 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᖁᕐᓗᖅᑑᖅ, ᓄᓇᕗᑦ(ᓯᑦᑏᕝᕙ 3, 2003)¬ - ᓄᓇᓕᐊᑦ ᖁᕐᓗᖅᑑᑉ ᐃᑲᔪᖅᑕᐅᓂᐊᖅᑐᖅ ᐋᖅᑭᒃᑕᐅᓂᖓᓄᑦ ᓄᑖᖅ ᐃᑲᔪᖅᑕᐅᕕᒃᓴᑦ ᒪᒥᓴᕐᕕᐅᓗᓂ, ᐊᑦᑕᕐᓇᓗᐊᙱᑦᑐᓄᑦ ᐅᑭᐅᑭᑦᑐᓄᑦ ᒪᒥᓴᕐᕕᒃᓴᖅ. ᐃᖅᑲᖅᑐᐃᔨᓕᕆᓂᕐᒧᑦ ᒥᓂᔅᑕ ᐊᒻᒪᓗ ᓯᕗᓕᖅᑎ ᐹᓪ ᐅᑲᓕᖅ ᑐᓴᖅᑎᖅᓯᔪᖅ ᐅᓪᓗᒥ ᓄᓇᓖᑦ ᑭᒡᒐᖅᑐᐃᔨᖏᓐᓄᑦ, ᑲᑎᒪᔨᓄᑦ ᐊᒻᒪᓗ ᐃᑲᔪᖅᑕᐅᕕᓕᕆᔩᑦ ᐃᖅᑲᓇᐃᔭᖅᑎᖏᓐᓄᑦ. ᑖᓐᓇ ᐃᒡᓗ ᐃᑲᔪᕈᓐᓇᖅᓯᓂᐊᖅᑐᖅ ᑎᑭᑦᑐᓐᓇᕐᓗᒋᑦ ᐊᕙᑎᓄᑦ 20 ᐅᑭᐅᑭᒃᑐᓄᑦ ᐱᕋᔭᒃᓯᒪᔪᓄᑦ ᐊᑯᓂᐅᙱᑦᑐᖅ ᑎᒍᔭᐅᓯᒪᔾᔪᑎᓖᑦ, ᐱᐊᓂᒋᐊᖅᑐᖅᑐᓪᓘᓐᓃᑦ ᑎᒍᔭᐅᓯᒪᕕᒋᒋᐊᖃᖅᑕᒥᓂᒃ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥᑦ, ᔭᓗᓇᐃᕝ ᐃᑲᔪᖅᑕᐅᕕᐊᓂᓪᓘᓐᓃᑦ. ᑖᓐᓇ ᒪᒥᓴᕐᕕᐅᔪᖅ ᐃᒡᓗ ᐱᔪᓐᓇᖅᑎᑦᓯᓂᐊᖅᑐᖅ ᐅᑭᐅᑭᑦᑐᓂᒃ ᐱᕋᔭᒃᓯᒪᔪᓂᒃ ᑎᒍᔭᐅᓯᒪᔪᓐᓇᕐᓗᑎᒃ ᖃᓂᒋᔭᖓᓄᑦ ᐊᖏᕐᕋᖏᑦᑕ, ᐅᖃᐅᓯᕆᔪᓐᓇᕐᓗᒋᑦ ᐱᔾᔪᑕᐅᔪᑦ ᐱᑦᓯᐊᖏᖃᑦᑕᕐᓂᕐᒧᑦ ᐊᒻᒪᓗ ᓴᖅᑭᑎᑦᓯᔾᔪᑕᐅᓂᐊᖅᑐᖅ 12-ᓂᒃ ᓄᑖᓂ ᐃᓂᐅᔪᓂᒃ, ᑖᒃᑯᐊ ᐋᖅᑭᒃᓱᖅᑕᐅᓂᐊᖅᑐᑦ ᐊᒻᒪᓗ ᐃᖅᑲᓇᐃᔭᖅᑎᑖᕈᑕᐅᓗᑎᒃ ᓄᓇᓕᐅᔪᓂ. ᐃᖅᑲᖅᑐᐃᔨᓕᕆᔨᒃᑯᑦ ᕿᒥᕐᕈᓂᖃᕐᒥᔪᑦ ᐃᑲᔪᖅᑎᒌᒍᑎᖃᕈᓐᓇᕐᒪᖔᕐᒥᒃ ᓄᓇᓕᖕᓂ ᑲᑐᔾᔨᖃᑎᒌᖑᔪᓂᒃ ᐱᑕᖃᖅᑎᑦᓯᓂᐊᖅᑐᓂᒃ ᐃᑲᔫᑎᒃᓴᓂᒃ ᐅᑭᐅᑭᑦᑐᓄᑦ ᐱᕋᔭᒃᓯᒪᔪᓄᑦ ᐊᒻᒪᓗ ᖃᑕᙳᑎᖏᓐᓄᑦ. ᑖᓐᓇ ᐃᒡᓗ ᓴᖅᑭᑎᑕᐅᓂᐊᖅᑐᖅ ᐃᖅᑲᖅᑐᐃᕕᓕᕆᔨᒃᑯᓐᓄᑦ ᐃᑲᔪᖅᑎᖃᕐᓗᑎᒃ ᕼᐊᒻᓕᖓᓐᓂᒃ ᖁᕐᓗᖅᑑᑉ. ᑖᒃᑯᐊ ᕼᐊᒻᓕᒃᑯᑦ ᐊᖏᕈᑎᖃᖅᓯᒪᔪᑦ ᓄᒃᑎᕆᓂᐊᕐᓗᑎᒃ ᐊᒥᐊᒃᑯᖓᓐᓂᒃ ᐃᒡᓗᖁᑎᖏᑦᑕ ᓄᓇᕗᑦ ᒐᕙᒪᖏᓐᓄᑦ ᐃᓂᒋᔭᐅᓂᐊᕐᓗᓂ ᓄᒃᑎᖅᑕᐅᔪᓄᑦ ᐅᑭᐅᑭᓗᐊᖅᑐᓄᑦ ᐱᕋᔭᓯᒪᔪᓄᑦ. ᑮᓇᐅᔭᖅᑐᓗᐊᖏᔾᔪᑕᐅᓂᐊᕐᓂᖓ, ᐊᒻᒪᓗ ᐊᖏᓂᖓᑕ ᓈᒻᒪᖕᓂᖓ ᐃᓗᓕᕆᓗᐊᓚᐅᖅᑕᖓ ᑕᒪᑐᒪ ᐃᓂᒋᓂᐊᖅᑕᖓᑕ ᓄᑖᑉ ᐃᑲᔪᖅᑕᐅᕕᐅᑉ ᖁᕐᓗᖅᑑᒥ. “ᒪᓕᒃᑐᒋᑦ ᑐᙵᕕᓕᐊᖑᓯᒪᔪᑦ ᐊᒻᒪᓗ ᖃᓄᐃᓕᖓᓂᖏᑦ ᕿᖓᐅᒻᒥ ᑐᑭᒧᐊᒍᑎᓕᐊᖑᓚᐅᖅᑐᑦ, ᓴᖅᑭᑎᑦᓯᔪᒪᓚᐅᕋᑦᑕ ᑕᒡᓗᒥᒃ ᒪᒥᓴᕐᕕᒃᓴᐅᒐᔭᖅᑐᒥᒃ ᐅᑭᐅᑭᑦᑐᓄᑦ ᐱᕋᔭᒃᓯᒪᔪᑦ ᖃᓂᓐᓂᖅᓴᐅᖁᓪᓗᒋᑦ ᐊᖏᕐᕋᖃᕐᕕᒋᔭᖏᓐᓄᑦ, ᐃᓚᐅᑎᑕᐅᖁᓪᓗᒋᑦ ᐱᖃᓐᓇᕆᔭᖏᑦ, ᖃᑕᙳᑎᖏᓪᓗ ᒪᒥᓴᖅᐸᓪᓕᐊᓂᕐᒧᑦ” ᐅᖃᖅᑲᐅᔪᖅ ᐅᑲᓕᖅ. “ᐊᒻᒪᑦᑕᐅᖅ, ᐱᑕᖃᖅᑎᑦᓯᔪᒪᒐᑦᑕ ᐃᓄᐃᑦ ᐃᓕᖅᑯᓯᖏᓐᓅᖓᔪᓂᒃ ᐱᓕᕆᐊᒃᓴᓂᒃ ᐃᒪᒋᓗᓂᒋᑦ ᑕᒪᑐᒪ ᒪᒥᓴᖅᐸᓪᓕᐊᔾᔪᑎᖃᕐᓂᐅᑉ, ᐃᑲᔫᑎᔪᓐᓇᖅᑐᑦ ᐊᖅᑯᑎᒃᓴᓕᐅᑦᓯᐊᓗᒋᑦ ᐃᓚᐅᓂᖃᑦᓯᐊᕈᓐᓇᕐᓂᐊᕐᒪᑕ ᓄᓇᓕᐅᔪᓂ.” “ᑕᒡᕙᓂ ᐃᒡᓗᒥ, ᓴᖅᑭᑎᑦᓯᓂᐊᖅᑐᒍᑦ 12-ᓂᒃ ᓄᑖᓂᒃ ᐃᓂᐅᔪᓂᒃ ᑕᒡᕙᓂ ᓄᓇᓕᖕᓂ, ᑭᓯᐊᓂ ᐱᒻᓚᕆᐅᓂᖅᓴᖅ ᐱᑕᖃᖅᑎᑦᓯᔪᓐᓇᕐᓂᐊᕋᑦᑕ ᓄᓇᕗᒦᙶᖅᓯᒪᔪᓂᒃ ᒪᒥᓴᖅᐸᓪᓕᐊᔾᔪᑎᒃᓴᓂᒃ ᓄᓇᓕᐅᔪᓄᑦ ᐃᓚᐅᓕᐅᑎᓗᒋᑦ ᐅᒃᐱᕆᔭᕗᑦ,” ᐅᖃᖅᑲᐅᔪᖅ ᖁᕐᓗᖅᑑᒧᑦ ᒪᓕᖓᓕᐅᖅᑎ, ᑖᓄᓪ ᕼᐊᕕᐅᔭᖅ. ᑕᒪᒃᑯᐊ ᓄᑖᑦ ᐃᖅᑲᓇᐃᔭᕐᕕᒃᓴᐅᔪᑦ ᓴᖅᑭᑎᑕᐅᔪᑦ ᑖᑦᓱᒧᖓ ᒪᒥᓴᕐᕕᐅᓂᐊᖅᑐᒧᑦ ᐃᓚᒋᔭᖓ ᒐᕙᒪᒃᑯᑦ ᓯᐊᒻᒪᒃᑎᕆᒍᒪᑦᓯᐊᕐᓂᖏᑦᑕ. ᖁᕐᓗᖅᑑᖅ ᑐᕌᕐᕕᐅᓯᒪᖕᒪᑦ 7-ᓄᑦ ᐃᖅᑲᓇᐃᔭᖅᑎᓄᑦ ᐃᓂᐅᔪᓂᒃ: ᑕᒪᓐᓇ ᐱᓕᕆᐊᖑᔪᖅ ᐅᖓᑖᓅᕈᑕᐅᓂᐊᖅᑐᖅ ᑐᕌᕕᐅᔪᑦ ᓈᓴᐅᑏᑦ. ᓇᓚᐅᑦᓵᖅᑕᐅᓯᒪᔪᖅ ᒪᑐᐃᕐᕕᐅᓂᐊᖅᑐᕆᔭᖅ ᐅᓪᓗᖅ ᑖᑦᓱᒪᖓ ᐃᑲᔪᖅᑕᐅᕕᖕᒧᑦ ᒪᒥᓴᕐᕕᐅᓪᓗᓂ ᐱᒋᐊᙵᕐᓂᖓᓂ ᑭᖑᓪᓕᖅ ᐊᐅᔭᐅᓂᐊᖅᑐᖅ, ᑕᐃᒪᓐᓇ ᐃᖅᑲᓇᐃᔭᖅᑎᐅᓂᐊᖅᑐᑦ ᐃᓕᓐᓂᐊᖅᑎᑕᐅᓯᒪᔪᓐᓇᕐᓂᐊᕐᒪᑕ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ ᐅᖃᕐᕕᒋᓗᒍ: ᐱᐅᓪ ᑭᓖ ᐊᓪᓚᒡᕕᐊ ᓯᕗᓕᖅᑎᐅᑉ (867) 975-5059 |