ᐅᖃᓚᐅᑎᓯᐅᑏᑦ

You are here

ᓄᑖᖅ ᓯᓚᒥ ᐱᙳᐊᕐᕕᒃ ᐃᓕᓐᓂᐊᖅᑎᓄᑦ ᓕᐅ ᐅᓴᒃ ᐃᓕᓐᓂᐊᕐᕕᒃ ᑲᖏᕐᖠᓂᕐᒥ

ᔪᓚᐃ 13, 2017

ᓕᐅ ᐅᓴᒃ ᐃᓕᓐᓂᐊᖅᑎᖏᑦ, ᖃᑕᙳᑎᖏᑦ ᐊᓯᖏᓪᓗ ᓄᓇᓕᐅᖃᑕᐅᔪᑦ ᐊᑐᕈᓐᓇᖅᓯᔪᑦ ᐃᖃᐃᓕᓴᒃᑲᓐᓂᕐᓂᕐᒧᑦ ᐱᙳᐊᖅᑐᓕᕆᓂᕐᒥᒃᓗ ᐱᕕᒃᓴᓂᑦ ᓄᑖᑦᑎᐊᒧᑦ ᓴᓇᔭᐅᓵᖅᑐᒧᑦ ᓯᓚᒥ ᐱᙳᐊᕐᕕᖕᒥ ᓄᓇᓕᖓᓂ ᑲᖏᕐᖠᓂᖅ.

 

ᓄᑖᖅ ᓯᓚᒥ ᐱᙳᐊᕐᕕᒃ ᐋᖅᑭᒃᓯᒪᔪᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᔾᔨᒌᖏᑦᑐᓄᑦ ᐅᑭᐅᓕᖕᓄᑦ. ᐃᓚᐅᑎᑦᑎᔪᖅ ᐱᕕᖃᕐᖢᓂ ᒪᖕᑭᙴᔭᕈᑎᓂᒃ, ᐊᔾᔨᒌᖏᑦᑐᓂᒃ ᓯᑐᖃᕐᕕᖕᓂ ᐊᒻᒪᓗ ᖃᕝᕕᑲᑕᒃᕕᖕᓂ ᐱᑎᑦᑎᔪᓐᓇᖅᑐᓂᒃ ᐱᙳᐊᕈᑎᓂᒃ, ᖁᕕᐊᓱᒍᑎᓂᒃ ᐃᓂᐅᓪᓗᓂᓗ ᐃᓕᓐᓂᐊᖅᑎᓄᑦ, ᐱᖃᓐᓇᕇᓄᑦ ᖃᑕᙳᑎᒌᓄᓪᓗ ᑲᑎᒍᑎᓂᕐᒥ.

 

"ᓯᓚᒥ ᐱᙳᐊᕐᕖᑦ ᐱᒻᒪᕆᐅᔪᑦ ᓄᓇᓕᖕᓄᑦ. ᐱᑎᑦᑎᖕᒪᑕ ᐃᓄᖃᕐᕕᖕᓄᑦ ᐱᕕᒃᓴᒥᒃ ᓄᑕᖅᑲᑦ ᐱᙳᐊᕈᓐᓇᕐᓗᑎᒃ ᐊᑦᑕᕐᓇᙱᑦᑐᒥ, ᖃᑕᙳᑎᒌᑦ ᑲᑎᙵᖃᑎᒌᒍᓐᓇᖅᑐᑦ ᐱᕕᖏᓐᓂ ᓄᓇᓕᒃᓗ ᑲᑎᑦᑐᓐᓇᕐᖢᓂ,” ᐅᖃᖅᑐᖅ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐹᓪ ᖁᐊᓴ.

 

ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓴᖅᓯᔪᑦ ᐱᒻᒪᕆᐅᓂᖓᓂᒃ ᑎᒥᒃᑯᑦ ᖃᓄᐃᓕᐅᕈᑎᓂᒃ ᐃᓕᓐᓂᐊᖅᑎᖁᑎᑦᑎᓐᓄᑦ. ᐃᓕᐅᖅᑲᐃᓂᖅ ᓯᓚᒥ ᐱᙳᐊᕐᕕᖕᓂ ᐃᓕᓐᓂᐊᕐᕕᖁᑎᑦᑕ ᖃᓂᒋᔭᖏᓐᓂ ᐱᑎᑦᑎᔪᖅ ᐃᓕᓐᓂᐊᖅᑎᓂᒃ ᐱᔪᓐᓇᕐᓗᑎᒃ ᐊᑦᑕᕐᓇᙱᑦᑐᒥᒃ ᓯᓚᒥ ᑎᒥᒃᑯᑦ ᖃᓄᐃᓕᐅᕐᓂᕐᒥ ᐊᕙᑎᓕᖕᒥ.

 

ᓄᓇᓖᑦ ᐃᓚᐅᓪᓗᑎᒃ ᐃᒡᓗᓕᒑᕐᔪᒃ, ᕿᑭᖅᑕᕐᔪᐊᖅ, ᐊᕐᕕᐊᑦ, ᓴᓪᓖᑦ, ᑎᑭᕋᕐᔪᐊᖅ, ᐊᒻᒪᓗ ᑭᒻᒥᕈᑦ ᓂᕆᐅᒋᔭᖃᕈᓐᓇᕐᒥᔪᑦ ᑕᑯᓂᓛᕆᐊᔅᓴ ᓄᑖᒥᒃ ᓯᓚᒥ ᐱᙳᐊᕐᕕᖕᓂ ᓴᓇᔭᐅᔪᓂᒃ ᑕᒪᑐᒪᓂ ᐊᕐᕌᒍᒥ.

 

ᑐᓴᕆᐊᒃᑲᓐᓂᕈᑎᓄᑦ ᖃᐅᔨᒋᐊᕐᓗᒍ info.edu@gov.nu.ca. ᐅᕝᕙᓘᓐᓃᑦ 867-975-5649.