᓚᐅᖅᐳᖅ, ᓄᓇᕗᑦ ᒐᕙᒪᖓᓄᑦ ᖃᓄᐃᓕᐅᕈᑕᐅᔭᕆᐊᓕᖕᓂᒃ ᐅᖃᐅᓯᖃᖅᖢᑎᒃ ᐊᑐᖅᑕᐅᔪᓐᓇᕋᔭᖅᑐᑦ ᑕᐅᑦᑐᒃᓴᖓᓄᑦ ᑭᓈᓗᖃᕐᕖᓪᓗ ᑲᒪᒋᔭᐅᓂᒃᓴᖏᓐᓄᑦ. ᐊᒻᒪᓗᑦᑕᐅᖅ, ᓄᓇᕗᑦ ᒐᕙᒪᖓᑦ ᒫᓐᓇ ᐸᕐᓇᐃᕙᓪᓕᐊᓕᖅᐳᑦ ᐊᑯᓂᐅᓂᐊᖅᑐᖅ ᐱᓕᕆᐊᖑᓂᐊᖅᑐᒥᑦ ᑭᓈᓗᖃᕐᕕᓕᕆᔾᔪᑕᐅᕙᒃᑐᑦ ᖃᐅᔨᓴᖅᑕᐅᖁᓪᓗᒋᑦ ᐅᑭᐅᖅᑕᖅᑐᒥ ᐊᐅᓚᑕᐅᕙᒃᑐᑦ. ᑖᓐᓇ ᐃᑲᔫᑕᐅᓂᐊᖅᐳᖅ ᓇᓗᓇᙱᑦᑐᒥᑦ ᐱᓕᕆᔾᔪᑎᓂᒃ ᑲᒪᒋᔭᐅᔾᔪᑎᒃᓴᖏᓐᓄᓪᓗ ᐊᒃᑕᖅᑕᐅᕙᒃᑐᑦ ᐊᐅᓚᑕᐅᑦᑎᐊᖁᓪᓗᒋᑦ.

ᓱᒃᑲᔪᒥᑦ ᖃᕆᓴᐅᔭᒃᑯᑦ ᑐᓴᐅᒪᔾᔪᑕᐅᕙᒃᑐᑦ 

ᓄᓇᕗᑦ ᐊᑐᖃᑦᑕᖅᐳᑦ ᖃᖓᑦᑕᖅᑎᑕᐅᓯᒪᔪᒃᑯᑐᐊᖅ ᑐᓴᐅᒪᔾᔪᑎᓂᒃ ᑐᓴᐅᒪᖃᑎᒌᒍᑎᒋᓂᐊᖅᑕᖏᓐᓄᑦ. ᓄᓇᖓ ᐊᖏᔪᒻᒪᕆᐊᓘᓪᓗᓂ ᐅᑭᐅᖅᑕᖅᑑᓪᓗ ᖃᓄᐃᓕᖓᓕᕐᓂᕆᔭᖓ ᓴᖅᑭᑎᑦᑎᓪᓗᓂ ᐊᒃᓱᕈᕐᓇᖅᑐᓂᒃ ᐱᕙᓪᓕᐊᑎᑦᑎᓇᓱᖕᓂᕐᒧᑦ ᓄᓇᒦᑦᑐᓂᒃ ᑐᓴᐅᒪᔾᔪᑎᒃᓴᓂᒃ. ᑕᒪᓐᓇ ᐱᔾᔪᑎᒋᓪᓗᒍ, ᓄᓇᕗᑦ ᐊᑐᖃᑦᑕᖅᐳᑦ ᓴᖅᑭᑎᑕᐅᓯᒪᔪᓂᒃ ᖃᖓᑦᑕᖅᑎᑕᐅᓯᒪᔪᒃᑯᑦ ᑐᓴᐅᒪᖃᑎᒌᒍᑎᓂᒃ. ᐱᔪᓐᓇᕐᓂᕆᔭᐅᔪᑦ ᐊᑭᖏᓐᓄᓪᓗ ᐊᒃᑐᐃᑐᐃᓐᓇᕆᐊᓖᑦ ᐱᑕᖃᖅᑐᐃᓐᓇᐅᕗᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᑐᓴᐅᒪᔪᓐᓇᐅᑎᓄᑦ. ᑭᒃᑯᑐᐃᓐᓇᐃᑦ ᐱᕙᓪᓕᐊᔪᓕᕆᓂᕐᓗ ᓄᓇᕗᒻᒥ ᐊᑐᖃᑦᑕᖅᐳᑦ ᐅᒃᐱᕆᔭᐅᑦᑎᐊᕈᓐᓇᖅᑐᒥᒃ, ᐊᑭᑐᓗᐊᙱᑦᑐᒥᒃ ᓱᒃᑲᔪᒥᓪᓗ ᑐᓴᐅᒪᑎᑦᑎᔾᔪᑎᓂᒃ ᖃᕆᓴᐅᔭᒃᑯᑦ ᑐᓴᐅᒪᖃᑎᒋᒍᓐᓇᖅᖢᑎᒃ. ᓄᓇᕗᑦ ᒐᕙᒪᖓᑦ ᐊᑐᖃᑦᑖᓂᓕᖅᐳᑦ ᓄᑖᓂᒃ ᐊᑐᖅᑕᐅᕙᓕᖅᑐᓂᒃ ᐱᓕᕆᐊᒥᓂᒃ ᓴᖅᑭᑎᑦᑎᕙᓪᓕᐊᕙᒃᖢᑎᒃ ᓱᒃᑲᔪᒥᒃ ᑐᓴᐅᒪᖃᑎᒌᒍᑎᒥᒃ ᐊᑐᖅᖢᑎᒃ - ᐅᖃᓘᑎᒃᑯᑦ ᐋᓐᓂᐊᖅᑐᓕᕆᔾᔪᑎ, ᑕᕐᕆᔭᐅᑎᒃᑯᑦ ᐅᖃᓗᖃᑎᒌᒃᐸᒃᖢᑎᒃ ᓘᒃᑖᓂᒃ ᐋᓐᓂᐊᕐᕕᖕᓂᓪᓗ, ᐆᒃᑑᑎᒋᔭᐅᔪᓐᓇᖅᐳᖅ. ᓱᒃᑲᔪᒃᑯᑦ ᖃᕆᓴᐅᔭᒃᑰᕈᑎᑦ ᓴᖅᑭᑎᑕᐅᓯᒪᓕᖅᐳᑦ ᓄᓇᓕᖕᓂ ᑕᒪᐃᓐᓂᒃ ᓄᓇᕗᒻᒥ.

ᐆᒻᒪᖅᑯᑎᓕᕆᓂᖅ 

ᓄᓇᕗᑦ ᐊᑐᕆᐊᖃᓪᓚᕆᒃᐳᑦ ᑲᓇᑕᒧᐊᖅᑕᐅᕙᓪᓕᐊᕙᒃᑐᒥᑦ ᐅᖅᓱᐊᓗᖕᓂᒃ ᖃᐅᑕᒫ ᐃᓅᓯᑦᑎᓐᓂ ᐊᑐᕆᐊᖃᖅᐸᒃᑕᑦᑎᓐᓂᒃ. ᑎᓴᒪᑦ ᐅᒥᐊᕐᔪᐊᒃᑯᑦ ᐅᓯᔭᐅᓪᓗᐊᑕᖅᐸᒃᑐᑦ 114-ᒥᓕᐊᓐ ᓖᑕᐅᕗᑦ ᐅᖅᓱᐊᓗᒃ P50 ᐅᖅᑰᓴᐅᑎᒃᓴᓄᑦ, 33.4-ᒥᓕᐊᓐ ᓖᑕ ᐅᖅᓱᐊᓗᒃ ᐆᒻᒪᖅᑯᑎᒃᓴᓄᑦ, 17.8-ᒥᓕᐊᓐ ᓖᑕ ᐅᖅᓱᖅ ᐃᖏᕐᕋᔾᔪᑎᓄᑦ ᐊᒻᒪ 43.8-ᒥᓕᐊᓐ ᓖᑕ ᑎᖕᒥᓲᖅᓯᐅᑦ ᖃᖓᑕᓲᓄᑦ. ᐅᖅᓱᐊᓗᖕᓂᑦ ᓄᓇᓕᖕᓄᑦ ᐅᓯᑲᖅᑕᖃᑦᑕᖅᐳᑦ ᐊᐅᔭᒃᑯᑦ ᖃᑦᑕᐅᔭᙳᐊᑦ ᐃᒻᒥᖅᓱᖅᑕᐅᕙᒃᖢᑎᒃ ᐊᕐᕌᒍᓕᒫ ᐊᑐᖅᑕᐅᓂᐊᖅᑐᒥᒃ. 

ᓄᓇᕗᑦ ᒐᕙᒪᖓᑦ ᐊᑭᓖᖃᑦᑕᖅᐳᑦ ᑖᔅᓱᒧᖓ ᐆᒻᒪᖅᑯᑎᒧᑦ ᑕᒪᐃᓐᓄᑦ ᓂᐅᕕᖅᑕᐅᕙᒃᑐᓄᑦ ᐃᑲᔪᖅᑕᐅᔾᔪᑎᑎᒍᓪᓗ ᓄᓇᕗᒻᒥᐅᓄᑦ. ᓄᓇᕗᑦ ᒐᕙᒪᖓᑦ ᐊᖏᔪᒻᒪᕆᐊᓗᖕᒥᑦ ᑮᓇᐅᔭᖅᑑᑎᖓᑕ ᐃᓚᖓᓂᒃ ᐊᑐᖃᑦᑕᖅᐳᑦ ᐆᒻᒪᖅᑯᑎᓄᑦ. 

ᓄᓇᕗᑦ ᒐᕙᒪᖓᑦ ᐆᒻᒪᖅᑯᑎᓕᕆᓂᕐᒧᑦ ᐸᕐᓇᐅᑎᖓ ᖃᔅᓯᑲᓪᓚᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐋᖅᑭᒃᓯᓯᒪᕗᑦ ᐊᐅᓚᑦᑎᔾᔪᑕᐅᓂᐊᖅᑐᓂᒃ ᐊᑭᖏᓐᓄᑦ, ᐊᑐᖅᑕᐅᓂᖓᑕ ᒥᒃᖠᒋᐊᕈᑎᒃᓴᖓᓄᑦ, ᐊᒻᒪ ᓴᖅᑭᔮᖅᑎᑦᑎᓇᓱᖕᓂᕐᒧᑦ ᓇᖕᒥᓂᖅᓱᕈᓐᓇᕐᓂᖅᓴᐅᖁᓪᓗᒋᑦ ᐆᒻᒪᖅᑯᑎᓕᕆᓂᕐᒥᑦ. ᐅᑯᓂᖓ ᐃᓚᖃᖅᐳᑦ ᐊᓯᐊᓂᖔᖅ ᐆᒻᒪᖅᑯᑎᖃᕈᓐᓇᖅᓯᓗᑎᒃ ᐊᖏᔪᒥᑦ ᓇᓗᓇᐃᔭᖅᓯᒪᑦᑎᐊᖅᑐᒥᓪᓗ, ᓲᕐᓗ ᑰᒃᑯᑦ ᐆᒻᒪᖅᑯᑎᖃᕐᓂᖅ, ᓯᕿᓂᕐᒧᑦ ᐊᓄᕆᒧᓪᓗ ᐆᒻᒪᖅᑯᑎᓕᐅᕐᓂᖅ ᑭᒡᓕᖃᖅᑎᑕᐅᓂᖅᓴᓄᑦ. ᑭᖑᓪᓕᖅᐹᕆᓕᕐᓗᒍ, ᓄᓇᕗᑦ ᒐᕙᒪᖓᑦ ᕿᒥᕐᕈᕙᓪᓕᐊᖕᒥᔪᑦ ᐆᒻᒪᖅᑯᑎᒥᒃ ᐊᑐᓗᐊᖅᑕᐃᓕᒪᓂᕐᒧᑦ ᐱᓕᕆᐊᖑᔪᓐᓇᖅᑐᓂᒃ ᐆᒻᒪᖅᑯᑎᒥᒃ ᐊᑐᓗᐊᖃᑦᑕᖅᑐᑦ ᒥᒃᖠᒋᐊᖅᑎᑦᑐᒪᓪᓗᒋᑦ ᑕᒪᕐᒥᒃ ᐅᖅᓱᐊᓗᖕᒥᑦ ᐊᑐᕆᐊᖃᖃᑦᑕᖅᐳᑦ ᒥᒃᖠᒋᐊᖅᑎᒃᑲᓐᓂᕈᒪᓪᓗᒋᑦ.

 

Download the PDF file

Category(ies):