ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᑐᓴᖅᑎᑦᓯᕗᖅ ᓵᓚᓕᒻᒥᑦ 2016-ᒥ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᑕᕆᔭᐅᔾᔪᑎᒥᑦ

ᓯᑎᐱᕆ 08, 2016

ᑐᓴᒐᒃᓴᖅ ᓴᖅᑭᖅᑕᖅ

ᓯᕗᓕᖅᑎ ᑐᓴᖅᑎᑦᓯᕗᖅ ᓵᓚᓕᒻᒥᑦ 2016-ᒥ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᑕᕆᔭᐅᔾᔪᑎᒥᑦ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 8, 2016) - ᓯᕗᓕᖅᑎ ᐲᑕ ᑕᑉᑑᓇ ᖁᕕᐊᑦᑐᖅ ᑐᓴᖅᑎᑦᓯᒋᐊᖅ ᓵ ᐱᑦᓯᐅᓛᖅ, ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᑦᓴᓕᕆᔨ ᐃᓕᖅᑯᓯᓕᕆᔨᒃᑯᓐᓂᑦ, ᓵᓚᖃᕐᒪᑦ ᓵᓚᖃᕐᒪᑦ 12-ᖓᓂᑦ ᐊᕐᕌᒍᓕᒫᒧᑦ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᑕᖅᓯᓂᕐᒥᑦ ᓄᓇᕗᒻᒥᑦ.

"ᓵ ᐃᓕᓐᓂᐊᑎᑦᓯᓯᒪᔪᖅ ᐊᒥᓱᐊᓗᓐᓂᑦ ᓄᑕᖅᑲᓂᑦ ᐃᓐᓇᕐᓂᓪᓗ ᓄᓇᕗᒻᒥᑦ ᐅᖓᑖᒎᖅᐸᑦᑐᖅ ᑭᖑᓂᖓᒍᓪᓗᑦ ᐅᓪᓗᒃᑯᑦ ᐃᖅᑲᓇᐃᔮᖓᑕ, ᐱᓕᕆᐊᖃᖃᑦᑕᖅᓱᓂ ᐱᓕᕆᐊᒥᓂᑦ ᓇᒻᒥᓂᖅ ᐱᕕᖃᕐᕕᓂᑦ" ᐅᖃᖅᑐᖅ ᓯᕗᓕᖅᑎ ᑕᑉᑑᓇ. "ᑭᒡᒐᖅᑐᕐᓗᒋᑦ ᒐᕙᒪᒃᑯᑦ ᓄᓇᕗᒻᒥᑦ, ᓇᓗᓇᐃᖅᓯᒍᒪᔪᖓ ᖁᔭᓕᓪᓚᕆᓐᓂᕐᓂᑦ ᐱᒻᒪᕆᐅᓂᖓᓄᑦ ᐱᓕᕆᐊᖓ ᐃᑲᔪᖅᓯᓯᒪᓂᖓᓂᓪᓗ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᓄᓇᕘᓕᒫᒥᑦ."

ᐱᒋᐊᖅᑎᑕᐅᓯᒪᔪᖅ 2004-ᒥ, ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᑕᖅᓯᓂᖃᖃᑦᑕᖅᑐᑦ ᑲᔪᓯᓂᖃᑦᓯᐊᕐᓂᖏᓐᓄᑦ ᐃᓐᓇᐃᑦ ᐱᓕᕆᐊᖃᖅᓯᒪᔪᓂᑦ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᓐᓂᐊᕐᓂᕐᒥᑦ, ᖁᕕᐊᓲᑎᖃᕐᓂᕐᒥᓪᓗ ᐱᒻᒪᕆᐅᔪᓂᑦ ᐃᑲᔪᖅᓯᓯᒪᓂᖏᓐᓄᑦ ᑲᓇᑕᒥᐅᓕᒫᓂᑦ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ. ᐱᑦᓯᐅᓛᖅ ᓂᕈᐊᖅᑕᐅᓯᒪᔪᖅ ᓯᕗᓕᖅᑎᐅᓯᒪᓂᖓᓄᑦ ᐃᓕᓐᓂᐊᑎᑦᓯᔨᐅᑦᓱᓂ ᓄᓇᕗᒻᒥᑦ ᐊᕐᕌᒍᓐᓄᑦ 30-ᓄ, ᓴᖅᑭᑎᑦᓯᖃᑕᐅᓯᒪᓂᖓᓄᓪᓗ ᓄᑕᕋᕐᓄᑦ ᐃᓄᒃᑎᑐᑦ ᐃᑲᔫᑎᓂᑦ ᐅᖃᓕᒫᕆᐅᖅᓴᓂᕐᒧᑦ ᓄᓇᕗᒻᒥᑦ ᐃᓕᓐᓂᐊᕐᕕᓐᓂᑦ.

ᐊᕐᕌᒍᑕᒫᑦ, ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᖁᕕᐊᓲᑎᖃᖃᑦᑕᖅᑐᑦ ᐱᔭᕇᖅᓯᓂᖏᓐᓂᑦ, ᐊᓯᔾᔨᐸᓪᓕᐊᓂᐅᔪᓄᑦ ᐊᑐᖅᑕᐅᕙᑦᑐᓂᑦ, ᐱᐅᔪᐊᓗᓐᓂᓪᓗ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ. ᐊᕐᕌᒍᑕᒫᑦ ᐃᓕᑕᕆᔭᐅᔾᔪᑎ ᑐᓂᔭᐅᖃᑦᑕᖅᑐᖅ ᐃᓕᓐᓂᐊᑎᑦᓯᔨᓄᑦ, ᐊᑭᓕᖅᑐᖅᑕᐅᒐᑎᒃ ᐃᑲᔪᖃᑦᑕᖅᑐᓄᑦ, ᐃᓕᓐᓂᐊᖅᑐᓄᑦ, ᓄᓇᓕᓐᓂᑦ ᑲᑐᔾᔨᖃᑎᒌᓄᑦ, ᒐᕙᒪᐅᖏᑦᑐᓄᑦ ᑲᑐᔾᔨᖃᑎᒌᓄᑦ, ᓇᒻᒥᓂᖁᑎᓕᓐᓄᓪᓗ, ᐊᑐᓂᑦ ᑲᓇᑕᒥ ᐊᕕᑦᑐᖅᓯᒪᔪᓂᑦ. ᐊᑐᓂᑦ ᐃᓕᑕᖅᓯᔾᔪᒥᑦ ᐱᑎᑕᐅᔪᖅ ᓇᓗᓇᐃᒃᑯᑕᖅᑖᖃᑦᑕᖅᑐᖅ ᐊᑎᓕᐅᖅᑕᐅᓯᒪᔪᒥᑦ ᓯᕗᓕᖅᑎᖓᓄᑦ ᐊᕕᑦᑐᖅᓯᒪᕕᒋᔭᖓᓂᑦ, ᐊᒻᒪ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑕ ᐅᔭᒥᖓᓂᑦ.

###

ᑐᓴᐅᒪᔪᓕᕆᔨᒃᑯᓐᓂᑦ ᖃᐅᔨᒋᐊᕐᕕᑦᓴᖅ:

ᔮᔅᒦᓇ ᐱᐸ
ᐊᖓᔪᖅᑳᖅ, ᑐᓴᐅᒪᖃᑦᑕᐅᑎᓕᕆᕕᒃ
ᐊᓪᓚᕝᕕᖓ ᓯᕗᓕᖅᑎᐅᑉ ᑕᑉᑑᓇ
867-975-5059
ypepa@gov.nu.ca