ᐅᖃᓚᐅᑎᓯᐅᑏᑦ

You are here

ᑲᓇᑕᒥ ᐊᑐᖅᑕᐅᕙᒃᑐᕕᓃᑦ ᑰᖏᑦ

ᑲᓇᑕᐅᑉ ᑰᖏᑦ ᓇᒧᑐᐃᓈᖓᒻᒪᑕ ᐊᖏᔪᒻᒪᕆᐅᓪᓗᑎᒃ ᓇᒧᑐᐃᓈᖓᓪᓗᑎᒡᓗ. ᑲᓇᑕᒥ ᑰᑦ ᐊᑐᖅᑕᐅᕙᒃᑐᑐᖃᐃᑦ ᐃᓂᖁᓇᐅᑎᒋᒻᒪᒋᑦ, ᑲᔾᔮᕐᓇᓗᖁᑕᐅᓪᓗᑎᒃ ᓄᓇᑐᐃᓐᓇᒧᑦ ᐊᒻᒪᓗ ᐱᖅᑯᓯᑐᖃᕆᓪᓗᓂᒋᑦ. ᑖᒃᑯᐊ ᑲᓇᑕᒥ ᑰᑦ ᐊᑐᖅᑕᐅᕙᒃᑐᑐᖃᐃᑦ ᐊᐅᓚᑦᑎᔨᖏᑦ (CHRS)-ᑯᑦ ᑲᓇᑕᓕᒫᒧᑦ ᑰᖕᓂᒃ ᐱᐅᖅᓱᐊᕋᓱᐊᖅᑎᐅᕗᑦ. ᐱᐅᓯᒋᐊᖅᑎᑦᑎᔨᐅᕗᑦ, ᓴᐳᔾᔨᓯᒪᔨᐅᕗᑦ, ᐊᒻᒪ ᐋᖅᑭᒃᓯᑎᑦᑎᓯᒪᔨᐅᕗᑦ ᑲᓇᑕᒥᐅᑦ ᑰᖏᓐᓂᒃ ᐊᑐᖅᑕᐅᒐᔪᑦᑐᓂᒃ, ᐊᒻᒪ ᑲᒪᒋᔭᖃᖅᑎᐅᕗᑦ ᑲᓇᑕᐅᑉ ᑰᓪᓚᕆᖁᑎᖏᓐᓂᒃ ᑲᒪᒋᔭᐅᑦᑎᐊᖅᑎᑦᑎᓂᒃᑯᑦ ᐱᐅᓕᐊᖃᕐᓂᒃᑯᓪᓗ ᑰᖕᓂᒃ. ᐊᔪᕐᓇᑲᓴᑦᑎᐊᕐᒪᑦ ᑲᓇᑕᒥᐅᑦ ᑰᖏᓐᓂ ᐃᓚᐅᓕᕆᐊᒃᓴᖅ, ᓲᖃᐃᒻᒪ ᐱᓕᕆᐊᖑᓇᓱᖕᓂᖓ ᐱᔭᕆᑐᔫᖕᒪᑦ ᐊᑯᓂᐅᓲᖑᓪᓗᓂᓗ. ᒪᓕᒃᑕᐅᔭᕆᐊᓖᑦ ᑕᒪᑐᒧᖓ ᐱᑕᖃᕐᒥᖕᒪᑕ ᐋᖅᑭᑦᑎᐊᖅᓯᒪᖁᔨᓂᕐᒧᑦ ᑲᓇᑕᐅᑉ ᑰᖏᓐᓂᒃ ᓂᕈᐊᕆᔭᐅᔪᓐᓇᕐᓂᕐᒧᑦ ᐱᐅᖃᑕᐅᔪᓐᓇᕐᓂᕐᒧᓪᓗ ᓇᓗᓇᐃᖅᑕᐅᖃᑕᐅᔪᓐᓇᖁᓪᓗᒋᑦ ᑲᓇᑕᐅᑉ ᑰᖁᑎᓪᓗᐊᑕᖏᓐᓂ. ᑰᑦ ᓇᓗᓇᐃᖅᑕᐅᓯᒪᔭᕆᐊᖃᖅᐳᑦ ᐱᒻᒪᕆᐅᓂᖏᓐᓂᑦ ᐊᒻᒪᓗ ᑲᔾᔭᐅᓴᕝᕕᐅᔪᓐᓇᕐᓗᑎᒃ.  ᐃᓄᓕᒫᓄᑦ ᐃᑲᔪᖅᑐᖅᑕᐅᓯᒪᔪᖅ ᓂᕈᐊᖅᑕᐅᓪᓗᓂᓗ ᐆᒃᑐᕋᖅᑕᐅᓂᖓ, ᐊᒻᒪᓗ ᓇᓗᓇᐃᖅᑕᐅᓯᒪᔭᕆᐊᖃᕆᕗᑦ ᓈᒻᒪᒃᑐᒃᑯᑦ ᐊᑐᐊᖅᓯᑦᑎᐊᖅᓯᒪᓂᖏᓐᓂᒃ ᒪᓕᑦᑎᐊᕐᓂᐊᕐᓂᖏᓐᓂᒡᓗ ᐱᐅᔫᑎᑕᐅᑦᑎᐊᕐᓂᐊᕐᓂᖓᓂᒃ. ᐊᑐᓕᖅᑎᑦᑎᓯᒪᕗᑦ ᑲᓇᑕᒥ ᑰᑦ ᐊᑐᖅᑕᐅᕙᒃᑐᑐᖃᕐᓂᑦ ᒪᕐᕉᐃᓕᖅᑲᔪᒥᒃ ᐊᑐᐊᒐᓕᒃ ᓂᕈᐊᖅᓯᓕᕌᖓᒥᒃ ᐊᑦᑎᖅᓯᓕᕌᖓᒥᒡᓗ. ᓄᓇᕗᒻᒥ, ᓄᓇᕗᑦ ᒥᕐᖑᐃᖅᓯᕐᕕᓕᕆᔨᒃᑯᖏᑦ ᐱᓕᕆᖃᑎᖃᑦᑎᐊᖅᐸᒃᑐᑦ ᓄᓇᓕᖕᓂᒃ ᓂᕈᐊᖅᓯᓇᓱᐊᖅᑎᓪᓗᒋᑦ ᑰᖕᓂᒃ ᐊᑐᕆᐊᖃᖅᑐᑦ ᒪᓕᒃᖢᒋᑦ, ᐊᒻᒪᑦᑕᐅᖅ ᓄᓇᓕᖕᓂᑦ ᑐᕌᒐᕆᔭᐅᔪᓂᒃ. ᑰᖕᓂᒃ ᓂᕈᐊᕆᔭᖃᖅᓯᒪᓃᑦ ᓇᓗᓇᐃᖅᑕᐅᓲᖑᕗᑦ ᑲᓇᑕᒥᐅᑦ ᑰᖁᑎᖏᑕ ᑲᑎᒪᔨᖏᓐᓄᑦ, ᐊᒻᒪᓗ ᑖᒃᑯᐊ ᑲᑎᒪᔨᐅᔪᑦ ᐱᖁᔨᓂᕐᒥᖕᓂᒃ ᓇᓗᓇᐃᖅᓯᕙᒃᑐᑦ ᒐᕙᒪᑐᖃᒃᑯ ᒥᓂᔅᑕᖓᓄᑦ, ᑖᓐᓇᓗ ᐊᖏᖅᐸᒃᐳᖅ ᑐᒃᓯᕋᐅᑕᐅᔪᒥᒃ ᑭᓯᐊᓂᑦᑕᐅᖅ ᒪᓕᑦᑎᐊᖅᓯᒪᒃᐸᑕ ᑲᓇᑕᒥ ᑰᑦ ᐊᑐᖅᑕᐅᕙᒃᑐᑐᖃᐃᑦ ᐊᐅᓚᑦᑎᔨᖏᑦ (CHRS)-ᑯᑦ ᐊᑐᕆᐊᓕᖏᓐᓂᒃ.  ᑰᒃ ᓂᕈᐊᕆᔭᐅᔪᖅ ᐃᓚᐅᑎᑕᐅᓕᖅᐸᒃᐳᖅ ᐊᐅᓚᑕᐅᓂᐊᕐᓂᖓᓄᑦ ᐸᕐᓇᐅᑎᑦ ᐅᕝᕙᓘᓐᓃᑦ ᐱᖅᑯᓯᑐᖃᓕᕆᓂᕐᒧᑦ ᐊᑐᖅᑕᐅᕙᒃᑐᑦ ᐱᓯᒪᔭᐅᓕᖅᐸᑕ ᑲᑎᒪᔨᐅᔪᓂᑦ ᒐᕙᒪᒃᑯᖏᓐᓂᓪᓗ ᓂᕈᐊᖅᓯᓇᓱᐊᖅᑐᕕᓃᑦ. ᑖᓐᓇ ᐱᕙᓪᓕᐊᑎᑕᐅᓂᖓ ᐊᐅᓚᑕᐅᓂᐊᕐᓂᖓᓄᑦ ᐸᕐᓇᐅᑎ ᐅᕝᕙᓘᓐᓃᑦ ᐱᖅᑯᓯᑐᖃᓕᕆᓂᕐᒧᑦ ᐊᐅᓚᑦᑎᓂᐅᕙᒃᑐᑦ ᐊᖏᖃᑎᒋᔭᐅᓯᒪᓗᑎᒃ ᐃᓄᓕᒫᓂᑦ. ᑕᒪᕐᒥᑦᑎᐊᖅ ᓴᐳᓐᓂᐊᕐᓂᕐᒧᑦ ᐱᓕᕆᐊᖑᕙᒃᑐᑦ ᑲᓇᑕᒥᐅᑦ ᑰᖁᑎᖏᓐᓂᒃ ᒪᓕᒃᐸᒃᐳᑦ ᒫᓐᓇ ᐊᑐᖅᑐᓂᒃ ᒪᓕᒐᕐᓂᒃ ᐊᑐᐊᒐᕐᓂᒡᓗ, ᐃᒃᐱᒍᓱᑦᑎᐊᕆᓪᓗᑎᒃ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ, ᓄᓇᓕᖕᓂᒃ, ᓇᖕᒥᓂᖅ ᓄᓇᖃᐅᑎᖏᓐᓂᒃ, ᐊᓯᖏᓐᓂᒡᓗ ᐱᖃᖃᑕᐅᔪᓂᒃ.  ᑕᒪᕐᒥᒃ ᑎᓴᒪᐅᔪᑦ ᓄᓇᕗᑦ ᓂᕈᐊᕆᓯᒪᔭᖏᑦ ᐱᑕᖃᓕᖅᑎᓯᒪᔭᖏᓪᓗ ᐃᒻᒪᕐᓂᓴᐅᔪᑦ ᑰᑦ ᐱᕕᖃᖅᑎᑦᑎᔪᓐᓇᕐᒪᑕ ᖃᓄᐃᓕᐅᕈᓘᔭᕈᓐᓇᕐᓂᕐᒥᒃ ᐊᔾᔨᒌᖏᑦᑐᓂ ᑕᒫᓂᕐᕆᔾᔪᓯᕐᓂᒃ. ᐊᐅᓚᑕᐅᕗᓪᓗ ᐊᑕᐅᓯᐅᖏᑦᑐᓂᑦ ᓄᓇᕐᔪᐊᕐᒥ ᐱᑕᖃᕈᓐᓇᖅᑐᑦ ᖁᕕᐊᓱᖕᓂᑐᐃᓐᓇᐅᖏᑦᑐᒥᒃ ᐃᒫᓂ, ᑭᓯᐊᓂᑦᑕᐅᖅ ᐊᑲᐅᒋᔭᕐᓂᒥᒃ ᓄᓇᐃᓐᓇᕐᒥ ᑲᔾᔮᕐᓇᖅᑐᐊᓗᒥᑦ. ᑰᒃᑯᑦ ᑲᔾᔭᐅᓴᒃᑐᓄᑦ ᐊᐅᓪᓚᕐᕕᐅᒐᔪᑦᑐᑦ ᐊᑐᖅᑕᐅᔪᓐᓇᖅᑐᓂ ᓄᓇᕗᒻᒥ. ᓄᓇᕗᒻᒥ ᑰᑦ ᑰᑦᑎᐊᖅᑐᑦ ᓱᓕ, ᐱᓗᐊᕈᑕᐅᓯᒪᕗᓪᓗ ᐃᓄᖕᓂᑦ ᓱᕋᔪᒃᑕᐅᓯᒪᔪᑦ, ᑰᒍᓐᓃᖅᑎᑕᐅᕙᑦᑐᑦ  ᐃᓄᖃᖏᑦᑎᐊᖅᑐᒥ ᐃᓕᖅᑯᓯᖅᓱᕐᓂᕐᒥᒃ ᑕᒫᓂ ᓄᓇᒥᑦ.  ᓯᒡᔭᖏᑦ ᐊᖏᕐᕋᕆᔭᐅᕗᑦ ᐃᒻᒪᑲᓪᓚᓐᓂᑦ ᐊᒥᓱᒻᒪᕆᖕᓄᑦ ᑐᒃᑐᓄᑦ ᐊᒻᒪᓗ ᐃᒻᒪᕐᓂᓴᓪᓚᕆᖕᓄᑦ ᐅᒥᖕᒪᖕᓄᑦ, ᐃᒻᒪᑲᓪᓚᒻᒪᕆᐊᓗᒡᓗ ᐱᑕᖃᓕᓚᐅᖅᓯᒪᔪᕕᓂᕐᓄᑦ. ᑭᒡᒐᕕᐊᕐᔪᐃᑦ, ᑭᒡᒐᕖᑦ, ᑳᔫᑦ ᐊᒻᒪ ᕿᓐᓄᐊᔪᐊᑦ ᐃᕙᓲᖑᖕᒪᑕ ᖃᖅᑲᖏᓐᓂ ᑰᑉ ᓯᓈᓂ ᕿᒡᒍᒐᓚᖏᓐᓂ, ᐊᒻᒪ ᖃᖅᓴᐅᑦ, ᑲᖑᐃᑦ, ᖁᒡᔪᐃᑦ, ᒥᑏᓪᓗ ᓂᕆᕙᒃᑭᓪᓗᑎᒃ ᑰᑉ ᑰᓗᐊᖏᓐᓂᖏᓐᓂᑦ ᐃᒫᓂᑦ, ᖃᓂᒋᔭᖏᓐᓂᓗ ᑕᓰᑦ ᓯᓂᖏᓐᓂ ᐃᕙᓲᖑᓪᓗᑎᒃ.

ᑕᒪᒃᑯᓂᖓ ᐊᖑᓇᓱᒃᑎᐅᕙᖕᒥᔪᑦ ᓂᕐᔪᑏᑦ- ᑎᕆᒐᓂᐊᑦ, ᐊᒪᕈᐃᑦ, ᖃᕝᕕᒑᕐᔪᐃᑦ, ᓇᓄᐃᑦ ᐊᒃᖤᐃᓪᓗ – ᑰᑉ ᓯᓈᓂ ᑎᓱᖅᑲᔮᖑᓂᖏᓐᓂ ᐊᖑᓇᓱᒃᐸᒃᑭᕗᑦ, ᐃᓚᖏᓪᓗ ᐃᖃᓗᒐᓱᓲᖑᓪᓗᑎᒃ ᑰᖕᓂ. ᑖᒃᑯᐊ ᑰᑦ ᓄᓇᖃᕐᕕᐅᕙᖕᓂᑰᕗᑦ ᐃᓄᖕᓂᑦ ᐊᑐᐊᖅᓯᓪᓗᑎᒃ ᑰᖕᒥᒃ ᐊᖑᓇᓱᒃᐸᒃᖢᑎᒃ ᑲᑎᙵᔪᓂᒃ ᑐᒃᑐᓂᒃ, ᖃᔭᖅᑐᖅᖢᑎᒃ ᐃᑳᕐᕕᐅᕙᒃᑐᒃᑯᑦ ᑐᒃᑐᓄᑦ. ᐊᖑᓇᓱᒡᕕᐅᕙᖕᓂᕕᓂᖏᑦ ᓱᓕ ᒫᓐᓇ ᓇᓗᓇᙱᓚᑦ, ᐅᔭᖅᑲᑦ ᓇᓗᓇᐃᒃᑯᑕᕆᖕᒪᒋᑦ ᓄᓇᒥ ᐃᑲᔪᖅᑎᒋᕙᒃᑕᕕᓂᖏᑦ ᑐᒃᑐᓐᓇᓱᒃᑎᓪᓗᒋᑦ ᐅᕝᕙᓘᓐᓃᑦ ᐋᖅᑭᒃᐸᒃᑕᕕᓂᖏᑦ ᓄᓇᒋᒐᒥᔾᔪᒃ ᐊᑲᐅᓯᕙᓪᓕᕈᑎᒋᓪᓗᓂᔾᔪᒃ. ᑖᒃᑯᐊ ᐃᓚᖃᕆᕗᑦ ᕿᖕᓂᕕᕕᓂᕐᓂᒃ ᐸᓂᖅᑎᓯᒪᔪᓂᒃ ᓂᕿᓂᒃ ᐃᖃᓗᖕᓂᒡᓘᓐᓃᑦ, ᑐᑭᓕᕇᒃᓱᖅᓯᒪᔪᑦ ᐅᔭᖅᑲᑦ ᓯᓈᓂ, ᐊᑐᐊᖅᑕᐅᔪᓐᓇᖁᓪᓗᒋᑦ ᓄᔪᐊᖅᑐᓂᑦ ᑐᒃᑐᓂᑦ ᑐᖁᑕᐅᕝᕕᒋᓇᔭᖅᑕᖓᓄᑦ ᐊᖑᓇᓱᒃᑎᓂᑦ ᐹᕐᖑᖅᖢᑎᒃ ᐅᐹᔭᖅᑐᓂᑦ ᑕᓗᐊᖅᑑᑎᒋᓪᓗᓂᔾᔪᒃ (ᑕᓗᐃᑦ) ᐱᓯᒃᓯᓂᒃ ᖃᕐᔪᓂᒡᓗ ᐊᑐᖅᖢᑎᒃ.  

ᓱᓕ ᐃᓄᐃᑦ ᐃᓚᖏᑦ ᑰᑉ ᓯᓈᒍᑦ ᐊᐅᔭᒃᑯᑦ ᑐᒃᑐᓐᓇᓱᒃᐸᒃᐳᑦ ᐱᕈᖅᑐᖏᓐᓂᒡᓘᓐᓃᑦ ᐊᕝᕗᕆᐊᖅᐸᒃᐳᑦ, ᐊᑐᖅᖢᑎᒃ ᐃᒻᒪᑲᓪᓚᒃ ᓄᓇᖃᕐᕕᐅᕙᒃᑐᕕᓂᕐᓂᒃ ᕿᒪᐃᓯᒪᑲᐃᓐᓇᕐᖢᑎᒃ ᖃᓄᐃᓕᐅᕈᓘᔭᕐᓂᕐᒥᒃ ᓄᓇᓕᖕᓂ, ᐃᓅᑲᐃᓐᓇᓚᐅᑲᒐᓱᐊᖅᖢᑎᒡᓗ ᓴᐃᒪᓇᖅᑐᒥᒃ ᓄᓇᐃᓐᓇᕐᒥ, ᓈᓚᒋᐊᖅᓯᒪᓪᓗᑎᒃ ᓄᓇᐃᓐᓇᕐᒥ ᓯᕗᓕᖏᑕ ᐊᑐᖅᐸᓚᐅᖅᑕᖓᒍᑦ. ᐃᒻᒪᑲᓪᓚᓐᓂᑦ, ᑖᒃᑯᐊ ᑰᑦ ᐊᖅᑯᑕᐅᓚᐅᖅᐳᑦ ᐆᒻᒪᑎᖓᓄᑦ ᓄᓇᕗᑦ, ᐊᐅᓛᖅᑐᓄᑦ ᐊᖅᑯᑎᒋᔭᐅᓪᓗᑎᒃ ᓄᓇᙳᐊᓕᐊᕆᓯᒪᖏᑦᑐᒃᑯᑦ ᓄᓇᒃᑯᑦ ᐅᑭᐅᖑᑎᓪᓗᒍ ᐊᑐᒐᕐᓂᕐᓂᖅᓴᐅᓂᖏᓐᓄᓪᓗ ᐊᐅᓛᖅᑐᓄᑦ ᐅᒥᐊᒃᑯᑦ ᐊᕗᖓ ᐅᖓᓯᒡᔫᒥᔪᒧᑦ ᓅᑦᑐᒪᔪᓄᑦ ᐅᑭᐅᖅᑕᖅᑐᒥ. ᐃᖏᕐᕋᕙᒃᑐᕕᓃᑦ ᑕᒪᒃᑯᐊ ᓲᕐᓗ ᓵᒥᐅᓪ Hᐆᕐᓐ (Samuel Hearne), ᕗᓛᓐᑭᓚᓐ, (Franklin), ᑕᐃᒃᑯᐊᓗ ᓄᑲᕇᑦ ᑎᐅᕈᓪᑯᑦ (Tyrrell) ᐊᑐᓚᐅᖅᓯᒪᒋᕙᖓᑦ ᑰᒃ ᐊᖅᑯᑎᒋᓪᓗᓂᔾᔪᒃ, ᐅᔭᕋᒃᓯᐅᖅᖢᑎᒃ, ᐊᖅᑯᑎᒋᓪᓗᓂᔾᔪᒃ ᐅᑭᐅᖅᑕᖅᑐᒧᑦ ᐊᒻᒪ ᐅᑭᐅᖅᑕᖅᑐᒧᑦ ᐊᖅᑯᑕᐅᖃᑦᑕᕐᓂᐊᓕᖅᑐᒃᑯᑦ, ᕿᓯᖕᓄᑦ ᒥᖅᑯᓕᖕᓄᑦ ᓂᐅᕐᕈᑎᖃᖃᑦᑕᓕᕈᓐᓇᖁᓪᓗᒋᑦ. ᐅᓪᓗᒥᐅᓕᖅᑐᖅ, ᓱᓕ ᑕᒪᓐᓇ ᓄᓇ ᐊᑐᖅᑕᐅᕙᒃᐳᖅ, ᐃᓄᐃᑦ ᓴᑭᑐᐃᓐᓇᖅ ᓄᓇᕐᔪᐊᒥᑦ ᐅᐱᒍᓱᒃᑐᑦ ᐊᓐᓂᕐᓇᖅᑑᓂᖓᓂᒃ ᓄᓇᐃᓐᓇᕐᒥ ᑕᒫᓂ, ᑕᑯᔪᒪᓪᓗᑎᒡᓗ ᐱᐅᔪᒻᒪᕆᐅᓂᖓᓂᒃ ᓱᕈᖅᑕᐅᓯᒪᖏᓐᓂᖓᓂᒡᓗ ᓄᓇᖓ.

ᐱᒻᒪᕆᐅᒍᓱᖕᓂᕐᒧᑦ ᐃᓅᓯᑐᖃᕐᒥᒃ ᐱᐅᓯᑐᖃᖓᓂᒡᓗ ᐊᑐᖅᑕᐅᕙᒃᑐᕕᓂᐅᑉ, ᑖᒃᑯᐊ ᐱᖓᓱᑦ ᓄᓇᕗᒻᒥ ᑰᖁᑎᖏᑦ ᓇᓗᓇᐃᖅᑕᐅᓯᒪᕗᑦ ᐊᑦᑎᖅᑕᐅᓪᓗᑎᒡᓗ “ᑲᓇᑕᒥ ᐊᑐᖅᑕᐅᕙᒃᑐᕕᓃᑦ ᑰᖏᑦ” – ᐊᑎᖃᖅᑐᑦ ᑰᒃ (Thelon), ᓴᕐᕙᖅᑑᖅ (Kazan), ᐊᒻᒪᓗ ᑰᔾᔪᐊᖅ  (Soper). ᑎᓴᒪᒋᔭᐅᓪᓗᓂ, ᑖᓐᓇ ᖁᕐᓗᖅᑑᑉ ᑰᖓ, ᓂᕈᐊᖅᑕᐅᖃᑕᐅᖁᔭᐅᓯᒪᓕᕆᕗᖅ ᑕᐃᔭᐅᖃᓯᐅᑎᓕᖁᓪᓗᒍ ᑲᓇᑕᒥ ᐊᑐᖅᑕᐅᕙᒃᑐᕕᓃᑦ ᑰᖏᓐᓄᑦ. ᒫᓐᓇ ᐱᒋᐊᖅᓯᒪᓕᖅᐳᑦ ᐊᑐᖅᑕᐅᔭᕆᐊᓕᖕᓂᒃ ᐊᑐᓕᖅᖢᑎᒃ ᑖᔅᓱᒪ ᐃᓚᓕᐅᑎᔭᐅᔪᓐᓇᕈᑎᒃᓴᖓᓂᒃ ᐊᖏᖅᑕᐅᓂᕐᒧᑦ ᐊᑐᕆᐊᓕᖕᓂᒃ, ᑕᒪᓐᓇᓗ ᐱᔭᕇᓛᕋᓱᒋᔭᐅᓪᓗᓂ 2008-ᒥ. ᓄᓇᕗᒻᒥ ᐱᖓᓲᔪᑦ ᓇᓗᓇᐃᖅᑕᐅᓯᒪᔪᑦ ᓂᕈᐊᕆᔭᐅᖃᑕᐅᓯᒪᓪᓗᑎᒡᓗ ᑲᓇᑕᒥ ᐊᑐᖅᑕᐅᕙᒃᑐᕕᓃᑦ ᑰᖁᑎᖏᓐᓄᑦ ᑖᒃᑯᐊᓗ ᑕᐃᔭᐅᕗᑦ ᓯᕗᓕᖅᑎᐅᑉ ᑰᖁᑎᖏᑦ, ᐊᑐᓂᓪᓗ ᐊᑐᕐᓂᖃᒻᒪᕆᒃᓯᒪᕗᑦ ᓴᖅᑭᑕᐅᓂᖓᓂᒃ ᐃᓄᐃᑦ ᐱᖅᑯᓯᑐᖃᖓ ᐊᕐᕌᒍᒐᓴᖕᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᑲᓇᑕᒥ ᐃᑦᑕᕐᓂᓴᓄᑦ ᑰᓂᑦ ᓄᓇᕗᒻᒥᑦ, ᓇᕿᓪᓗᒋᑦ ᑲᓱᕐᕕᖏᑦ ᓇᓗᓇᐃᔭᖅᑕᐅᓯᒪᔪᑦ ᒥᑦᓵᓄᑦ: 

Coppermine

ᑲᔮᓐ ᑰᖓ

Soper

ᑕᓚᓐ ᑰᖓ ᐊᒻᒪᓗ ᑕᓚᓐ ᓂᕐᔪᑎᖃᕐᕕᖓ

ᓇᕿᓪᓗᒋᑦ ᑲᓱᕐᕕᖏᑦ ᕿᒥᕐᕈᑲᓐᓂᕈᒪᒍᕕᑦ ᓄᓇᕗᒻᒥᑦ ᒥᕐᖑᐃᓯᖅᕖᑦ ᐊᓯᖏᓐᓂᓪᓗ ᓄᓇᓂᑦ

ᓄᓇᕗᒻᒥᑦ ᑰᑦ ᐃᑦᑕᕐᓂᓴᐃᑦ

ᕿᒥᕐᕈᓗᒋᑦ ᓄᓇᕗᒻᒥᑦ ᒥᕐᖑᐃᖅᓯᖅᕖᑦ ᐊᓯᖏᓐᓂᓪᓗ ᓄᓇᐃᑦ

ᓇᕿᓪᓗᒋᑦ ᑲᓱᕐᕕᖏᑦ ᑐᑭᓯᒋᐊᑲᓐᓂᕈᒪᒍᕕᑦ ᑲᓇᑕᒥ ᐃᑦᑕᕐᓂᓴᓄᑦ ᑰᑦ

ᑲᓇᑕᒥ ᐃᑦᑕᕐᓂᓴᓄᑦ ᑰᓂᑦ