ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᑕᑉᑑᓇ ᑭᐅᔾᔪᑎᓕᒃ 2016 ᒐᕙᒪᑐᖃᒃᑯᑦ ᑮᓇᐅᔭᐃᑦ ᐊᑐᖅᑐᑦᓴᖏᓐᓄᑦ

ᒫᑦᓯ 23, 2016

ᓇᓗᓇᐃᕈᑎ 

ᓯᕗᓕᖅᑎ ᑕᑉᑑᓇ ᑭᐅᔾᔪᑎᓕᒃ 2016 ᒐᕙᒪᑐᖃᒃᑯᑦ ᑮᓇᐅᔭᐃᑦ ᐊᑐᖅᑐᑦᓴᖏᓐᓄᑦ 

“ᖁᕕᐊᑦᑐᖓ ᒐᕙᒪᑐᖃᒃᑯᑦ ᖃᓄᐃᓕᒋᐊᕈᑎᖃᕐᓂᖏᓐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᒥᓃᓪᓗ ᓄᓇᓕᖏᓐᓂ, ᑕᐃᒫᑦᓴᐃᓐᓇᕐᓗ ᑕᑯᒍᒪᓪᓗᑎᒃ ᒪᑭᑕᓂᖃᑦᓯᐊᖅᑐᒥᒃ, ᖃᓄᐃᙱᑦᓯᐊᖅᑐᒥᒃ ᖃᑭᓯᒪᔪᓂᓪᓗ ᓄᓇᕗᒻᒥ. 

ᐊᑦᓱᕈᕐᓇᖅᑐᒃᑰᕈᑕᐅᕙᑦᑐᑦ ᓄᓇᕗᒻᒥ ᑲᓇᑕᐅᓪᓗ ᐅᑭᐅᖅᑕᖅᑐᒥ ᓄᓇᓕᖏᓐᓂ ᐊᔾᔨᐅᙱᑦᑐᑦ. ᑲᒪᒋᔭᖃᕐᓂᖅ ᓲᕐᓗ ᐃᓪᓗᓕᕆᓂᕐᒥᒃ, ᐊᑭᑐᔫᑎᓂᒃ, ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᐃᓱᒪᓕᕆᓂᕐᒥᓪᓗ, ᓄᓇᓕᓐᓂ ᐊᑦᑕᓇᖅᑐᒦᑦᑕᐃᓕᑎᑦᓯᓂᖅ ᐸᓖᓯᖃᖅᑎᑦᓯᓂᕐᓗ, ᓱᕈᓯᓛᓂᒃ ᐃᑉᐱᒋᔭᖃᑦᓯᐊᕐᓂᖅ, ᐃᓕᓐᓂᐊᖅᑐᓕᕆᓂᕐᒥᓪᓗ ᐱᒻᒪᕆᐅᓂᖃᖅᑐᑦ ᖃᓄᐃᙱᑦᓯᐊᕈᓐᓇᖁᓪᓗᑕ. 

ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᓯᓂᖏᑦ ᐊᑭᑐᔫᑎᓄᑦ ᐱᓕᕆᐊᓄᑦ ᓄᓇᕗᒻᒥ ᐱᒻᒪᕆᐅᔪᑦ ᓇᓗᓇᐃᖅᓯᓯᒪᒐᓱᐊᕐᓂᕐᒧᑦ ᑮᓇᐅᔭᓕᐅᕈᓐᓇᓂᒃᑯᑦ ᖃᑭᕙᓪᓕᐊᒍᓐᓇᓂᕐᒧᑦ. ᖁᕕᐊᒻᒥᔪᒍᑦ ᒐᕙᒪᒃᑯᑦ ᕿᓚᒥᐅᓂᖅᓴᒃᑰᖅᑎᑦᓯᒻᒪᑕ ᑮᓇᐅᔭᖃᖅᑎᑦᓯᓂᕐᒧᑦ ᐊᑭᑐᔫᑎᓄᑦ ᐱᓕᕆᐊᓄᑦ, ᐃᓚᒋᓕᐅᑎᓪᓗᒋᑦ $25.3 ᒥᓕᐊᓐ ᓄᓇᓕᕋᓛᓄᑦ ᑮᓇᐅᔭᓄᑦ ᑕᓪᓕᒪᓄᑦ ᑭᐱᙳᐃᔭᐃᕕᓐᓄᑦ ᐱᙳᐊᕐᕕᓄᓪᓗ ᐱᓕᕆᐊᓄᑦ ᓄᓇᕗᒻᒥ, ᐃᓚᒋᔭᐅᓪᓗᓂ ᐃᓕᖅᑯᓯᓕᕆᕕᒃ ᑭᙵᕐᓂ, ᓴᓇᔭᐅᒋᐊᕐᓂᖓᓄᑦ ᐃᖃᓗᑦᑑᑦᑎᐊᕐᒥ ᐊᓐᓂᑭᑦᑐᕐᕕᒃ ᐃᖃᓗᓐᓂᓗ ᐳᐃᔾᔪᕋᕐᕕᑦᓴᒧᑦ. 

ᑐᙵᓱᑦᑎᑕᕗᑦ ᑮᓇᐅᔭᖃᖅᑎᑦᓯᒋᐊᒃᑲᓐᓂᕐᓂᖏᑦ ᐃᓪᓗᓕᕆᓂᕐᒧᑦ ᑮᓇᐅᔭᖃᖅᑎᑦᓯᓪᓗᑎᒃ ᐊᑭᑐᓗᐊᙱᑦᑐᓂᒃ ᐃᓪᓗᓕᕆᓂᕐᒧᑦ ᐱᓕᕆᐊᑎᒍᑦ. ᐊᑐᐃᓐᓇᖃᕆᐊᖅᑎᑦᓯᓂᖅ ᐃᓪᓗᓂᒃ ᓄᓇᕗᒻᒥᐅᓄᑦ ᐱᒻᒪᕆᐊᓘᒻᒪᑦ, ᓯᕗᓪᓕᐅᑎᓯᒪᓂᖅᐹᕆᓪᓗᑎᒍ. 

ᓄᓇᕗᑦ ᒐᕙᒪᒃᑯᖏᑦ ᖁᕕᐊᒻᒥᔪᑦ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᑖᒃᓰᔭᖅᑕᐅᒍᑎ ᐊᖏᓪᓕᒋᐊᖅᑕᐅᓂᖓᓂᒃ. ᑕᒪᓐᓇ ᖄᒃᑲᓐᓂᖓᒍᑦ ᑖᒃᓰᔭᙱᓂᖅᓴᐅᒍᑎᐅᓕᕐᓂᐊᖅᑐᖅ ᓄᓇᕗᒻᒥᐅᓄᑦ. 

ᓄᑖᖅ ᑲᓇᑕᒥ ᓱᕈᓯᕐᓄᑦ ᐃᑲᔫᓯᐊᖅᑖᑦᓴᖅ ᐊᑭᕐᕆᓕᖅᐹᓪᓕᒍᑕᐅᓂᐊᖅᑐᖅ ᑮᓇᐅᔭᓕᐅᙱᓂᖅᓴᓄᑦ ᓄᓇᕗᒻᒥᐅᓄᑦ ᐊᒥᓱᓂᒃ ᐃᓚᒌᑦᑐᓄᑦ ᐃᓅᓯᖏᓐᓄᑦ. 

ᓂᕆᐅᑦᓯᐊᖅᑐᖓ ᖃᐅᔨᓴᖅᐸᓪᓕᐊᓂᐊᕐᓂᓐᓂᒃ ᑮᓇᐅᔭᖃᖅᑎᑕᐅᒃᑲᓐᓂᕆᐊᕐᓂᐊᕐᓂᖓᓂᒃ ᐅᑭᐅᖅᑕᖅᑐᒥ ᓂᕿᑦᓯᐊᕙᓕᕆᓂᕐᒧᑦ ᐱᓕᕆᐊᖅ ᐃᑭᐊᖅᑭᕕᒃᑰᕈᓐᓇᐅᑎᓄᓪᓗ ᐅᖓᓯᑦᑐᓂ ᐅᐸᒋᓐᓇᐅᙱᑦᑐᓂᓗ ᓄᓇᓕᓐᓂ, ᐱᕚᓪᓕᕈᑕᐅᒍᓐᓇᖅᓯᖁᓪᓗᒋᑦ ᓄᓇᕗᒻᒥᐅᓄᑦ. 

ᑭᖑᓪᓕᖅᐹᒥ, ᖁᕕᐊᑦᑐᒍᑦ ᐊᑕᖏᖅᑐᒋᑦ ᑮᓇᐅᔭᖃᖅᑎᑦᓯᓂᖏᓐᓄᑦ ᐊᔾᔨᒌᙱᑦᑐᓄᑦ ᐃᑲᔪᖅᓱᐃᓪᓗᑎᒃ ᓴᓗᒪᔪᓂᒃ ᐆᒻᒪᖅᑯᑎᓕᐅᕐᓂᕐᒧᑦ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ, ᐊᑦᑐᐃᓂᖃᖅᐸᒻᒪᑕ ᓄᓇᕗᒻᒥᐅᓕᒫᓂᒃ. ᑲᓇᑕᐅᑉ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᕌᒐᖏᑦ ᑲᒪᒋᔭᐅᒋᐊᖃᕐᓂᐊᖅᑐᑦ ᐊᑦᑐᐃᓂᖃᓗᐊᖅᑕᐃᓕᓗᑎᒃ ᐅᑭᐅᖅᑕᖅᑐᒥ ᐃᓅᓇᓱᐊᕐᓂᕐᒧᑦ ᐊᑭᖃᕐᓂᖓᓂᒃ, ᓂᕆᔭᑦᓴᖃᕆᐊᖃᕐᓂᕐᒧᑦ, ᐅᕝᕙᓘᓐᓃᑦ ᐊᕝᕕᐊᓕᑦᑕᐃᓕᖁᓪᓗᒋᑦ ᑮᓇᐅᔭᓕᐅᕈᑕᐅᒍᓐᓇᖅᓯᕙᓪᓕᐊᔪᓂᒃ. ᐃᓱᒪᓇᖅᑐᖅ ᓄᑖᕐᖑᕆᐊᖅᓯᓂᖏᑦ ᖃᓄᐃᓕᒋᐊᕈᑎᖃᕐᓂᕐᒧᑦ ᐆᒻᒪᖅᑯᑎᓕᕆᓂᕐᒧᑦ ᐱᒋᐊᕈᑕᐅᓂᐊᕐᓂᖓᓂᒃ ᐅᖃᖃᑎᒌᒍᑎᖃᕈᓐᓇᓂᕐᒧᑦ ᑭᖑᕝᕕᖅᑕᐅᕙᓪᓕᐊᖁᓪᓗᒋᑦ ᐱᑐᖃᐅᓗᐊᓕᖅᑐᑦ ᐅᖅᓱᐊᓗᑐᐃᓐᓇᒨᖅᑐᑦ ᐊᐅᓚᐅᑎᖃᕐᕖᑦ. 

ᐱᓕᕆᖃᑎᒌᓐᓇᕐᓂᐊᖅᑕᕗᑦ ᒐᕙᒪᑐᖃᒃᑯᑦ ᑐᓴᖅᑎᒋᐊᖏᓐᓇᕐᓗᒋᑦ ᐱᒋᐊᖃᓪᓚᕆᑦᑕᑎᓐᓂᒃ ᐊᑭᑐᔫᑎᓂᒃ. ᐅᖃᖅᓯᒪᒐᒪ, ᑮᓇᐅᔭᖃᖅᑎᑦᓯᓂᖅ ᓄᓇᕗᒻᒥ ᐱᐅᔪᖅ ᓇᒻᒥᓂᖃᖅᑐᓕᕆᓂᕐᒧᑦ ᐱᓕᕆᑦᓯᐊᕐᓂᒃᑯᓪᓗ ᑲᓇᑕᒥ ᑐᙵᕕᓕᐅᕐᓂᕐᒧᑦ, ᑲᓇᑕᒥᐅᑕᓕᒫᓄᓪᓗ. 

ᑲᓇᑕᐅᑉ ᒐᕙᒪᒃᑯᖏᑦ, ᑲᑐᔾᔨᖃᑕᐅᓯᒪᑦᓯᐊᖅᑐᑦ, ᑲᑐᔾᔨᖃᑕᐅᖏᓐᓇᕐᓂᐊᖅᑐᑎᓪᓗ ᑐᙵᕕᓕᐅᖃᑕᐅᓂᕐᒧᑦ ᓄᓇᕗᑦ ᑲᔪᓯᑦᓯᐊᕈᑕᐅᒍᓐᓇᖁᓪᓗᒍ. ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᒐᕙᒪᑐᖃᒃᑯᓐᓂᒃ ᓄᓇᕗᒻᒥᐅᑦ ᐱᒻᒪᕆᐅᒋᔭᖏᓐᓄᑦ. ᐱᓕᕆᖃᑎᒌᒋᐊᖃᖅᑐᒍᑦ ᐱᕙᓪᓕᐊᔪᓕᕆᓂᖅ ᖃᑭᕙᓪᓕᐊᓂᕐᓗ ᐱᕙᓪᓕᐊᒍᓐᓇᖁᓪᓗᒋᑦ, ᑮᓇᐅᔭᖃᖅᑎᑦᓯᓂᒃᑯᑦ ᐊᑭᑐᔫᑎᓄᑦ, ᓴᐳᒻᒥᔮᕆᓂᕐᒧᓪᓗ ᓴᖅᑭᔮᖅᑎᑦᓯᒋᐊᕐᓂᒧᓪᓗ ᓄᓇᕗᒻᒥ ᐃᓕᖅᑯᓯᑦᑎᓐᓂᒃ.” 

### 

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ: 

ᑲᑐᕆᓇ ᒪᒃᓚᐅᑦ 
ᑐᓴᕋᑦᓴᓕᕆᓂᕐᒧᑦ ᑐᑭᓯᐊᖅᑎᑦᓯᔨ 
ᒐᕙᒪᓕᕆᔨᒃᑯᑦ 
867-975-6049 
cmacleod@gov.nu.ca