ᐅᖃᓚᐅᑎᓯᐅᑏᑦ

You are here

ᐊᕕᑦᑐᖅᓯᒪᔪᐃᑦ ᑲᑐᔾᔨᖃᑎᖃᕐᓂᐊᖅᑐᑦ ᐃᐅᓪᕘᑕᒥᑦ ᐃᓕᓐᓂᐊᕈᑎᑦᓴᓂᑦ ᐊᑐᓕᒃᑲᓐᓂᖅᑎᑕᐅᕙᓪᓕᐊᓂᖓᓄᑦ

ᓯᑎᐱᕆ 12, 2017

ᐃᐅᓪᕘᑕᒥ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᖅᓱᑎᒃ ᓄᓇᕗᒻᒥ ᓄᓇᑦᓯᐊᕐᒥᓪᓗ ᐊᑐᓕᒃᑲᓐᓂᖅᑎᑕᐅᕙᓪᓕᐊᓂᖓᓄᑦ ᐃᐅᓪᕘᑕᒥ ᑭᒥᓛᓂᑦ-12-ᒧ ᐃᓕᓐᓂᐊᕈᑎᑦᓴᓂᑦ. ᐋᖅᑭᒋᐊᖅᑕᐅᓂᖓ ᑐᕌᒐᖃᖅᑐᖅ ᐱᐅᓯᕚᓪᓕᑎᑦᓯᓂᕐᒥᑦ ᐃᓕᓐᓂᐊᕐᓂᕐᒥᑦ ᐱᔪᓐᓇᕐᓂᕐᒥᓪᓗ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑎᓄᑦ ᑐᙵᕕᒋᓗᒍ ᐅᓪᓗᒥᒧᑦ ᖃᐅᔨᓴᕐᓂᐅᔪᖅ ᐃᓕᓐᓂᐊᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᓪᓗ.

 

ᒫᓐᓇᐅᔪᖅ, ᓄᓇᕗᑦ ᒪᓕᖃᑦᑕᕐᒪᑦ ᐃᐅᓪᕘᑕᒥᑦ ᑭᒥᓛᓂᑦ-12ᒧ ᐊᑐᖅᑕᐅᖃᑦᑕᖅᑐᒥᑦ ᐃᓚᓕᐅᑎᑦᓱᑎᓪᓗ ᑐᙵᕕᖓᓂᑦ ᐃᓄᐃᑦ ᖃᐅᔨᒪᔭᑐᐊᖏᑦ. ᐃᓕᓐᓂᐊᖅᑏᑦ ᐱᕚᓪᓕᖃᑦᑕᕐᒪᑕ ᐃᓕᓐᓂᐊᕈᑎᑦᓴᓂᑦ ᐃᓚᓕᐅᔾᔨᔪᓂᑦ ᐃᓄᐃᑦ ᐱᒻᒪᕆᐅᒋᔭᖏᓐᓂᑦ ᑐᙵᕕᓕᓐᓂᑦ ᐃᓄᐃᑦ ᐱᖅᑯᓯᕐᓂᑦ ᖃᐅᔨᒪᔭᖏᓐᓂᑦ, ᐅᖃᐅᓯᕐᒥᑦ ᐅᑉᐱᕆᔭᖏᓐᓂᓪᓗ. ᐃᓚᓕᐅᔾᔨᓂᒃᑯᑦ ᑐᙵᕕᐅᔪᓂᑦ ᐱᓕᕆᖃᑎᒌᓐᓂᖅ: ᐱᓇᓱᐊᖅᑕᒥᓂᒃ ᐱᓕᕆᖃᑎᒌᓐᓂᖅ, ᓄᓇᕗᑦ ᓄᓇᑦᓯᐊᕐᒥᓪᓗ ᐃᓕᓐᓂᐊᕐᓂᓕᕆᓂᕐᒧᑦ ᓯᕗᓕᖅᑏᑦ ᐱᓕᕆᖃᑎᒌᓐᓂᐊᖅᑐᑦ, ᑲᑐᔾᔨᖃᑎᖃᕐᓗᑎᓪᓗ ᐃᐅᓪᕘᑕᒥᑦ ᐊᐅᓚᓂᖅᑖᖅᑲᐅᔪᒥᑦ ᐱᕙᓪᓕᐊᑎᑦᓯᓂᕐᒥᑦ ᐃᓕᓐᓂᐊᕈᑎᑦᓴᓂᑦ. ᐃᓚᒋᔭᐅᓗᓂ ᐋᖅᑭᒋᐊᖅᑕᐅᓂᖓ ᖃᓄᐃᓕᐅᖅᑕᐅᕙᓚᐅᖅᑐᓄᑦ, ᐃᓱᒪᒋᔭᐅᔪᓂᑦ ᐃᑲᔫᑎᓂᖏᓐᓄᓪᓗ ᓄᓇᖃᖅᑳᖅᓯᒪᔪᑦ, ᐊᓪᓚᖓᔪᑦ, ᐃᓄᐃᑦ, ᐅᐃᕖᓪᓗ ᐃᓄᐃᑦ.

 

ᔫ ᖃᕆᑕᖅ - ᓄᓇᓕᓐᓂᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐊᐅᓚᑦᓯᔨ, ᑭᐊᓐ ᕕᐅᑦᓵᓪ - ᓄᓇᕗᓯᐅᑎᑦ ᐃᓕᓐᓂᐊᕈᑎᑦᓴᓂᑦ ᐊᐅᓚᑦᓯᔨ, ᓲᓯ ᒪᒃᐸ - ᐃᓄᒃᑎᑐᑦ ᐊᐅᓚᑦᓯᔨ, ᐃᓕᓐᓂᐊᕈᑎᑦᓴᓂᑦ ᐃᓕᓐᓂᐊᕐᕕᒻᒥᓪᓗ ᐱᔨᑦᓯᕋᕐᓂᕐᒧᑦ ᐊᒻᒪᓗ ᔨᐃᒻ ᑯᓘᒍ - ᐃᓕᓐᓂᐊᕐᓂᓕᕆᓂᕐᒧᑦ ᐅᖃᐅᔾᔨᒋᐊᖅᑎ ᐅᐸᑦᓯᒪᓚᐅᖅᑐᑦ ᐅᖃᖃᑎᒌᓐᓂᕐᒧᑦ ᑲᑎᒪᓂᕐᒧᑦ ᐃᐅᓪᕘᑕᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓇᓱᐊᕈᓯᐅᓚᐅᖅᑐᒥᑦ. ᖃᕆᑕᖅ ᐅᖃᐅᓯᖃᓚᐅᖅᑐᖅ ᐃᓄᐃᑦ ᐃᓱᒪᒋᔭᖏᓐᓂᑦ ᐃᓚᒋᔭᐅᑦᓱᓂ ᖃᐅᔨᒪᔾᔪᑎ ᐃᓕᖅᑯᓯᕐᒥᑦ ᖃᐅᔨᒪᓂᕐᒥᑦ, ᓯᓚᑐᓂᖏᓐᓄᑦ ᐅᖃᐅᓯᒃᑯᓪᓗ ᐱᖅᑯᓯᕐᒧᑦ. ᓇᓗᓇᐃᖅᓯᓚᐅᖅᑐᖅ ᐱᒻᒪᕆᐅᓂᖓᓂᑦ ᐃᓄᑐᖃᐃᑦ ᖃᐅᔨᒪᓂᖃᕐᓂᕐᒥᓪᓗ ᐱᓯᒪᑦᓯᔪᓂᑦ ᐃᓚᓕᐅᔾᔨᑎᑦᓯᓂᕐᒥᑦ ᐃᓄᐃᑦ ᖃᓄᖅ ᖃᐅᔨᒪᓂᐊᕐᓂᖏᓐᓄᑦ ᐃᓕᓐᓂᐊᕋᑦᓴᓂᑦ, ᖃᓄᓪᓗ ᐱᒻᒪᕆᓪᓚᕆᐅᓂᖓᓄᑦ ᓅᑎᑦᓯᓂᕐᒥᑦ, ᐱᓯᒪᑦᓯᓂᕐᒥᑦ ᐱᓯᒪᑦᓯᖏᓐᓇᓂᕐᒥᓪᓗ ᖃᐅᔨᒪᓂᕐᓂᑦ, ᐅᖃᐅᓯᕐᒥᑦ ᐱᖅᑯᓯᕐᓂᓪᓗ.

 

 “ ᖁᕕᐊᓇᓪᓚᕆᑦᑐᖅ ᐱᔪᓐᓇᕐᓂᖃᕐᕕᒋᔭᑦᑎᓐᓂᑦ ᐱᓕᕆᖃᑎᒌᒍᓐᓇᓂᕐᒥᑦ ᐃᓚᓕᐅᔾᔨᕙᓪᓕᐊᓂᕐᒥᑦ ᐃᓄᐃᑦ ᐃᓕᖅᓯᖓᓂᑦ ᐃᓕᓐᓂᐊᕈᑎᑦᓴᓄᑦ,” ᐅᖃᖅᑐᖅ ᔫ ᖃᕆᑕᖅ. “ᖁᕕᐊᒋᔭᖃᖅᑐᖓ ᐱᓕᕆᖃᑎᒌᓐᓂᕐᒥᑦ ᐃᓕᓐᓂᐊᕈᑎᑦᓴᓂᑦ ᐱᕙᓪᓕᐊᑎᑦᓯᓂᕐᒥᑦ ᐱᕙᓪᓕᐊᓂᕐᒥᑦ; ᐃᑲᔪᖅᑐᖅᓂᐊᖅᑐᕆᔭᕋᓕ ᐊᔾᔨᒌᑦᑐᒥᑦ ᑐᕌᒐᖃᑦᓯᐊᖅᑐᒥᓪᓗ ᐃᓕᓐᓂᐊᕐᓂᕐᒥᑦ ᓄᓇᕗᒻᒥᐅᓕᒫᑦ ᐃᓕᓐᓂᐊᖅᑎᖏᓐᓄᑦ.”

 

ᖃᕆᑕᖅ, ᕕᐅᑦᓵᓪ, ᒪᒃᐸ ᑯᓘᒍᓗ ᐃᓚᐅᖃᑕᐅᓯᒪᕗᑦ ᐋᖅᑭᒋᐊᖅᑕᐅᓂᖓᓄᑦ 2016-ᒥᓂᑦ. “ᐃᓕᓐᓂᐊᕈᑎᑦᓴᐃᑦ ᓴᖅᑭᑎᑦᓯᓂᐅᕗᖅ ᐱᐅᔪᓂᑦ ᓯᕗᓂᑦᓴᖓᓄᑦ ᓄᓇᕗᑦ,” ᐅᖃᖅᑐᖅ ᕕᐅᑦᓵᓪ. “ᐱᒻᒪᕆᐅᕗᖅ ᐃᓕᓐᓂᐊᖅᑎᑕᐅᔪᓄᑦ ᑐᙵᕕᖃᕐᓂᕐᒥᓪᓗ ᐃᓕᓐᓂᐊᕐᓂᕐᒧᑦ ᖃᐅᔨᒪᓕᕐᓂᐊᕐᒪᑕ.” ᑎᑎᕋᖅᑕᐅᑲᓐᓂᕐᓂᖅ ᓇᓚᐅᑦᓵᖅᑕᐅᓯᒪᔪᖅ ᐊᕐᕌᒍᓐᓂᑦ ᐱᖓᓲᔪᖅᑐᓂᑦ ᐱᔭᕇᖅᑕᐅᒐᔭᕆᐊᖓᓂᑦ, ᑐᕌᒐᖃᕐᓂᐊᖅᓱᑎᓪᓗ ᐱᖓᓲᔪᖅᑐᓂᑦ ᐃᓕᓐᓂᐊᕈᑕᐅᕙᑦᑐᓂᑦ: ᑎᑎᖅᑐᒐᓕᕆᓂᖅ, ᐅᖃᐅᓯᓕᕆᓂᖅ, ᓈᓴᐅᓯᕆᓂᖅ, ᐃᓄᓕᕆᓂᕐᒧᑦ, ᖃᐅᔨᓴᕐᓂᖅ, ᖃᓄᐃᖏᑦᓯᐊᕐᓂᕐᒥᓪᓗ.

 

ᐃᓚᖓᑦ ᒐᕙᒪᒃᑯᑦ ᓄᓇᕗᒻᒥᑦ ᐱᓇᓱᐊᒐᖓᑦ ᐊᑐᓕᖅᑎᑦᓯᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᓄᓇᕗᒻᒥᐅᓕᒫᓂᑦ ᐃᓕᓐᓂᐊᕐᕕᓐᓂᑦ. ᒫᓐᓇᐅᔪᖅ ᐃᓚᒋᔭᐅᓂᖅ ᐊᕕᑦᑐᖅᓯᒪᔪᓄᑦ ᐃᐅᓪᕘᑕᐅᑉ ᐃᓕᓐᓂᐊᕋᑦᓴᓂᑦ ᐋᖅᑭᑦᑕᐅᓂᖓᓄᑦ ᓇᓗᓇᐃᖅᓯᓂᐊᖅᑐᖅ ᐃᓕᓐᓂᐊᕐᓂᕐᒥᑦ ᓄᓇᕗᒻᒥᑦ ᐱᐅᔪᒥᑦ ᐊᑦᑐᐃᓂᖃᕐᓂᐊᖅᑐᖅ ᐱᓕᕆᓂᓕᒫᓂᑦ ᐃᓕᓐᓂᐊᕐᓂᕐᒧᑦ ᑭᓯᐊᓂ ᓇᓗᓇᐃᖅᓯᓂᕐᒥᓪᓗ ᓯᕗᓂᑦᓴᖓᓐᓂᑦ ᐃᐅᓪᕘᑕᐅᑉ ᐃᓕᓐᓂᐊᕋᑦᓴᖏᓐᓂᑦ ᐃᓚᒋᔭᖃᕐᓗᓂ ᐃᓄᐃᑦ ᐅᑭᐅᖅᑕᖅᑐᒥᐅᓪᓗ ᐃᓱᒪᒋᔭᖏᓐᓂᑦ ᐃᑲᔪᖅᑐᕐᓂᕐᒥᑦ ᓴᖅᑭᑎᑦᓯᓂᕐᒧᑦ ᐱᐅᔪᒥᑦ ᐱᒻᒪᕆᐅᔪᓂᑦ ᓄᓇᓕᐅᔪᓂᑦ. 

 

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒃᑲᕐᓗᒍ info.edu@gov.nu.ca. ᐅᕝᕙᓘᓐᓃᑦ 867-975-5649.