ᐅᖃᓚᐅᑎᓯᐅᑏᑦ

You are here

ᓄᓇᕗᒥᐅᑦ ᐃᓚᐅᕗᑦ ᓄᓇᕐᔪᐊᕐᒥ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᓪᓗᕆᔭᐅᑎᓪᓗᒍ

ᐊᒃᑐᐸ 06, 2017

ᑭᒃᑯᑐᐃᓐᓇᓄᑦ ᑐᓴᒐᒃᓴᖅ

ᓄᓇᕗᒥᐅᑦ ᐃᓚᐅᕗᑦ ᓄᓇᕐᔪᐊᕐᒥ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᓪᓗᕆᔭᐅᑎᓪᓗᒍ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓕᐅᕆᕗᑦ ᓄᓇᕗᒥᐅᓂᒃ ᐃᓚᐅᖁᓪᓗᒋᑦ ᐃᓄᒐᓴᒡᔪᐊᓂ ᓄᓇᕐᔪᐊᕐᒥ ᐃᓕᑕᕆᔭᐅᑎᓪᓗᒍ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᓪᓗᕆᔭᐅᔪᖅ ᐅᑐᐱᕆ 10−ᒥ.

ᓄᓇᕐᔪᐊᕐᒥ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᓪᓗᕆᔭᐅᑎᓪᓗᒍ ᐃᖅᑲᐃᓯᔾᔪᑎᑦᑎᐊᕙᐅᕗᖅ ᐅᕙᑦᑎᓐᓄᑦ ᐅᕙᑦᑎᓐᓂ ᑲᒪᒋᑦᑎᐊᕆᐊᖃᕐᓂᑦᑎᓐᓂ ᐃᓅᖃᑎᑦᑎᓐᓂᒡᓗ ᑲᒪᑦᑎᐊᕆᐊᖃᕐᓂᑦᑎᓐᓂ. ᐱᒻᒪᕆᐅᖕᒪᑦ ᐃᓱᒪᑦᑎᓐᓂ ᑲᒪᑦᑎᐊᕆᐊᖃᕐᓂᖅ ᑎᒥᕗᑦ ᑲᒪᒋᑦᑎᐊᓲᕆᒐᑦᑎᒍᑦ ᑕᐃᒪᓐᓇᑐᐃᓐᓇᑦᑎᐊᖅ. ᐱᓕᕆᔪᐃᓐᓇᐅᓚᐅᖅᑕ ᐃᑲᔪᖅᓱᕐᓗᑎᒍᑦ ᐱᖃᓐᓇᕆᔭᕗᑦ ᐊᒻᒪ ᖃᑕᙳᑎᕗᑦ ᐃᓱᒪᒃᑯᑦ ᖃᓄᐃᙱᑦᑎᐊᕈᓯᖏᑦ, ᑎᓕᐅᕆᖃᑦᑕᐅᑎᓗᑕᓗ ᐃᑲᔪᕈᓐᓇᕌᖓᑦᑕ ᐃᑲᔪᕆᐊᓕᖕᓂᒃ ᐃᑲᔪᖅᐸᒡᓗᑕ.

ᐃᓄᑑᙱᑦᑐᑎᑦ. ᐃᓱᒪᒃᑯᑦ ᐊᔪᕈᑎᖃᕈᕕᑦ ᐅᕝᕙᓘᓐᓃᒃ ᖃᐅᔨᒪᔭᖃᕈᕕᑦ ᐊᒃᓱᕉᑎᖃᖅᑐᒥᒃ ᐃᓱᒪᒥᒍᑦ, ᐃᑲᔪᖅᑕᐅᔪᓐᓇᑦᑎᐊᖅᐳᓯ. ᐃᑲᔪᖅᑕᐅᔪᒪᖃᑦᑕᕆᔅᓯ ᐱᖃᓐᓇᕆᔭᔅᓯᓐᓄᑦ, ᓇᓕᐊᖕᓄᑐᐃᓐᓇᖅ ᐃᓚᖕᓄᑦ, ᐃᓕᓴᐃᔨᒧᑦ, ᐃᓕᓐᓂᐊᕐᕕᖕᒥ ᐃᓅᓯᓕᕆᔨᒧᑦ ᐅᕝᕙᓘᓐᓃᑦ ᐃᓐᓇᕐᒧᑦ. ᖃᓄᖅ ᐃᒃᐱᒋᔭᖃᕐᒪᖔᑦ ᐅᖃᐅᓯᕆᕙᒡᓗᒋᑦ ᖃᓄᐃᒻᒪᖔᖅᐱᓪᓗ ᐅᖃᐅᓯᕆᕙᒡᓗᒋᑦ. ᐋᓐᓂᐊᕕᓯᓐᓅᕐᓗᑎᓪᓗ ᐃᓱᒪᓕᕆᔨᒥᑦ ᐅᖃᖃᑎᖃᕆᐊᖅᑐᕐᓗᑎᑦ.

ᑲᒪᑦᓯᐊᖅᑐᑦ ᐃᑲᔪᖅᑕᐅᕕᖕᒧᑦ ᐅᖃᓗᒍᓐᓇᖅᑐᓯ ᑭᒃᑰᖕᒪᖔᖅᓯ ᖃᐅᔨᔭᐅᙱᒃᑲᓗᐊᕐᓗᓯ ᐃᑲᕐᕋᑦ 24−ᓄᑦ ᐅᖃᓗᒡᕕᒃᓴᐅᓲᑦ, ᐅᕗᖓ ᓈᓴᐅᑎᒧᑦ 867-979-3333 ᐅᕝᕙᓘᓐᓃᑦ ᐊᑭᖃᙱᑦᑐᒧᑦ ᐅᕗᖓ 1-800-265-3333. ᐅᕗᖓ ᐃᑭᐊᖅᑭᕕᖕᒧᐊᕈᓐᓇᕐᒥᔪᓯ Isaaksimagit Inuusirmi Katujjiqatigiit ᐃᑭᐊᖅᑭᕕᖓᓐᓄᑦ, ᑐᑭᓯᒋᐊᒃᑲᓐᓂᕈᒪᒍᔅᓯ ᐃᑲᔪᖅᑕᐅᔪᒪᒍᔅᓯᓘᓐᓃᑦ, ᐅᕝᕙᓘᓐᓃᑦ ᐊᑭᖃᙱᑦᑐᒧᑦ ᐅᖃᓗᒍᓐᓇᕐᒥᔪᓯ ᐅᕗᖓ 1-866-804-2782.

ᐊᑦᑕᕐᓈᕿᓐᓂᕈᕕᑦ ᖃᐅᔨᒪᔭᓪᓘᓐᓃᑦ, ᐸᓖᓯᒃᑯᑦ ᐅᖃᓗᒡᕕᒋᓗᒋᑦ, ᐅᕝᕙᓘᓐᓃᑦ ᐋᓐᓂᐊᕕᓕᐊᕐᓗᑎᑦ ᐋᓐᓂᐊᕕᐊᓗᖕᒧᓪᓘᓐᓃᑦ ᐃᕐᖐᓐᓇᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓇᐃᑎᓐ ᐴᕐᑎ
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
(867) 975-5712
npurdy@GOV.NU.CA