ᓄᕕᐱᕆ ᑎᒍᐊᖅᐸᒃᑐᓂᑦ ᐅᔾᔨᕈᓱᖕᓇᐅᕗᖅ

ᐃᓄᖕᓄᑦ ᑐᓴᒐᒃᓴᖅ ᒐᕙᒪᒃᑯᓐᓂ

ᓄᕕᐱᕆ ᑎᒍᐊᖅᐸᒃᑐᓂᑦ ᐅᔾᔨᕈᓱᖕᓇᐅᕗᖅ

ᐃᓄᓕᕆᔨᒃᑯᑦ ᐃᓕᓴᖅᓯᔪᒪᕗᑦ, ᐅᐱᒍᓱᒍᒪᕗᑦ ᖁᕕᐊᓲᑎᖃᕐᓗᑎᒡᓗ ᓄᓇᕗᒻᒥ ᑎᒍᐊᖅᐸᒃᑐᓂᑦ ᖃᑕᙳᑎᒌᓂᑦ. ᖃᓄᑐᐃᓐᓇᖅ ᐊᖓᔪᖅᑳᙳᕈᓐᓇᖅᐳᒍᑦ ᑕᒪᒃᑯᐊᓗ ᖃᑕᙳᑎᑦᑎᐊᕚᓗᐃᑦ ᓄᑕᖅᑲᒥᒃ ᒪᒃᑯᒃᑐᒥᓪᓗ ᑐᙵᓱᒃᑎᑦᑎᖃᑦᑕᖅᐳᑦ ᐆᒻᒪᑎᒥᓂᙶᖅᑐᒥᒃ ᐊᖏᕐᕋᒥᓄᓪᓗ ᑎᒍᐊᖅᑖᖅᐸᓪᓕᐊᑎᓪᓗᒋᑦ.

ᑎᒍᐊᖅᐸᒃᑐᑦ ᖃᑕᙳᑎᒌᑦ ᐊᑦᑕᕐᓇᙱᑦᑐᒥᒃ ᑐᙵᓇᖅᑐᒥᓪᓗ ᐃᓂᖃᖅᑎᑦᑎᖃᑦᑕᖅᐳᑦ ᓄᑕᖅᑲᓂᑦ ᒪᒃᑯᒃᑐᓂᓪᓗ ᐃᓕᑉᐸᓪᓕᐊᖁᓪᓗᒋᑦ ᐱᕈᖅᐸᓪᓕᐊᓗᑎᒡᓗ. ᓇᒡᓕᒋᔭᐅᖃᑦᑕᖅᖢᑎᒃ ᑲᒪᒋᔭᐅᑦᑎᐊᖅᖢᑎᒡᓗ ᐃᓂᒋᔭᖓᓂ, ᓄᑕᖅᑲᑦ ᐱᔭᕆᐊᓕᖏᓐᓂᒃ ᐱᖃᑦᑎᐊᕐᓂᖅᓴᐅᓂᐊᖅᐳᑦ ᐃᓄᑦᑎᐊᕙᐅᔪᓐᓇᖅᓯᓗᑎᒡᓗ. ᓄᑕᕋᓕᒫᑦ ᒪᒃᑯᒃᑐᓕᒫᓪᓗ ᐊᑦᑕᕐᓇᙱᑦᑐᒥᑦ ᐃᓂᖃᕆᐊᖃᖅᐳᑦ ᓇᒡᓕᒋᔭᐅᓗᑎᒡᓗ ᐊᖏᕐᕋᒥᓂ.

ᓄᓇᕗᒻᒥ, ᐱᖓᓱᐃᓕᖓᕗᑦ ᑎᒍᐊᕈᓰᑦ ᖃᑕᙳᑎᒌᓄᑦ ᐊᑐᐃᓐᓇᐅᔪᑦ: ᐃᓄᐃᑦ ᑎᒍᐊᕈᓯᖓ, ᐱᓕᕆᕝᕕᑎᒍᑦ, ᐃᒻᒥᒃᑰᖅᑐᓪᓗ. ᑖᒃᑯᐊ ᐊᑐᖅᑕᐅᔪᓐᓇᖅᑐᑦ ᓄᑕᖅᑲᓂᒃ ᐱᕕᒃᓴᖃᖅᑎᑦᑎᕗᑦ ᖃᑕᙳᑎᖃᐃᓐᓇᓕᕐᓗᑎᒃ ᑕᐅᕗᖓᓕᒫᖅ ᐊᒻᒪ ᑲᑎᙵᖃᑕᐅᖏᓐᓇᓕᕐᓗᑎᒃ ᐃᓕᖅᑯᓯᕐᒥᓂ ᓄᓇᓕᖕᓂᓗ.

ᑎᒍᐊᙳᐊᖃᕈᒪᓐᓂᕈᕕᑦ ᑎᒍᐊᕈᒪᒍᕕᓪᓘᓐᓃᑦ ᖃᐅᔨᒪᔭᖃᕈᕕᓪᓘᓐᓃᑦ ᑎᒍᐊᙳᐊᖃᕈᒪᓇᔭᖅᑐᒥᒃ ᑎᒍᐊᕈᒪᔪᒥᓪᓘᓐᓃᑦ, ᖃᑕᙳᑎᒌᓄᑦ ᐃᓅᓯᓕᕆᔨᑦ ᐃᑭᐊᖅᑭᕕᒃᑰᕈᑖᓄᑦ ᑕᑯᒋᐊᕈᓐᓇᖅᑐᑎᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᐅᕝᕙᓘᓐᓃᑦ ᐊᑖᓃᑦᑐᒧᑦ ᓈᓴᐅᑎᒧᑦ ᐅᖄᓚᓗᑎᑦ.

ᑐᑭᓯᒋᐊᒃᑲᓂᕈᒪᒍᕕᑦ ᑎᒍᐊᙳᐊᖃᖅᐸᒃᑐᑦ ᑎᒍᐊᖅᐸᒃᑐᓪᓘᓐᓃᑦ ᒥᒃᓵᓄᑦ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑰᕈᑖᓄᑦ ᑕᑯᒋᐊᕆᑦ ᐅᕗᖓ https://www.gov.nu.ca/family-services/programs-services/adoptions ᑎᒍᐊᖅᑐᓕᕆᔩᓪᓘᓐᓃᑦ ᐅᖄᓚᕝᕕᒋᓗᒋᑦ ᐅᕗᖓ 867-975-5200.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓘᓯ ᐊᖅᐱᒃ
ᑐᓴᒐᒃᓴᓕᕆᔨᒻᒪᕆᒃ
ᐃᓄᓕᕆᔨᒃᑯᑦ
867-975-5207
@email