 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᖕᓂ, ᓄᓇᕗᒻᒥ (ᓯᑎᐱᕆ 8, 2003) -- ᒐᕙᒪᑐᖃᒃᑯᓐᓄᑦ, ᐊᕕᒃᑐᖅᓯᒪᓂᕆᔭᐅᔪᓄᑦ ᐅᑭᐅᖅᑕᖅᑐᒧᓪᓗ ᒥᓂᓯᑕᕆᔭᐅᔪᑦ ᑲᒪᒋᔭᒃᓴᖃᖅᑎᑕᐅᓪᓗᑎᒃ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒧᑦ ᑲᑎᑦᑐᒫᕐᒪᑕ ᐃᖃᓗᖕᓂ, ᓄᓇᕘᒥ, ᑕᒪᓐᓇ ᑕᖅᑭᖅ ᐊᒃᐸᓕᖅᐸᑦ ᐅᖃᖃᑎᒌᒋᐊᕐᓗᑎᒃ ᐱᒻᒪᕆᐊᓗᖕᒥᒃ ᑭᓱᓕᕆᓂᐅᖃᑦᑕᖅᑐᒥᒃ ᑭᒡᓕᓯᓂᐊᕐᓂᕐᒧᑦ ᓄᑖᓄᓪᓗ ᐊᑐᖅᑕᐅᔪᓐᓇᖅᑐᓄᑦ ᑲᔪᓯᑎᑦᑎᑦᑎᐊᕈᒪᓗᓂ ᐅᑭᐅᖅᑕᖅᑐᒥ ᐃᓱᒪᒋᔭᐅᓯᒪᔪᓂᒃ ᐱᕙᓪᓕᐊᓂᕐᒧᓪᓗ. ᐃᑯᐱᒡᕕᕆᔨᒃᑯᑦ ᒥᓂᓯᑕᖓᑦ ᐅᓛᔪᒃ ᐊᑭᓱᒃ ᑲᑎᒪᑎᑦᑎᓂᐊᖅᑐᖅ ᒪᕐᕉᖕᓄᑦ ᐅᓪᓘᖕᓄᑦ ᐅᖃᖃᑎᒌᖕᓂᕐᒥᒃ ᐃᓚᓕᖕᒥᒃ ᒥᓂᓯᑕᕆᔭᐅᔪᓂᒃ ᐅᑭᐅᖅᑕᖅᑐᒧᑦ ᑲᓇᑕᓕᒫᒥ, ᐊᒻᒪᓗᑦᑕᐅᖅ ᐃᓚᐅᖕᒥᓗᓂ ᕌᐳᑦ ᓈᓪᑦ, ᒐᕙᒪᑐᖃᒃᑯᑦ ᒥᓂᓯᑕᖓᑦ ᐅᑭᐅᖅᑕᖅᑐᒧᑦ. “ᐅᖃᖃᑎᒌᖕᓂᕆᓂᐊᖅᑕᕗᑦ ᐱᔾᔪᑎᖃᓪᓗᐊᑕᕐᓂᐊᖅᑐᑦ ᖃᓄᖅ ᐱᓕᕆᖃᑎᒌᒍᓐᓇᕐᒪᖔᑦᑕ ᐱᐅᓯᑎᑦᑎᒋᐊᕐᓂᐊᕐᓗᑕ ᐱᕙᓪᓕᐊᓂᑉᒧᑦ ᑭᒃᑯᑐᐃᓐᓇᐃᓪᓗ ᐊᕙᑎᒋᕙᒃᑕᖏᓐᓂᒃ ᐃᑲᔪᖅᑐᕐᓗᑕᓗ ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᖃᐅᔨᒪᓂᕆᔭᐅᔪᓂᒡᓗ ᑕᒪᐃᒃᑯᓕᒫᖅ ᐅᑭᐅᖅᑕᖅᑐᒥ ᐱᕙᓪᓕᐊᓂᕆᕙᒃᑕᑦᑎᒍᑦ,” ᒥᓂᓯᑕ ᐊᑭᓱᒃ ᐅᖃᓚᐅᖅᑐᖅ. ᑖᒃᑯᐊ ᒥᓂᓯᑕᐃᑦ ᐅᖃᖃᑎᒌᖕᓂᐊᖅᑐᑦ ᐊᕐᕌᒍᓄᑦ ᐱᖓᓱᓄᑦ ᖃᓄᐃᓕᐅᕐᓂᕆᓂᐊᖅᑕᒥᓂᒃ, ᕿᒥᕐᕈᓇᒃᑲᓐᓂᕐᓗᑎᒡᓗ ᓯᕗᓪᓕᖅᐸᐅᑦᑎᐅᑎᓯᒪᔭᒥᓂᒃ ᐱᓕᕆᐊᒃᓴᓂᒃ ᕿᓂᕐᓗᑎᒡᓗ ᖃᓄᖅ ᐊᔪᓐᖏᓐᓂᖃᑦᑎᐊᖅᑐᓂᒃ ᐃᖅᑲᓇᐃᔭᖅᑎᖃᓕᕈᓐᓇᕐᒪᖔᑦ ᐅᑭᐅᖅᑕᖅᑐᒥ ᑲᓇᑕᒥ. ᑖᓐᓇ ᑲᑎᒪᕐᔪᐊᕐᓂᕆᔭᖓᑦ ᓴᖅᑭᔮᕐᕕᐅᓂᐊᕐᒥᔪᖅ ᐅᓂᒃᑳᕐᓂᕐᓂᒃ ᐅᑭᐅᖅᑕᖅᑐᒥ ᓄᑖᓄᑦ ᐊᑐᖅᑕᐅᔪᓐᓇᖅᑐᓄᑦ ᐅᑯᓇᓐᖓᑦ, ᔫᑳᓐ-ᒥᐅᓂᑦ, ᑯᐃᐸᒃ-ᒥᐅᓂᑦ, ᒪᓂᑑᐸ-ᒥᐅᓂᑦ ᓄᓇᕘᒥᐅᓂᓪᓗ. ᓴᖅᑭᑎᑕᐅᓚᐅᖅᓯᒪᑎᓪᓗᒍ 1999-ᒥ, ᐊᕐᕌᒍᑕᒫᑦ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒧᑦ ᒥᓂᓯᑕᐃᑦ ᐅᖃᖃᑎᒌᖕᓂᕆᔭᖓᑦ ᐃᓚᒋᔭᐅᕗᖅ ᒐᕙᒪᑐᖃᒃᑯᑦ, ᐊᕕᒃᓯᒪᓂᕆᔭᐅᔪᑦ ᐅᑭᐅᖅᑕᖅᑐᒥᐅᓪᓗ ᒐᕙᒪᖏᑕ ᑲᔪᓰᓐᓇᖅᑐᖅ ᐱᓕᕆᓪᓚᕆᒍᒪᓯᒪᓂᖓᑦ ᐱᓕᕆᖃᑎᒌᖕᓂᒃᑯᑦ ᐱᓕᕆᐊᖃᓪᓚᑦᑖᕐᓗᑎᒃ ᐅᑭᐅᖅᑕᖅᑐᒥ ᐱᕙᓪᓕᐊᓂᕐᒧᑦ ᐃᓱᒪᒋᔭᐅᕙᒃᑐᓄᑦ. ᑖᓐᓇ ᑲᑎᒪᕐᔪᐊᕐᓂᖅ ᐱᒋᐊᓛᖅᑐᖅ ᓯᑎᐱᕆ 24, 2003-ᖑᓕᖅᐸᑦ. - 30 - ᖃᐅᔨᒋᐊᒃᑲᓐᓂᖅᑕᖃᕈᒪᒍᕕᑦ ᖃᐅᔨᕝᕕᒋᒋᐊᕐᓗᒍ ᐅᓇ: ᑭᐅᕆ ᒪᒃᓚᔅᑭ ᑐᓴᐅᒪᑎᑦᑎᓂᕐᒧᑦ ᐊᐅᓚᑦᑎᔨ ᐃᑯᐱᒡᕕᓕᕆᔨᒃᑯᓐᓂ ᒐᕙᒪᒋᔭᐅᔪᒥ ᓄᓇᕘᒧᑦ ᐅᖄᓚᐅᑖ: (867) 975-5929 ᐊᑭᖃᓐᖏᑦᑐᖅ: 1-866-222-9063 ᖃᕆᑕᐅᔭᒃᑯᑦ: kmccluskey@gov.nu.ca |