ᐅᖃᓚᐅᑎᓯᐅᑏᑦ

You are here

ᑲᓇᑕᓕᒫᕐᒥ ᓯᓚᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᖅᑑᕈᑎ

ᑎᓯᐱᕆ 12, 2016

ᐅᖃᐅᓯᒃᓴᑦ

ᑲᓇᑕᓕᒫᕐᒥ ᓯᓚᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᖅᑑᕈᑎ

ᓯᕗᓕᖅᑎ ᑕᑉᑐᓇ ᐅᑯᓂᖓ ᐅᖃᐅᓯᒃᓴᒥᓂᒃ ᓴᖅᑭᑎᑦᑎᖅᑲᐅᕗᖅ:

"ᓄᓇᕗᑦ ᐅᑭᐅᖅᑕᖅᑐᖓᑕ ᐊᕙᑎᖓ ᐊᑦᑐᖅᑕᐅᖅᑳᖅᓯᒪᒻᒪᑦ ᓯᓚᑉ ᐊᓯᔾᔨᕐᓂᖓᓄᑦ. ᓯᓚᕗᑦ, ᓄᓇᕗᑦ ᐃᒪᕗᓪᓗ, ᓯᑯᕗᑦ ᐊᒻᒪᓗ ᓄᓇᑉ ᖁᐊᖑᓂᖓ ᐊᑦᑐᖅᑕᐅᓴᕋᐃᑦᑐᑯᓘᓂᖏᓐᓄᑦ ᖃᓄᐃᑦᑐᖃᖅᐸᓪᓕᐊᖃᑦᑕᑎᓪᓗᒍ ᐅᖅᑰᓇᖅᑐᒧᑦ, ᓯᓚᑉ ᐊᓯᔾᔨᕐᓂᖓᓄᓪᓗ ᐊᒃᓱᒻᒪᕆᐊᓗᒃ ᐊᑦᑐᐃᓂᖃᖅᓯᒪᓕᖅᑐᖅ ᐱᖅᑯᓯᑐᖃᖅᑎᒍᑦ ᐃᓅᓯᕆᔭᑦᑎᓐᓂ.

ᓄᓇᕐᔪᐊᕐᒥ ᐅᖅᑰᓇᖅᓯᕙᓪᓕᐊᑎᓪᓗᖑ, ᐅᑭᐅᖅᑕᖅᑐᖅ ᓯᕗᓪᓕᖅᐹᖑᓪᓗᓂ ᐊᑦᑐᖅᑕᐅᖅᑳᑐᐃᓐᓇᙱᑦᑐᓂ, ᑭᓯᐊᓂᓕ ᐊᒃᓱᒻᒪᕆᐅᓛᖅ ᐊᑦᑐᖅᑕᐅᓯᒪᓕᖅᑐᓂ.

ᐅᓪᓗᒥᐅᔪᖅ, ᓄᓇᕗᑦ ᐊᖏᖅᑲᐅᕗᖅ ᐊᑎᓕᐅᕐᓂᐊᖅᑐᓂ ᑲᓇᑕᓕᒫᕐᒥ ᑐᙵᕕᖓ ᓴᓗᒪᔪᒃᑯᑦ ᐱᕈᖅᐸᓪᓕᐊᓗᓂ ᐊᒻᒪᓗ ᓯᓚᑉ ᐊᓯᔾᔨᐸᓪᓕᐊᓂᖓᓄᑦ, ᑐᒃᓯᕋᖅᓯᒪᓪᓗᑎᑦ ᐊᓂᕐᓂᕐᓗᓕᐅᖅᐸᑦᑐᑦ ᐊᑭᓖᑎᑕᐅᔾᔪᑎᖏᓐᓂᒃ ᐊᐅᓚᑦᑎᒍᓯᖃᖁᔨᓪᓗᑎᑦ.

ᓄᓇᕗᑦ ᒐᕙᒪᖏᑦ ᐅᖃᖃᑦᑕᖅᓯᒪᓕᕐᒪᑕ ᐊᓂᕐᓂᕐᓗᓕᐅᖅᐸᑦᑐᑦ ᐊᑭᓖᑎᑕᐅᔾᔪᑎᖏᑦ ᐊᑐᖅᑕᐅᔭᕆᐊᖃᕐᓂᐊᕐᒪᑕ ᓇᓕᒧᓐᓂᖃᖅᑐᒃᑯᑦ ᐊᒻᒪᓗ ᐊᓂᕐᓂᕐᓗᓕᐅᖅᑐᑦ ᐊᖏᑎᒋᓂᖏᓐᓂᑦ ᒪᓕᓪᓗᑎᑦ ᐊᑭᓖᑎᑕᐅᖃᑦᑕᖁᔨᓪᓗᑎᑦ. ᑮᓇᐅᔭᓕᐅᕋᓱᐊᕈᑕᐅᔭᕆᐊᖃᙱᑦᑐᖅ ᐊᒻᒪᓗ ᐊᑭᑦᑐᕆᐊᖅᑎᑦᑎᒃᑲᓐᓂᕆᐊᖃᙱᑦᑐᖅ ᓄᓇᓕᑦᑎᓐᓄᑦ. ᐊᒻᒪᓗ ᐊᑦᑐᐃᓂᖃᕆᐊᖃᙱᓪᓚᕆᑦᑐᓂ ᓄᓇᕗᒻᒨᖅᑕᐅᕙᑦᑐᑦ ᑮᓇᐅᔭᑦ ᑲᓇᑕᒥ ᒐᕙᒪᒃᑯᓐᓃᙶᓲᖑᓂᑦ.

ᑲᓇᑕᒥᐅᑕᐅᔪᑦ ᐱᓕᕆᖃᑎᖃᕆᐊᙵᐸᓪᓕᐊᒃᑲᓐᓂᓕᖅᑎᓪᓗᒋᑦ ᓄᓇᖃᖅᑳᖅᓯᒪᔪᓂᑦ, ᐊᔭᐅᖅᐸᕗᑦ ᑲᓇᑕ ᒐᕙᒪᖏᑦ ᕿᒥᕐᕈᑦᑎᐊᖁᓪᓗᒋᑦ ᓄᓇᕗᑉ ᖃᓄᐃᑦᑑᓂᖓᓂᒃ ᐊᒻᒪᓗ ᐃᖅᑲᓇᐃᔭᖃᑎᒋᔭᐅᑦᑎᐊᕐᓗᑕ, ᓇᓕᒧᓐᓂᖃᕐᒪᑦ ᓄᓇᕗᑦ, ᑮᓇᐅᔭᓕᐅᕋᓱᐊᕐᓂᖓ ᐊᒻᒪᓗ ᐃᓅᓯᖏᑦ ᓄᓇᓕᕐᔪᐊᑦ ᐱᕙᓪᓕᐊᓕᑕᐃᓐᓇᖅᑐᓂᑦ ᐊᔾᔨᖃᖅᑐᓂ.

ᐊᓯᖏᓐᓂᒃ ᐊᑐᕈᓐᓇᙱᓐᓇᑦᑕ ᐅᖅᓱᐊᓗᒃᓴᓂᒃ ᑭᓯᐊᓂ ᐊᑐᕐᓗᑕ ᐊᒻᒪᓗ ᐊᑭᑐᔪᒻᒪᕆᐅᓪᓗᓂ ᐱᓕᕆᐊᖃᕐᓗᓂ ᓄᓇᕗᒻᒥ.

ᐃᖅᑲᓇᐃᔭᖃᑎᒋᔪᓐᓇᑦᑎᐊᕐᓂᐊᖅᑕᕗᑦ ᑲᓇᑕ ᑮᓇᐅᔭᓂᑦ ᐊᑐᕐᓗᑕ ᓴᓗᒪᔪᓂᑦ ᖃᓄᐃᓕᐅᕈᑎᒋᔭᐅᓲᕐᓂᑦ, ᐊᒻᒪᓗ ᓱᖏᐅᑎᕙᓪᓕᐊᓗᑕ ᐊᒻᒪᓗ ᐱᐅᓯᕚᓪᓕᑎᑦᑎᓗᑕ ᐊᒥᓱᓂᑦ. ᑭᓯᐊᓂᓕ ᐊᑭᑭᓪᓕᒋᐊᖅᑎᑦᑎᒍᑕᐅᓲᑦ ᐱᕙᓪᓕᐊᔪᒻᒪᕆᐅᓂᖏᓐᓄᑦ ᐊᑦᑎᓗᐊᑲᓚᐅᕐᓂᑦᑎᓐᓄᑦ, ᓇᒻᒥᓂᖅ ᑕᒪᓐᓇ ᐱᔪᓐᓇᐅᔾᔮᙱᓪᓚᕆᒃᑲᑦᑎᒍᑦ ᑕᒪᓐᓇ ᑲᒪᒋᓇᓱᐊᕐᓗᒐ.

ᑲᓇᑕ ᐱᓕᕆᖃᑎᖃᕐᓂᐊᕐᓂᕋᖅᓯᒪᕗᖅ ᐅᕙᑦᑎᓐᓂ ᖃᐅᔨᒪᓇᑦᑎᐊᖁᓪᓗᒍ ᓄᓇᕗᑦ ᓈᒻᒪᑦᑐᒃᑯᑦ ᒪᓕᓪᓗᒋᑦ ᑲᒪᒋᔪᓐᓇᖅᑕᖏᑦ ᐱᓕᕆᐊᖃᕐᓂᐊᕐᒪᑕ ᓯᓚᑉ ᐊᓯᔾᔨᖅᐸᓪᓕᐊᓂᖓᓂᒃ."

###

ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒋᐊᕐᕕᒃᓴᖅ

ᔭᔅᒦᓇ ᐱᐸ
ᐊᖓᔪᖅᑳᖅ, ᑐᓴᒐᒃᓴᓕᕆᓂᕐᒧᑦ
ᓯᕗᓕᖅᑎᑉ ᐊᓪᓚᕝᕕᐊ
867-222-0961
ypepa@gov.nu.ca