ᐅᖃᓚᐅᑎᓯᐅᑏᑦ

You are here

2016-ᒥᑦ ᑲᓇᑕᒥ ᓯᕗᓕᖅᑏᑦ ᑲᑎᒪᓂᖏᑦ

ᒫᑦᓯ 03, 2016

ᐅᖃᐅᓯᐅᔪᖅ

2016-ᒥᑦ ᑲᓇᑕᒥ ᓯᕗᓕᖅᑏᑦ ᑲᑎᒪᓂᖏᑦ 

ᓯᕗᓕᖅᑎᒋᔭᐅᔪᑦ ᔫᑳᓐᒥ, ᓄᓇᑦᓯᐊᒥ ᐊᒻᒪ ᓄᓇᕗᒻᒥ ᓴᖅᑭᑎᑦᑎᓇᓱᒃᐳᑦ ᐅᑭᐅᖅᑕᖅᑐᒥᐅᑦ ᐱᔾᔪᑎᒋᓪᓗᒋᑦ ᑲᓇᑕᒥ ᓯᕗᓕᖅᑏᑦ ᑲᑎᒪᑎᓪᓗᒋᑦ ᕚᖕᑰᕗᒥ ᒫᔾᔨ 3-ᒥᑦ.  

ᔫᑳᓐ ᓯᕗᓕᖅᑎᖓ ᑎᐅᕈᓪ ᐸᔅᓛᔅᑭ, ᓄᓇᑦᓯᐊᒥ ᓯᕗᓕᖅᑎᖓ ᐹᑉ ᒪᒃᓚᐅᑦ ᐊᒻᒪ ᓄᓇᕗᑦ ᓯᕗᓕᖅᑎᖓ ᐲᑕ ᑕᑉᑑᓇ ᓂᕆᐅᒃᐳᑦ ᐱᓕᕆᖃᑎᖃᕐᓂᐊᕐᓂᖏᓐᓂᒃ ᑲᓇᑕᒥ ᓯᕗᓕᖅᑎᓕᒫᓂᒃ, ᓇᓗᓇᐃᖅᓯᓗᑎᒡᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐱᒻᒪᕆᐊᓘᓂᖓᓂᒃ ᑲᒪᒋᔭᐅᒋᐊᖃᕐᓂᖓ. 

ᖃᐅᔨᒪᓪᓗᑎᒃ ᐱᒻᒪᕆᐅᔪᒥᒃ ᐊᒃᑐᐃᓂᖃᕐᓂᖓ ᐅᑭᐅᖅᑕᖅᑐᒥᐅᑦ ᓄᓇᓕᖏᓐᓄᑦ, ᐊᕕᒃᑐᖅᓯᒪᔪᑦ ᓯᕗᓕᖅᑎᖏᑦ ᓇᓗᓇᐃᖅᓯᑦᑎᐊᕈᒪᕗᑦ ᐱᓇᔪᒍᑕᐅᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᕌᒐᕆᔭᐅᔪᑦ ᐅᖃᐅᓯᕆᔪᒪᓪᓗᒋᑦ ᑐᓴᖅᑎᑕᐅᓚᐅᕆᕗᑦ ᐊᕕᒃᑐᖅᓯᒪᔪᑦ ᐱᓕᕆᐊᒃᓴᓪᓚᑦᑖᖏᓐᓂᒃ. 

“ᐅᒃᐱᕈᓱᒃᑐᖓ ᐸᐅᒃᓴᓄᑦ ᑖᒃᓰᔭᕈᑎ ᐊᒃᑐᐃᓂᕐᓗᐃᔪᓐᓇᕐᓂᖓᓂᒃ ᐅᑭᐅᖅᑕᖅᑐᒥᐅᑦ ᐃᓅᓯᖏᓐᓂᒃ. ᑲᓇᑕᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᕌᒐᕆᔭᐅᔪᑦ ᐊᐅᓚᑕᐅᔭᕆᐊᖃᖅᐳᑦ ᐊᒃᑐᐃᓗᐊᖅᑕᐃᓕᓗᑎᒃ ᐅᑭᐅᖅᑕᖅᑐᒥ ᐃᓅᓇᓱᐊᕈᑎᓄᑦ, ᐊᑦᑕᕐᓇᖅᑐᒦᑎᑦᑎᓪᓗᑎᒃ ᓂᕆᔭᑦᓴᖃᑦᓯᐊᕈᓐᓇᕐᓂᖏᓐᓄᑦ ᐱᔾᔪᑎᖃᖅᑐᓂᒃ ᐅᕝᕙᓘᓐᓃᑦ ᐊᕝᕕᐊᕈᑕᐅᓂᐊᕐᓂᖓᓂᒃ ᑮᓇᐅᔭᓕᐅᕈᑎᒃᓴᓂᒃ,” ᔫᑳᓐᒥᐅᑦ ᓯᕗᓕᖅᑎᖓ ᑎᐅᕈᓪ ᐸᔅᓛᔅᑭ ᐅᖃᖅᑐᖅ. “ᑮᓇᐅᔭᓕᐅᕈᑎᐅᒍᓐᓇᖅᑐᐃᑦ ᐊᒃᓱᕈᕐᓇᖅᑐᒃᑰᕈᑕᐅᑎᓪᓗᒋᑦ, ᐅᕙᒍᑦ ᐊᕕᒃᑐᖅᓯᒪᔪᓂ ᓯᕗᓕᖅᑎᒋᔭᐅᓪᓗᑕ ᓇᓗᓇᐃᖅᓯᔭᕆᐊᖃᖅᐳᒍᑦ ᑮᓇᐅᔭᐅᓕᕈᑎᐅᒍᓐᓇᖅᑐᓄᑦ ᐊᒃᑐᐃᓂᖃᕈᓐᓇᖅᑐᓂᒃ ᖃᓄᑐᐃᓐᓇᖅ ᒐᕙᒪᑐᖃᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᐅᔨᓴᕈᑕᐅᔪᒪᔪᓂᒃ ᐱᔮᕆᙱᓗᑎᒃ ᖁᔭᓈᖅᓯᓯᒪᑐᐃᓐᓇᕆᐊᖃᕐᓂᖏᓐᓂᒃ ᐊᕕᒃᑐᖅᓯᒪᔪᑦ ᑮᓇᐅᔭᓕᐅᕈᑎᒋᒍᓐᓇᖅᑕᖏᓐᓂᒃ .” 

ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ ᒥᑭᑉᐳᑦ ᑭᓯᐊᓂ ᐱᒻᒪᕆᐅᕗᑦ ᐊᕕᒃᑐᖅᓯᒪᔪᑦ ᑮᓇᐅᔭᓕᐅᕈᑎᒃᓴᖏᑦ ᐊᒻᒪ ᐃᓄᑭᑦᑐᓂᒃ ᓄᓇᓕᕋᓛᖑᓂᖅᓴᑦ ᐅᖓᓯᒃᑐᒦᓐᓂᖅᓴᓪᓗ ᐱᒻᒪᕆᐅᙱᓐᓂᖅᓴᐅᕗᑦ ᑲᓇᑕᓕᒫᒥ ᓯᓚᐅᑉ ᐅᔅᓯᒃᓯᕙᓪᓕᐊᔾᔪᑎᖓᓄᑦ ᐃᓯᐊᕿᓂᖓᓂᒃ. ᑕᐃᒫᑦᓴᐃᓐᓇᖅ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᔾᔨᒌᙱᑦᑐᒥᒃ ᐊᒃᑐᐃᓂᖃᖅᐳᖅ ᐅᑭᐅᖅᑕᖅᑐᒥᐅᑦ ᓄᓇᓕᖏᓐᓄᑦ. ᑕᒪᓐᓇ ᑐᑭᓯᔾᔪᑎᒋᓪᓗᒍ ᓯᕗᓕᖅᑏᑦ ᐅᖃᓚᐅᖅᐳᑦ ᐱᖓᓱᑦ ᐊᕕᒃᑐᖅᓯᒪᔪᑦ ᐱᓕᕆᖃᑕᐅᓂᖏᓐᓂᒃ ᖃᓄᐃᓕᐅᖅᑎᑦᑎᓯᒪᓕᖅᖢᑎᒡᓗ ᐃᓯᐊᕿᙱᓐᓂᖅᓴᐅᓕᖁᓪᓗᒍ, ᓴᓗᒪᓂᖅᓴᒥᒃ ᐆᒻᒪᖅᑯᑎᖃᖅᑎᑦᑎᓗᑎᒃ, ᓄᑖᙳᖅᐸᓪᓕᐊᔪᓂᒃ ᐊᒻᒪ ᓄᑖᓂᒃ ᓴᖅᑭᑎᑦᑎᔪᓐᓇᕐᓂᕐᒥᒃ. 

ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᔪᓯᑦᑎᐊᖁᔨᕗᑦ ᓇᓗᓇᐃᔭᖅᓯᒪᔪᓂᒃ ᑮᓇᐅᔭᓕᐅᕈᑎᒃᓴᓄᑦ ᖃᐅᔨᓴᕈᑕᐅᔪᑦ ᐱᐊᓂᒃᑕᐅᖁᓪᓗᒋᑦ ᓇᓂᑐᐃᓐᓇᖅ ᓄᑖᓂᒃ ᑲᓇᑕᒥ ᐱᓕᕆᐊᖑᑎᑕᐅᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐅᑯᓂᖓᓗ ᖃᐅᔨᓴᖅᑕᐅᓗᑎᒃ ᐱᓗᐊᖅᑐᒥ ᐊᒃᑐᐃᑐᐃᓐᓇᕆᐊᓖᑦ ᐊᕕᒃᑐᖅᓯᒪᓂᕆᔭᑦᑕ ᑮᓇᐅᔭᓕᐅᕈᑎᒃᓴᖏᓐᓂᒃ. 

"ᐊᕕᒃᑐᖅᓯᒪᓂᕆᔭᕗᑦ ᓯᕗᓕᖅᑎᐅᕗᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᓱᖏᐅᑎᖃᕈᓐᓇᓂᖅ ᐱᔾᔪᑎᒋᓪᓗᒍ ᐱᒻᒪᕆᐅᓂᖅᓴᓂᒃ ᐊᒃᑐᐃᓯᒪᖕᒪᑦ ᐊᑐᖅᓯᒪᓕᕇᖅᑕᑦᑎᓐᓂᒃ, “ᓄᓇᑦᓯᐊᒥ ᓯᕗᓕᖅᑎ ᐹᑉ ᒪᒃᓚᐅᑦ ᐅᖃᖅᑐᖅ. “ᓂᕆᐅᒃᐳᒍᑦ ᒐᕙᒪᑐᖃᒃᑯᓐᓂ ᐱᓕᕆᖃᑎᖃᕈᒪᓪᓗᑕ ᑲᔪᓯᑦᑎᐊᖁᓪᓗᒍ ᑲᓇᑕᒥ ᐊᑐᖅᐸᓪᓕᐊᓂᐊᖅᑕᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᓚᒋᐊᕈᑕᐅᖁᓪᓗᒍ ᐊᕕᒃᑐᖅᓯᒪᓂᑦᑕ ᐸᕐᓇᐅᑎᖏᓐᓄᑦ." 

ᐊᕕᒃᑐᖅᓯᒪᓂᕆᔭᑦᑕ ᓯᕗᓕᖅᑎᖏᑦ ᓂᕆᐅᒃᐳᑦ ᐅᖃᖃᑎᒌᖕᓂᐊᕐᓂᖏᓐᓂᒃ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ ᐃᖅᑲᓇᐃᔭᖃᑎᒋᕙᒃᑕᖏᓐᓂ ᐊᒻᒪ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ ᓯᕗᒻᒧᐊᒃᐸᓪᓕᐊᔪᒪᓪᓗᑎᒃ ᐱᓕᕆᐊᕆᕙᓪᓕᐊᔭᒥᓂᒃ ᐱᔪᓐᓇᕐᓂᖃᕐᕕᓕᒫᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᓱᕈᕐᓇᖅᑐᑦ ᐅᖃᐅᓯᕆᔭᐅᓗᑎᒃ. 

“ᐅᑭᐅᖅᑕᖅᑐᒥ ᑲᓇᑕᒥ ᑲᑎᑦᑎᓚᐅᖅᐳᑦ ᓯᓚᐅᑉ ᐅᔅᓯᒃᓯᕙᓪᓕᐊᓂᖓᓄᑦ ᐃᓯᐊᖅᑭᔪᑦ ᒥᑭᑦᑑᒐᓗᐊᓂᒃ, ᑭᓯᐊᓂ ᐊᒃᑐᐃᕙᒃᑐᑦ ᑲᒪᒋᔭᕆᐊᖃᖅᐸᒃᑕᕗᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᐊᓂᖃᓪᓚᑦᑖᖅᐳᑦ ᓴᓇᕝᕕᖕᓂ ᓄᓇᕐᔪᐊᓕᒫᒥ,” ᓄᓇᕗᑦ ᓯᕗᓕᖅᑎᖓ ᐲᑕ ᑕᑉᑑᓇ ᐅᖃᖅᑐᖅ. ᑕᐃᒪᐃᒻᒪᑦ ᐅᔾᔨᕈᓱᓪᓗᐊᑕᖃᑦᑕᖅᐳᒍᑦ ᐸᓚᖅᓯᕚᓪᓕᖅᑎᑦᑎᓂᕐᒥᒃ ᐋᖅᑭᒋᐊᖅᑎᑦᑎᓂᕐᒥᒡᓗ, ᐊᒻᒪ ᐊᓯᖏᓐᓂᒃ ᑭᒡᒐᖅᑐᐃᕕᐅᔪᓂᒃ ᑐᑭᓯᐅᒪᖁᔨᓪᓗᑕ ᐊᔾᔨᒋᔭᐅᙱᑦᑐᒥᒃ ᖃᓄᐃᓕᖓᔾᔪᑕᐅᔪᓂᒃ ᐅᑭᐅᖅᑕᖅᑐᒥ ᐊᒻᒪ ᐊᒃᑐᐃᔪᓐᓇᕐᓂᖓᓂᒃ ᑭᒡᓕᖃᖅᑎᑕᐅᔪᓄᑦ ᑮᓇᐅᔭᓕᐅᕈᑎᒃᓴᑦᑎᓐᓄᑦ ᐊᓯᔾᔨᖅᓯᖃᑦᑕᐃᓐᓇᕐᓗᑕ ᖃᓄᑐᐃᓐᓇᖅ ᖃᓄᖅᑑᕈᑎᒃᓴᓄᑦ ᐸᕐᓇᐅᑎᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐱᔾᔪᑎᒋᓪᓗᒍ.” 

-30- 

ᖃᐅᔨᒋᐊᕐᕕᐅᔪᓐᓇᖅᑐᖅ: 

ᑖᓐ ᒪᒃᑖᓄᓪ 
ᒥᓂᔅᑕᐃᑦ ᑐᓴᒐᒃᓴᓕᕆᔨᖓᑦ 
ᔫᑳᓐ ᒐᕙᒪᖓᑦ 
867-393-6470 
dan.macdonald@gov.yk.ca 

ᑲᐃᑦ ᒪᒃᓚᐅᑦ 
ᑐᑭᒧᐊᒃᑎᑦᓯᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ 
ᒐᕙᒪᓕᕆᔨᒃᑯᑦ 
ᓄᓇᕗᑦ ᒐᕙᒪᖓᑦ 
867-222-0305 
cmacleod@gov.nu.ca 

ᐊᓐᑐᕈ ᓕᕕᖕᔅᑑᓐ 
ᓄᓇᑦᓯᐊ ᒐᕙᒪᖓᑦ 
867-767-9140 ᓇᕿᒃᑲᓐᓂᕐᓗᒍ 11091