ᐅᖃᓚᐅᑎᓯᐅᑏᑦ

You are here

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2017: ᐃᓄᒃᑐᑦ ᓴᖅᑭᔮᖅᑎᑦᑎᒃᑲᓐᓂᕐᓂᖅ ᐅᓂᒃᑳᖅᑐᐊᑎᒍᑦ

ᕕᕝᕗᐊᓕ 01, 2017

ᐱᕙᓪᓕᐊᔪᑦ ᐅᖃᐅᓯᐅᔪᑦ

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2017: ᐃᓄᒃᑐᑦ ᓴᖅᑭᔮᖅᑎᑦᑎᒃᑲᓐᓂᕐᓂᖅ ᐅᓂᒃᑳᖅᑐᐊᑎᒍᑦ

ᐃᖃᓗᐃᑦ, ᓄᓇᕗᑦ (ᕕᕝᕗᐊᕆ 1, 2017) – ᕕᕝᕗᐊᕆ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᐅᕗᖅ - ᐃᓄᒃᑐᑦ ᐅᖃᐅᓯᓕᕆᓂᐅᑉ ᑕᖅᑭᖓ, ᓄᓇᕗᒻᒥᐅᑦ ᖁᕕᐊᓲᑎᖃᕈᓐᓇᖅᖢᑎᒃ ᐃᓄᐃᑦ ᐅᖃᐅᓯᖓᓂᒃ ᐊᒻᒪ ᐃᓕᖅᑯᓯᖓᓂᒃ ᓄᓇᕘᓕᒫᒥ. ᑕᒪᑐᒪᓂ ᐊᕐᕌᒍᒥ ᐅᓇ ᐱᓕᕆᐊᖑᓂᐊᖅᑐᖅ ᐅᓂᒃᑳᖅᑐᐊᑦ, ᐃᒪᓐᓇ ᑐᑭᖃᖅᖢᓂ ᐃᓄᐃᑦ ᐅᓂᒃᑳᖅᑐᐊᖏᑦ. ᐃᓄᓪᓚᕇᑦ ᐅᓂᒃᑳᖅᑐᐊᖏᑦ ᐊᒻᒪ ᒫᓐᓇᓕᓴᐃᑦ ᐅᓂᒃᑳᖅᑐᐊᑦ ᐅᖃᐅᓯᖃᕈᑎᑦᑎᐊᕙᐅᕗᑦ ᓴᓇᐅᒐᕐᓂᒃ ᐊᒻᒪ ᐱᖅᑯᓯᑦᑎᓐᓂᒃ, ᐊᒃᑐᐊᖃᑦᑕᐅᑎᓂᑦᑎᓐᓂᒃ ᐊᒻᒪ ᐃᓱᒪᒋᔭᑦᑎᓐᓂᒃ ᑐᓴᖅᑎᑦᑎᔪᓐᓇᖅᖢᑕ ᓄᓇᕐᔪᐊᕐᒥ.

"ᑕᒪᑐᒪᓂ ᐊᕐᕌᒍᒥ ᐅᓇ ᐱᓕᕆᐊᖑᓂᐊᖅᑐᖅ, ᐅᓂᒃᑳᖅᑐᐊᑦ, ᓴᖅᑭᔮᖅᑎᑦᑎᕗᑦ ᐃᓕᖅᑯᓯᑦᑎᓐᓂᒃ ᐊᒻᒪ ᓴᓇᐅᒐᕐᓂᒃ ᐅᖃᐅᓯᖃᕐᓂᖅ ᐱᒻᒪᕆᐅᓂᖓᓂᒃ ᓄᓇᕗᒻᒥ," ᒥᓂᔅᑕ ᐅᖃᐅᓯᓕᕆᓂᕐᒧᑦ ᔪᐊᔾ ᑯᒃᓱᒃ ᐅᖃᖅᑐᖅ. "ᐃᓄᐃᑦ ᐊᒻᒪ ᒫᓐᓇᓕᓴᐃᑦ ᐅᓂᒃᑳᖅᑐᐊᖏᑦ ᖃᐅᔨᕚᓪᓕᕐᓇᖅᐳᑦ ᐃᓄᐃᑦ ᐅᒃᐱᕐᓂᖏᓐᓂᒃ ᐊᒻᒪ ᐃᓅᖃᑎᒌᖕᓂᕐᒥᒃ, ᐃᓄᐃᑦ ᐅᓂᒃᑳᖅᑐᐊᖏᑦ ᐱᑕᖃᖅᑎᑦᑏᓐᓇᖅᖢᓂᓗ. ᓄᓇᕗᒻᒥᐅᑦ ᑐᙵᓱᖁᕙᒃᑲ ᖁᕕᐊᓲᑎᖃᖁᓪᓗᒋᑦ ᐊᒻᒪ ᐃᓕᓐᓂᐊᒃᑲᓐᓂᕐᓗᑎᒃ ᐅᓂᒃᑳᖅᑐᐊᓂᒃ ᐊᒻᒪ ᑕᐃᒎᓯᖏᓐᓂᒃ ᐱᔾᔪᑎᓕᖕᓂᒃ ᕕᕝᕗᐊᕆ ᐊᑐᖅᑎᓪᓗᒍ."

ᑕᒪᑐᒪᓂ ᐊᕐᕌᒍᒥ ᖁᕕᐊᓲᑎᖃᖅᑎᓪᓗᒋᑦ, ᐃᓕᖅᑯᓯᓕᕆᔨᒃᑯᑦ ᓴᖅᑭᑎᑦᑎᓂᐊᕆᕗᑦ ᓂᐱᓕᐅᖅᓯᒪᔪᓂᒃ 2016−ᒥ ᓵᓚᖃᓚᐅᖅᑐᓂᑦ ᕿᓚᐅᑦ−ᒥᑦ, ᓄᓇᕗᒻᒥ ᐊᕐᕌᒍᑕᒫ ᐃᓄᒃᑐᑦ ᐃᙱᐅᑎᓂᒃ ᓵᓚᕐᓴᕋᓱᐊᖅᑎᑕᐅᕙᒃᑐᑦ. ᓵᓚᖃᓚᐅᖅᑐᑦ ᐃᙱᐅᑏᑦ ᖃᕆᓴᐅᔭᒃᑯᑦ ᒪᓂᒪᑎᑕᐅᓕᕐᓂᐊᖅᐳᑦ ᐊᒻᒪ ᕿᓪᓕᖅᑐᒃᑯᑦ. ᕿᑐᑦᑐᒐᐅᔭᐃᑦ ᐴᖅᑲᖅᓯᒪᔪᑦ ᐃᓄᒃᑐᑦ ᐊᑐᒐᒃᓴᐃᑦ ᐅᖃᓕᒫᒐᖃᖅᖢᑎᒃ, ᐸᑦᑕᖕᓂᒃ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐊᑭᓐᓇᕐᒥᐅᑕᓂᒃ ᓴᖅᑭᔮᖅᑎᑦᑎᒃᑲᓐᓂᕋᓱᒃᑐᓂᒃ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᕐᒥᒃ ᑐᓐᓂᖅᓴᐅᑕᐅᓛᕆᕗᑦ ᐃᓕᓐᓂᐊᕐᕕᓕᒫᓄᑦ ᐸᐃᕆᕝᕕᖕᓄᑦ ᐊᒻᒪ ᐅᖃᓕᒫᒐᖃᕐᕕᖕᓄᑦ ᓄᓇᕘᒥ.

ᓄᓇᕗᑦ ᒐᕙᒪᒃᑯᑦ ᓄᓇᕗᒻᒥᐅᓂᒃ ᑎᓕᐅᕆᕗᑦ ᐃᓚᐅᖁᔨᓪᓗᑎᒃ ᑕᒪᑐᒪᓂ ᐊᕐᕌᒍᒥ ᖁᕕᐊᓲᑎᖃᓕᖅᐸᑕ ᐅᖃᓪᓚᖃᑕᐅᓗᑎᒃ, ᐃᓕᓴᐃᓗᑎᒃ, ᐊᒻᒪ ᐃᓕᓐᓂᐊᕐᓗᑎᒃ ᐃᓄᒃᑐᑦ, ᐊᒻᒪ ᐋᖅᑭᒃᓱᐃᓗᑎᒃ ᐃᓄᐃᑦ ᐱᓕᕆᐊᕆᕙᒃᑕᖏᓐᓂᒃ ᐊᖏᕐᕋᒥᓂᒃ ᐊᒻᒪ ᓄᓇᑦᑎᓐᓂ, ᐃᖅᑲᓇᐃᔭᕐᕕᖕᓂ ᐊᒻᒪ ᐃᓕᓐᓂᐊᕐᕕᖕᓂ.

ᑐᑭᓯᒋᐊᒃᑲᓐᓂᕈᒪᒍᕕᑦ ᑕᒪᑐᒪᓂ ᐊᕐᕌᒍᒥ ᐱᓕᕆᐊᖑᓂᐊᖅᑑᑉ ᒥᒃᓵᓄᑦ ᐊᒻᒪ ᐊᑐᒐᒃᓴᓂᒃ ᐅᖃᐅᓯᓕᕆᓂᕐᒧᑦ ᑐᕌᖓᔪᓂᒃ ᐊᒻᒪ ᐃᓚᒌᑦ ᐅᖃᓕᒫᕆᐅᖅᓴᔾᔪᑎᒃᓴᖏᓐᓂᒃ, ᐅᕗᖓ ᑕᑯᒋᐊᕐᓗᑎᑦ www.ch.gov.nu.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐃᓕᓴᐱ ᐊᓚᒃᑲᕆᐊᓪᓚᒃ ᕌᐳᑦᔅ
ᑐᓴᒐᒃᓴᓕᕆᔨ
ᐃᓕᖅᑯᓯᓕᕆᔨᒃᑯᑦ
867-975-5543
EARoberts@gov.nu.ca