ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᖏᑦ ᑎᒥᓐᖑᖅᑎᑦᓯᕗᑦ ᓄᓇᕗᒥ ᐃᓄᖕᓂᑦ ᐃᓕᓐᓂᐊᖅᑎᑦᓯᓂᕐᒧᑦ ᑯᐊᐳᕇᓴᒥᒃ

ᐊᒃᑐᐸ 22, 2015

 

ᑐᓴᒐᒃᓴᑦ 

ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᖏᑦ ᑎᒥᓐᖑᖅᑎᑦᓯᕗᑦ ᓄᓇᕗᒥ ᐃᓄᖕᓂᑦ ᐃᓕᓐᓂᐊᖅᑎᑦᓯᓂᕐᒧᑦ ᑯᐊᐳᕇᓴᒥᒃ 

(ᐊᒃᑑᕝᕙ 22, 2015 –ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐊᒻᒪ ᓄᓇᕗᑦ ᓯᕗᓕᖅᑎᖓᑦ ᐲᑕ ᑕᑉᑑᓇ ᐅᓪᓗᒥ ᑐᓴᖅᑎᑦᓯᔪᑦ ᑖᒃᑯᐊ ᑎᒥᓐᖑᖅᑎᑕᐅᓂᖏᓐᓂᒃ ᓴᖅᑭᑎᑕᐅᓪᓗᑎᒃ ᑎᒥᓐᖑᖅᑎᑦᓯᕗᑦ ᓄᓇᕗᒥ ᐃᓄᖕᓂᑦ ᐃᓕᓐᓂᐊᖅᑎᑦᓯᓂᕐᒧᑦ ᑯᐊᐳᕇᓴᒥᒃ. ᑖᒃᑯᐊ ᓯᕗᓕᖅᑏᑦ ᑐᓴᖅᑎᑦᓯᖅᑲᐅᔪᑦ ᐅᓪᓗᒥ ᑎᒥᓐᖑᖅᑎᑦᓯᓂᕐᒥᓂᒃ ᑖᓐᓇ ᓯᕗᓕᖅᑎ ᑕᑉᑑᓇ ᐅᓂᒃᑳᕆᐊᖅᑲᐅᑎᓪᓗᒍ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᕕᒡᔪᐊᖅᑎᓪᓗᒋᑦ ᐃᖃᓗᖕᓂ. 

ᑖᓐᓇ ᐃᓕᓐᓂᐊᖅᑎᑦᓯᓂᕐᒧᑦ ᑯᐊᐳᕇᓴᓐ, ᑎᒥᓐᖑᖅᑎᑕᐅᒻᒪᕆᓚᐅᖅᑐᖅ ᐊᒃᑑᕝᕙ 9, 2015, ᐃᓚᖓ ᑮᓇᐅᔭᖃᖅᑎᑕᐅᓂᐊᖅᑐᖅ ᑮᓇᐅᔭᓄᑦ ᑐᓂᔭᐅᓚᐅᖅᑐᓄᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓄᑦ ᐋᖅᑭᒃᓯᖃᑎᒌᖕᓂᕐᒧᑦ ᐊᖏᖃᑎᒌᒍᒻᒥᒃ ᐊᑎᓕᐅᓚᐅᑎᓪᓗᒋᑦ ᐱᖃᑎᒋᓪᓗᒋᑦ ᓄᓇᕗᑦ ᒐᕙᒪᖏᑦ ᐊᒻᒪ ᒐᕙᒪᑐᖃᒃᑯᑦ ᑖᒃᑯᐊ ᐋᖅᑭᒃᑕᐅᖁᓪᓗᒋᑦ ᐃᖅᑲᖅᑐᐃᕕᒃᑰᖅᑎᑦᓯᓂᖏᑦ ᓄᓇᕗᑦ ᑐᓐᖓᕕᒃ ᑎᒥᖓᑦ ᑖᒃᑯᓂᖓ ᒐᕙᒪᑐᖃᒃᑯᓐᓂᒃ ᐊᕐᕌᒍᐊᓂ 2006 ᒪᓕᒃᓯᒪᓐᖏᓐᓂᖏᓐᓄᑦ ᐊᑐᓕᖅᑎᒋᐊᖃᖅᓯᒪᔭᒥᓂᒃ ᐃᓚᖏᓐᓂᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᑖᓐᓇ ᐊᖏᖃᑎᒌᒍᑦ ᐋᖅᑭᒍᑕᐅᔪᖅ ᑖᑦᓱᒧᖓ ᐃᖅᑲᖅᑐᐃᕕᒃᑰᖅᑎᑦᓯᓚᐅᓂᕐᒧᑦ ᐊᒻᒪ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᓯᕗᒻᒧᐊᒋᐊᕈᓐᓇᖅᑎᑦᓯᓕᖅᑐᓂ ᐱᒻᒪᕆᐅᓗᐊᖅᑐᓂ ᐊᑐᓕᖅᑎᑦᓯᓂᕐᒨᖓᔪᑦ. 

ᒪᓕᒃᑐᒋᑦ ᒪᓕᒋᐊᖃᖅᑎᑕᐅᔪᑦ ᐊᖏᖃᑎᒌᒍᒻᒥ, ᑖᒃᑯᐊ ᒐᕙᒪᑐᖃᒃᑯᑦ ᐊᑭᓖᔪᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ $255.5 ᒥᓕᔭᓂᒃ ᐊᑭᓕᐅᑎᒋᓪᓗᒋᑦ ᒪᓕᓚᐅᓐᖏᓐᓂᕐᒥᓄᑦ. ᓄᓇᕗᑦ ᑐᓐᖓᕕᒃᑯᑦ ᓇᓗᓇᐃᖅᑐᑦ ᐊᑐᕐᓂᐊᕐᓂᕐᒥᓂᒃ ᐅᓄᕐᓂᖃᖅᑐᓂᒃ $175 ᒥᓕᔭᓐ ᑖᒃᑯᓇᓐᖓᑦ ᐊᑭᓕᐅᑕᐅᔪᓂᒃ ᓴᖅᑭᑎᑦᓯᒍᑎᒋᓪᓗᒍ ᓄᓇᕗᒥ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᑯᐊᐳᕇᓴᒥᒃ, ᐱᑕᖃᕈᑕᐅᓂᐊᖅᑐᖅ ᐃᓄᐃᑦ ᐃᓕᓐᓂᐊᖅᑎᑕᐅᔪᓐᓇᕐᓗᑎᒃ ᐃᓯᖅᐸᓪᓕᐊᔪᓐᓇᕐᓂᖏᓐᓄᑦ ᒐᕙᒪᒃᑯᑦ ᐃᖅᑲᓇᐅᔭᖅᑎᖏᓐᓄᑦ, ᐊᒻᒪ ᖁᒡᕙᕆᐊᖅᐸᓪᓕᐊᔾᔪᑎᒃᓴᖏᑦ ᐃᖅᑲᓇᐃᔭᕐᓗᓂ. 

“ᓴᖅᑭᑎᑕᐅᓂᖓᑎᒍᑦ ᓄᓇᕗᒥ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᑯᐊᐳᕇᓴᓐ, ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᖏᔪᒥᒃ ᐱᓕᕆᐊᒃᓴᖃᓕᖅᑐᑦ ᐊᑐᓕᖅᑎᑕᐅᕙᓪᓕᐊᓂᖓᓄᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓃᑦᑐᑦ ᐋᑎᑯ 23, ᐅᖃᖅᓯᒪᔪᖅ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓂ ᒐᕙᒪᒃᑯᓐᓂ ᑭᒡᒐᖅᑐᖅᑕᐅᑦᓯᐊᕐᓗᑎᒃ. ᑕᒪᓐᓇ ᑐᑭᖃᖅᑐᖅ ᐃᓄᐃᑦ ᑕᒫᓃᑦᑐᓂᒃ 85-ᐳᓴᖏᓐᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᓂᖁᑎᖏᓐᓂ. ᑖᓐᓇ ᓄᑖᖅ ᑯᐊᐳᕇᓴᓐ ᐱᑕᖃᖅᑎᑦᓯᓂᐊᖅᑐᖅ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐸᕐᓇᐃᔪᓐᓇᖅᑎᑦᓯᓗᑎᒃ ᐃᓄᖕᓂᑦ ᑕᒪᑐᒧᖓ ᑐᕌᒐᐅᔪᒧᑦ,” ᐅᖃᖅᑐᖅ ᑕᐅᑐᓐᖏ. ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑐᓴᖅᑎᑦᑎᔾᔪᑎᖓᑦ ᒪᒃᐱᒐᖅ 2 

" ᑖᒃᑯᐊ ᓄᓇᕗᑦ ᒐᕙᒪᖏᑦ ᓇᓗᓇᐃᖅᑐᑦ ᐱᐅᓯᕚᓪᓕᖅᑎᑦᓯᓂᐊᕐᓂᕐᒥᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓂᒃ ᐊᒻᒪ ᐃᑲᔪᕐᓂᐊᕐᓗᒋᓪᓗ ᐃᓄᐃᑦ ᐊᔪᕈᓐᓃᖅᓴᐅᑎᓄᑦ ᑐᒍᓯᒍᑎᒋᔪᓐᓇᓕᕐᓗᒋᑦ ᐃᖅᑲᓇᐃᔭᕐᓂᑦᓯᐊᕙᖕᒧᑦ ᐊᕕᒃᑐᖅᓯᒪᓂᑦᑎᓐᓂ ᐊᒻᒪ ᑲᓇᑕᓕᒫᒥ,” ᐅᖃᖅᑐᖅ ᓄᓇᕗᑦ ᓯᕗᓕᖅᑎᖓᑦ ᑕᑉᑑᓇ. “ᑖᓐᓇ ᐊᖏᖃᑎᒌᒍᑕᐅᔪᖅ ᐊᒻᒪ ᓄᑖᖅ ᑮᓇᐅᔭᕆᓂᐊᖅᑕᖏᑦ ᓴᖅᑭᑎᑦᓯᔪᑦ ᓄᑖᒥᒃ ᐱᒋᐊᕈᑎᖃᕐᓂᐊᕐᓗᑎᒃ ᐊᑐᓕᖅᑎᑕᐅᒋᐊᖃᕐᓂᖏᓐᓂᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ. ᒥᓂᔅᑕ ᖁᐊᓴᖅ ᐊᒻᒪ ᐅᕙᖓ ᕿᓚᓈᕈᑎᖃᖅᐳᒍᒃ ᐱᓕᕆᖃᑎᖃᕐᓂᐊᕐᓂᑦᑎᓐᓂᒃ ᑖᒃᑯᓂᖓ ᓄᓇᕗᒥ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᑯᐊᐳᕇᓴᒃᑯᓐᓂᒃ ᑕᒪᒃᑯᐊ ᐃᓄᓕᒫᑦ ᐃᑲᔪᖅᑕᐅᔪᐃᓐᓇᐅᖁᓪᓗᒋᑦ ᓄᓇᕗᒥ ᑮᓇᐅᔭᓕᐅᕈᑕᐅᔪᓐᓇᑦᓯᐊᖅᑐᓄᑦ ." 

ᑖᒃᑯᐊ ᓄᓇᕗᒥ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᑯᐊᐳᕇᓴᓐ ᑲᑎᒪᔨᖏᑦ ᐃᓚᖃᖅᑐᑦ ᐊᖓᔪᖅᑳᖅ ᑕᐅᑐᓐᖏ, ᑐᒡᓕᐊ ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᖓᔪᖅᑳᖓᑦ ᓯᑖᓐᓕ ᐊᓇᑉᓚᒃ, ᕿᑎᒃᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᖓᔪᖅᑳᖓᑦ ᑏᕕᑦ ᓂᖏᐅᖓᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᖓᔪᖅᑳᖓᑦ ᐲᔩ, ᐊᕿᐊᕈᖅ, ᓯᕗᓕᖅᑎ ᑕᑉᑑᓇ ᐊᒻᒪ, ᒥᓂᔅᑕᖓᑦ ᐃᓕᓐᓂᐊᕐᓂᓕᕆᔨᒃᑯᑦ ᐹᓪ ᖁᐊᓴᖅ. 

-30- 

ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ: 

ᑭᐅᕆ ᒪᑲᓚᔅᑭ 
ᑐᑭᒧᐊᒃᑎᑦᑎᔨ ᑐᓴᖃᑦᑕᐅᑎᓕᕆᓂᕐᒧᑦ 
ᓄᓇᕗᑦ ᑐᓐᖓᕕᒃ ᑎᒥᖓᑦ 
ᐅᖃᓘᑖ: (867) 975-4914
ᐊᑭᖃᓐᖏᑦᑐᖅ: 1-888-646-0006 
kmccluskey@tunngavik.com 
www.tunngavik.com 

ᑳᑐᕆᐅᓇ ᒪᒃᓚᐅᑦ 
ᑐᑭᒧᐊᒃᑎᑦᑎᔨ ᑐᓴᖃᑦᑕᐅᑎᓕᕆᓂᕐᒧᑦ 
ᓄᓇᕗᑦ ᒐᕙᒪᖏᑦ 
ᐅᖃᓘᑖ: (867) 975-6049 
cmacleod@gov.nu.ca