ᐅᖃᓚᐅᑎᓯᐅᑏᑦ

You are here

ᖃᓄᐃᒻᒪᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑲᑎᒪᔨᙳᕋᔭᖅᐱᑦ?

ᐃᓅᖃᑎᒌᑦᑎᐊᕐᓂᖅ … ᑐᙵᓇᕐᓂᖅ … ᐱᔨᑦᓯᕐᓂᖅ … ᐋᔩᖃᑎᒌᖕᓂᖅ … ᐱᓕᒻᒪᒃᓴᕐᓂᖅ/ᐱᔭᕆᐅᖅᓴᕐᓂᖅ … ᐱᓕᕆᖃᑎᒌᖕᓂᖅ/ᐃᑲᔪᖅᑎᒌᖕᓂᖅ … ᖃᓄᖅᑑᕐᓂᖅ … ᐊᕙᑎᑦᑎᓐᓂᒃ ᑲᒪᑦᓯᐊᕐᓂᖅ …

 

ᐱᕕᒃᓴᑦᑎᐊᕙᒃ ᓄᓇᔅᓯᓐᓂ ᐱᔨᑦᑎᕋᖅᑎᐅᖃᑕᐅᓂᕐᒧᑦ

ᓄᓇᓕᖕᓂ ᓂᕈᐊᖅᑕᐅᓯᒪᓗᑎᑦ ᐃᓄᖕᓂᒃ ᑭᒡᒐᖅᑐᐃᔨᐅᓂᕐᒧᑦ, ᐃᓚᒋᔭᐅᓕᕐᓂᐊᖅᐳᑎᑦ ᓄᓇᓕᖕᓂ ᐱᔨᑦᑎᕋᖅᑎᒋᔭᐅᓂᐊᖅᑐᓄᑦ ᐊᖑᑎᓂᒃ ᐊᕐᓇᓂᒡᓗ ᐱᓕᕆᖃᑎᒌᒃᑐᓂᒃ ᐊᑭᓕᖅᓱᖅᑕᐅᙱᖦᖢᑎᒃ ᐃᑲᔪᖃᑦᑕᕐᓂᐊᖅᑐᓂᒃ ᓄᓇᓖᑦ ᐃᓕᓐᓂᐊᕐᕕᖏᓐᓂ. ᑲᑎᒪᔭᕆᐊᖃᓕᕌᖓᑕ ᑲᑎᒪᖃᑕᐅᖃᑦᑕᕐᓗᑎᑦ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓂᕆᐅᒋᔭᐅᔪᓂᒃ ᐱᓕᕆᖃᑕᐅᔪᓐᓇᖃᑦᑕᖅᐳᑦ ᐃᑲᔪᖅᑎᒌᖕᓂᒃᑯᑦ ᐋᖅᑭᒃᓱᐃᔨᐅᓪᓗᑎᒃ ᓯᕗᓂᒃᓴᒥ ᐃᓕᓐᓂᐊᕐᕖᑦ ᐃᓕᓐᓂᐊᕐᕕᐊᕈᓯᖏᓐᓂᒃ ᐊᒻᒪ ᓄᓇᓕᖕᓄᑦ ᐃᑲᔫᑕᐅᔪᓐᓇᖅᓯᕙᒃᖢᑎᒃ.

 

ᓇᖕᒥᓂᖅ ᐱᕈᖅᐸᓪᓕᐊᓂᖅ ᐊᒻᒪ ᐱᕙᓪᓕᐊᑎᑦᑎᓂᖅ

ᐃᓕᓐᓂᐊᖅᑐᓕᕆᔨᒃᑯᑦ ᐅᓄᖅᑐᓂᒃ ᐱᕕᒃᓴᖃᖅᑎᑦᑎᖃᑦᑕᖅᐳᑦ ᓯᕗᓕᖅᑎᙳᕆᐅᖅᓴᒃᑲᓐᓂᕈᑎᒃᓴᕐᓂᒃ, ᐱᓕᒻᒪᒃᓴᖅᐸᓪᓕᐊᓗᑎᒃ ᑭᒃᑯᑐᐃᓐᓇᓄᑦ ᐅᖃᖅᑎᐅᓂᕐᒧᑦ ᐊᒻᒪ ᑐᓴᐅᒪᑎᑦᑎᓂᕐᒧᑦ. ᑲᑎᒪᔨᓂᒃ ᐃᓚᐅᖃᑕᐅᖃᑦᑕᕐᓂᒃᑯᑦ ᐱᓕᕆᐊᒃᓴᕆᕙᒃᑕᖏᑦ ᐱᕙᓪᓕᐊᔾᔪᑎᒋᓂᐊᖅᐸᑎᑦ ᐊᐅᓚᑦᑎᔨᒋᔭᔅᓯᓐᓂᒃ, ᐸᕐᓇᐃᓂᕐᒥᒃ ᐊᒻᒪ ᐊᑲᐅᙱᓕᐅᕈᑎᓂᒃ ᐋᖅᑭᒃᓱᐃᔪᓐᓇᕐᓂᕐᒥᒃ. ᐃᓚᐅᖃᑦᑕᕐᓂᒃᑯᑦ ᑲᑐᔾᔨᖃᑎᒌᒍᓐᓇᖅᓯᕙᓪᓕᐊᓂᐊᖅᐳᑎᑦ ᐊᒻᒪ ᐃᓕᓐᓂᐊᖅᑎᑦᑎᖃᑕᐅᔪᓐᓇᖅᓯᓗᑎᑦ.

 

ᐱᓕᕆᔨᒻᒪᕇᑦ ᑐᓴᐅᒪᖃᑎᒌᖕᓂᖏᑦ

ᐱᕕᒃᓴᖃᕐᕕᒋᓗᒍ ᐅᓪᓗᒥ ᓄᓇᓕᖕᓂ ᐊᒻᒪ ᓇᖕᒥᓂᓖᑦ ᓯᕗᓕᖅᑎᖏᓐᓂᒃ ᐱᓕᕆᖃᑎᖃᕈᓐᓇᕐᓗᑎᒃ ᐱᒻᒪᕆᐅᔪᓂᒃ ᐃᓱᒪᓕᐅᖃᑎᒌᒃᐸᒃᑐᓂᒃ ᐊᒻᒪ ᐊᒃᑐᐃᕙᒃᑐᓂᒃ ᓄᓇᓕᖕᓂ ᐃᓕᓐᓂᐊᖅᑐᓕᕆᓂᕐᒥᒃ.

 

 

ᐅᑯᓂᖓ ᐱᓕᕆᖃᑦᑕᖅᓯᒪᒍᕕᑦ ᖃᐅᔨᒪᒍᕕᓪᓗ ᐊᑲᐅᓇᔭᖅᐳᖅ

ᓂᕈᐊᒐᒃᓴᐃᑦ ᐱᓕᕆᖃᑦᑕᖅᓯᒪᓂᑰᔭᕆᐊᖃᙱᑦᑐᑦ ᐃᓕᓐᓂᐊᖅᑐᓕᕆᓂᕐᒥᒃ ᐅᕝᕙᓘᓐᓃᑦ ᑮᓇᐅᔭᓕᕆᓂᕐᒥᒃ. ᑭᓯᐊᓂ, ᐅᑯᓂᖓ ᐊᔪᙱᒃᑯᓂ ᐱᓕᕆᖃᑦᑕᖅᓯᒪᓐᓂᕈᓂᓗ ᐃᑲᔪᕐᓂᖃᕋᔭᖅᐳᖅ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔨᐅᖃᑕᐅᓇᔭᕈᓂ:

  • ᐃᓚᖏᓐᓂᒃ ᑐᑭᓯᐅᒪᓗᓂ ᑮᓇᐅᔭᓕᕆᔾᔪᑎᓂᒃ ᐊᒻᒪ ᑮᓇᐅᔭᓂᒃ ᐊᑐᖅᑐᒃᓴᓂᒃ ᐊᐅᓚᑦᑎᓂᕐᒥᒃ
  • ᑐᑭᓯᐅᒪᓪᓗᐊᑕᕆᐊᓕᒃ ᑲᑎᒪᔾᔪᑎᑦ ᐱᐅᓯᕆᕙᒃᑕᖏᓐᓂᒃ ᐊᒻᒪ ᒐᕙᒪᒃᑯᑦ ᐊᑐᐊᒐᖏᓐᓂᒃ
  • ᑐᑭᓯᐅᒪᓪᓗᐊᑕᕆᐊᓕᒃ ᑲᑎᒪᔨᐅᖃᑕᐅᔪᑦ ᐱᓕᕆᐊᕆᔭᕆᐊᓕᖏᓐᓂᒃ
  • ᐃᓚᖏᓐᓂᒃ ᖃᐅᔨᒪᓗᓂ ᒪᓕᒐᓕᕆᓂᕐᒥᒃ, ᒐᕙᒪᓕᕆᓂᕐᒥᒃ ᐊᒻᒪ ᒪᓕᒐᐃᑦ ᑭᒡᓕᒋᔭᖏᓐᓂᒃ ᓄᓇᕗᑦ ᐃᓕᓐᓂᐊᕐᕕᖏᓐᓄᑦ ᐊᐅᓚᓂᕆᔭᐅᔪᓂᒃ
  • ᐃᓕᑦᑎᔪᒪᑦᑎᐊᕐᓗᓂ ᐊᒻᒪ ᖃᐅᔨᕙᓪᓕᐊᓇᓱᖃᑦᑕᕐᓗᓂ ᑲᑎᒪᔨᑦ ᐊᑐᐊᒐᖏᓐᓂᒃ ᐊᒻᒪ ᐊᑐᖅᑐᓂᒃ ᒪᓕᒐᕐᓂᒃ

 

ᐃᓕᓐᓂᐊᖅᑐᓕᕆᔨᑦ ᑲᑎᒪᔨᖏᓐᓄᑦ ᓂᕆᐅᒋᔭᐅᔪᑦ

  • ᐋᖅᑭᒃᓱᐃᕙᒡᓗᑎᒃ, ᐊᒻᒪ ᐃᓚᐅᖃᑦᑕᕐᓗᑎᒃ, ᑲᑎᒪᕝᕕᒋᓂᐊᖅᑕᓕᒫᖏᓐᓂᒃ
  • ᐃᓚᐅᖃᑦᑕᕐᓗᑎᒃ ᐊᒻᒪ ᐊᔪᙱᑕᕐᓂᒃ ᖃᐅᔨᒪᔭᕐᓂᓪᓗ ᑐᓴᖅᑎᑦᑎᖃᑦᑕᕐᓗᑎᒃ
  • ᐱᓕᕆᐊᒃᓴᒥᓂᒃ ᑕᖅᑲᐅᖓᑐᐃᓐᓇᖅ ᐅᓂᒃᑳᖃᖃᑦᑕᙱᓪᓗᓂ ᐊᒻᒪ ᓯᕗᓕᐅᖅᑎᑦᑎᐊᕙᐅᓇᓱᒡᓗᓂ
  • ᐃᓱᒪᓕᐅᕆᔪᓐᓇᕐᓗᓂ ᐃᓕᓐᓂᐊᖅᑎᓄᑦ ᐊᒻᒪ ᐃᓕᓐᓂᐊᕐᕕᐊᕈᓯᖏᓐᓄᑦ ᐃᑲᔫᑎᖃᕈᓐᓇᖅᑐᓂᒃ
  • ᒪᓕᒍᓐᓇᕐᓗᓂ ᐊᖏᖅᑕᐅᓯᒪᔪᓂᒃ ᒪᓕᒐᐃᑦ ᐊᒻᒪ ᑮᓇᐅᔭᓕᕆᔨᑦ ᒪᓕᒐᒃᓴᖏᓐᓂᒃ
  • ᓄᓇᖅᑲᑎᖏᓐᓂᒃ ᑐᓴᖅᑎᑦᑎᖃᑦᑕᕐᓗᓂ ᐃᓕᓐᓂᐊᖅᑐᓕᕆᓂᐅᑉ ᒥᒃᓵᓄᑦ ᐱᓕᕆᐊᒃᓴᓂᒃ ᐊᒻᒪ ᐱᓕᕆᐊᖑᑎᑕᐅᔪᓂᒃ
  • ᖃᓄᑐᐃᓐᓇᖅ ᐃᓱᒪᒃᓴᖅᓯᐅᕈᓐᓇᑦᑎᐊᕐᓗᓂ