 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᐅᒃᑑᕝᕙ 7, 2003) - ᓯᕗᓕᖅᑎ ᐹᓪ ᐅᑲᓕᖅ ᑎᒃᑯᐊᖅᓯᔪᖅ ᕌᐳᑦ ᒑᓐᒥᑦ, ᖃᐅᔨᒪᑦᓯᐊᖅᑐᖅ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓯᒪᔪᖅ ᐅᑯᓂᒻᒪᕆᒃ ᐊᒻᒪᓗ ᖃᐅᔨᒪᓂᖃᖅᑐᓂᒃ ᐱᓕᕆᐊᒥᒃ ᐃᓕᑕᕆᐅᔭᔾᔪᑎᖃᕆᐊᖃᖅᑐᒥᒃ, ᐃᓂᖓᓅᕐᓂᐊᓕᖅᑐᖅ ᑐᒡᓕᕆᔭᐅᓗᓂ ᒥᓂᔅᑕᖓᓐᓄᑦ ᒐᕙᒪᒃᑯᑦ ᓴᓇᔪᓕᕆᔨᖏᑦᑕ. “ᑕᒪᓐᓇ ᑎᒃᑯᐊᖅᓯᓂᖅ ᒪᓕᒃᑐᖅ ᒐᕙᒪᒃᑯᑦ ᐱᓕᕆᐊᕆᓂᐊᖅᓯᒪᔭᖓᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᖁᒡᕙᕆᐊᖁᓪᓗᒋᑦ ᒐᕙᒪᒃᑯᑦ ᐱᔨᑦᓯᕋᐅᑎᖏᑦ ᐊᒻᒪᓗ ᐃᓄᖅᓯᒋᐊᕈᒪᓪᓗᒋᑦ ᐃᓄᐃᑦ ᐃᖅᑲᓇᔮᖃᖅᑐᑦ ᖁᑦᓯᖕᓂᖅᓴᓂᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑏᑦ,” ᐅᖃᖅᑐᖅ ᐅᑲᓕᖅ. “ᒥᔅᑕ ᒐᓐ ᐃᓚᒋᔭᐅᔪᖅ ᖃᐅᔨᒪᓂᖃᑦᓯᐊᖅᑐᓄᑦ ᐅᓄᖅᓯᕙᓪᓕᐊᔪᓄᑦ ᒐᕙᒪᒃᑯᓐᓂ ᐃᖅᑲᓇᐃᔭᕈᒪᓯᒪᔪᑦ ᖁᑦᓯᖕᓂᖅᓴᐅᔪᓂ, ᐱᐅᓯᕚᓪᓕᖁᓪᓗᒋᑦ ᐃᓅᓯᖏᑦ ᓄᓇᕗᒥᐅᑦ.” ᒐᓐ ᓇᒃᓴᕐᓂᐊᖅᑐᖅ ᐊᒥᓱᓂᒃ ᖃᐅᔨᒪᓂᕐᒥᓂᒃ ᑖᒃᑯᓇᓂ ᒐᕙᒪᒃᑯᑦ ᓴᓇᔪᓕᕆᔨᖏᓐᓂ. ᑎᒃᑯᐊᖅᑕᐅᓚᐅᕋᓂ, ᐃᑲᔪᖅᑎᐅᓚᐅᖅᑐᖅ ᑐᒡᓕᐊᓄᑦ ᒥᓂᔅᑕᐅᑉ ᐊᐅᓚᔾᔪᑎᖏᓐᓂ ᒐᕙᒪᒃᑯᑦ ᓴᓇᔪᓕᕆᔨᖏᑦᑕ. ᐱᓕᕆᐊᖃᖅᓯᒪᖕᒥᔪᖅ ᐊᐅᓚᑦᑎᔨᐅᓪᓗᓂ, ᐱᓕᕆᐊᒥᓂᒃ ᐃᓕᑕᕆᐅᔭᔾᔪᑎᖃᖅᑐᓄᑦ ᐊᖓᔪᖅᑳᖑᓪᓗᓂ, ᐋᖅᑭᐅᒪᑎᑦᓯᔨᓄᑦ ᒪᑲᔨᐅᓪᓗᓂ ᐊᒻᒪᓗ ᓱᓪᓗᓕᕆᔨᓄᑦ ᐊᖓᔪᖅᑳᖑᓪᓗᓂ. ᓱᒡᓗᓕᕆᔨᐅᓂᕐᒧᑦ ᐃᓕᑕᕆᔭᐅᓯᒪᔾᔪᑎᖃᖅᑐᖅ ᐊᒻᒪᓗ ᓱᓪᓗᓕᖕᓂᑦ ᐋᖅᑭᒃᓱᐃᔨᐅᓪᓗᓂ. ᓯᓚᑖᒍᑦ ᒐᕙᒪᒃᑯᑦ ᓴᓇᔪᓕᕆᔨᖏᑦᑕ, ᑖᓐᓇ ᒐᓐ ᖃᖓᑕᔫᑎᐅᔪᖅ, ᓚᐃᓴᖃᖅᑐᓂ ᖁᓕᒥᒎᓄᑦ ᖃᖓᑕᔫᖅᑎᐅᓪᓗᓂ ᐊᒻᒪᓗ ᐃᖕᒥᒃᑰᕐᓗᓂ ᖃᖓᑕᔫᖅᑎᐅᔪᓐᓇᕐᓂᕐᒧᑦ ᓚᐃᓴᖃᖅᑐ. ᑕᒪᓐᓇ ᑎᒃᑯᐊᖅᓯᓂᖅ ᒪᓕᒃᑐᖅ ᓯᕗᓕᖅᑎᐅᑉ ᐱᓕᕆᐊᕆᓂᐊᖅᓯᒪᔭᖓᓂᒃ, ᐃᓕᓐᓂᐊᖅᑎᑉᐸᓪᓕᐊᒍᒪᓪᓗᒋᑦ ᐊᔾᔨᒌᙱᑦᑐᓂᒃ ᖃᐅᔨᒪᓕᖁᓪᓗᒋᑦ ᐊᒻᒪᓗ ᐃᓕᓐᓂᐊᖅᑎᑕᐅᖁᓪᓗᒋᑦ ᐃᓄᐃᑦ ᐊᐅᓚᑦᑎᔨᐅᔪᑦ. “ᐱᓕᕆᐊᖃᕈᒪᒐᒪ ᐊᑐᕐᓗᒋᑦ ᑖᒃᑯᐊ ᐊᑑᑎᒃᓴᓕᐊᖑᓚᐅᖅᑐᑦ ᕿᖓᐅᒻᒥ ᑐᑭᒧᐊᒍᑎᒃᓴᓕᐊᓄᑦ ᐱᕈᖅᐸᓪᓕᐊᑎᑦᑐᒪᓪᓗᒍ ᒐᕙᒪᐅᔪᖅ ᓴᖅᑭᔮᖅᑎᑦᓯᓂᖅᓴᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᑦ,” ᐅᖃᖅᑐᖅ ᐅᑲᓕᖅ. “ᑕᒪᓐᓇ ᑎᒃᑯᐊᖅᓯᓂᖅ ᐃᑲᔫᑎᓂᐊᖅᑐᖅ ᓴᖅᑭᑎᑕᐅᕙᓪᓕᐊᓂᖏᓐᓄᑦ ᑐᕌᖅᑕᐅᔪᑦ, ᐅᓄᖅᓯᕙᓪᓕᐊᑎᑦᓯᒐᓱᐊᕐᓂᕐᒧᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂ ᑭᒡᒐᖅᑐᐃᔪᓂᒃ ᐃᓄᒻᒪᕆᖕᓂᑦ ᐱᔨᑦᓯᖅᑕᒥᓂᒃ.” ᒐᓐ, ᑐᒡᓕᕆᔭᐅᑲᐃᓐᓇᓚᐅᖅᑐᖅ ᒥᓂᔅᑕᒧᑦ ᓄᖅᑲᖅᑎᓪᓗᒍ ᕌᔅ ᒧᕌᓯᒃ, ᑖᓐᓇ ᐱᒋᐊᑲᐅᑎᒋᓂᐊᖅᑐᖅ ᑐᒡᓕᐊᓄᑦ ᒥᓂᔅᑕᐅᑉ ᒫᓐᓇᑲᐅᑎᒋ. ᑐᑭᓯᒋᐊᕈᑎᒃᓴᓂᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ: ᐱᐅᓪ ᑭᓖ ᓯᕗᓕᖅᑎᐅᑉ ᑐᓴᒐᒃᓴᓕᕆᔨᖓ ᐊᓪᓚᒡᕕᐊ ᓯᕗᓕᖅᑎᐅᑉ (867) 975-5059 |