ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ/ᒐᕙᒪᒃᑯᑦ ᐃᖅᑲᓇᐃᔭᕐᑎᖏᓐᓄᑦ ᑲᑐᔾᔨᖃᑎᒌᑦ ᑲᓇᑕᒥ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᒃᑯᑦ ᐊᖏᖃᑎᒌᓐᓂᖃᓚᐅᖅᑯᑦ ᐋᔩᖃᑎᒌᓐᓂᖏᑦ ᑲᔪᓯᓂᖃᑦᑎᐊᓚᐅᖅᑎᓪᓗᒋᑦ

ᔪᓚᐃ 05, 2017

ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ/ᒐᕙᒪᒃᑯᑦ ᐃᖅᑲᓇᐃᔭᕐᑎᖏᓐᓄᑦ ᑲᑐᔾᔨᖃᑎᒌᑦ ᑲᓇᑕᒥ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᒃᑯᑦ ᐊᖏᖃᑎᒌᓐᓂᖃᓚᐅᖅᑯᑦ ᐋᔩᖃᑎᒌᓐᓂᖏᑦ ᑲᔪᓯᓂᖃᑦᑎᐊᓚᐅᖅᑎᓪᓗᒋᑦ

ᒫᓐᓇᐅᔪᖅ ᓴᖅᑭᖅᑕᐅᑦᑕᐅᑎᒋᔭᕆᐊᓕᒃ: ᔪᓚᐃ 5, 2017 - ᐃᖃᓗᐃᑦ, ᓄᓇᕗᑦ – – ᐊᖏᖃᑎᒌᓐᓂᖃᓚᐅᖅᑯᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ (NEU) ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᑭᒡᒐᖅᑐᐃᓪᓗᑎᑦ 160 ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓐᓃᑦᑐᓄᑦ ᐃᖅᑲᓇᐃᔭᖅᐸᒃᑐᓄᑦ ᐊᑐᐃᓐᓇᕈᐃᓂᕐᒥᑦ ᐆᒻᒪᖅᑯᑎᓂᒃ ᐱᔨᑦᑎᕋᖅᑕᒥᓄᑦ ᓄᓇᕗᑦᓕᒫᒥ.

"ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᖁᕕᐊᓱᒃᐳᑦ ᑎᑭᐅᑎᔪᓐᓇᕆᐊᒃᓴᒥᓂᒃ ᓈᒻᒪᓈᖅᑐᒥᒃ ᐊᒻᒪᓗ ᑕᐃᒪᐃᓪᓗᐊᖅᑎᑦᑎᔫᒥᔪᒥᒃ ᐊᖏᖃᑎᒌᒍᑎᖃᖅᑐᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᑦ ᑕᒪᓐᓇᓗ ᓴᖅᑭᓚᐅᖅᑐᓂ ᐃᑉᐱᒋᔭᐅᑦᑎᐊᕐᓂᒃᑯᑦ ᐃᓱᒫᓘᑎᐅᔪᑦ ᑕᒪᒃᑮᓐᓃᙶᖅᑐᑦ," ᐅᖃᖅᑐᓂ ᕕᐅᓪ ᕙᓄᓪ, ᐊᖓᔪᖅᑳᖅ ᓄᓇᕗᑦ ᐃᖅᑲᓇᔭᖅᑏᑦ ᑲᑐᔾᔨᖃᑎᒋᖏᓐᓄᑦ. "ᒫᓐᓇᐅᔪᖅ ᐱᒋᐊᖅᓯᒪᓕᖅᑕᕗᑦ ᑖᒃᑯᐊ ᐃᓕᔭᐅᕙᓪᓕᐊᑎᓐᓇᓱᒃᑐᒋᑦ ᐊᖏᖃᑎᒌᒍᑎᐅᓚᐅᖅᑐᑦ ᑖᒃᑯᐊ ᐃᓚᒋᔭᐅᔪᖁᑎᕗᑦ ᓂᕈᐊᕈᓐᓇᖅᓯᓚᐅᙱᓂᕐᒥᓂ. ᐅᑉᐱᕈᓱᒃᑐᒍᑦ ᑖᓐᓇ ᐊᖏᖃᑎᒌᒍᑎᐅᔪᖅ ᐃᑉᐱᒋᔭᐅᑦᑎᐊᕐᓂᒃᑯᑦ ᐃᓱᒫᓘᑎᐅᔪᓂᑦ ᐅᖃᐅᓯᐅᓯᒪᔪᓂᒃ ᐃᖅᑲᓇᐃᔭᖅᑎᓄᑦ ᐃᓱᒪᒋᔭᐅᓯᓐᓈᖅᑐᑎᑦ ᐃᖅᑲᓇᐃᔭᖅᑏᑦ ᐱᔭᕆᐊᓕᖏᑦ."

ᑕᒪᓐᓇ ᐃᓕᔭᐅᓂᖓ ᐊᖏᖃᑎᒌᒍᑎᐅᑉ ᓂᕆᐅᒋᔭᐅᕗᖅ ᐱᔭᕇᖅᓯᒪᓂᐊᕆᐊᖓ ᐱᓇᓱᐊᕈᓯᖅ ᐱᖓᔪᐊᓐᓂ ᐋᒌᓯ. ᑕᒪᓐᓇ ᐱᕕᔅᓴᐅᔪᖅ ᐱᔪᓐᓇᑎᑦᑎᓂᐊᖅᑯᖅ ᑖᒃᑯᓄᖓ ᐊᒃᑐᖅᑕᐅᓯᒪᔪᓄᑦ ᓄᓇᕗᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᓂᕈᐊᕈᓐᓇᖅᓯᖁᓪᓗᒋᑦ ᑐᑭᓯᐅᒪᖃᑎᒌᓐᓂᕐᒧᑦ ᐃᓕᔭᐅᓂᖏᓐᓄᑦ ᑕᒪᓐᓇᓗ ᑕᒪᐃᓐᓄᓕᒫᖅ ᐊᑐᓕᖁᔭᐅᓚᐅᖅᑐᓂ ᐊᖏᖅᑕᐅᓂᒃᑯᑦ ᑕᒪᒃᑮᓐᓄ ᑖᒃᑯᓇᙵᑦ ᓄᓇᕗᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ.

"ᑕᒪᓐᓇ ᐱᒻᒪᕆᐅᕗᖅ ᐊᓪᓗᕆᐊᕐᓂᕗᑦ ᓯᕗᒧᑦ ᑖᒃᑯᓄᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ, ᐊᒻᒪᓗ ᑖᒃᑯᐊ ᐅᐱᒋᒍᒪᕙᒃᑲ ᐋᔩᖃᑎᒌᓐᓂᕐᒧᑦ ᐱᓕᕆᔨᐅᓚᐅᖅᑐᑦ ᐱᓇᓱᐊᑦᑎᐊᖅᑐᒻᒪᕆᐅᓚᐅᕐᓂᖏᓐᓄᑦ ᑎᑭᐅᑎᓇᓱᒃᑐᑎᑦ ᐊᖏᖃᑎᒌᒍᑎᒥᒃ," ᐅᖃᖅᑐᖅ ᒥᓂᔅᑕ ᔮᓂ ᒪᐃᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ.

ᑖᓐᓇ ᓈᒻᒪᒋᔭᐅᑉᐸ ᓄᓇᕗᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐃᓕᔭᐅᕙᓪᓕᐊᑎᓪᓗᒍ ᐊᖏᖃᑎᒌᒍᑎᐅᔪᖅ, ᑖᓐᓇᓗ ᐊᖏᖃᑎᒌᒍᑎᐅᔪᖅ ᐊᑕᐃᓐᓇᕐᓂᐊᖅᑐᓂ ᑎᑭᓐᓇᓱᐊᕐᓂᖓᓂᑦ ᑎᓯᐱᕆ 31, 2020.

"ᖁᕕᐊᓱᑉᐳᖓ ᑖᒃᑯᐊ ᓄᓇᕗᑦᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑎᑭᐅᑎᒍᓐᓇᓚᐅᕐᓂᖏᓐᓄᑦ ᐊᖏᖃᑎᒌᒍᑎᒥᒃ. ᐅᐱᓐᓇᖅᑐᐃᓐᓇᐅᕘᒃ ᑕᒪᒃᑮᓐᓂᒃ ᐋᔩᖃᑎᒌᓚᐅᖅᑐᑦ ᐱᓕᕆᔪᒻᒪᕆᐅᓚᐅᕐᓂᖏᓐᓄᑦ ᐊᒻᒪᓗ ᐊᖏᖅᓯᒪᑦᑎᐊᓚᐅᕐᓂᖏᓐᓄᑦ," ᐅᖃᖅᑐᖅ ᒥᓂᔅᑕ ᑮᑦ ᐲᑕᓴᓐ, ᒥᓂᔅᑕ ᑲᒪᒋᔭᓕᒃ ᒐᕙᒪᒃᑯ ᐃᖅᑲᓇᐃᔭᕐᕕᖏᓐᓄᑦ ᐱᖁᔭᖅ.

-30-

ᒥᔅᓵᓄᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ (NEU), ᐃᓚᒋᔭᐅᖃᑕᐅᔪᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒋᖏᑦ ᑲᓇᑕᒥ (PSAC), ᑭᒡᒐᖅᑐᐃᓪᓗᑎᑦ ᐅᓄᕐᓂᖅᓴᐅᔪᓂᑦ 4,200 ᐃᖅᑲᓇᐃᔭᖅᑎᓂᑦ

ᐃᖅᑲᓇᐃᔭᖅᑐᑦ ᓄᓇᕗᑦᒧ ᐊᒻᒪᓗ ᓄᓇᓕᖁᑎᖏᓐᓄᑦ ᑕᒪᐃᓐᓂᓕᒫᖅ ᓄᓇᕗᑦᒥ. ᑖᓐᓇ ᓴᖅᑭᓚᐅᖅᑯᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑕᐃᑲᓂ 1998 ᑕᒪᓐᓇ ᓴᖅᑭᙱᓱᖓᖅᑎᓪᓗᒍ ᓱᓕ ᓄᓇᕗᑦ ᑕᐃᑲᓂ 1999. ᐊᑦᑕᑎᒋᓯᒪᔭᖏᑦ ᐃᖅᑲᓇᐃᔮᑦ ᑕᒪᔅᓱᒧᖓ ᓄᓇᕗᑦᒥ ᐃᖅᑲᓇᐃᔮᓂᑦ ᐊᑐᐃᓐᓇᖃᖅᑎᑦᑎᓂᕐᒥᑦ ᓯᕗᓂᑐᖃᑦᑎᓐᓂᑦ ᐱᒋᐊᖅᓯᒪᕗᖅ ᑕᒪᓐᓇᓗ ᓄᓇᕗᑦᒥ ᖃᓄᐃᓐᓂᐅᖃᑦᑕᖅᓯᒪᔪᑐᖃᐅᓪᓗᓂ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᓗᑎᑦ www.neu.ca.

ᒥᔅᓵᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑕᒪᓐᓇ ᓄᓇᕗᑦ ᐃᓛᑰᓕᓚᐅᖅᑎᓪᓗᒍ ᓄᓇᑦᓯᐊᕐᒥ, ᑖᒃᑯᐊ ᓄᓇᕗᑦᒥ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᖓ ᐱᓚᐅᖅᑯᑦ ᑎᓕᔭᐅᔾᔪᑎᒋᓯᒪᔭᖏᓐᓂᒃ ᐆᒻᒪᖅᑯᑎᖃᖅᑎᑦᑎᓂᐊᕐᓗᑎᑦ ᓄᓇᓕᓐᓄᑦ ᓄᓇᕗᑦᒥ ᑕᐃᑲᓂ ᐊᐃᐳᕉᓪ 1, 2001. ᐊᑦᑎᖅᑕᐅᑲᓐᓂᓚᐅᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᑕᐃᑲᓂ 2003, ᑖᓐᓇ ᐊᕕᒃᑐᖅᓯᒪᔪᓕᒫᒧᑦ ᑯᐊᐳᕇᓴᐅᔪᖅ ᓇᒻᒥᓂᕆᔭᐅᕗᖅ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪᓗ ᐊᐅᓚᑕᐅᓪᓗᓂ ᒐᕙᒪᒃᑯᓐᓄᑦ, ᐅᓂᒃᑳᓕᐅᖃᑦᑕᖅᑐᑎᑦ ᒥᓂᔅᑕᖓᓐᓄᑦ ᑲᒪᒋᔭᖃᖅᑐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄ. ᑖᓐᓇ ᑯᐊᐳᕇᓴᐅᔪᖅ ᐊᐅᓚᐅᑎᖃᖅᑐᑑᕗᖅ ᐊᒻᒪᓗ ᖃᐅᒻᒪᖅᑯᑎᑎᒍᑦ ᐊᐅᓪᓛᖅᑎᑦᑎᒍᓐᓇᖅᑐᑑᓪᓗᓂ ᓄᓇᕗᑦᒥ. ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕗᙵᕐᓗᑎᑦ www.qec.nu.ca.

ᑐᓴᐅᒪᒃᔪᑎᓕᕆᓂᕐᒧᑦ ᖃᐅᔨᒋᐊᕈᒪᒍᕕᑦ ᐊᑏ ᖃᐅᔨᒋᐊᕐᕕᒋᒍᒃ:

ᔭᐃᒻᔅ ᑲᐃᓗᕐ
ᑐᓴᒐᒃᓴᓕᕆᔨ
ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᑦ
ᐅᖄᓚᐅᑦ: (867.979.4209) ᓇᕿᒃᑲᓐᓂᕐᓗᒍ ᐅᓇ 204
ᐃᕐᖐᓐᓈᖅᑕᐅᑦ: james@neu.ca

ᓰᓚ ᐸᐸ
ᐊᐅᓚᑦᑎᔨ, ᐊᖓᔪᖅᑲᐅᑎᓄᑦ ᑐᓴᐅᒪᖃᑦᑕᐅᑎᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ
ᐅᖄᓚᐅᑦ: 867.979.7534
ᐃᕐᖐᓐᓈᖅᑕᐅᑦ:spapa@qec.nu.ca

ᑎᓃᔅ ᒍᕌᓐᒪᐃᓴᓐ
ᐊᐅᓚᑦᑎᔨ, ᑐᓴᐅᒪᔪᓕᕆᓂᖕᓄᑦ
ᑮᓇᐅᔭᓕᕆᔨᒃᑯᑦ
ᐅᖄᓚᐅᑦ: 867.975.6818
ᐃᕐᖐᓐᓈᖅᑕᐅᑦ: dgrandmaison@gov.nu.ca