ᑖᓐᓇ ᒪᓕᒐᓕᐅᕐᕕᒃ ᐊᒻᒪᓗ ᐊᕕᒃᑐᖅᓯᒪᓂᐅᔪᑦ ᓄᓇᕗᒥ ᐱᐊᓂᖕᓂᐊᓕᕐᒪᑕ ᐊᕐᕌᒍᓂᒃ ᐱᖓᔪᐊᓐᓂᒃ. ᒫᓐᓇᒫᖅ ᑕᖅᑭᐅᓚᐅᖅᑐᓂ ᐃᓱᒪᒃᓴᖅᓯᐅᕈᑎᖃᕆᐊᖃᓚᐅᕋᑦᑕ ᑭᓱᑦ ᓴᖅᑭᑎᑕᐅᓯᒪᓕᕐᒪᖔᑕ ᓯᕗᓪᓕᖅᐹᓂ 1000-ᓂᒃ ᐅᓪᓗᓂ. ᑕᒪᒃᑯᓇᙵᑦ ᐅᖃᓕᒪᓂᐅᔪᓂᒃ, ᓴᖅᑭᑦᑐᖃᖅᑐᖅ ᐊᖏᔪᒥᒃ ᐅᐱᒍᓱᖕᓂᕐᒥᒃ, ᓴᕆᒪᓱᖕᓂᕐᒥᑦ ᐊᒻᒪᓗ ᓈᒻᒪᒃᓴᕐᓂᕐᒥᑦ. ᐃᓕᖅᑯᓯᕆᖕᒪᔾᔪᒃ ᐊᒻᒪᓗ ᐃᓄᐃᑦ ᐃᓕᖅᑯᓯᑐᖃᕆᖕᒪᒋᑦ ᐃᓕᑕᖅᓯᒋᐊᒃᓴᖅ ᐊᒻᒪᓗ ᐅᖃᐅᓯᖃᕆᐊᒃᓴᖅ ᐱᐅᔪᓂᒃ ᓴᖅᑭᑕᖏᓐᓂᒃ ᐊᓯᑦᑕ ᐊᒻᒪᓗ ᓄᓇᕗᒥᐅᖑᓪᓗᓂ ᐊᖏᔪᓂᒃ ᓴᖅᑭᑦᓯᓯᒪᔪᖃᕐᒪᑦ ᐃᓕᑕᕆᔭᕆᐊᖃᖅᑕᑦᑎᓐᓂᒃ:

ᓄᓇᕗᑦ ᒐᕙᒪᖏᑦ, ᐱᓕᕆᐊᖏᑎᒍᑦ ᒪᓕᒐᓕᐅᕐᕕᐅᑉ ᐊᖏᕈᑎᖃᖅᓯᒪᔪᑦ ᐊᒻᒪᓗ ᑕᑯᓂᐊᖅᑐᑦ ᓴᓇᔭᐅᔪᒥᒃ ᐅᕝᕙᓘᓐᓃᑦ ᓂᐅᕕᐊᕆᔭᐅᓗᓂ ᓄᙳᐊᓂ 2002 ᐃᒡᓗᓕᐅᕐᓇᐅᑎᓪᓗᒍ 300-ᑲᓴᖕᓂᑦ ᐊᔪᖅᓴᕐᓂᖅᓴᓄᑦ ᐃᒡᓗᓕᐅᕐᓂᐊᖅᑐᑦ ᓄᓇᕗᒥ.

ᑖᒃᑯᐊ ᓄᓇᕗᑦ ᒐᕙᒪᖏᑦ, ᐊᖏᖅᑕᐅᓪᓗᑎᒃ ᑖᑦᓱᒧᖓ ᒪᓕᒐᓕᐅᕐᕕᖕᒧᑦ ᐊᑐᓂᐊᖅᑐᑦ 35-ᐳᓴᙱᓐᓂᒃ ᑮᓇᐅᔭᖅᑑᑎᒃᓴᑦ ᐊᑭᑐᔫᑎᓄᑦ ᐃᓕᓐᓂᐊᕐᕕᓐᓄᑦ ᐃᓕᓴᕐᓂᐊᕐᓗᒋᑦ ᐊᒻᒪᓗ ᐃᓕᓐᓂᐊᖅᑎᖃᑦᑕᕐᓗᒋᑦ ᐱᕈᖅᐸᓪᓕᐊᔪᖁᑎᕗᑦ ᒪᒃᑯᑦᑐᑦ. ᑕᑯᓯᒪᓕᕋᑦᑕ ᐊᒥᓱᓂᒃ ᖁᑦᑎᖕᓂᓕᖕᓂᑦ 12 ᐃᓕᓐᓂᐊᕌᓂᑦᓯᐊᖏᓐᓇᖅᐸᓪᓕᐊᔪᑦ.

ᐊᕐᕌᓂ ᒪᕐᕈᐃᖅᑐᓂ ᐊᒥᓱᕈᕐᓂᖅᓴᐅᓚᐅᖅᑐᑦ ᐃᓕᓐᓂᐊᖅᑎᖁᑎᕗᑦ ᐃᓕᓐᓂᐊᕌᓂᒃᑐᑦ ᖁᑦᓯᖕᓂᓕ 12-ᓂᒃ ᓴᓂᐊᓂ ᑕᓪᓕᒪᐃ ᐊᕐᕌᒎᓚᐅᖅᑐᑦ. ᐱᐅᓂᖅᓴᒻᒪᕆᒃ ᐊᕐᕌᓂ ᐱᖓᓲᔪᖅᑐᐃᕋᖅᑐᒍ (6) ᐊᒥᓱᑦ ᐃᓕᓐᓂᐊᖅᑎᖁᑎᕗᑦ ᐃᓕᓐᓂᐊᕌᓂᓚᐅᖅᑐᑦ ᖁᑦᑎᖕᓂᓕᖕᓂᑦ 12 ᓴᓂᐊᓂ ᐊᕐᕌᒍᐃᑦ ᖁᓕᐅᓚᐅᖅᑐᑦ (10) ᐊᒻᒪᓗ ᑕᒪᓐᓇ ᓴᖅᑭᑎᑕᐅᓚᐅᖅᑐᖅ ᓄᓇᓕᐅᔪᓂ ᓄᓇᕗᓕᒫᒥ.

ᐋᖅᑭᖅᓯᓯᒪᓕᖅᑐᒍᑦ ᐱᔪᓐᓇᕈᑎᓂᒃ ᐃᓕᓐᓂᐊᕌᓂᒍᓐᓇᕈᑎᒃᓴᖏᓐᓂᒃ ᐋᓐᓂᐊᓯᐅᖅᑎᐅᓂᕐᒧᑦ ᐊᒻᒪᓗ ᒪᓕᒐᓕᕆᔨᐅᓂᕐᒧᑦ, ᐅᕙᑦᑎᓐᓄᑦ ᐅᖃᐅᓯᐅᖃᑦᑕᓚᐅᖅᑐᑦ ᐊᔪᕐᓂᕋᖅᑕᐅᓪᓗᑕ ᐊᒻᒪᓗ ᓴᖅᑭᑎᓯᒪᓕᖅᑕᕗᑦ ᑕᒪᒃᑯᐊ ᓄᓇᕗᒥ. ᒪᓕᒃᑐᒍ ᐸᕐᓇᒍᑕᐅᓯᒪᔪᖅ ᓴᓇᔭᐅᓚᐅᖅᑐᖅ ᐊᖅᑯᑎᒋᓪᓗᒋᑦ ᓯᐊᒻᒪᒃᑎᑦᑎᕙᓪᓕᐊᔩᑦ ᐋᖅᑭᒃᑕᐅᓯᒪᔪᑦ, ᑕᑯᓯᒪᔪᒍᑦ ᐅᖓᑖᓄᑦ 400 ᐃᓂᐅᔪᓂᒃ ᐃᖅᑲᓇᐃᔭᖅᑎᓄᑦ ᓄᒃᑎᖅᑕᐅᔪᑦ ᐅᕝᕙᓘᓐᓃᑦ ᐋᖅᑭᒃᑕᐅᔪᑦ ᓯᐊᒻᒪᒃᑎᕐᕕᐅᓯᒪᔪᓂ ᓄᓇᓕᐅᔪᓂ ᓄᓇᕗᓕᒫᒥ.

ᑲᓐᑐᕌᒃᑎᑦᓯᓚᐅᕐᓂᕗᑦ ᒐᕙᒪᐅᓚᐅᖅᑐᓂᒃ ᔭᓗᓇᐃᕝᒥ ᒥᑭᓪᓕᕙᓪᓕᐊᖏᓐᓇᖅᑐᑦ, ᓄᓇᑦᑎᓐᓅᖅᑎᑦᓯᔾᔪᑎᒋᓪᓗᒋᑦ ᐃᓚᒋᐊᕈᑕᐅᔪᓂᒃ $14-ᒥᓕᔭᓂᒃ ᑮᓇᐅᔭᖅᑑᑎᒃᓴᖅᑎᓐᓅᖅᑐᓂᒃ ᐊᕐᕌᒍᑕᒫᑦ ᐊᑐᖅᑕᐅᓪᓗᑎᒃ ᓄᓇᕗᒥ. ᑕᒪᒃᑯᐊ ᐅᓄᕐᓂᐅᔪᑦ ᐃᓚᐅᑎᑦᓯᖏᑦᑐᑦ ᓄᓇᕗᒥ ᐃᑯᒪᓕᕆᔩᑦ ᑯᐊᐳᕇᓴᖓᓐᓂᒃ ᑕᒪᓐᓇ ᓅᓚᐅᖅᑐᖅ ᓄᓇᕗᒧᑦ ᐊᐃᐳᕈ 1, 2001, ᐅᖃᐅᔾᔭᐅᔾᔪᑎᒋᓚᐅᖅᓯᒪᖕᒥᔭᕗᑦ ᐊᔪᕐᓂᕋᖅᑕᐅᓪᓗᑕ, ᐃᓚᓕᐅᔾᔨᔪᑦ ᐃᓚᒋᐊᕈᑕᐅᔪᓂᒃ $47-ᒥᓕᔭᓐ ᑮᓇᐅᔭᓕᐅᕈᑕᐅᓪᓗᑎᒃ ᓄᓇᕗᒧᑦ.

ᕿᖓᐅᒻᒥ ᑐᕌᒐᓕᐊᕆᔭᐅᓚᐅᖅᑐᑦ ᑐᑭᒧᐊᒍᑕᐅᔪᓐᓇᖅᓯᒪᔪᑦ ᐃᓕᕆᐊᑦᑎᓐᓄᑦ. ᓇᓗᓇᐃᖅᓯᒪᔪᒥᒃ ᑐᑭᒧᐊᒍᑎᒋᔭᐅᓯᒪᓪᓗᓂ ᐊᒻᒪᓗ ᐅᖃᐅᓯᖃᖅᓱᑎᒃ ᑐᙵᕕᖏᓐᓂᒃ ᑲᔪᓯᔾᔪᑎᒋᒋᐊᖃᖅᑕᑦᑎᓐᓂᒃ ᓯᕗᒻᒧᐊᒃᐸᓪᓕᐊᑎᓪᓗᑕ ᐊᕝᕙᖓᓄᑦ ᑖᑦᓱᒪ ᒪᓕᒐᓕᐅᕐᕕᐅᑉ ᓴᖅᑭᓯᒪᕕᒋᓂᐊᖅᑕᖓᓄᑦ.

ᒫᓐᓇᒫ ᕿᑎᐊᓂ ᕿᒥᕐᕈᓂᐅᓚᐅᖅᑐᖅ ᐃᓕᑕᖅᓯᓯᒪᔪᑦ ᑕᒪᒃᑯᓂᖓ ᓴᖅᑭᑎᑕᐅᔪᓐᓇᖅᓯᒪᔪᓂᒃ, ᑭᓯᐊᓂ ᐅᖃᕆᐊᒃᑲᓐᓂᖅᓯᒪᔪᑦ ᒪᓕᒐᓕᐅᖅᑎᓕᒫᓄᑦ ᐱᒻᒪᕆᐅᓂᖓᓂᒃ ᐃᓚᖏᑦ ᑐᕌᖅᑕᐅᔪᑦ ᓴᖅᑭᑎᑕᐅᑎᓪᓗᒍ ᓄᓇᕗᑦ. ᐱᒻᒪᕆᐅᕗᖅ ᐃᖅᑲᐅᒪᒋᐊᖃᕐᓂᕗᑦ ᑕᒪᒃᑯᐊ ᓄᓇᕗᒥᐅᑦ, ᐊᖅᑯᑎᒋᓪᓗᒋᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᒻᒪᓗ ᐊᑐᖅᑕᐅᓚᐅᖅᑐᑦ ᑖᓐᓇ ᒐᕙᒪᐅᔪᖅ ᐋᖅᑭᒃᑕᐅᕙᓪᓕᐊᑎᓪᓗᒍ, ᐱᓕᕆᑐᐃᓐᓇᓚᐅᙱᒻᒪᑕ ᓴᖅᑭᑦᓯᒍᒪᑐᐃᓐᓇᕐᓂᕐᒧᑦ ᐃᓂᖃᖅᑐᒥᒃ ᓄᓇᕗᒥ.

ᐱᓕᕆᓚᐅᕋᑦᑕ ᓴᖅᑭᑦᑎᒐᓱᐊᖅᓱᑕ ᒐᕙᒪᐅᔪᒥᒃ ᐆᒪᑎᖓ ᐊᒻᒪᓗ ᑕᕐᓂᖓ ᓄᓇᕗᒦᑦᑐᒥᒃ. ᑕᒪᒃᑯᐊ ᐃᓄᐃᑦ ᐃᖅᑲᓇᐃᔭᕐᓂᖏᑦ ᐱᒻᒪᕆᕈᖅᑎᑕᐅᓪᓗᓂ. ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᒋᒻᒪᕆᓕᖅᑐᓂᒋᑦ ᒐᕙᒪᒃᑯᑦ ᐊᐅᓚᓂᖓᑕ. ᑕᒪᓐᓇ ᐃᓄᒃᑎᑐᑦ ᐅᖃᐅᓯᖅ ᐅᖃᕈᓐᓇᐅᑎᒋᓪᓗᒍ.

ᑕᒪᒃᑯᐊ ᑐᕌᖅᑕᐅᔪᑦ ᔭᒐᐃᔭᐅᒋᐊᖃᙱᑦᑐᑦ ᖃᐅᑕᒫᑦ ᐊᒃᓱᕈᕐᓇᖅᑐᓄᑦ ᐊᒻᒪᓗ ᐃᓱᒪᓕᐅᕈᑎᖏᓐᓂ ᑖᑦᓱᒪ ᒐᕙᒪᐅᔫᑉ.

ᐃᓱᒪᒋᓗᒋᑦ ᑕᒪᒃᑯᐊ ᑐᕌᖅᑕᐅᔪᑦ, ᐊᖅᑯᑕᐅᓂᐊᖅᑐᑦ ᐊᕐᕌᒎᓂᐊᖅᑐᓄᑦ ᕿᒥᕐᕈᔭᐅᓯᒪᓕᖅᑐᑦ ᐊᒻᒪᓗ ᐋᖅᑭᒋᐊᖅᑕᐅᓪᓗᑎᒃ. ᐊᓯᔾᔨᐅᑕᐅᔪᑦ ᐋᖅᑭᒃᓱᖅᑕᐅᕙᓪᓕᐊᓕᖅᑐᑦ. ᒥᓂᔅᑕᐃᑦ ᓄᑖᒥ ᒥᓂᔅᑕᐅᕝᕕᖃᓕᖅᑐᑎᒃ. ᒫᓐᓇᒫᖑᓂᐊᖅᑐᖅ ᐊᓯᔾᔨᐅᑕᐅᔪᑦ ᑐᓴᖅᑎᑦᑎᔾᔪᑕᐅᓂᐊᖅᑐᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐃᑲᔪᖅᓱᐃᓗᓂ ᑕᒪᒃᑯᓂᖓ ᓄᑖᓂᒃ ᐱᓕᕆᐊᓴᓂᒃ. ᓄᑖᒥ ᑮᓇᐅᔭᖅᑑᑎᒃᓴᓂ ᐱᑕᖃᕐᓂᐊᖅᑐᑦ ᐃᓚᒋᐊᕈᑕᐅᔪᑦ ᑮᓇᐅᔭᖅᑑᑎᒃᓴᓂᒃ ᐊᑐᖅᑕᐅᔪᒪᔪᓄᑦ ᐊᒻᒪᓗ ᐊᒃᓱᕉᑕᐅᒋᐊᖃᓗᐊᖅᑐᑦ ᐋᖅᑭᒃᓗᒋᑦ, ᐱᓕᕆᐊᒃᓴᖏᑦ ᐃᓕᖅᑯᓯᓕᕆᔨᒃᑯᑦ, ᐅᖃᐅᓯᓕᕆᔨᒃᑯᑦ, ᐃᓐᓇᑐᖃᓕᕆᔨᒃᑯᑦ, ᐅᕕᒃᑲᓕᕆᔨᒃᑯᓪᓗ.

ᑕᓐᓇ ᐱᓕᕆᕕᐅᔪᖅ ᐊᔾᔨᖏᒻᒪᑦ ᐅᖃᖅᑎᐅᑎᓪᓗᒍ ᐱᒍᒪᔭᖏᓐᓄᑦ ᓄᓇᕗᒥᐅᑦ. ᑖᓐᓇ ᐱᓕᕆᕕᐅᖕᒪᑦ ᐊᔾᔨᐅᖏᑦᑐᖅ ᑲᓇᑕᒥ, ᐊᒥᓱᓂᒃ ᐱᓕᕆᐊᒃᓴᖃᖅᓱᓂ ᐊᒻᒪᓗ ᑐᕌᒐᖏᑦ ᓴᖅᑭᑎᑦᓯᔾᔪᑕᐅᒍᒪᓪᓗᑎᒃ. ᑕᒪᒃᑯᐊ ᑐᕌᖅᑕᐅᔪᑦ ᑎᑭᑕᐅᔾᔮᖏᑦᑐᑦ ᓴᙲᓕᖅᑎᕆᓂᒃᑯᑦ, ᒥᑭᓪᓕᒋᐊᕆᓂᒃᑯᑦ, ᐲᔭᐃᓂᒃᑯᑦ ᐱᔪᓐᓇᐅᑎᖏᓐᓂᒃ ᑖᑦᓱᒪ ᐱᓕᕕᐅᔫᑉ. ᑖᓐᓇ ᐱᓕᕆᕕᐅᔪᖅ ᓴᙱᓕᖅᑎᑕᐅᖔᕆᐊᖃᕐᒪᑦ ᐊᒻᒪᓗᑐᓂᔭᐅᓗᓂ ᐱᔪᓐᓇᐅᑎᓂᒃ ᐊᒻᓗ ᐱᓕᕆᔾᔪᑎᒃᓴᓂᒃ ᐱᒋᒋᖃᖅᑕᖏᓐᓂᒃ ᐱᓕᕆᐊᒃᓴᒥᓄᑦ ᐋᖅᑭᒃᑕᐅᔾᔪᑎᒋᓯᒪᔭᖏᓐᓄᑦ ᓴᖅᑭᑦᑎᔾᔪᑕᐅᖁᔭᐅᓪᓗᑎᒃ. !

ᑕᖅᑭᐅᓂᐊᖅᑐᓂ ᑐᓴᕐᓂᐊᖅᑐᓯ ᑐᒃᓯᕋᐅᑎᓂᒃ ᐅᓄᖅᓯᒋᐊᕆᖁᔨᔪᑦ ᐱᓕᕆᐊᖏᓐᓂᒃ ᑖᑦᓱᒪ ᐱᓕᕆᕕᐅᔫᑉ ᐊᒻᒪᓗ ᐱᔪᓐᓇᐅᑎᖏᓐᓂᒃ ᒐᕙᒪᒃᑯᓐᓂ, ᖁᒡᕙᕆᐊᕐᓗᒋᑦ ᐱᖓᓲᓕᖓᔪᑦ ᑐᕌᖅᑕᐅᔪᑦ ᐃᓄᖕᓂᑦ ᐃᖅᑲᓇᐃᔭᖅᑎᖃᕈᒪᓂᖅ, ᐃᓄᐃᑦ ᐅᖃᐅᓯᖏᑦ, ᐃᓄᐃᑦ ᖃᐅᔨᒪᔭᑐᖃᖏᑦ. 6-ᒋᔭᖓᓂ ᑲᑎᒪᓂᐅᑉ ᒪᕐᕉᒃ ᐱᒻᒪᕆᐅᔫᒃ ᐱᖁᔭᒃᓵᒃ ᓴᖅᑭᑎᑕᐅᓂᐊᖅᑑᒃ ᑕᒡᕙᓂ ᒪᓕᒐᓕᐅᕐᕕᐅᑉ ᐃᓱᒪᒃᓴᖅᓯᐅᕈᑎᒋᓂᐊᖅᑕᖏᑦ.

ᑖᒃᑯᐊ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᑦ ᐋᖅᑭᒃᓱᖅᑕᐅᓯᒪᔪᑦ ᑐᕌᖓᓪᓗᑎᒃ ᐊᒻᒪᓗ ᐋᖅᑭᒃᑕᐅᓯᒪᓪᓗᑎᒃ ᐃᑲᔪᖅᑕᐅᔾᔪᑎᒋᒋᐊᖃᖅᑕᑦᑎᓐᓄᑦ ᐊᒻᒪᓗ ᐅᒃᐱᕆᔭᑦᑎᓐᓄᑦ ᓴᖅᑭᑎᑕᐅᓂᐊᖅᑐᑦ ᒪᓕᒐᓕᐅᖅᑎᓄᑦ ᐃᓱᒪᒃᓴᖅᓯᐅᕈᑕᐅᖁᓪᓗᒋᑦ. ᑖᒃᑯᐊ ᐱᖁᔭᙳᖁᔭᐅᔪᑦ ᓴᖅᑭᑎᑕᐅᓯᒪᔪᑦ ᐊᒥᓱᓄᑦ ᑐᓴᖃᑎᒌᖕᓂᐅᓚᐅᖅᑐᓄᑦ, ᐊᒃᓱᕈᖅᑐᑎᒃ ᐱᓕᕆᓯᒪᓂᑯᖏᓐᓄᑦ ᑖᒃᑯᐊ ᐱᓕᕆᐊᖃᖅᑎᑕᐅᔪᑦ ᐊᑖᒍᑦ ᑲᖏᖅᑐᒑᐱᖕᒥ ᖃᓄᖅᑑᕈᑕᐅᓚᐅᖅᑑᑉ ᐊᒻᒪᓗ ᑐᓴᖃᑎᒌᖕᓂᖃᒻᒪᕆᒃᑎᓪᓗᒍ ᑖᓐᓇ ᐱᓕᕆᕕᐅᔪᖅ.

ᐱᓕᕆᐊᖏᑎᒍᑦ ᒪᓕᒐᓕᐅᖅᑏ ᑖᓐᓇ ᐱᖁᔭᖅ ᕿᒥᕐᕈᔭᐅᓂᐊᓕᖅᑐᖅ ᐊᒻᒪᓗ ᒪᓕᒐᒃᓴᖏᑦ ᖃᐅᔨᓴᕈᑕᐅᓗᑎᒃ, ᑕᒪᒃᑯᐊ ᖁᓖᑦ ᐊᕐᕌᒎᓂᐊᖅᑐᑦ ᐃᓕᓐᓂᐊᖅᑐᓕᕆᓂᖅ ᓄᓇᕗᒥ ᐊᑐᖁᓪᓗᒍ ᐊᖅᑯᑎᒃᓴᑦᓯᐊᕙᐅᓂᖅᓴᒥᒃ.

ᑕᐃᒪᙵᓂᒃ ᑎᑭᓚᐅᖅᑎᓐᓇᒍ ᑭᖑᓪᓕᖅᐹᒥ ᐊᖏᕈᑕᐅᔪᖅ 1993-ᒥ, ᓄᓇᕗᒥᐅᑦ ᖃᐅᔨᒪᐃᓐᓇᕐᒪᑕ ᑕᒪᒃᑯᐊ ᐱᖁᔭᐃᑦ ᐆᒪᔪᓕᕆᓂᕐᒧᑦ ᐱᖁᔭᕐᓂ ᒪᓕᒃᓯᒪᙱᒻᒪᑕ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᓕᖅᑯᓯᕆᕙᒃᑕᖏᓐᓂᒃ ᐃᓄᐃᑦ ᑕᒡᕙᓂ ᐊᕕᒃᑐᖅᓯᒪᓂᐅᔪᒥ. ᑖᓐᓇ ᐱᖁᔭᖅ ᐃᓘᓐᓇᖓᓂᒃ ᑎᑎᕋᖅᑕᐅᒃᑲᓐᓂᕆᐊᖃᕐᒪᑦ ᓄᓇᕗᒦᙶᕐᓗᓂ ᐊᒻᒪᓗ ᐃᒃᐱᒋᓗᒋᑦ ᐊᒻᒪᓗ ᐃᓚᓕᐅᑎᓗᒋᑦ ᐱᖁᔭᐃᑦ ᓄᓇᑖᕐᓂᕐᒧᑦ ᐊᖏᕈᑎᓂ.

ᑖᓐᓇ ᐱᒻᒪᕆᐅᔪᖅ ᐊᒻᒪᓗ ᐊᑦᑕᕐᓇᖅᑐᓂ ᐱᖁᔭᒃᓴᖅ. ᒪᓕᒐᓕᐅᖅᑏᑦ ᑕᒡᕙᓂ ᒪᓕᒐᓕᐅᕐᕕᖕᒥ ᐃᓱᒪᒃᓴᖅᓯᐅᕈᑎᖃᕈᒪᓂᐊᖅᑐᑦ ᐅᔾᔨᕈᓱᑦᓯᐊᕐᓗᑎᒃ ᑐᒃᓯᕋᐅᑕᐅᔪᒥᒃ ᐃᓕᑦᓯᓐᓅᖅᑕᐅᓂᐊᖅᑐᑦ ᒥᓂᔅᑕᖓᓐᓄᑦ ᐃᑯᐱᒡᕕᓕᕆᔨᒃᑯᑦ. ᓱᓖᓛᒃ, ᑖᒃᑯᐊ ᐃᓗᐊᓃᑦᑐᑦ ᑲᖏᖅᑐᒑᐱᖕᒥ ᖃᓄᖅᑑᕈᑕᐅᓚᐅᖅᑐᓂ. ᓄᓇᕗᑦ ᑐᙵᕕᒃᑯᑦ, ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᑖᓐᓇ ᒐᕙᒪᐅᔪᖅ ᐱᓕᕆᖃᑎᒌᒃᑐᑦ ᐋᖅᑭᒃᓱᐃᕙᓪᓕᐊᓪᓗᑎᒃ ᓈᒻᒪᒃᑐᓂᒃ ᑖᒃᑯᓂᖓ ᐱᖁᔭᒃᓴᓂᒃ ᐱᐊᓂᒃᓵᓕᔾᔫᒥᓗᒋᑦ.

ᐃᓚᖏᑦ ᐅᖃᖃᑦᑕᖅᓯᒪᔪᑦ ᑕᐃᒪᓐᓇ ᐱᖁᔭᓂᒃ ᐊᕐᕌᒍᕋᓴᖕᓂᑦ ᐋᖅᑭᒃᓱᐃᔪᖃᖅᐸᒃᑐᖅ; ᐃᓚᖏᑦ ᐅᖃᖅᓯᒪᔪᑦ ᑕᓯᐅᖅᑕᐅᒻᒪᕆᒋᐊᖃᕐᓂᐊᕐᓂᖏᓐᓂᒃ ᓄᓇᕗᒥᐅᑦ ᖃᐅᔨᒪᖁᓪᓗᒋᑦ ᐊᒻᒪᓗ ᐅᖃᕈᓐᓇᖁᓪᓗᒋᑦ ᐱᒍᒪᔭᒥᓂᒃ ᑕᒡᕙᓂ ᐱᖁᔭᒃᓴᒥ. ᑖᓐᓇ ᒐᕙᒪᐅᔪᖅ ᓈᒪᔪᒥᒃ ᑐᓴᖃᑎᒌᖕᓂᖃᕐᓂᐊᖅᑐᖅ ᐱᔾᔪᑎᒋᓗᒋᑦ ᑖᒃᑯᐊ ᐃᓗᓕᖏᑦ ᐱᖁᔭᒃᓴᐅᑉ, ᑭᓯᐊᓂ ᖃᐅᔨᒪᓂᖏᑦ, ᓯᓚᑐᓂᖏᑦ ᓄᓇᕗᒥ ᐊᖑᓇᓱᒃᑏᑦ ᑐᑭᒧᐊᒍᑕᐅᓂᐊᖅᑐᑦ ᐱᔪᓐᓇᓕᕈᑎᒃᓴᖏᓐᓂᒃ ᒥᓂᔅᑕᐅᑉ ᐋᖅᑭᒃᓱᐃᓗᓂ ᐊᒻᒪᓗ ᓴᖅᑭᑦᑎᓗᓂ ᐱᖁᔭᒃᓴᓂᒃ ᑕᒫᓂ ᑲᑎᒪᓂᖏᓐᓂᒃ ᒪᓕᒐᓕᐅᕐᕕᒃ.

ᑕᖅᑭᐅᓂᐊᖅᑐᓂᒃ ᑖᓐᓇ ᒐᕙᒪᐅᔪᖅ ᓴᖅᑭᑦᓯᓂᐊᖅᑐᖅ ᒪᓕᒐᓕᐅᕐᕕᖕᒧᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐃᓱᒪᒃᓴᖅᓯᐅᕈᑕᐅᓂᐊᖅᑐᓂᒃ ᖃᑦᓯᑲᓪᓚᖕᓂᑦ ᕿᒥᕐᕈᔾᔪᑎᕕᓃᑦ, ᐅᓂᒃᑳᓕᐊᕆᓯᒪᔪᓄᑦ ᐊᒻᒪᓗ ᖃᐅᔨᓴᕈᑎᕕᓂᕐᓄᑦ ᓴᖅᑭᑎᑦᓯᔾᔪᑕᐅᓯᒪᔪᑦ ᐅᖃᐅᓯᒃᓴᑲᓪᓚᖕᓂᑦ ᓯᕗᓂᒃᓴᒧᑦ ᑐᑭᒧᐊᒍᑎᒃᓴᖏᓐᓂᒃ ᒐᕙᒪᑦᑕ.

ᑲ ᒪᓕᒐᓕᐅᖅᑏᑦ ᖃᐅᔨᒪᖕᒪᑕ ᑖᒃᑯᐊ ᐊᐅᓚᑦᑎᔩᑦ ᑲᑎᒪᔨᖏᑦ (ᒥᓂᔅᑕᐃᑦ) ᑲᑎᓚᐅᖅᑐᑦ ᓇᐅᔮᓂ ᓯᑦᑏᕝᕙᐅᓚᐅᖅᑐᒥ ᐅᖃᐅᓯᖃᖅᑐᑎᒃ ᑮᓇᐅᔭᓕᐅᕈᑎᖃᕐᓂᕐᒧᑦ ᐱᕙᓪᓕᐊᔾᔪᑎᒃᓴᓂᒃ ᐊᒻᒪᓗ ᐱᓗᐊᖅᑐᒥᒃ ᓄᓇᓕᖕᓂ ᐱᒋᐊᖅᑐᓂᒃ ᑮᓇᐅᔭᓕᐅᕈᑎᒃᓴᓂᒃ.

ᐱᓇᓱᐊᕈᓯᐅᓂᐊᖅᑐᓂ ᐊᒥᓲᙱᑦᑐᓂ, ᒪᓕᒐᓕᐅᖅᑏᑦ, ᑭᒃᑯᑐᐃᓐᓇᐃᓪᓗ ᐊᐱᕆᔭᐅᓂᐊᖅᑐᑦ ᐃᓱᒪᒃᓴᖅᓯᐅᕈᑎᖃᖁᔭᐅᓪᓗᑎᒃ ᓇᐅᔮᓂ ᐊᒃᓱᕉᑎᒃᓴᓕᐊᖅ - ᑐᒃᒥᕋᐅᑎᓕᒃ, ᑎᑎᕋᖅᓯᒪᔪᓪᓗ ᑮᓇᐅᔭᓕᐅᕈᑕᐅᕙᓪᓕᐊᔪᒪᔪᑦ ᐸᕐᓇᐅᑏᑦ ᓄᓇᕗᒥ.

ᑖᒃᑯᐊ ᐱᒋᐊᖅᑎᑕᐅᓯᒪᔪᑦ ᐱᑕᖃᖅᑎᑦᓯᓂᐊᖅᑐᑦ ᓄᓇᕗᒥᐅᓄᑦ ᓇᓕᒨᒌᓕᖅᑎᓪᓗᒋᑦ ᐃᓕᖅᑯᓯᑐᖃᒃᑯᑦ ᑮᓇᐅᔭᓕᐅᕈᑕᐅᔪᑦ ᐊᒻᒪᓗ ᐃᓅᓯᐅᔪᑦ, ᑮᓇᐅᔭᓕᐅᕈᑎᒃᓴᐃᑦ ᐱᕙᓪᓕᐊᑎᑕᐅᓗᑎᒃ ᓂᕆᐅᒋᔭᖏᑦ ᖃᑕᙳᑎᑦᑕ - ᐱᓗᐊᖅᑐᒥᒃ ᐊᒃᑐᐃᓂᐊᕐᒪᑦ ᓯᕗᓂᒃᓴᖏᓐᓂᒃ ᕿᑐᙵᑦᑕ

ᑖᓐᓇ ᒐᕙᒪᐅᔪᖅ ᖃᐅᔨᓴᕆᐊᕈᑎᖃᓕᖅᑐᖅ ᓯᕗᓂᒃᓴᒥ ᐅᖅᓱᐊᓗᒃᓴᑦᑎᓐᓂᒃ ᐊᒻᒪᓗ ᐆᒻᒪᖅᑯᑎᒋᒋᐊᖃᖅᑕᑦᑎᓐᓂᒃ ᐊᒻᒪᓗ ᐊᓯᐊᒎᕈᑕᐅᔪᓐᓇᖅᑐᓂᒃ ᐆᒻᒪᖅᑯᑎᖃᕈᑎᒋᓗᒋᑦ ᐊᒻᒪᓗ ᐃᓕᖅᑯᓯᐅᓂᐊᖅᑐᑦ ᐋᖅᑭᒋᐊᕐᓗᒋᑦ ᐊᐅᓚᑦᓯᓂᕐᒧᑦ ᐊᒻᒪᓗ ᑐᓂᐅᖅᑲᐃᓂᕐᒧᑦ ᐅᖅᓱᐊᓗᖕᓂᑦ ᐊᒻᒪᓗ ᐆᒻᒪᖁᑎᓂᒃ ᓄᓇᓕᖁᑎᑦᑎᓐᓄᑦ. ᑖᒃᑯᐊ ᐃᑯᒪ ᓗᓗ ᐅᓂᒃᑳᖏᑦ ᓴᖅᑭᑎᑕᐅᓂᐊᖅᑐᑦ ᐃᓱᒪᒃᓴᖅᓯᐅᕈᑕᐅᓂᐊᕐᓗᑎᒃ ᒥᓂᔅᑕᒧᑦ ᐱᓕᕆᐊᖃᖅᑐᒧᑦ ᓄᓇᕗᒥ ᐃᑯᒪᓕᕆᓂᕐᒧᑦ ᑯᐊᐳᕇᓴᒃᑯᓐᓂᒃ.

ᑖᓐᓇ ᐅᓂᒃᑳᓕᐊᕆᓯᒪᔪᖅ ᑲᔪᓯᔾᔪᑎᖃᖅᑐᖅ ᒐᕙᒪᑦᑕ ᓇᓗᓇᐃᔭᐃᒐᓱᐊᖅᑎᓪᓗᒋᑦ, ᐱᔭᕆᐊᑐᒍᓐᓃᖅᑎᓪᓗᒋᑦ ᐊᒻᒪᓗ ᓴᖅᑭᓪᓗᒍ ᑭᒃᑯᑐᐃᓐᓇᕐᓄᑦ ᐅᖃᓕᒪᐅᑕᐅᓂᐊᕐᒪᑦ ᐱᒻᒪᕆᐅᔪᑦ ᐋᖅᑭᒃᓯᒪᔾᔪᑏᑦ. ᑕᐃᒪᓐᓇ ᒪᓕᒐᓕᐅᖅᑏᑦ ᑕᒪᒃᑯᐊ ᐱᖁᑏᑦ ᐊᒡᔭᖅᑕᐅᑦᓯᐊᕈᓐᓇᕐᓂᐊᖅᑐᑦ, ᐊᑭᑭᓪᓕᒋᐊᖅᓯᒪᔾᔪᑏᑦ ᐊᖏᕈᑕᐅᓗᑎᒃ ᑐᕌᖓᓗᒋᑦ ᐃᓄᖕᓄᑦ ᑐᕌᕐᕕᐅᒐᓱᐊᖅᑐᓄᑦ ᐊᒻᒪᓗ ᑕᒪᒃᑯᐊᓗ ᑮᓇᐅᔭᓕᐅᕈᑕᐅᒐᓱᐊᖅᑐᑦ ᐃᓱᒪᓕᐅᕈᑕᐅᔪᑦ ᐃᑲᔪᖅᓱᐃᓗᑎᒃ ᓄᓇᕗᒥᐅᓂᒃ ᐊᒻᒪᓗ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑦᓯᔪᒪᓂᖅᐳᑦ.

ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᑦ ᐊᖏᕈᑕᐅᓚᐅᖅᑐᑦ ᓯᕗᓪᓕᖅᐹᒥ ᓇᓪᓕᐅᑎᑎᓪᓗᒋᑦ ᐊᒻᒪᓗ ᕿᒥᕐᕈᔭᐅᓪᓗᓂ ᑖᓐᓇ ᐱᖁᔭᖅ ᐊᒻᒪᓗ ᐊᒃᑐᐃᓂᖓ ᐱᐊᓂᒃᑕᐅᓯᒪᓕᖅᑐᖅ ᒐᕙᒪᒃᑯᑦ ᓴᓇᔪᓕᕆᔨᖏᓐᓄᑦ ᐃᓚᐅᓪᓗᑎᒃ ᓄᓇᕗᑦ ᑐᙵᕕᒃᑯᑦ. ᒪᓕᒐᓕᐅᖅᑏᑦ ᓂᕆᐅᒋᐊᖃᖅᑐᑦ ᑎᑎᕋᖅᓯᒪᔪᑦ ᓴᖅᑭᑎᑕᐅᓂᐊᕐᓂᖏᓐᓂᒃ ᒥᓂᔅᑕᒧᑦ ᐅᓪᓗᓂᒃ ᖃᐃᔪᓂᒃ ᑭᖑᓪᓕᕐᒥ ᑲᑎᒪᓕᖅᐸᑦ ᑖᓐᓇ ᒪᓕᒐᓕᐅᕐᕕᒃ.

ᓄᓇᕗᒥ ᑭᒡᓕᓯᓂᐊᖅᑏᑦ ᓴᖅᑭᑎᑦᓯᓂᐊᓕᖅᑐᑦ ᓯᕗᓪᓕᖅᐹᒥ ᐊᖏᕐᕋᕆᔭᐅᔪᑦ ᖃᐅᔨᓴᖅᑕᐅᓚᐅᕐᓂᖏᓐᓄᑦ, ᒪᓕᒃᑐᒋᑦ ᑐᑭᓯᒋᐊᕈᑎᒃᓴᑦ ᑲᑎᖅᓱᖅᑕᐅᔪᑦ ᐊᕐᕌᓂ. ᑕᒪᓐᓇ ᐊᑑᑎᖃᖅᑐᒥᒃ ᑐᑭᓯᒋᐊᕈᑎᒃᓴᖃᕐᓂᐊᖅᑐᖅ ᐃᓅᓯᕆᔭᐅᔪᓕᒫᓂᒃ ᓄᓇᕗᒥ, ᑭᓯᐊᓂ ᐱᓗᐊᖅᑐᒥᒃ ᐅᖃᐅᓰᑦ ᐊᑐᖅᑕᐅᔪᑦ, ᐊᖏᕐᕋᕐᒥᐅᖃᑎᒌᑦ ᖃᓄᐃᓕᖓᓂᖏᑦ ᐊᒻᒪᓗ ᐃᖅᑲᓇᐃᔭᕐᓂᕆᔭᖏᑦ.

ᑕᒪᑐᒪ ᖄᖓᒍᑦ, ᕿᒥᕐᕈᔨᐅᔪᑦ ᑖᒃᑯᓇᓂ ᑭᒡᓕᓯᓂᐊᖅᑎᓂ ᐱᐊᓂᒃᓯᒪᓕᖅᑐᑦ ᖃᐅᔨᓴᒻᒪᕆᖕᓂᕆᓚᐅᖅᑕᒥᓂᒃ ᒐᕙᒪᑦᑕ ᐊᐅᓚᓂᖃᑦᓯᐊᕐᕕᒋᔭᖏᓐᓂᒃ ᐊᒻᒪᓗ ᐊᒃᓱᕉᑎᒋᒋᐊᖃᖅᑕᖏᓐᓂᒃ ᓅᑎᕆᓂᕐᒧᑦ ᐃᖅᑲᓇᐃᔭᕐᕕᒃᓴᓂᒃ ᓄᓇᕗᒥ ᓄᓇᓕᐅᔪᓄᑦ.

ᒪᓕᒐᓕᐅᖅᑏᑦ ᑐᓂᔭᐅᓂᐊᖅᑐᑦ ᐊᔾᔨᖏᓐᓂᒃ ᑖᒃᑯᐊ ᐅᓂᒃᑳᓕᐊᕆᓯᒪᔪᑦ ᐊᒻᒪᓗ ᓂᕆᐅᒍᓐᓇᖅᑐᑦ ᑖᓐᓇ ᒥᓂᔅᑕ ᐱᓕᕆᐊᖃᖅᑐᖅ ᓯᐊᒻᒪᒃᑎᕆᔨᓂᒃ ᓴᖅᑭᑦᓯᓂᐊᕐᒪᑦ ᑖᒃᑯᓂᖓ ᑎᑎᕋᖅᓯᒪᔪᓂᒃ ᐊᒻᒪᓗ ᑐᓴᖅᑭᑎᑦᑎᓗᓂ ᐸᕐᓇᒍᑕᐅᓯᒪᔪᓂᒃ, ᐅᖃᐅᓯᖃᕐᓂᐊᕐᓗᑎᒃ ᐊᑐᓕᖁᔭᐅᔪᓂᒃ.

ᐊᐅᓚᑦᑎᔩᑦ ᑲᑎᒪᔨᖏᑦ ᕿᒥᕐᕈᓯᒪᔪᑦ ᐊᑕᐅᓯᕐᒥᒃ ᐊᑐᐊᒐᖅᑕᖃᕆᐊᖃᕐᓂᖓᓂᒃ ᑐᕌᖓᔪᒥᒃ ᓄᓇᕗᒥ ᐃᒡᓗᓕᕆᓂᕐᒧᑦ. ᑎᓰᕝᕙᐅᓚᐅᖅᑐᒥ, ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᐃᓚᓕᐅᔾᔭᐅᓚᖅᑐᖅ ᐱᓕᕆᐊᖏᓐᓄᑦ ᒫᓐᓇ ᒥᓂᔅᑕᖓᑦᑕ ᑮᓇᐅᔭᓕᕆᔩᑦ. ᑖᓐᓇ ᒥᓂᔅᑕ ᑐᓴᖅᑎᑦᑎᓂᐊᖅᑐᖅ ᐅᓂᒃᑳᖅᓯᒪᔪᓂᒃ ᒐᕙᒪᒃᑯᑦ ᐸᕐᓇᐅᑎᖏᓐᓂᒃ ᐃᖅᑲᓇᐃᔭᖅᑏᑦ ᐃᒡᓗᖃᖅᑎᑕᐅᓂᖏᑦ, ᑭᒃᑯᑐᐃᓐᓇᐃᓪᓗ ᐊᑕᐅᓯᕐᒦᖁᓪᓗᒋᑦ.

ᐱᒋᐊᕐᓗᒍ ᒫᓐᓇᑲᐅᑎᒋ, ᐊᑐᐊᒐᐃᑦ ᑐᕌᖓᔪᑦ ᐃᖅᑲᓇᐃᔭᖅᑏᑦ ᐃᒡᓗᓕᕆᔭᐅᓂᖏᓐᓄᑦ ᖃᓄᐃᓕᖓᔾᔪᑏᑦ ᓄᒃᑎᖅᑕᐅᓂᐊᖅᑐᑦ ᑖᒃᑯᓇᙵᑦ ᒐᕙᒪᒃᑯᑦ ᓴᓇᔪᓕᕆᔨᖏᓐᓂᒃ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᖓᓐᓄᑦ. ᑕᒪᓐᓇ ᐊᒃᑐᐃᑲᐅᑎᒋᔾᔮᖏᑦᑐᖅ ᓄᓇᓖᑦ ᐃᒡᓗᓕᕆᔨᖏᓐᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᖅᑏᑦ ᐃᒡᓗᖃᕐᓂᖏᓐᓄᑦ ᐊᑐᐊᒐᕐᓂᒃ, ᑭᓯᐊᓂ ᑕᖅᑭᐅᓂᐊᖅᑐᓂᒃ ᒪᓕᒐᓕᐅᖅᑏᑦ ᐊᐱᕆᔭᐅᓂᐊᖅᑐᑦ ᐃᓱᒪᒃᓴᖅᓯᐅᕈᑎᖃᖁᔭᐅᓗᑎᒃ ᑮᓇᐅᔭᖅᑑᑎᒃᓴᓂᒃ ᐊᒻᒪᓗ ᐅᖃᐅᔾᔭᐅᓗᑎᒃ ᐱᓕᕆᐊᒃᓴᐅᔪᓂᒃ ᑕᑯᒃᓴᐅᑎᑦᑎᓂᐊᖅᑐᓂᒃ ᑖᑦᓱᒥ ᓄᑖᒥ ᑲᑎᑕᐅᓯᒪᔪᒥᒃ ᐱᓕᕆᐊᓂᒃ, ᓴᖅᑭᑎᑦᓯᔾᔪᑕᐅᓗᓂ ᓄᑖᓂᒃ ᐃᑲᔫᑎᒃᓴᓂᒃ ᐊᒻᒪᓗ ᐊᐅᓚᓂᖃᑦᓯᐊᕐᓂᒃᓴᓂᒃ ᐊᑐᐊᒐᕐᓂᒃ ᐊᒻᒪᓗ ᑐᓂᐅᖅᑲᐃᓂᕐᒥᑦ ᐃᒡᓗᒋᔭᐅᒋᐊᖃᖅᑐᓂᒃ ᓄᓇᕗᓕᒫᒥ.

ᐱᓕᕆᐊᕆᔭᐅᕙᓪᓕᐊᓕᖅᑐᖅ ᐱᑕᖃᖅᑎᑦᓯᔪᒪᓪᓗᑕ ᐊᓯᐊᒎᕈᑕᐅᔪᓐᓇᖅᑐᓂᒃ ᐃᒡᓗᖃᖅᑎᑦᓯᓂᕐᒧᑦ ᓄᓇᕗᑦ ᒐᕙᒪᖏᑦᑕ ᐃᖅᑲᓇᐃᔭᖅᑎᖏᓐᓄᑦ. ᐃᑲᔫᑏᑦ ᐃᖃᓗᖕᓂ ᐊᒻᒪ ᐃᒻᒪᖄ ᓯᑕᒪᓂ ᓯᐊᒻᒪᒃᑎᕐᕕᐅᓯᒪᔪᓂ ᐋᖅᑭᒃᓱᖅᑕᐅᕙᓪᓕᐊᔪᑦ ᐊᑭᑐᓗᐊᙱᑦᑐᓂᒃ ᐊᖏᕐᕋᒥᒃ ᓇᖕᒥᓂᖅᑖᕈᓐᓇᕈᑎᒃᓴᑦ ᓴᓇᔭᐅᓂᐊᖅᑐᑦ ᐊᒻᒪᓗ ᓂᐅᕐᕈᑎᒋᓗᒋᑦ ᐃᖅᑲᓇᐃᔭᖅᑎᓄᑦ ᐊᑭᖓ ᐋᖅᑭᒃᓯᒪᓗᒍ. ᑕᒪᓐᓇ ᐱᔪᓐᓇᖅᑎᑦᓯᒐᔭᖅᑐᖅ ᐱᕈᖅᐸᓪᓕᐊᓗᑎᒃ ᓇᖕᒥᓂᖅ ᐃᒡᓗᖃᖅᑐᑦ, ᑕᒪᒃᑯᐊ ᓂᐅᕈᑕᐅᔪᑦ ᑮᓇᐅᔭᐃᑦ ᐊᑐᖅᑕᐅᒃᑲᓐᓂᕈᓐᓇᖅᓯᒐᔭᕐᒪᑕ ᐃᒡᓗᖃᖅᑎᑦᓯᓂᕐᒧᑦ ᐊᓯᐊᒎᕈᑕᐅᓗᑎᒃ ᓄᓇᕗᒥ.

ᒪᓕᒃᒍ ᐊᑐᖅᑕᐅᔪᖅ ᒪᓕᒍᓕᐅᖅᑏᑦ ᑐᓴᕐᓂᐊᖅᑐᑦ, ᑕᖅᑭᓂ ᖃᐃᔪᓂ, ᐸᕐᓇᒍᑎᒋᔭᐅᔪᓂᒃ ᑕᒪᒃᑯᐊ ᓄᓇᓖᑦ ᐃᒡᓗᖁᑎᖏᑦ ᓄᒃᑎᖅᑕᐅᓗᑎᒃ ᓇᖕᒥᓂᖅᑖᖅᐸᓪᓕᐊᓂᕐᒧᑦ, ᐊᖏᕐᕋᒦᖏᓐᓇᕋᓗᐊᕐᓗᑎᒃ. ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᑲᔪᓯᓯᒪᓂᐊᖅᑐᖅ ᐅᓄᖅᓯᒋᐊᕆᓗᑎᒃ ᐃᒡᓗᖁᑎᒥᓂᒃ ᐃᓐᓇᖏᖅᑕᐅᔾᔪᑎᒋᓂᐊᖅᑕᖏᓐᓂᒃ ᑕᒪᒃᑯᐊ ᐃᒡᓗᐃᑦ ᓂᐅᕕᐊᖑᔪᑦ.

ᑕᒪᑐᒪ ᖄᖓᒍᑦ ᓄᓇᕗᒥᐅᑦ ᓂᕈᐊᖅᑐᑦ ᓄᓇᓖᑦ ᐃᒡᓗᖁᑎᖏᓐᓃᑦᑐᒪᓗᑎᒃ, ᓄᑖᑦ ᐊᑐᖅᑐᐊᓂᕐᒧᑦ ᐊᑭᓕᐅᑎᒃᓴᑦ ᑐᓴᖅᑎᑦᑎᔾᔪᑕᐅᓂᐊᖅᑐᑦ ᓈᒻᒪᖕᓂᖅᓴᐅᓗᑎᒃ, ᐊᔾᔨᒌᒃᑎᑦᑎᓂᖅᓴᐅᓗᑎᒃ ᐊᒻᒪᓗ ᐊᑭᑐᓗᐊᙱᓐᓂᖅᓴᐅᓗᑎᒃ. ᑮᓇᔭᓕᕆᓂᖅ ᐱᔾᔪᑎᒋᓪᓗᒍ, ᒐᕙᒪᕗᑦ ᐋᖅᑭᒋᐊᕆᓯᒪᔪᑦ ᑮᓇᐅᔭᖅᑑᑎᒃᓴᓂᒃ ᑕᒪᒃᑯᐊ ᐊᑭᑐᔫᑏᑦ ᓇᓚᐅᑦᓵᖅᑕᐅᓯᒪᔪᑦ ᐱᐊᓂᒃᑕᐅᓯᒪᓕᖅᑐᑦ ᓄᕕᒻᐱᕆᒥ, ᐸᕐᓇᒍᑕᐅᑦᓯᐊᕈᓐᓇᕐᓂᖅᓴᐅᓪᓗᑎᒃ ᐊᒻᒪᓗ ᓂᐅᕕᕈᑕᐅᑦᓯᐊᕈᓐᓇᕐᓂᖅᓴᐅᓪᓗᑎᒃ ᐊᒻᒪᓗ ᑮᓇᐅᔭᖅᑑᓗᐊᙱᓐᓂᖅᓴᐅᔾᔪᑕᐅᓪᓗᑎᒃ ᓴᓇᔭᐅᓂᖏᓐᓄᑦ ᐊᒻᒪᓗ ᐅᒥᐊᕐᔪᐊᒃᑰᕐᓂᖏᓐᓄᑦ ᐊᑭᐅᔪᓄᑦ.

ᑮᓇᐅᔭᖃᖅᑎᑦᑎᔪᓐᓇᕐᓂᖏᑦ ᒐᕙᒪᑦᑕ ᐃᓗᐃᑦᑐᕈᖅᐸᓪᓕᐊᔪᑦ. ᑭᐅᔾᔪᑎᒋᓪᓗᒋᑦ ᐊᑐᓕᖁᔭᓕᐊᖑᓚᐅᖅᑐᓄᑦ ᑲᓇᑕᒥ ᑮᓇᐅᔭᓂᒃ ᓈᓴᐃᔨᕐᔪᐊᓄᑦ, ᒪᓕᒐᓕᐅᖅᑏᑦ ᑕᑯᓂᐊᖅᑐᑦ ᐅᓂᒃᑳᖅᓯᒪᓂᖅᓴᓂᒃ ᑮᓇᐅᔭᖅᑑᑎᒃᓴᓂᒃ ᐊᒻᒪᓗ ᑮᓇᐅᔭᓕᕆᓂᕐᒧᑦ ᐅᓂᒃᑳᖅᓯᒪᖃᑦᑕᕆᐊᓖᑦ, ᖁᒡᕙᕆᐊᕐᓗᒍ ᑮᓇᐅᔭᖃᕈᓐᓇᕐᓂᖏᑦ ᐊᒻᒪᓗ ᐃᓕᓐᓂᐊᖅᑎᑦᓯᓂᖅ ᐊᒻᒪᓗ ᐅᔾᔨᖅᑐᑦᓯᐊᕐᓗᑎᒃ ᕿᒥᕐᕈᓗᑎᒃ ᐊᑑᑎᖃᕐᓂᖓᓂ ᖃᐅᔨᓴᕈᑎᖃᕐᓂᖅ ᐊᑐᑐᐊᖅᑕᐅᔪᓂᒃ ᓂᐅᕕᐊᕆᓂᐊᕐᓗᒍ ᐊᒻᒪᓗ ᓂᐅᕕᕈᓐᓇᕐᓂᕐᒧᑦ ᐊᓯᐊᒎᕈᑕᐅᔪᓐᓇᖅᑐᑦ.

ᑕᒪᓐᓇ ᐃᑲᔫᑕᐅᔪᓂᒃ ᕿᒥᕐᕈᓂᖅ ᐱᒋᐊᖅᑎᑕᐅᓚᐅᖅᑐᖅ ᐊᕐᕌᓂ ᓴᖅᑭᑎᑦᓯᓯᒪᔪᖅ ᑲᑎᖅᓱᖅᑕᐅᓯᒪᔪᓂᒃ ᑐᑭᓯᒋᐊᕈᑎᒃᓴᓂᒃ ᓈᓴᖅᑕᐅᓯᒪᓂᖏᓐᓄᑦ ᐃᑲᔫᑕᐅᔪᓐᓇᖅᑐᑦ ᐊᒻᒪᓗ ᑮᓇᐅᔭᐃᔭᕈᑕᐅᔪᑦ, ᖃᐅᔨᒐᓱᐊᖅᑐᒋᑦ ᐊᔾᔨᒌᙱᓐᓂᖏᑦ ᓴᓂᐊᓂ ᒫᓐᓇ ᑮᓇᐅᔭᖅᑑᑎᒃᓴᑦ. ᐸᕐᓇᒍᑕᐅᓯᒪᓕᖅᑐᖅ ᑐᓴᖃᑎᒌᖕᓂᖅᓴᐅᓂᖅᑕᖃᖁᓪᓗᒍ.

ᑐᑭᓯᒋᐊᕈᑎᒃᓴᑦ ᑲᑎᖅᓱᖅᑕᐅᔪᑦ ᕿᒥᕐᕈᔭᐅᓂᐊᖅᑐᑦ ᐊᒻᒪᓗ ᓴᖅᑭᑎᑕᐅᔪᑦ ᑐᓂᓗᒋᑦ ᐅᖃᐅᓯᐅᓂᐊᕐᒪᑕ ᒥᓂᔅᑕᓄᑦ, ᒪᓕᒐᓕᐅᖅᑎᓄᑦ ᐊᒻᒪᓗ ᓄᓇᕗᒥᐅᓄᑦ ᐊᒥᓱᓂ ᓄᓇᓕᖁᑎᑦᑎᓂ. ᑕᒪᓐᓇ ᑐᕌᖅᑕᐅᔪᑦ ᑲᔪᓯᑎᑕᐅᔪᒪᔪᖅ ᑕᒪᒃᑯᐊ ᑎᒍᔭᐅᓚᐅᖅᑐᑦ ᐃᒡᓗᐃᑦ ᒪᑭᒪᔪᑦ ᐊᒻᒪᓗ ᐃᑲᔫᑏᑦ ᐋᖅᑭᑦᓯᐊᖁᓪᓗᒋᑦ ᐱᐅᓂᖅᐹᒥᒃ ᒪᓕᖁᓪᓗᒋᑦ ᐃᑲᔪᖅᑕᐅᔾᔪᑕᐅᒋᐊᖃᖅᑐᓂᒃ ᐊᒻᒪᓗ ᑐᕌᖅᑕᖏᓐᓂᒃ ᓄᓇᕗᒥᐅᑦ.

ᐊᐅᓚᔾᔪᑏᑦ ᓇᓚᐅᑦᓵᖅᑕᐅᓯᒪᔪᑦ ᑐᓂᔭᐅᓂᐊᖅᑐᑦ ᒥᓂᔅᑕᖓᓐᓄᑦ ᑮᓇᐅᔭᓕᕆᔩᑦ ᒫᓐᓇ ᑲᑎᒪᓂᐅᔪᒥᒃ.

ᐱᓇᓱᐊᕈᓯᐅᓂᐊᖅᑐᓂ, ᓄᖅᑲᖓᑲᐃᓐᓇᖅᑎᓪᓗᒍ ᒪᓕᒐᓕᐅᕐᕕᒃ, ᓄᓇᓕᐸᐅᔮ ᐃᖃᓗᐃᑦ ᑐᙵᓱᒃᑎᑦᑎᓂᐊᕐᒪᑕ ᐅᑭᐅᖅᑕᖅᑐᒥ ᐱᙳᐊᕐᕕᒡᔪᐊᕐᓂᒥᑦ, ᐃᑲᔪᖅᑎᒌᒍᑕᐅᔪᒧᑦ ᓴᓂᓪᓕᕗᓪᓗ ᓅᒃ, ᐊᑯᑭᑦᑐᓂ ᐱᖃᑎᒋᓗᒋᑦ. ᐊᒥᓱᓄᑦ ᓄᓇᕗᒥᐅᓄᑦ ᐱᙳᐊᖅᑎᓄᑦ, ᑐᙵᓱᒃᑎᑦᑎᔨᓄᑦ, ᐋᖅᑭᓱᐃᔨᓄᑦ, ᐊᖓᔪᖅᑲᐅᑎᓄᑦ, ᐱᙳᐊᖅᑐᑦ ᑕᑯᕋᓐᓈᖅᑎᑦᑎᔪᑦ ᐊᒻᒪᓗ ᐃᑲᔪᑐᐃᓐᓇᖅᑐᑦ, ᓇᓗᙱᓚᖓ ᑖᒃᑯᐊ ᒪᓕᒐᓕᐅᖅᑏᑦ ᐃᓚᓕᐅᑎᓂᐊᖅᑐᑦ ᐅᕙᓐᓄᑦ ᐊᐅᓚᓂᖃᑦᓯᐊᖁᔨᑎᓪᓗᖓ ᖃᓄᐃᓕᐅᕈᑕᐅᓂᐊᖅᑐᓂᒃ ᐊᒻᒪᓗ ᐱᖃᓐᓇᕇᒡᓗᑎᒃ ᐊᒻᒪᓗ ᐊᑑᑎᖃᖅᑐᒥᒃ ᑕᐅᖅᓰᖃᑦᑕᕐᓗᑎᒃ ᐱᔾᔪᑎᒋᓪᓗᒋᑦ ᑕᒪᒃᑯᐊ ᐱᙳᐊᕈᓯᐅᔪᑦ.

ᑕᒪᓐᓇ ᖄᖏᕋᑖᖅᑎᓪᓗᒍ ᓄᓇᕗᑦ ᑐᙵᓱᒃᑎᑦᑎᓂᐊᖅᑐᖅ ᑲᓇᒥ ᒥᓂᔅᑕᐅᔪᓂᒃ ᐱᙳᐊᖅᑐᓕᕆᓂᕐᒧᑦ ᐊᒻᒪᓗ ᕉᒪᓇᐅ ᑲᑎᒪᔨᖏᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐋᖅᑭᒋᐊᕈᑕᐅᒐᓱᐊᖅᑐᓄᑦ. ᕿᑎᐊᓂ ᔫᓂᐅᑉ ᑖᒃᑯᐊ ᑲᓇᑕᒥ ᒥᓂᔅᐃᑦ ᓄᓇᖃᖅᑳᖅᓯᒪᔪᓄᑦ ᑲᑎᓐᓂᐊᖅᑐᑦ ᐃᖃᓗᖕᓂ.

ᐊᒃᑑᕝᕙᒥ, ᑯᐃᖕ ᐊᒻᒪᓗ ᐅᐃᖓ ᐳᓛᕆᐊᕐᓂᐊᖅᑐᑦ ᓄᓇᕗᒧᑦ.

ᐊᑐᓂ ᑕᒪᒃᑯᐊ ᖃᓄᐃᓕᐅᕈᑕᐅᓂᐊᖅᑐᑦ ᑕᑯᒃᓴᐅᑎᑦᑎᔪᑦ ᐱᕈᖅᐸᓪᓕᐊᓂᖓᓂᒃ ᓄᓇᕗᑦ ᐃᓚᒋᓪᓗᓂᐅᒃ ᑲᓇᑕᐅᑉ ᐊᒻᒪᓗ ᑕᒪᒃᑯᐊ ᓄᓇᕐᔪᐊᒥᐅᑕᓄᑦ.

ᐅᓪᓗᒥᒧᑦ ᐋᖅᑭᒋᐊᖅᑐᒋᑦ ᐅᖃᐅᓯᖏᑦ ᐃᓇᖏᓚᐅᖅᑕᒪ ᕼᐃᓕᓐ ᒪᒃᓴᒐᖅ ᒪᑐᐃᖅᓯᓪᓗᓂ ᓯᕗᓪᓕᖅᐹᒥ ᑖᑦᓱᒥᖓ ᒪᓕᒐᓕᐅᕐᕕᐅᒥᑦ ᐊᐃᐳᕈ 1, 1999-ᒥ ᑕᑯᓇᒃᑐᒍ ᖃᓄᐃᓕᖓᓂᕗᑦ ᒫᓐᓇᐅᔪᖅ ᐃᓚᐃᓕᒐᔭᖅᐳᖓ ᐃᓱᓕᔾᔪᑎᒋᓗᒍ: ᐱᓕᕆᐊᒃᓴᖃᐅᕐᒪᑦ ᓱᓕ ᓇᒥᓕᒫᖅ, ᑕᒪᕐᒥᐊᓗᒃ ᐊᐅᓚᓂᖃᑦᓯᐊᖅᓯᒪᙱᒻᒪᑕ ᐅᕝᕙᓘᓐᓃᑦ ᐊᐅᓚᓂᖃᑦᓯᐊᔾᔮᖏᒻᒪᑕ, ᓯᕗᓪᓕᖅᐹᒥ ᐊᐅᓚᔾᔭᒋᐊᖅᑕᐅᔪᑦ. ᑕᒪᓐᓇ ᐊᖏᕈᑎᒋᔭᕗᑦ ᐊᒻᒪᓗ ᑲᔪᓯᓯᒪᓂᐊᖅᑐᒍᑦ ᓯᕗᒻᒧᐊᒃᐸᓪᓕᐊᓂᕐᒧᑦ. ᐊᒥᓲᓯᒪᔪᑦ ᐊᐅᓚᓂᖃᑦᓯᐊᖅᑐᑦ, ᐊᒥᓱᑦ ᐱᐅᔪᑦ ᓅᒋᐊᕈᑕᐅᓯᒪᔪᑦ, ᐃᓚᖏᑦ ᑭᖑᕙᕆᐊᖅᑐᑎᒃ ᐊᒻᒪᓗ ᐱᒋᐊᑦᓯᐊᖅᓯᒪᒐᑎᒃ.

ᐃᓛᓐᓂᒃᑯᑦ ᐃᓚᐃᑎᒍᑦ ᑕᑯᔪᓐᓇᖃᑦᑕᖏᓐᓇᑦᑕ ᐊᐅᓚᓂᖏᓐᓂᒃ ᓄᓇᕗᑦ ᐱᔾᔪᑎᒋᓪᓗᒍ ᖃᓂᒃᓴᓗᐊᒧᑦ, ᐊᒃᓱᕈᖅᑐᑕ ᐱᓕᕆᓯᒪᔪᒍᑦ ᑕᒪᒃᑯᐊ ᓴᖅᑭᖁᓪᓗᒋᑦ, ᐊᒻᒪᓗ ᐆᒪᑎᕗᑦ ᑕᑖᕐᒪᑕ ᓂᕆᐅᖕᓂᕐᒥᑦ ᓯᕗᓂᒃᓴᑦᑎᓐᓄᑦ. ᑭᓯᐊᓂ ᐊᖏᔪᒥᒃ ᐱᕙᓪᓕᐊᓂᖃᖅᓯᒪᔪᒍᑦ ᐊᒻᒪᓗ ᓄᓇᕗᑦ ᑲᔪᓯᓂᐊᖅᑐᖅ ᐱᕙᓪᓕᐊᑎᑦᓰᓐᓇᕐᓗᓂ.

ᓱᓖᓛᒃ, ᑕᓐᓇ ᐊᑐᒃᑲᓐᓂᕐᓗᒋᑦ ᐅᖃᐅᓯᕕᓂᐊ ᓯᕗᓪᓕᖅᐹᒥ ᑲᒥᓯᓇᐅᓚᐅᖅᑑᑉ:

ᑖᓐᓇ ᓱᓕ ᒐᕙᒪᒋᒐᑦᑎᒍ, ᐱᕈᖅᐸᓪᓕᐊᑎᒃᑲᑎᒍ ᓱᓕ, ᓇᖕᒥᓂᕆᓗᑎᒍ ᐊᒻᒪᓗ ᐱᓕᕆᐊᒃᓴᖃᕋᑦᑕ ᐊᐅᓚᓂᖃᑦᓯᐊᕈᑎᒃᓴᖏᓐᓂᒃ.

ᒪᓕᒐᓕᐅᖅᑎᐅᓪᓗᓂ ᑕᒡᕙᓂ ᒪᓕᒐᓕᐅᕐᕕᖕᒥ ᐱᓕᕆᐊᒃᓴᖃᖅᐳᑎᑦ ᑲᔪᓯᓯᒪᓗᑎᒃ ᑕᒪᑐᒥᖓ ᐱᓕᕆᐊᒃᓴᒥᒃ ᐊᔾᔨᒌᒻᒥᒃ ᑐᕌᖅᑕᑦᓯᓐᓄᑦ; ᑎᑭᑦᑐᒪᓪᓗᒍ ᑕᑯᒍᒪᓯᒪᔭᓯ ᓇᓗᓇᐃᓯᒪᔭᓯ ᕿᖓᐅᒻᒥ ᑐᕌᒐᓕᐊᖑᓚᐅᖅᑐᑦ; ᐊᒻᒪᓗ ᖃᓄᐃᓕᐅᕐᓂᓕᒫᑦᓯᒍᑦ ᑕᒡᕙᓂ ᓄᑖᒥ ᑲᑎᒪᓂᐅᔪᒥ ᖁᒡᕙᕆᐊᕆᓗᓯ ᐃᓚᐅᓂᖃᕐᕕᒋᔪᒪᔭᖏᑦ ᓄᓇᕗᒥᐅᑦ.

(ᓴᖕᒥᓂᖅ ᐅᖃᐅᓯᖏᑦ ᑲᒥᓯᓇᐅᑉ)

ᒫᓐᓇ ᓇᓗᓇᐃᖅᐸᕋ ᒪᑐᐃᕐᓂᖓ ᑖᑦᓱᒪ 6-ᒋᔭᖓᓂ ᓯᕗᓕᖅᐹᑦ ᒪᓕᒐᓕᐅᖅᑏᑦ ᓄᓇᕗᒥ ᑲᑎᒪᓂᖏᓐᓂᒃ

ᐊᐱᕆᕙᒃᑲ ᑭᒃᑐᓕᒫᑦ ᐃᓚᓕᐅᑎᖁᓪᓗᒋᑦ ᐅᕙᓐᓄᑦ, ᐅᖃᖅᑎᒧᑦ, ᐊᒻᒪᓗ ᒪᓕᒐᓕᐅᖅᑎᓄᑦ ᑕᒡᕙᓂ ᒪᓕᒐᓕᐅᕐᕕᖕᒥ ᑕᒧᓗᒡᓗᑎᒃ ᓂᐅᖅᑲᕐᓗᑎᒡᓗ ᐅᑎᒃᑲᓐᓂᓚᐅᙱᓐᓂᕐᒥᓂᒃ ᑲᑎᒪᔾᔪᑎᒃᓴᓄᑦ.