ᐅᖃᓚᐅᑎᓯᐅᑏᑦ

You are here

ᐊᑭᓕᖅᓱᐃᓂᖅ ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᓂᒃ ᑮᓇᐅᔾᔭᒃᓵᖑᔪᓂᑦ

ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᕖ? ᐃᒡᓗᒥ ᓇᖕᒥᓂᖃᖅᐲ ᐊᓯᐊᓂᓪᓘᓐᓃᑦ ᓇᖕᒥᓂᖃᖅᐲ, ᐃᖃᓗᐃᑦ ᓯᓚᑖᓂ?

ᐊᐱᖅᑯᑎᓄᑦ ᐊᖏᕈᕕᑦ, ᓇᖕᒥᓂᖃᕐᓂᕐᒧᑦ ᑖᒃᓰᔭᕈᓐᓇᖅᓯᔪᑎᑦ ᑮᓇᐅᔭᓕᐊᕐᓂᑦ ᐲᔭᐃᕝᕕᐅᖃᑦᑕᕐᓗᑎᑦ.

ᓄᓇᕗᑦ ᒐᕙᒪᒃᑯᑦ ᐱᕕᖃᖅᑎᑦᑎᖕᒪᑕ ᐃᖅᑲᓇᐃᔭᖅᑎᖁᑎᖏᓐᓂᒃ ᐊᑲᐅᔪᒥᒃ ᐊᑐᕐᓗᑎᑦ ᐊᑭᓕᖅᓱᐃᓂᕐᒥᑦ ᑖᒃᓰᔭᕈᑎᓂᑦ ᓇᖕᒥᓂᕆᔭᐅᔪᓄᑦ ᐃᖃᓗᐃᑦ ᓯᓚᑖᓂ.

ᐊᖏᕈᑎᒋᔭᕐᓄᑦ, ᑮᓇᐅᔭᓕᕆᔨᒃᑯᑦ ᐱᓕᕆᕝᕕᖓᑦ ᐲᔭᐃᑦᑕᐅᑎᒋᔪᓐᓇᖅᑐᑦ ᑮᓇᐅᔭᓕᐊᕆᔭᕐᓂᑦ ᑖᒃᓰᔭᕈᑎᓄᑦ ᐊᑭᓖᓂᐊᕋᕕᑦ. ᐊᑭᓖᔪᓐᓇᖅᑐᑎᑦ ᐊᑭᓕᕆᐊᓕᖕᓂᒃ ᐊᑕᐅᓯᐊᕐᓗᒍ, ᐅᕝᕙᓘᓐᓃᑦ ᓂᕈᐊᕈᓐᓇᖅᑐᑎᑦ ᐊᕕᑦᑐᕐᓗᒋᑦ ᐊᑭᓕᐅᑎᒃᓴᑎᑦ ᐱᓇᓱᐊᕈᓰᒃ ᒪᕐᕉᒃ ᐊᓂᒍᔭᕌᖓᑦ.

ᐊᑐᕈᓐᓇᕐᒥᔪᑎᑦ ᑮᓇᐅᔭᓕᐊᕐᓂᑦ ᐲᔭᐃᕝᕕᐅᓗᑎᑦ ᖃᓄᐃᑦᑐᑐᐃᓐᓇᕐᓂᑦ ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᓂᒃ ᐊᑭᓕᒃᓴᖃᕈᕕᑦ ᐊᕐᕌᒍᐃᑦ ᕐᑳᖏᖅᓯᒪᔪᓂᑦ. ᑭᖑᕙᖓᔪᑦ ᑖᒃᓰᔭᕈᑏᑦ ᐊᑭᓖᑎᑦᑎᒃᑲᓐᓂᑐᐃᓐᓇᕆᐊᓖᑦ ᐊᒻᒪ ᕿᑐᕐᖏᐅᕈᑎᓂ ᐃᓚᒃᑲᓐᓂᕐᓗᑎᑦ. ᑮᓇᐅᔭᕐᒥᒃ ᐲᔭᐃᕝᕕᐅᖃᑦᑕᕐᓗᓂ ᐱᔭᕆᐊᑭᑦᑑᕗᖅ ᐊᖑᒻᒪᑎᑦᑎᐊᕐᓂᕐᒧᑦ.

ᐊᑎᓕᐅᖃᑕᐅᓂᕐᒧᑦ, ᑕᑕᑎᑦᑎᐊᕐᓗᒍ ᐊᑕᔪᖅ ᑮᓇᐅᔭᓕᐊᒥᑦ ᐲᔭᐃᕝᕕᐅᓂᖅ ᐊᖏᕈᑎ ᑎᑎᕋᕐᕕᒃᓴᖅ. ᐱᔭᕇᖅᓯᒪᔪᖅ ᓇᒃᓯᐅᑎᓗᒍ ᐃᕐᖐᓐᓈᖅᑕᐅᑎᒃᑯᑦ ᐅᕗᖓ propertytax@gov.nu.ca ᓱᒃᑲᔪᒃᑯᓪᓘᓐᓃᑦ ᐅᕗᖓ 867-975-5845.

ᑎᑭᕝᕕᐅᓪᓗᐊᖅᑐᑎᑦ 2016-ᒧᑦ ᑖᒃᓰᔭᕈᑎᓄᑦ ᐊᑭᓕᒐᒃᓴᙳᖅᑎᑕᐅᕙᒃᑐᓄᑦ ᐅᑐᐱᕆᐅᑉ ᓄᙳᖏᓐᓂ. ᑖᓐᓇ ᑖᒃᓰᔭᕈᑎᓄᑦ ᐊᑭᓕᒐᒃᓴᙳᖅᑎᑕᐅᕙᒃᑐᓄᑦ ᓇᓗᓇᐃᕆᖕᒪᑦ ᖃᔅᓯᓂᒃ ᐊᑭᓕᒃᓴᖃᕐᒪᖔᖅᐱᑦ ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᓂᑦ. ᑕᒪᑐᒪᓂ ᐊᕐᕌᒍᒥᑦ, ᑖᒃᓰᔭᕈᑏᑦ ᐊᑭᓕᖅᑕᐅᓯᒪᔭᕆᐊᓖᑦ ᑎᓯᐱᕆ 14, 2016-ᒥ.

ᐊᖏᕈᑏᑦ ᐱᓯᒪᒋᐊᖃᖅᑕᕗᑦ ᐃᓱᓕᕝᕕᒃᓴᖃᖅᑐᓂ ᓄᕕᐱᕆ 4, 2016-ᒥ ᐊᑭᓕᐅᑎᒋᓂᐊᖅᑕᑎᑦ ᑲᒪᒋᔭᐅᓂᐊᕐᒪᑕ ᑭᖑᕙᖓᖏᓪᓗᑎᑦ ᑕᒪᑐᒪᓂ ᐊᕐᕌᒍᒥ ᐃᓱᓕᕝᕕᒃᓴᐅᑎᖓᓄᑦ. ᓂᕆᐅᒃᐳᒍᑦ ᐲᔭᐃᕝᕕᐅᓯᒋᐊᖃᑦᑕᕐᓂᐊᖅᑐᑦ ᓄᕕᐱᕆ 18, 2016-ᒥ.

ᐱᒻᒪᕆᐅᔪᑦ ᖃᐅᔨᒪᔭᐅᔭᕆᐊᓖᑦ:

  • ᑖᒃᓰᔭᕈᑏᑦ ᐊᑭᓕᖅᑕᐅᓯᒪᔭᕆᐊᓖᑦ ᑎᓯᐱᕆ 14, 2016-ᒥ. ᐃᒡᕕᑦ ᓇᖕᒥᓂᖅ ᑲᒪᒋᔭᕆᐊᖃᖅᑕᑦ ᐊᑭᓕᕐᓗᒋᑦ ᑖᒃᓰᔭᕈᑏᑦ ᑭᖑᕙᙱᓪᓗᑎᑦ, ᐱᔾᔪᑎᒃᓴᖃᙱᑦᑐᖅ ᓇᐅᒃᑰᖔᖅ ᐊᑭᓖᓂᐊᕋᓗᐊᕈᕕᑦ. ᐊᑭᓕᐅᑎᑎᑦ ᓈᒻᒪᖏᑉᐸᑕ ᑕᒪᐃᓐᓂ ᐊᑭᓖᓂᕐᒧᑦ ᑖᒃᓰᔭᕈᑎᓂᑦ ᐊᑭᓕᒃᓴᕆᔭᕐᓄᑦ ᐃᓱᓕᕝᕕᒃᓴᐅᑎᐊᓄᑦ ᑎᑭᐅᑎᓚᐅᙱᓐᓂᕐᓂ, ᐊᑭᓕᒃᓴᑎᑦ ᕿᑐᕐᖏᐅᕈᑎᓂᑦ ᐃᓚᒃᑲᓐᓂᑐᐃᓐᓇᕆᐊᓖᑦ ᐊᑎᖃᖃᑕᐅᑐᐃᓐᓇᕆᐊᖃᖅᑐᑎᓗ ᑎᑎᖅᑲᖁᑎᒥᑦ ᑖᒃᓰᔭᐃᓂᕐᒧᑦ ᐊᑭᓕᒃᓴᖃᖅᑐᓄᑦ.
  • ᐊᑎᓕᐅᖃᑕᐅᓂᖅ ᑖᔅᓱᒧᖓ ᐱᔨᑦᑎᕋᕈᑎᒧᑦ ᐃᓱᒪᖅᓲᑕᐅᔪᖅ. ᐊᑭᓖᙶᖃᑦᑕᕈᓐᓇᖅᑐᑎᑦ ᑖᒃᓰᔭᕈᑎᓂᑦ ᐃᒡᕕᑦ ᐊᑲᐅᒋᔭᖓᒍᑦ.
  • ᑖᓐᓇ ᐱᔨᑦᑎᕋᕈᑎ ᐊᑐᐃᓐᓇᐅᑎᑕᐅᔪᖅ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓄᑦ.
  • ᑖᓐᓇ ᐱᔨᑦᑎᕋᕈᑎ ᐊᑐᐃᓐᓇᐅᑎᑕᐅᙱᑦᑐᖅ ᓇᖕᒥᓂᕆᔭᐅᔪᓄᑦ ᐃᖃᓗᓐᓂ ᐱᔾᔪᑎᒋᓪᓗᒍ ᓄᓇᓕᐸᐅᔭᒃᑯᑦ ᑲᒪᓲᖑᒻᒪᑕ ᓇᖕᒥᓂᖅ ᑖᒃᓰᔭᕈᑎᖏᓐᓂᒃ. ᑖᒃᓰᔭᕈᑏᑦ ᐊᑭᓕᒋᐊᖃᖅᑕᑎᑦ ᑕᐃᑯᖓ ᑐᕌᖅᑎᓪᓗᒋᑦ ᓄᓇᓕᐸᐅᔭᒃᑯᓐᓄ.
  • ᑎᑭᕝᕕᐅᙱᒃᑯᕕᑦ ᑖᒃᓰᔭᕈᑎᒃᓴᒥᑦ ᐅᑐᐱᕆᐅᑉ ᓄᙳᖏᓐᓂ, ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᕕᐅᑕ ᐅᕗᖓ propertytax@gov.nu.ca, ᐊᑭᖃᙱᑦᑐᒃᑯᓪᓘᓐᓃᑦ ᐅᕐᑳᓚᕕᐅᓗᑕ ᐅᕗᖓ 1-800-316-3324.