ᐅᖃᓚᐅᑎᓯᐅᑏᑦ

You are here

ᐃᓐᓇᕐᓄᑦ ᐃᓕᓐᓂᐊᒐᒃᓴᐃᑦ ᐊᒻᒪᓗ ᐃᓕᓐᓂᐊᕐᓂᖕᓄᑦ ᐃᑲᔫᑏᑦ (ALTS)

ᒥᓇᖅᓗᒋᑦ ᐊᔨᖏᑦ ᐃᓕᓐᓂᐊᖅᑎᓄᑦ ᐊᑐᐊᒐᒃᓴᖅ ᐅᕗᖓ!

ᑖᒃᑯᑎᒎᓇᖅ ᐱᓕᕆᔾᔪᓯᒃᑯᑦ ᐃᑲᔫᑎᒋᔪᓐᓇᖅᐸᓯ ᐊᔪᕈᓐᓃᖅᓴᖃᑕᐅᑎᓪᓗᓯ ᐃᓕᓐᓂᐊᒃᑲᓐᓂᕈᔅᓯᓘᓐᓃᑦ. ᑐᕌᖓᑎᑕᐅᓲᑦ ᐱᕚᓪᓕᕈᑕᐅᓇᓱᒃᖢᑎᒃ ᐃᖅᑲᓇᐃᔮᖅᑖᕆᔪᓐᓇᖅᑕᔅᓯᓐᓂᒃ ᐃᖅᑲᓇᐃᔮᖃᐃᓐᓇᓕᕐᓗᓯᓗ. ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐃᒪᓐᓇᐅᒐᔪᒃᖢᑎᒃ ᑮᓇᐅᔭᖃᖅᑎᑦᑎᕙᒃᖢᑎᒃ ᐊᔪᕈᓐᓃᓴᐅᑎᒃᓴᓄᑦ ᐊᕐᕌᒍᓕᒫᒨᖓᔪᒧᑦ, ᑐᖔᓄᓪᓘᓐᓃᑦ, ᑕᐃᒪᓐᓇ ᐊᑯᓂᐅᑎᒋᔪᓄᑦ ᐃᖅᑲᓇᐃᔮᖃᓕᕈᑕᐅᔪᓐᓇᕐᓗᑎᒡᓗ. ᐃᒪᓐᓇᐅᒐᔪᒃᖢᓂ, ᐊᔪᕈᓐᓃᖅᓴᖅᑐᑦ ᑮᓇᐅᔭᖃᖅᑎᑕᐅᔪᑦ ᑖᒃᑯᑎᒎᓇᖅ ᐱᓕᕆᐊᖅᑎᒍᑦ ᒪᕐᕈᐃᓕᖅᑲᖓᕗᖅ: ᐊᔪᕈᓐᓃᖅᓴᖅᑕᐅᓲᑦ ᐃᓱᓕᑕᐅᑎᓪᓗᒋᑦ ᐃᖅᑲᓇᐃᔮᖅᑖᕐᓇᖅᑐᑦ ᐃᖅᑲᓇᐃᔭᑐᐃᓐᓇᕆᐊᖃᓕᕐᓗᑎᒡᓘᓐᓃᑦ ᐅᕝᕙᓘᓐᓃᑦ ᐃᓕᓐᓂᐊᒃᑲᓐᓂᕐᓗᑎᒃ ᐊᔪᕈᓐᓃᖅᓴᖅᑎᑕᐅᒃᑲᓐᓂᕈᑎᓄᑦ.

 

 

ᐅᑯᐊ ᐆᒃᑑᑎᑦ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᑮᓇᐅᔭᑎᒎᕆᐊᖃᖅᑐᑦ:

 

  • ᐃᓕᓐᓂᐊᖅᐸᓪᓕᐊᔪᑦ ᐱᓕᕆᔾᔪᑎᓄᑦ ᐊᔪᕈᓐᓃᖅᓴᕐᓂᖅ.
  • ᐃᖅᑲᓇᐃᔭᕐᕕᖕᒥ ᐊᔪᕈᓐᓃᖅᓴᕐᓂᖅ.
  • ᐃᖅᑲᓇᐃᔭᖅᓯᓐᓈᑦ ᐃᖅᑲᓇᐃᔭᓕᒻᒪᒃᓴᔪᑦ.
  • ᓄᓇᕗᒻᒥ ᓯᓚᑦᑐᖅᓴᕐᕕᖕᓂᒃ ᐱᓕᕆᐊᑦ.

 

 ᐳᐃᒍᖅᑕᐃᓕᓗᓯ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐃᓱᒪᖅᓲᑕᐅᓂᖓᓂᒃ ᓄᓇᕘᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓄᑦ ᑕᒪᒃᑯᐊ ᐃᓕᓐᓂᐊᖅᑕᐅᔪᒃᓴᑦ ᐊᔪᖅᑎᑕᐅᙱᑦᑐᑦ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐊᔪᖅᑎᑕᐅᕗᑦ ᓄᓇᕘᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓄᑦ ᑭᒡᓗᕐᒧᖔᕐᓘᓐᓃᑦ.

 

 

ᐱᓇᔪᒍᓐᓇᖅᐳᓯ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᓄᑦ ᑕᑕᑎᕆᐊᓖᑦ ᐊᑕᖏᕐᓗᒋᑦ ᑎᑎᕋᕐᕕᒋᓗᒋᑦ ᐅᑯᓇᓃᑦᑑᒃ EAS ᐊᒻᒪ ALTS ᐅᖃᓗᒡᓗᓯᓘᓐᓃᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᒧᑦ ᐅᑯᓇᓂ ᓈᓴᐅᑎᓂᒃ:

 

ᕿᑭᖅᑖᓗᒃ - 1-800-567-1514

ᑭᕙᓪᓕᖅ - 1-800-953-8516

ᕿᑎᕐᒥᐅᑦ - 1-800-661-0845

 

 

ᐅᑯᐊᑦᑕᐅᖅ ᐊᑦᑕᑕᕐᕕᐅᑲᐅᑦᑐᕈᓐᓇᖅᑐᑦ:

 

ᐃᓕᓐᓂᐊᖅᑕᐅᔪᒃᓴᑦ ᐊᔪᖅᑎᑕᐅᙱᑦᑐᑦ

ᖃᓄᐃᓕᐅᕆᐊᖃᕐᒪᖔᑦ

ᐅᑯᐊ ᐳᐃᒍᖅᑕᐃᓕᓗᒋᑦ

ᓯᓚᑦᑐᖅᓴᕐᕕᒃ/ᕕᒡᔪᐊᖅ ᑎᒃᑯᐊᖅᑕᐅᓯᒪᔪᑦ

ᑎᑎᕋᖅᑕᐅᓯᒪᔪᑦ ᕿᒥᕐᕈᔭᐅᔭᕆᐊᖃᕐᓂᖏᑦ

 

 

ᐊᔪᖅᑎᑕᐅᙱᑦᑐᑦ

 

ᐃᒪᐃᒃᑯᕕᑦ ᐊᔪᔾᔮᙱᑉᐳᑎᑦ

 

  • ᑲᓇᑕᒥᐅᑕᐅᒍᕕᑦ ᐅᕝᕙᓘᓐᓃᑦ ᓇᓂᒥᐅᑕᐅᒍᕕᑦ ᓄᓇᒌᓐᓇᕐᓗᒍ
  • ᓄᓇᕗᒥᐅᑕᐅᓗᑎᑦ ᐱᑎᑕᐅᖃᑦᑕᓕᒑᒍᕕᑦ ᓄᓇᕘᒥ ᑮᓇᐅᔭᖅᑖᕆᔭᐅᕙᒃᑐᓂᒃ
  • ᐊᔪᕈᓐᓃᖅᓴᕆᐊᖃᕐᓗᑎᑦ ᐃᖅᑲᓇᐃᔮᖅᑕᐅᖃᑕᐅᓇᓱᒃᑐᓂᒃ
  • ᐅᑭᐅᖃᕐᓗᑎᑦ 18-ᓂᒃ ᐅᖓᑖᓂᒡᓘᓐᓃᑦ

 

 

ᐱᓕᕆᐊᒧᑦ ᐊᔪᖅᑎᑕᐅᙱᑦᑐᑦ

 

  • ᐃᓕᓐᓂᐊᖅᑕᐅᔪᒃᓴᑦ ᐊᔪᕈᓐᓃᖅᓴᖅᑕᐅᔪᒃᓴᓪᓘᓐᓃᑦ ᐃᓚᐅᕝᕕᒋᔪᒪᔭᑎᑦ ᓯᓚᑦᑐᖅᓴᕐᕕᖕᒨᖓᔭᕆᐊᖃᙱᑦᑐᑦ ᐱᔪᓐᓇᖅᑎᑕᐅᓗᑎᒡᓘᓐᓃᑦ ᓄᓇᕘᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᕈᓐᓇᖅᑐᓄᑦ.
  • ᐃᓕᓐᓂᐊᕐᕕᒋᓂᐊᕈᒪᔭᑦ ᐃᓕᑕᕆᔭᐅᓯᒪᔭᕆᐊᖃᖅᐳᖅ ᐊᖏᖅᑕᐅᓯᒪᓗᓂᓘᓐᓃᑦ ᐊᐅᓚᑦᑎᕕᒋᔭᖓᓂᒃ.
  • ᐃᓕᓐᓂᐊᖅᑕᐅᔪᒃᓴᖅ ᐅᓪᓗᓕᒫᒨᖓᔭᕆᐊᖃᖅᐳᖅ (ᐱᓇᓱᐊᕈᓯᕐᒥ ᐃᑲᕐᕋᑦ 30 ᑐᖔᓂᐅᙱᑦᑐᖅ).
  • ᐃᓕᓐᓂᐊᖅᑕᐅᔪᒃᓴᖅ ᐃᖅᑲᓇᐃᔮᖅᑖᕋᓱᒃᑐᓄᑦ ᑐᕌᖓᑎᑕᐅᓇᓱᒃᑐᖅ ᓄᓇᕘᒥ.
  • ᑮᓇᐅᔭᑦ ᑭᒡᓕᖃᖅᑎᑕᐅᖕᒪᑕ ᑕᐃᒪᐃᓐᓂᖓᓄᑦ ᐸᕐᓇᒃᐸᒌᖁᔭᐅᕗᓯ ᐱᓇᔪᖁᔭᐅᕗᓯᓗ ᕿᓚᒻᒥᐅᓂᖅᐹᒃᑯᑦ. ᐋᒃᑳᖅᑕᐅᔪᓐᓇᕋᔅᓯ ᑮᓇᐅᔭᑦ ᓄᖑᓐᓂᖅᐸᑕ ᑮᓇᐅᔭᓕᕆᓐᓇᖅ ᐊᕐᕌᒍ ᐃᓱᖅᐸᓯᐊᓂᒃ.

 

 

ᐃᓱᓕᕝᕕᒃᓴᐅᑖ

 

  • ᐃᓱᓕᕝᕕᒃᓴᐅᑎᑕᖃᙱᑦᑐᖅ ᐱᓇᔪᒐᓱᒋᐊᒃᓴᖅ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᓂᒃ ᐊᔪᕈᓐᓃᖅᓴᕆᐊᖃᖃᑦᑕᕐᓂᖏᓐᓄᑦ ᖃᖓᓕᒫᑦᑎᐊᖅ ᐊᕐᕌᒍᕆᔭᒥ. ᑭᓯᐊᓂ, ᐱᓇᔫᑕᐅᔪᑦ ᑎᑎᖅᑲᓪᓗ ᐊᖏᖅᓯᒪᓂᕋᖅᑐᑦ ᐃᓕᓐᓂᐊᕐᕕᔅᓯᓐᓂ ᑐᓐᓂᖅᑯᑕᐅᔭᕆᐊᖃᖅᐸᒃᖢᑎᒃ ᐃᒻᒪᖄ ᐱᓇᓱᐊᕈᓯᑦ ᑎᓴᒪᑦ ᓯᕗᓂᑲᓪᓛᒍᑦ ᐃᓕᓐᓂᐊᐊᕐᕕᒋᓂᐊᖅᑕᑦ ᐱᒋᐊᓚᐅᙱᓐᓂᖓᓂ ᓇᓗᓇᙱᖁᔭᐅᓪᓗᓂ ᑮᓇᐅᔭᑦ ᑮᓇᐅᔭᒃᑯᕕᖕᒧᐊᖅᑕᐅᓂᐊᕋᓗᐊᕐᒪᖔᑕ ᓈᒻᒪᖅᑯᑕᐅᓗᑎᒃ.

 

Back to top

 

ᐃᑲᔫᑎᑦ ᐱᔭᒃᓴᐅᔪᑦ

 

ᖃᔅᓯᑲᓪᓚᖕᓂᒃ ᐃᑲᔫᑎᒃᓴᖃᖅᐳᖅ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᓄᑦ ᐃᑲᔪᕆᐊᖃᖅᐸᒃᑐᓄᑦ

 

  • ᐃᓕᓐᓂᐊᕈᑎᓄᑦ - ᐅᓄᓛᖃᕐᓗᒍ $3,700.00 ᐊᕐᕌᒍᒥ ᐊᑕᐅᓯᖅ ᑕᖅᑭᖅ ᐊᓂᒍᕌᖓᑦ - ᓇᓕᖅᑲᖏᑦ ᐱᔭᐅᔭᕆᐊᖃᖅᑐᑦ
  • ᕿᒥᕐᕈᐊᑦ, ᐅᖃᓕᒫᒐᑦ ᐃᓕᓐᓂᐊᕈᑎᒃᓴᓪᓗ - ᐅᓄᓛᖃᕐᓗᒍ $5,000.00 - ᓇᓕᖅᑲᖏᑦ ᐱᔭᐅᔭᕆᐊᖃᖅᑐᑦ
  • ᐊᔪᕈᑎᓕᖕᒧᑦ ᑐᕌᖓᔪᑦ ᐱᖁᑎᑦ - ᐅᓄᓛᖃᕐᓗᒍ $5,000.00 - ᓇᓕᖅᑲᖏᑦ ᐱᔭᐅᔭᕆᐊᖃᖅᑐᑦ
  • ᐃᓕᓴᐃᔨᓄᑦ - ᐅᓄᓛᖃᕐᓗᒍ $5,000.00 - ᓇᓕᖅᑲᖏᑦ ᐱᔭᐅᔭᕆᐊᖃᖅᑐᑦ
  • ᐊᔪᕈᓐᓃᖅᓴᐅᑎᓄᑦ ᐊᑭᓕᐅᓯᐊᑦ

 

ᐱᓕᕆᔾᔪᑎᓂᒃ ᐊᔪᕈᓐᓃᖅᓴᖅᑕᐅᔪᒃᓴᑦ ᐱᓕᒻᒪᒃᓴᕈᑎᒃᓴᓪᓗ                 $400.00/ᐱᓇᓱᐊᕈᓯᖅ

ᐅᖃᓕᒫᒐᒃᓴᑦ ᐃᖅᑲᓇᐃᔭᕐᕕᖕᒥᓪᓗ ᐊᔪᕈᓐᓃᖅᓴᐅᑎᒃᓴᑦ                     $300.00/ᐱᓇᓱᐊᕈᓯᖅ

 

  • ᓄᓇᒋᙱᑕᒥ ᐃᓅᔾᔪᑎᓄᑦ ᐊᑭᓕᐅᑎᑦ - $350.00-ᒧᑦ ᑎᑭᓪᓗᒍ ᐱᓇᓱᐊᕈᓰᒃ ᒪᕐᕉᒃ ᐊᓂᒍᕌᖓᑕ (ᐃᒡᓗᑖᖅᐸᓪᓕᐊᓂᕐᒧᑦ ᐊᑭᓕᐅᑎᑦ/ᐃᒡᓗᒥᒃ ᐊᑐᖅᑐᐊᕈᑎᒧᑦ ᐊᖏᖃᑎᒌᒍᑎᑕᖃᕆᐊᖃᖅᑐᖅ).
  • ᓄᒃᑕᐅᑎᑦ - ᖃᖓᑦᑕᐅᑎᑦ ᐅᖓᒻᒧᑦ ᐅᑎᒧᓪᓗ ᐃᓕᓐᓂᐊᕆᐊᕐᕕᒋᓂᐊᖅᑕᒧᑦ.
  • ᑎᒥᒥᒍᑦ ᐊᔪᕈᑎᓕᖕᓄᑦ ᐃᑲᔫᑎᑦ - ᐅᓄᓛᖃᕐᓗᒍ $8,000.00 ᐊᕐᕌᒍᒥ ᑕᖅᑭᖅ ᐊᓂᒍᕌᖓᑦ - ᓇᓕᖅᑲᖏᑦ ᐱᔭᐅᔭᕆᐊᖃᖅᑐᑦ.
  • ᐸᐃᕆᔭᐅᔾᔪᑎᓄᑦ - ᐅᓄᓛᖃᕐᓗᒍ $450.00/ᐊᑕᐅᓯᕐᒧᑦ ᑕᖅᑭᕐᒧᑦ ᓚᐃᓴᑖᖅᓯᒪᙱᑦᑐᓄᑦ $700.00/ᓚᐃᓴᖃᖅᑐᓄᑦ.

 

 

ᖃᓄᐃᓕᐅᖅᑕᐅᒋᐊᖃᕐᒪᖔᑦ

 

1. ᐃᖅᑲᓇᐃᔮᕆᔭᐅᔪᒪᔪᓕᕆᔨᒥᒃ ᐅᖃᖃᑎᖃᕐᓗᑎᑦ ᐅᕝᕙᓘᓐᓃᑦ ᐱᓇᔫᑎᒃᓴᑦ ᓇᓂᔪᓐᓇᖅᐸᑎᑦ ᐅᕙᓂ ᐃᑭᐊᖅᑭᕕᖕᒥ www.gov.nu.ca

 

2. ᐱᓇᔫᑎᑦ ᐊᑕᖏᕐᓗᒍ ᑕᑕᑎᕐᓂᐊᖅᐸᑦ ᓇᒃᓯᐅᑎᓗᒍᓗ ᐃᓚᓕᐅᑎᓗᒍ ᐊᖏᖅᑕᐅᓯᒪᔪᖅ ᑎᑎᖅᑲᖅ ᐊᕕᒃᓯᒪᓂᕐᒥ ᐃᖅᑲᓇᐃᔮᕆᔭᐅᔪᒪᔪᓕᕆᔨ ᑎᑎᕋᕐᕕᐊᓄᑦ.

 

3. ᐱᓕᕆᐊᖑᓂᐊᖅᑐᒥᒃ ᐸᕐᓇᐅᑎᒥᒃ ᐱᐊᓂᒃᓯᓗᑎᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨ ᐱᓕᕆᖃᑎᒋᓗᒍ ᐅᑕᖅᑭᓗᒍᓗ ᐊᔪᖅᑎᑕᐅᓇᔭᙱᒻᒪᖔᖅᐱᑦ ᕿᒥᕐᕈᔭᐅᓂᖓᓂᒃ.

 

4. ᐊᖏᖅᑕᐅᒍᕕᑦ ᐊᑎᓕᐅᕐᓂᐊᖅᐳᑎᑦ ᑮᓇᐅᔭᖃᖅᑎᑕᐅᔾᔪᑎᒧᑦ ᐊᖏᖃᑎᒌᒍᑎᒥᒃ ᓇᓗᓇᐃᖅᓯᓯᒪᓗᓂ ᐱᓕᕆᐊᒃᓴᕐᓂᒃ ᖃᓄᐃᓕᖓᓕᕐᓂᕆᕙᒃᑕᖏᓐᓂᒡᓗ ᑖᒃᑯᐊ ᒪᓕᙱᐅᔭᕈᓗᒃᖢᒋᑦ. ᑮᓇᐅᔭᒃᑯᕕᖃᕐᕕᖕᒥ ᓇᓕᖅᑲᑎᑦ ᖃᐅᔨᔭᐅᑎᑦᑕᕆᐊᖃᕐᓂᐊᖅᑕᑎᑦ ᐃᑲᔫᓯᐊᖅᑖᕆᔭᒃᓴᑎᑦ ᑮᓇᐅᔭᒃᑯᕕᖃᕐᕕᖕᓄᐊᖅᑕᐅᔪᓐᓇᓛᕐᒪᑕ.

 

5. Top of the World-ᑯᓐᓄᑦ ᐅᖃᓗᒋᐊᖃᖅᐳᑎᑦ ᐃᕐᖐᓐᓈᕉᑎᒃᑯᓪᓘᓐᓃᑦ ᑎᑎᕋᕐᓗᑎᑦ ᐅᕗᖓ ᑐᕌᕈᑎᒧᑦ ALTS@topoftheworld.com ᖃᖓᑦᑕᐅᑎᒃᓴᑎᑦ ᐋᖅᑭᒃᑕᐅᔪᓐᓇᖁᓪᓗᒋᑦ ᐃᓕᓐᓂᐊᕆᐊᕐᕕᒋᓂᐊᖅᑕᕐᓄᑦ.

 

6. ᐃᓕᓐᓂᐊᕐᕕᒋᓂᐊᖅᑕᕐᓄᙵᐅᓗᑎᑦ ᐊᓂᒍᐃᓗᑎᓪᓗ!

 

7. ᐊᑭᓕᒃᑲᓐᓂᕆᐊᓖᑦ ᐊᑭᓕᕐᓗᒋᑦ ᐃᓕᓐᓂᐊᕐᕕᒋᓂᐊᖅᑕᔅᓯᓐᓄᑦ ᐅᕝᕙᓘᓐᓃᑦ ᐃᓕᓴᐃᔨᒋᓂᐊᖅᑕᔅᓯᓐᓄᑦ.

 

8. ᐊᑭᓕᐅᑎᑦ ᓇᓕᖅᑲᖏᑦ ᑐᓂᓗᒋᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᒧᑦ ᐱᐊᓂᐸᓗᒡᓗᒍᓗ ᐱᓕᕆᐊᖑᐊᓂᒃᑎᓪᓗᒍ ᐃᑲᔪᖅᑐᐃᔾᔪᑎᒃᓴᖅ.

 

Back to top

 

ᐅᑯᐊ ᐳᐃᒍᖅᑕᐃᓕᓗᒋᑦ

 

ᐳᐃᒍᖅᑕᐃᓕᓗᑎᑦ, ᑲᒪᒋᔭᒃᓴᖃᕋᕕᑦ ᐃᓕᓐᓂᐊᖅᑎᐅᑎᓪᓗᑎᑦ ᐱᑎᑕᐅᕙᓪᓕᐊᑎᓪᓗᑎᑦ ᒐᕙᒪᒃᑯᑦ ᑮᓇᐅᔭᖏᓐᓂᒃ. ᐅᑯᐊ ᐃᓚᓕᐅᔾᔭᐅᓪᓗᑎᒃ ᐃᓕᓐᓂᐊᕆᐊᑦᑎᐊᖅᐸᒃᑐᑦ ᐃᓕᓐᓂᐊᑦᑎᐊᖅᑐᓪᓗ ᐊᒻᒪᑦᑕᐅᖅ ᖃᐅᔨᒪᓗᒋᑦ ᑮᓇᐅᔭᖅᑖᕆᕙᓪᓕᐊᔭᑎᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖕᓄᑦ ᐊᑭᓕᖅᑕᐅᒐᓗᐊᕐᒪᖔᖅᐱᑦ ᐃᓕᓐᓂᐊᕐᕕᖕᓄᑦ.

 

 

ᐱᓕᕆᔪᓐᓇᖅᐳᑎᑦ ᐱᓇᔫᑎᒋᔭᑦ ᐱᓕᕆᐊᖑᑲᐅᑦᑐᕈᓐᓇᖁᓪᓗᒍ ᖃᐅᔨᔾᔪᑎᒃᓴᕐᓂᓪᓗ ᑮᓇᐅᔭᓂᒃ ᐃᑲᔫᑎᒃᓴᑎᑦ ᐱᕙᒌᕈᓐᓇᕐᒪᖔᑦ ᐃᓕᓐᓂᐊᓯᒋᐊᓚᐅᙱᓐᓂᔅᓯᓐᓂᒃ.

 

1. ᐱᓇᔫᑎᑦ ᐃᑲᔪᖅᓱᐃᔾᔪᑎᓪᓗ ᑎᑎᖅᑲᑦ ᓇᒃᓯᐅᑎᓗᒋᑦ ᐊᔪᕐᓇᕈᓐᓃᑐᐊᖅᐸᑦ.

 

2. ᐃᕐᖐᓐᓈᕈᑎᒃᑯᑦ ᓱᒃᑲᔪᒃᑯᓪᓘᓐᓃᑦ ᐱᓇᔫᑎᑦ ᐊᐅᓪᓚᖅᑎᒃᑯᖕᓂ ᖃᐅᔨᒋᐊᖅᑳᕐᓗᑎᑦ ᐱᔭᐅᒐᓗᐊᕐᒪᖔᑕ. ᓱᒃᑲᔪᒃᑰᕈᓐᓇᐅᑎᑦ ᐱᓗᐊᖅᑐᒥᒃ ᐱᔾᔪᑕᐅᔪᓐᓇᕐᒪᑕ ᖃᐅᔨᒋᐊᖃᑦᑖᓗᖕᓂᐊᖅᐳᓯ ᑕᑕᑎᖅᓯᒪᔭᑎᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᔅᓯᓐᓄᐊᕋᓗᐊᕐᒪᖔᑕ.

 

3. ᑮᓇᐅᔭᒡᒋᐊᒃᓴᔅᓯᓐᓂᒃ ᓇᒃᓴᕐᓗᓯ ᐃᑲᔫᑎᒃᓴᔅᓯᓐᓂᒃ ᐱᓗᐊᖅᑐᒥᒃ ᖃᖓᑕᓲᒃᑯᑦ ᐃᓕᓐᓂᐊᕐᕕᒋᓂᐊᖅᑕᕐᓄᙵᐅᔭᕆᐊᖃᕐᓂᐊᕈᔅᓯ ᓯᕗᓂᑲᓪᓛᒍᑦ ᐃᒡᓗᒃᓴᖅᓯᐅᕆᐊᕐᓗᓯ ᐸᐃᕆᕕᒃᓴᖅᓯᐅᕆᐊᕐᓗᓯᓘᓐᓃᑦ.

 

 

ᐃᓕᓐᓂᐊᖅᑕᓐᓂ ᓄᖅᑲᒥᐊᕐᓂᕈᒪ, ᓴᐱᓕᕐᓂᕈᒪ ᓄᖅᑲᕐᓂᕈᒪᓘᓐᓃᑦ ᖃᓄᐃᑕᐅᓇᔭᖅᐳᖓ?

 

1. ᐃᓕᓐᓂᐊᕐᕕᒋᔭᔅᓯ ᑐᓴᖅᑎᑦᑎᓇᔭᖅᑐᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᔅᓯᓐᓂ ᐃᒪᐃᓕᐅᕐᓂᕈᕕᑦ:

 

  • ᐊᑭᓖᙲᓐᓇᓕᕐᓂᕈᕕᑦ
  • ᐃᓕᓐᓂᐊᕆᐊᖃᑦᑕᕈᓐᓃᕐᓂᕈᕕᑦ
  • ᐊᐅᓪᓚᕐᓂᕈᕕᑦ
  • ᐃᓕᓐᓂᐊᕆᐊᖃᖅᑕᕋᓗᐊᕐᓂᒃ ᐊᖑᒻᒪᑎᙱᓗᐊᕈᕕᑦ

 

2. ᐃᓂᖅᑎᖅᑕᐅᑐᐃᓐᓇᕆᐊᖃᖅᐳᑎᑦ ᑭᓯᐊᓂ ᐃᓕᓐᓂᐊᖃᑕᐅᒋᐊᒃᓴᖅ ᐊᔪᕐᓇᓈᖅᓰᓐᓇᕈᕕᑦ ᐃᑲᔫᓯᐊᖅᑖᕆᓚᐅᖅᑕᑎᑦ ᐅᑎᖅᑎᑦᑕᕆᐊᖃᕋᔭᖅᑕᑎᑦ ᓄᓇᕗᑦ ᒐᕙᒪᒃᑯᓐᓄᑦ.

 

* ᖃᐅᔨᒪᔭᕆᐊᖃᕆᓪᓗᓯ ᓇᓗᓇᐃᒃᑯᑦᑎᖅᑕᐅᓯᒪᓂᐊᕐᓂᕐᓂᒃ ᐃᖅᑲᓇᐃᔮᕆᔭᐅᔪᒪᔪᓕᕆᔨᒃᑯᑦ ᖃᕋᓴᐅᔭᖃᕐᕕᖓᓐᓂᒃ ᑭᓯᐊᓂ ᐊᑭᓕᒃᓴᑎᑦ ᐊᑭᓕᒃᓴᐅᔪᓐᓃᖅᐸᑕ ᑮᓇᐅᔭᖅᑖᖅᑎᑕᐅᔪᓐᓇᐃᓪᓕᓇᔭᖅᖢᑎᓪᓗ ᑖᒃᑯᓇᙵᑦ ᐃᑲᔫᓯᐊᖅᑐᓕᕆᔨᒃᑯᓐᓂ ᐊᓯᖏᓐᓂᒡᓘᓐᓃᑦ ᐃᑲᔫᓯᐊᖅᑐᓕᕆᔨᓂᒃ ᓲᕐᓗ ᓄᓇᕘᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑐᓕᕆᔨᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᖅᖢᑎᒃ ᐊᔪᕈᓐᓃᖅᓴᖅᑎᑕᐅᔪᓂᒃ.

 

 

ᓯᓚᑦᑐᖅᓴᕐᕕᒃ/ᕕᒡᔪᐊᖅ ᑎᒃᑯᐊᖅᑕᐅᓯᒪᔪᖅ   

 

 

ᑎᑎᖅᑲᖁᑎᒋᔭᐅᔪᑦ ᕿᒥᕐᕈᔭᐅᓂᖏᑦ

 

ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐱᓕᕆᑦᑎᐊᕋᓱᓲᖑᕗᑦ ᖃᐅᔨᒪᔭᐅᖁᓪᓗᒋᑦ ᐱᓇᔫᑕᐅᔪᓕᒫᑦ ᕿᒥᕐᕈᔭᐅᑦᑎᐊᖃᑦᑕᕋᓗᐊᕐᒪᖔᑕ ᐊᔾᔨᒌᒃᑎᑕᐅᓪᓗᑎᒃ, ᒪᓕᒃᑕᐅᓗᑎᒡᓗ ᐃᖅᑲᓇᐃᔭᖅᑐᓕᕆᔨᒃᑯᑦ ᐊᖏᖃᑎᒌᒍᑎᖏᓐᓂᒃ ᐊᒻᒪ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᖃᓄᐃᓕᐅᖅᑕᐅᔾᔪᑎᒃᓴᖏᓐᓂᒃ. ᑖᒃᑯᐊ ᐱᓇᔪᒃᑕᐅᒐᓗᐊᖅᑎᓪᓗᒋᑦ ᐊᒡᓚᕝᕕᓕᕆᔨᓂᒃ ᑕᒻᒪᖅᑕᐅᔪᖃᑐᐃᓐᓇᕆᐊᖃᓲᖑᖕᒥᖕᒪᑦ. ᐅᒃᐱᕈᓱᑐᐊᕈᔅᓯ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐊᑐᐊᒐᖏᑦ ᐃᓚᓕᐅᔾᔭᐅᓚᐅᕋᓱᒋᙱᒃᑯᕕᒋᑦ ᐱᓇᔫᑎᖕᓄᑦ ᐅᕝᕙᓘᓐᓃᑦ ᐃᓕᔅᓯᓐᓅᖓᔪᓂᒃ ᐱᔾᔪᑎᖃᕐᓗᓯ ᑎᓕᐅᖅᑕᐅᒐᓗᐊᖅᐳᑎᑦ ᕿᒥᕐᕈᖁᔭᓗᑎᑦ ᑎᑎᖅᑲᖁᑎᒋᔭᕐᓂᒃ. ᑖᒃᑯᐊ ᐱᓕᕆᔾᔪᓰᑦ ᐋᖅᑭᒃᑕᐅᕌᓂᒃᓯᒪᔪᑦ ᓇᓗᓇᐃᖅᑕᐅᓯᒪᖁᓪᓗᒋᑦ ᓈᒻᒪᖅᑰᑦᑎᓗᑎᒃ, ᒪᓕᑦᑎᐊᕐᓗᑎᒃ ᐊᔾᔨᒌᒃᑎᑕᐅᓗᑎᒡᓗ ᕿᒥᕐᕈᔭᐅᔪᓐᓇᖁᓪᓗᒋᑦ ᐱᓇᔫᑎᒋᔭᕐᓂᒃ ᑎᑎᖅᑲᖁᑎᖕᓂᓪᓗ. ᑖᒃᑯᐊ ᐱᓕᕆᔾᔪᓰᑦ ᒪᓕᙱᓐᓇᓱᒃᑲᓗᐊᖅᐸᑕ ᐅᖓᕙᕆᐊᕈᑕᐅᑐᐃᓐᓇᔭᒻᒪᑕ.

 

ᐅᓪᓗᑦ 30 ᐃᓱᓕᕝᕕᒃᓴᐅᑖ

 

ᖃᐅᔨᒃᑲᖅᑕᐅᕌᓂᒃᓯᒪᓕᕈᕕᑦ ᐅᓪᓗᕐᓂᒃ 30-ᓂᒃ ᑐᒃᓯᕋᖁᔭᐅᒐᔭᖅᐳᑎᑦ ᑎᑎᖅᑲᖁᑎᑎᑦ ᕿᒥᕐᕈᔭᐅᖁᓗᒋᑦ. ᑎᓕᐅᖅᑕᐅᒐᓗᐊᖅᐳᓯᓗ ᐊᑐᖃᑦᑕᖁᔭᐅᓪᓗᓯ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᐊᖏᖃᑎᖃᙱᒃᑯᕕᑦ ᑕᑕᑎᕆᐊᓕᖕᒥᒃ ᑕᕝᕙᙵᑦ ᓇᓂᔭᒃᓴᐅᔪᓂᒃ. ᑎᑎᖅᑲᑎᒍᑦ ᖃᐅᔨᒃᑲᖅᑕᐅᒍᕕᑦ ᐅᓪᓗᑦ 30 ᐱᒋᐊᖅᑎᑕᐅᓇᔭᖅᖢᓂ ᖁᓕᓄᑦ (10) ᐅᓪᓗᓄᑦ ᑎᑎᖅᑲᖅ ᐊᐅᒪᖅᑎᑕᐅᕌᓂᒃᓯᒪᓕᖅᑎᓪᓗᒍ. ᐃᕐᖐᓐᓈᕉᑎᒃᑯᑦ ᖃᐅᔨᒃᑲᖅᑕᐅᓐᓂᕈᕕᑦ, ᐅᓪᓗᓄᑦ 30 ᐱᒋᐊᕋᔭᖅᖢᓂ ᐅᓪᓘᖕᓄᑦ ᒪᕐᕉᖕᓄᑦ ᐃᕐᖐᓐᓈᖅᑕᐅᒃᑯᑦ ᑎᑎᕋᕐᕕᐅᓚᐅᖅᑎᓪᓗᑎᑦ. ᐅᖃᓘᑎᒃᑯᑦ ᖃᐅᔨᑲᖅᑕᐅᒍᕕᑦ ᐃᓚᓕᐅᔾᔭᐅᓪᓗᓂ ᐊᐃᓯᒪᙱᒃᑲᓗᐊᖅᑎᓪᓗᑎᑦ ᓂᐱᓕᐅᖅᑕᐅᔪᖅ, ᐅᓪᓗᑦ 30 ᐱᒋᐊᕋᔭᖅᖢᓂ ᑕᐃᑲᓂ ᐅᓪᓗᕐᒥ ᐅᖃᓗᒡᕕᐅᓚᐅᖅᑎᓪᓗᑎᑦ.

 

Back to top

 

ᐊᑐᕆᐊᓕᑦ

 

ᓯᕗᓪᓕᖅᐹᒥᒃ ᐊᑐᖅᑕᐅᒋᐊᓕᒃ ᑎᑎᖅᑲᕆᔭᓂᒃ ᕿᒥᕐᕈᓂᐊᕐᓗᓂ ᐱᓇᔪᒃᑐᖅ ᐅᖃᖃᑎᖃᖅᑳᕐᓗᓂ ᐱᔾᔪᑎᒋᔭᒥᓂᒃ ᐃᖅᑲᓇᐃᔮᕆᔭᐅᔪᒪᔪᓕᕆᔨᒧᑦ. ᖃᔅᓯᑲᓪᓚᖕᓂᒃ ᐱᔾᔪᑎᑕᖃᖅᐸᒃᐳᖅ ᐱᔾᔪᑕᐅᔪᖅ ᐅᖃᐅᓯᕆᓗᒍ ᖃᐅᔨᒪᒋᐊᕐᓗᒋᒡᓗ ᑕᒪᕐᒥᒃ ᐱᓕᕆᔨᐅᔪᑦ ᑐᑭᓯᔪᐃᓐᓇᐅᒐᓗᐊᕐᒪᖔᑎᒃ ᑭᓱ ᐱᔾᔪᑕᐅᖕᒪᖔᑦ.

 

ᐊᐃᑉᐸᖓ ᐊᑐᖅᑕᐅᒋᐊᓕᒃ ᐱᐊᓂᒋᐊᕐᓗᒍ ᑕᑕᑎᕆᐊᓕᒃ ᐃᓐᓇᕐᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐊᔪᕈᓐᓃᖅᓴᐅᑎᓄᓪᓗ ᐃᑲᔫᑎᑦ ᑎᑎᕋᖅᓯᒪᔪᑦ ᕿᒥᕐᕈᐊᓂᒡᓗᒍ ᑐᓐᓂᖅᑯᑎᒋᓗᒍᓗ ᐃᖅᑲᓇᐃᔮᕆᔭᐅᔪᒪᔪᓕᕆᔨᒧᑦ ᐱᓯᒪᒃᖠᖅᑎᐅᓂᖓᓄᑦ ᑕᑕᑎᕆᐊᓕᖕᓂᒃ ᐊᓯᒃᑲᓐᓂᖏᓐᓂᒡᓗ ᑐᑭᓯᒋᐊᕈᑎᓂᒃ ᐊᕕᒃᓯᒪᓂᕐᒥ ᐊᖓᔪᖅᑳᕆᔭᒧᑦ/ᐊᐅᓚᑦᑎᔨᒧᑦ. ᐊᖓᔪᖅᑳᕆᔭᖅ ᑎᑎᖅᑲᖁᑎᖕᓂᒃ ᕿᒥᕐᕈᓂᐊᖅᐳᖅ ᐃᓕᖕᓄᓪᓗ ᖃᐅᔨᒋᐊᕋᔭᖅᖢᓂ ᑐᑭᓯᒋᐊᕈᑎᒃᓴᒃᑲᓐᓂᕐᓂᒃ ᐱᕝᕕᒋᔪᒪᓗᓂᑎᑦ ᑕᐃᒪᐃᑦᑕᕆᐊᖃᕐᓂᖅᐸᑦ. ᐊᖓᔪᖅᑳᕆᔭᖅ ᐱᑐᐊᖅᐸᑦ ᐊᖏᖃᑎᒋᙱᔾᔪᑎᖕᓂᒃ ᐅᓪᓗᓄᑦ ᑕᓪᓕᒪᓄᑦ (5) ᓴᓇᓐᓇᒃᑯᑦ ᓇᓗᓇᐃᕈᑕᐅᓗᓂ ᖃᓄᐃᓕᖓᓕᕐᓂᕆᔭᖓᓂᒃ ᖃᐅᔨᒃᑲᕐᓗᒍᓗ ᐱᓇᔪᒃᑐᖅ ᖃᓄᐃᓕᖓᓕᕐᒪᖔᑦ ᐱᓕᕆᐊᖑᒃᑯᓐᓂᖁᔭᑦ.

 

ᐱᖓᔪᖓᑦ ᐊᑐᖅᑕᐅᒋᐊᓕᒃ ᐱᓕᕆᐊᖑᓕᖅᑎᓪᓗᒍ ᐊᖓᔪᖅᑳᕆᔭᖅ ᑐᓂᓯᓇᔭᖅᐳᖅ ᑎᑎᖅᑲᖁᑎᒋᔭᐅᔪᓂᒃ ᕿᒥᕐᕈᓯᒪᔪᓂᒃ ᐊᒃᑐᐊᓂᓕᖕᓂᓪᓗ ᑎᑎᖅᑲᓂᒃ ᐊᐅᓚᑦᑎᔨᒧᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᒧᑦ ᕿᒥᕐᕈᒃᑲᓐᓂᕋᔭᕆᓪᓗᓂ. ᐃᖅᑲᓇᐃᔮᕆᔭᐅᔪᒪᔪᓕᕆᔨᑦ ᐊᖓᔪᖅᑳᖓ ᐅᓪᓗᓂᒃ ᑕᓪᓕᒪᓂᒃ (5) ᓴᓇᓐᓇᓂᒃ ᕿᒥᕐᕈᕕᒃᓴᖃᕋᔭᖅᐳᖅ, ᖃᓄᐃᓕᖓᓕᕐᓂᐊᕐᒪᖔᑦ ᐃᓱᒪᓕᐅᕆᔨᐅᓗᓂ ᕿᒥᕐᕈᔭᐅᔪᖅ ᐱᓇᔪᒃᑐᕐᓗ ᖃᐅᔨᒃᑲᕐᓗᓂᒋᑦ.

 

ᑭᖑᓪᓕᖅᐹᒥᒃ ᐊᑐᖅᑕᐅᓇᔭᖅᑐᖅ ᐱᓕᕆᐊᖑᑎᓪᓗᒍ ᑖᓐᓇ ᐱᓇᔪᒃᑐᖅ ᓱᓕ ᓈᒻᒪᒃᓵᓂᙱᑉᐸᑦ ᑎᑎᖅᑲᖁᑎᖓᑕ ᕿᒥᕐᕈᔭᐅᓂᖓᓂᒃ. ᑕᒪᓐᓇᓕ ᐊᑐᓕᖅᑕᐅᓕᖅᑎᓪᓗᒍ ᐃᑲᔪᖅᑕᐅᓇᓱᒃᑐᖅ ᑐᒃᓯᕋᖔᕈᓐᓇᖅᑎᑕᐅᕗᖅ ᐊᖏᖃᑎᖃᙱᓪᓗᓂᓘᓐᓃᑦ ᐱᓕᕆᔭᐅᑎᑦᑎᒃᑲᓐᓂᖔᕐᓗᓂ ᐃᖅᑲᓇᐃᔮᕆᔭᐅᔪᒪᔪᓕᕆᔨᑦ ᑐᑭᒧᐊᒃᑎᑦᑎᔨᖓᓐᓄᑦ ᑎᑎᖅᑲᖁᑎᒋᔭᐅᔪᒥᒃ ᕿᒥᕐᕈᓇᔭᕐᒪᑦ, ᖃᐅᔨᒪᔨᑕᐅᓗᓂᓗ ᖃᓄᐃᓕᖓᓕᕐᓂᕆᓂᐊᖅᑕᖓᓂᒃ ᐱᓇᔪᒃᑐᒥᒡᓗ ᖃᐅᔨᒃᑲᐃᓗᓂ. ᑐᑭᒧᐊᒃᑎᑦᑎᔨ ᑖᔅᓱᒥᖓ ᐱᓕᕆᓇᔭᖅᐳᖅ ᐅᓪᓗᓄᑦ ᑕᓪᓕᒪᓄᑦ (5) ᓴᓇᓐᓇᓄᑦ ᕿᒥᕐᕈᒋᐊᒃᓴᖅ. ᑖᓐᓇᓗ ᐃᓱᒪᓕᐊᕆᔭᐅᔪᖅ ᑭᖑᓪᓕᖅᐹᒥᒃ ᐋᖅᑭᒃᑕᐅᓇᔭᖅᖢᓂ.

 

 

ᑐᑭᓯᒋᐊᕐᕕᒋᔭᒃᓴᒃᑲᓐᓃᑦ

 

ᑐᑭᓯᒋᐊᒐᒃᓴᑦ ᑲᓇᑕᒥ – Nunavut Labour Market Development Agreement -ᓄᓇᕗᒻᒥ ᐃᖅᑲᓇᐃᔭᖅᑐᓕᕆᔨᑦ ᐱᕙᓪᓕᐊᔾᔪᑎᓄᑦ ᐊᖏᖃᑎᒌᒍᑎ

ᑐᑭᓯᒋᐊᒐᒃᓴᒃ ᐅᑯᓂᖓ ᐱᔾᔪᑎᓕᖕᓂᒃ federal apprenticeship supports - ᑲᓇᑕᒥ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕋᓱᒃᑐᓄᑦ ᐃᑲᔫᑎᑦ.

Contact Name: 
Family Services
I Am: 
a drop-out
a student
a teacher
a teenager/youth
unemployed
unskilled
I Need: 
a grant/loan/money
a job
skills training
ᐱᓕᕆᕕᒃ: