ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᖁᐃᖅᓱᑰᔨᓐᓇᖅᑑᑉ ᐊᐃᑦᑑᑕᐅᔪᓐᓇᕐᓂᖓ ᐊᓂᒍᖅᑐᖅ

ᐄᐳᕈ 12, 2017

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᓴᖅᑭᑎᑕᐅᓯᑲᐅᑎᒋᔭᕆᐊᓕᒃ

ᓄᓇᕗᒻᒥ ᖁᐃᖅᓱᑰᔨᓐᓇᖅᑑᑉ ᐊᐃᑦᑑᑕᐅᔪᓐᓇᕐᓂᖓ ᐊᓂᒍᖅᑐᖅ

ᐃᖃᓗᐃᑦ, ᓄᓇᕗᑦ (ᐄᐳᕈ 12, 2017) – ᓄᓇᕗᒻᒥ ᖁᐃᖅᓱᑰᔨᓐᓇᖅᑑᑉ ᐊᐃᑦᑑᑕᐅᔪᓐᓇᕐᓂᖓ ᐊᓂᒍᖅᓯᒪᓪᓚᕆᓕᖅᑐᖅ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᓗᓇᐃᖅᓯᔪᑦ ᐅᓪᓗᒥᐅᔪᖅ.

"ᓄᓇᕗᒻᒥᐅᑦ ᖁᔭᓕᕙᒃᑲ ᑲᒪᒋᔭᖃᑦᑎᐊᓚᐅᕐᓂᖏᓐᓂᒃ, ᐋᓐᓂᐊᓕᕇᒃᑯᓯᖅᑕᐅᓪᓗᑎ ᐊᐃᑦᑐᐃᑦᑕᐃᓕᒪᑎᑦᑎᓪᓗᑎᓗ ᖁᐃᖅᓱᑰᔨᓐᓇᖅᑐᒥ," ᐅᖃᖅᑐᖅ ᓘᒃᑖᖅ ᑭᒻ ᐹᑯ, ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ. "ᖁᔭᓕᕐᔪᐊᕈᒪᒻᒥᔭᒃᑲ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᖁᑎᒋᔭᕗᑦ ᓄᓇᕘᓕᒫᒥᑦ; ᐱᓕᕆᔪᒻᒪᕆᐅᓚᐅᕐᒪᑕ ᐋᓐᓂᐊᓕᕇᒃᑯᓯᖅᓯᕙᑦᑐᑎ ᑲᐴᑎᓄᑦ ᑲᒪᑦᑎᐊᓚᐅᕐᒪᑕᓗ ᖁᐃᖅᓱᑰᔨᔪᓂᒃ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᓇᑕᒥ ᖁᔭᓕᒻᒥᔭᒃᑲ ᐃᑲᔪᖅᓱᐃᓐᓇᓚᐅᕐᓂᖏᓐᓄᑦ."

ᖁᐃᖅᓱᑰᔨᓐᓇᖅᑐᖅ ᐊᐃᑦᑐᖅᑕᐅᕙᓪᓕᐊᓂᖓ ᐱᒋᐊᕐᖓᓚᐅᖅᑐᖅ ᒥᑦᑎᒪᑕᓕᒻᒥ ᒪᐃ 2016ᒥ, ᓯᐊᒻᒪᑉᐸᓪᓕᐊᓚᐅᖅᑐᖅ 11-ᓄᑦ ᓄᓇᓕᓐᓄᑦ ᕿᑭᖅᑖᓗᒻᒥ ᑭᕙᓪᓕᕐᒥᓪᓗ. ᐊᐃᑦᑑᑕᐅᓂᖅᐹᖑᑎᓪᓗᒍ, ᓄᓇᕗᒻᒥᐅᑦ ᖃᐅᔨᒋᐊᖁᔭᐅᓚᐅᖅᑐᑦ ᑲᐱᔭᐅᓯᒪᓂᖏᑦ ᐋᓐᓂᐊᓕᕇᒃᑯᓯᕐᓄᑦ ᓈᒻᒪᑦᑎᐊᕋᓗᐊᕐᒪᖔᑦᑕ, ᑲᐱᔭᐅᒋᐊᕐᓗᑎᓗ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᑦ ᓄᓇᕘᒥ ᐅᖃᒃᑲᓐᓂᖅᐳᑦ ᐱᒻᒪᕆᐅᓂᕆᔭᖓᓂᒃ ᓄᑕᕋᐃᑦ ᑲᐱᔭᐅᓯᒪᑦᑎᐊᕆᐊᖃᖃᑦᑕᕐᓂᖏᓐᓂᒃ, ᐃᓚᒋᓪᓗᓂᐅᒃ ᓴᐳᔾᔭᐅᓯᒪᓂᕐᒧᑦ ᖁᐃᖅᓱᑰᔨᓐᓇᖅᑐᒥ. ᐋᓐᓂᐊᓕᕇᒃᑯᑏᑦ ᐊᑭᖃᙱᑦᑐᑦ, ᓄᓇᕗᒻᒥᐅᓪᓗ ᖃᐅᔨᒋᐊᕈᓐᓇᖅᑐᑦ ᓄᓇᓕᖏᑕ ᐋᓐᓂᐊᕕᖏᓐᓂᒃ ᑲᐱᔭᐅᓯᒪᓂᖏᑦ ᐋᓐᓂᐊᓕᕇᒃᑯᓯᕐᓄᑦ ᓈᒻᒪᑦᑎᐊᕋᓗᐊᕐᒪᖔᑦ.

ᐊᐃᑦᑐᐃᓂᖅ ᐊᓂᒍᖅᓯᒪᓕᕋᓗᐊᖅᑎᓪᓗᒍ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓕᐅᕆᕗᑦ ᐃᓄᓕᒫᓂᑦ ᐅᔾᔨᖅᓱᑦᑎᐊᕆᐊᕐᓗᑎᒃ ᖁᐃᖅᓱᑰᔨᓐᓇᖅᑐᒥᑦ, ᐋᓐᓂᐊᕕᓕᐊᑦᑕᐅᑎᒋᓗᓯ ᕿᑐᕐᖓᐃᑦ ᖁᐃᖅᓱᕇᖅᐸᑦ "ᐅᕕᙱᐊᖅᑰᔨᑉᐸᑦ", ᐆᑎᕐᓇᕐᔪᐊᓕᖅᐸᓘᓐᓃᑦ, ᒥᕆᐊᖅᐸᓘᓐᓃᑦ ᖁᐃᖅᓯᕇᖅᐸᑦ. ᖁᐱᕐᕈᐊᕐᔪᖕᓂᒃ ᐋᓐᓂᐊᓂᓪᓗ ᓯᐊᒻᒪᒃᑎᑦᑎᑦᑕᐃᓕᒪᓂᕐᒧᑦ, ᓄᓇᕗᒻᒥᐅᑦ ᐃᖅᑲᐃᑎᑕᐅᒋᐊᖅᑐᑦ ᐊᒡᒐᓂᒃ ᐅᐊᓴᐃᑦᑎᐊᖃᑦᑕᕐᓗᓯ, ᖁᐃᖅᓱᖃᑦᑕᕐᓗᓯ ᑕᓕᓐᓄᑦ ᑲᒃᑭᐅᑎᒃᓴᒧᓪᓘᓐᓃᑦ, ᓂᕿᓂᒃ ᐊᒥᖅᑳᖃᑎᖃᖏᓪᓗᓯ, ᐃᒥᒐᕐᓂᓪᓗ, ᓂᕆᔾᔪᑎᓂᓪᓗ ᑭᒍᑎᓯᐅᑎᓂᓪᓘᓐᓃᑦ, ᐃᓪᓘᑉ ᐃᓗᐊᓂ ᓯᒡᒐᓕᐊᖅᑐᖃᑦᑕᖏᓪᓗᓯᓗ.

ᑐᑭᓯᒋᐊᓂᕐᒧᑦ ᓄᓇᕗᒻᒥ ᐋᓐᓂᐊᓕᕇᒃᑯᓯᖅᑕᐅᓂᕐᒧᑦ ᑲᐱᔭᐅᖃᑦᑕᕐᓂᐅᔪᒧᑦ, ᐅᕗᖓᕐᓗᑎ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓄᑦ http://www.gov.nu.ca/health/information/immunization-programs ᓄᓇᓕᔅᓯᓐᓂ ᐋᓐᓂᐊᕕᔅᓯᓐᓄᑦ ᖃᐅᔨᒋᐊᕐᓗᓯ ᐅᕝᕙᓘᓐᓃᑦ ᐃᖃᓗᓐᓂ ᐅᖁᒪᐃᓐᓂᕐᓂᐊᕐᕕᖓᓄᑦ.

###

ᑐᓴᒐᒃᓴᒧᑦ ᖃᐅᔨᒋᐊᕐᕕᒃᓴᖅ:

ᕌᓐ ᐅᐊᓯᖕᒃ
ᑐᓴᒐᒃᓴᓕᕆᔨᒻᒪᕆᒃ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
(867) 975-5710
rwassink@gov.nu.ca