 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᓄᕕᒻᐱᕆ 27, 2003) - ᓄᓇᕗᑦ ᒐᕙᒪᖏᑦ ᑐᑭᒧᐊᒍᑎᖃᒻᒪᕆᒃᐳᑦ ᓴᖅᑭᑎᑕᐅᓂᖓᓄᑦ ᐃᓱᒪᓕᐅᕈᑕᐅᔪᓂᒃ ᓴᖑᑎᑦᓯᒐᓱᐊᕐᓂᕐᒧᑦ ᑲᑎᒪᔩᑦ ᐃᓚᓕᐅᑎᓂᐊᖅᑐᑦ ᐃᓗᓕᖏᓐᓄᑦ ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ, ᑳᓐᑐᕌᒃᑎᑦᓯᓂᒃᑯᑦ ᓂᕈᐊᕐᓂᖅᓴᐅᔾᔪᑎᒃᓴᑦ. ᑲᑎᒪᔩᑦ ᑐᑭᖃᖅᑐᖅ ᓴᖅᑭᑎᑕᐅᓚᐅᖅᑐᖅ ᐊᖏᖃᑎᒌᒍᑕᐅᓚᐅᖅᑐᓄᑦ ᑖᒃᑯᓄᖓ ᓄᓇᕗᑦ ᒐᕙᒪᖏᓐᓄᑦ, ᓄᓇᕗᑦ ᑐᙵᕕᒃᑯᓐᓄᑦ. ᓴᖅᑭᑎᑕᐅᓂᖓ ᐊᔪᐃᓐᓇᕆᐊᕐᕕᐅᔪᓐᓇᖅᑐᑦ ᐱᒋᐊᖅᑎᑕᐅᓯᒪᔪᖅ ᑳᓐᑐᕌᒃᑎᐅᕙᒃᑐᓄᑦ ᑕᐃᒪᙵᓂᒃ ᓇᖕᒥᓂᖅ ᐱᓕᕆᕕᖃᖅᑐᑦ “ᓴᖅᑭᑎᑕᐅᓚᐅᖅᑎᓪᓗᒋᑦ ᐊᔪᐃᓐᓇᕆᐊᕈᑎᖃᓂᕐᒧᑦ ᑲᑎᒪᔩᑦ ᑕᒪᓐᓇ ᑕᒪᒃᑮᖕᓄᑦ ᓵᓚᒃᓴᕈᑕᐅᔪᑦ. ᑕᒪᒃᑯᐊ ᓇᖕᒥᓂᖅ ᐱᓕᕆᕕᖃᖅᑐᑦ ᐊᒻᒪ ᑳᓐᑐᕌᒃᑎᐅᔪᑦ ᓄᓇᓕᖕᓂ ᑐᓴᖅᑕᐅᕕᒃᓴᖃᕐᓂᐊᓕᖅᑐᑦ ᐊᔪᐃᓐᓇᕆᐊᕈᑎᖅᑲᕐᓂᒃᑯᑦ ᑲᑎᒪᔨᑎᒍᑦ, ᐃᖅᑲᖅᑐᐃᕕᒃᑰᕆᐊᖃᙱᓪᓗᑎᒃ ᐊᒻᒪᓗ ᑖᒃᑯᐊ ᓄᓇᕗᑦ ᒐᕙᒪᖏᑦ, ᓄᓇᕗᑦ ᑐᙵᕕᒃᑯᑦ ᐱᕈᖅᐸᓪᓕᐊᑎᑦᓯᒋᐊᖃᖅᑐᑦ ᓴᙱᓂᖅᓴᒥᒃ ᐱᓕᕆᖃᑎᒌᒍᑎᒋᓂᐊᖅᑕᒥᓂᒃ ᓴᖅᑭᑎᑕᐅᔪᓂᒃ ᑕᐅᖅᓰᖃᑦᑕᕈᑎᖃᓚᐅᖅᑎᓪᓗᒋᑦ ᑎᑭᒐᓱᐊᖅᑐᑎᒃ ᐊᖏᖃᑎᒌᒍᑎᖃᕐᓂᕐᒧᑦ ᐊᔪᐃᓐᓇᕆᐊᕈᑎᖃᕐᓂᕐᒧᑦ ᑲᑎᒪᔨᐅᓂᐊᖅᑐᓂᒃ,” ᐅᖃᖅᑐᖅ ᒐᕙᒪᒃᑯᑦ ᓴᓇᔪᓕᕆᔨᖏᑦ ᒥᓂᔅᑕᖓᑦ ᐲᑕ ᑲᑦᑐᒃ. “ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐱᑕᖃᖅᑎᑦᓯᓯᒪᐃᓐᓇᖅᑐᑦ ᐋᖅᑭᒃᑕᐅᔪᓐᓇᖅᑐᑎᒃ ᐊᔪᐃᓐᓇᕆᐊᕈᑎᖃᕐᓂᕐᒧᑦ ᑲᑎᒪᔩᑦ ᐊᒻᒪᓗ ᖁᕕᐊᓱᒃᑐᖓ ᑖᒃᑯᐊ ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᑖᒃᑯᐊ ᒐᕙᒪᒃᑯᑦ ᑎᑭᒍᓐᓇᓚᐅᕐᒪᑎᒃ ᐊᖏᖃᑎᒌᒍᑎᖃᕐᓂᕐᒧᑦ ᐃᓕᖅᑯᓯᐅᓂᐊᖅᑐᓂᒃ,” ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᑐᒡᐊᓕ ᑮᓇᐅᔭᓕᕆᔨᐅᑉ ᐹᓪ ᖃᓗᔾᔭᖅ. ᐊᒥᓱᑲᓪᓚᑦ ᐊᔪᐃᓐᓇᕆᐊᕈᑏᑦ ᓴᖅᑭᑎᑕᐅᓯᖕᒪᔪᑦ ᑳᓐᑐᕌᒃᑎᐅᔪᓄᑦ ᑕᐃᒪᙵᓂᒃ ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᖏᑦ ᓴᖅᑭᑎᑕᐅᓚᐅᕐᒪᑕ ᐊᐃᐳᕈ 2000. ᑕᒪᒃᑯᐊ ᐊᔪᐃᓐᓇᕆᐊᕈᑏᑦ ᓄᖅᑲᖓᔪᑦ, ᓯᕗᕌᓐᓃᑦᑐᓪᓘᓐᓃᑦ ᐃᖅᑲᖅᑐᐃᕖᑦ. ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᔪᐃᓐᓇᕆᐊᕈᑎᒋᓗᒋᑦ ᑲᑎᒪᔩᑦ ᑐᓵᔪᓐᓇᖅᑐᑦ ᐊᔪᐃᓐᓇᕆᐊᕈᑕᐅᔪᓂᒃ ᐱᒋᐊᖅᑎᑕᐅᓯᒪᔪᑦ ᑐᖔᒍᑦ ᐋᖅᑭᒃᑕᐅᓂᖏᑦᑕ ᑖᒃᑯᐊ ᓄᓇᕗᑦ ᑐᙵᕕᒃᑯᑦ, ᓄᓇᕗᑦ ᒐᕙᒪᖏᑦ ᐊᖏᕈᑎᖃᑐᐊᖅᐸᑕ. ᑖᒃᑯᐊ ᐱᖓᓱᓂᒃ ᑲᑎᒪᔨᓖᑦ ᑎᒃᑯᐊᖅᑕᐅᓂᐊᖅᑐᑦ ᒐᕙᒪᒃᑯᓐᓄᑦ. ᐃᓚᖓ ᑲᑎᒪᔩᑦ ᓂᕈᐊᖅᑕᐅᓂᐊᖅᑐᖅ ᓄᓇᕗᑦ ᑐᙵᕕᒃᑯᓐᓄᑦ, ᐱᖃᑖ ᐊᕕᒃᑐᖅᓯᒪᓂᐅᔪᓂ ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐱᖓᔪᐊᑦ ᑖᒃᑯᓄᖓ ᒐᕙᒪᒃᑯᓐᓄᑦ. ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᓴᖅᑭᑎᑕᐅᓚᐅᖅᑐᑦ ᒐᕙᒪᒃᑯᓐᓄᑦ, ᐱᖃᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᓴᖅᑭᑎᑦᓯᖁᓪᓗᒋᑦ ᐱᓕᕆᐊᕆᒋᐊᖃᖅᓯᒪᔭᒥᓂᒃ ᐋᑎᑯ 24-ᒥ ᓄᓇᕗᒥ ᓄᓇᑖᕈᑎᓂ. ᑖᒃᑯᐊ ᑐᕌᖅᑕᖏᑦ ᐋᑎᑯ 24 ᐅᓄᖅᓯᒋᐊᕆᖁᔨᔪᑦ ᐃᓄᖕᓄᑦ ᓇᖕᒥᓂᖅ ᐱᓕᕆᕕᒋᔭᐅᔪᓂᒃ ᐱᓕᕆᐊᒃᓴᓂᒃ ᐱᕕᖃᖅᑎᑕᐅᓂᒃᑯᑦ, ᐅᓄᖅᓯᒋᐊᕐᔪᓗᒋᑦ ᐊᔪᙱᓐᓂᖏᑦ ᑕᒪᒃᑯᐊ ᐃᓄᐃᑦ ᓇᖕᒥᓂᖃᕐᕕᖏᑦ ᐊᑭᑦᑐᖃᐅᑎᖃᑕᐅᔪᓐᓇᕐᓗᑎᒃ ᒐᕙᒪᒃᑯᑦ ᑳᓐᑐᕌᒃᑎᑦᑎᔾᔪᑎᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᑦᓯᔪᓐᓇᕐᓗᑎᒃ ᐃᓄᖕᓂᑦ “ᑭᒡᒐᖅᑐᖅᑕᐅᓂᖃᑦᓯᐊᓕᕐᓗᑎᒃ” ᐃᖅᑲᓇᐃᔭᕐᕕᐅᔪᓂ. ᑖᒃᑯᐊ ᒐᕙᒪᒃᑯᑦ, ᓄᓇᕗᑦ ᑐᙵᕕᒃᑯᑦ ᒫᓐᓇᒫᖅ ᐱᐊᓂᕋᑖᓚᐅᕐᒪᑕ ᕿᒥᕐᕈᓂᖃᒻᒪᕆᒃᑐᑎᒃ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᖏᓐᓂᒃ ᐊᒻᒪᓗ ᑕᒪᒃᑯᐊ ᓴᖅᑭᑎᑕᐅᔪᑦ ᐊᒻᒪᓗ ᐊᑐᓕᖁᔭᐅᔪᑦ ᓴᖅᑭᑎᑕᐅᓂᐊᖅᑐᑦ ᒫᓐᓇᒫᖅ. ᑐᓴᒐᒃᓴᓕᕆᔩᑦ ᐅᖃᕐᕕᖃᕐᓗᑎᒃ: ᓃᓄ ᕙᐃᔅᓅᔅᑭ ᓄᓇᕗᑦ ᒐᕙᒪᖏᑦ ᑭᐅᕆ ᒪᑲᓚᔅᑭ ᓄᓇᕗᑦ ᑐᙵᕕᒃᑯᑦ |