 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ - ᔪᐊᑕᓐ ᑐᑐ ᐊᑎᓕᐅᕈᑎᖃᖅᓯᒪᔪᖅ ᐱᖓᓱᓄᑦ ᐊᕐᕌᒍᓄᑦ ᑳᓐᑐᕌᒋᓂᐊᖅᑕᒥᓂᒃ ᑖᒃᓇᓂ (ᓈᔅᕕᐅᓪ ᐳᕆᑎᑐᔅ) Nashville Predators-ᓯᕗᓪᓕᖅᐹᕈᖅᑐᓂ ᐃᓅᓪᓗᓂ ᑲᓇᑕᐅᑉ ᕼᐋᑭᖅᑎᖏᓐᓂ, ᐊᒃᓱᕈᖅᓯᒪᓂᒃᑯᑦ ᐊᑐᕈᓐᓇᖅᓯᓯᒪᔪᖅ ᑲᓇᑕᒥ ᕼᐋᑭᖅᑐᖅᓯᐅᑎᓂᒃ ᐅᕕᓂᕈᕐᒥᑦ. ᑲᖏᖅᖠᓂᕐᒥᐅᖅ, ᓄᓇᕗᑦ, ᑐᑐ ᐊᑎᓕᐅᕈᑎᖃᓚᐅᖅᑐᖅ ᑳᓐᑐᕌᒥᓂᒃ ᐃᓕᓐᓂᐊᖅᑎᓄᑦ ᐅᖃᓕᒪᒋᐊᖅᑐᖅᓯᒪᑎᓪᓗᒍ ᐃᓕᓐᓂᐊᕐᕕᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ. “ᑎᓕᐅᖃᑦᑕᖅᓯᒪᔭᒃᑲ ᒪᒃᑯᒃᑐᑦ ᐃᓄᐃᑦ ᐊᒃᓱᕈᕐᓗᑎᒃ ᐱᓕᕆᖃᑦᑕᖁᓪᓗᒋᑦ ᓴᖅᑭᑎᑦᓯᒐᓱᐊᖅᑎᓪᓗᒋᑦ ᓴᖅᑭᒍᒪᔭᒥᓂᒃ ᐊᒻᒪᓗ ᐅᓪᓗᒥ ᐅᖃᐅᑎᔪᓐᓇᖅᓯᒐᒃᑭᑦ ᐊᒃᓱᕈᕐᓗᓂ ᐱᓕᕆᓗᓂ ᐃᓱᒪᒋᔭᒥᒃ ᓴᖅᑭᑦᑎᓇᕐᓂᖓᓂᒃ,” ᐅᖃᖅᑲᐅᔪᖅ ᑐᑐ. ᖁᕕᐊᓇᕆᐊᓪᓚᒃᑲᓐᓂᖅᑐᖅ ᐊᑎᓕᐅᕈᑎᒋᔪᓐᓇᕋᒃᑯ ᑳᓐᑐᕌᒃᑖᕋ ᓄᓇᕗᒥ, ᐊᕙᑎᒥᐅᑕᕆᓪᓗᒋᑦ ᖃᑕᙳᑎᒃᑲ ᐊᒻᒪᓗ ᐱᖃᓐᓇᕆᔭᒃᑲ ᐃᑲᔪᖅᓱᐃᓯᒪᔪᑦ ᐊᒻᒪᓗ ᐱᒍᒥᓵᕆᓯᒪᔪᑦ.” ᑐᑐ ᑕᒪᒋᔭᐅᓚᐅᖅᑐᖅ ᓂᕈᐊᖅᑕᐅᓪᓗᓂ 2001-ᒥ ᑎᒍᔭᐅᔪᓄᑦ ᐊᒻᒪᓗ ᒪᕐᕉᖕᓂᑦ ᐊᕐᕌᒎᖕᓂᑦ ᑕᑯᑦᐅᑎᑦᓯᓯᒪᔪᖅ ᐊᔪᙱᓐᓂᕐᒥᓂᒃ ᑖᒃᑯᓇᓂ Brandon Wheat Kings ᒪᒃᑯᖕᓂᖅᓴᑦ ᕼᐋᑭᖅᑎᐅᔪᑦ, ᐱᖓᖕᓇᕐᒥ. ᐱᔪᓐᓇᑦᓯᐊᖅᑐᓂᒃ ᐱᙳᐊᖅᑎᐅᓪᓗᓂ ᑐᑐ ᓯᕗᓕᖅᑎᐅᖃᑕᐅᓚᐅᖅᑐᑦ ᐴᖅᓯᔪᓂᒃ ᖃᐅᔨᒪᔭᐅᓕᖅᑐᓂᓗ ᐊᒃᓱᕈᕈᓐᓇᕐᓂᖓ, ᐊᓇᐅᓯᔪᓐᓇᕐᓂᖓ ᐊᒻᒪᓗ ᐃᓱᒪᖃᑦᓯᐊᕐᓂᖓ. ᑖᒃᑯᐊ 2003-ᒥ ᓄᓇᕐᔪᐊᓂ ᒪᒃᑯᖕᓂᖅᓴᑦ ᕼᐋᑭᖅᑏᑦ ᓵᓚᒃᓴᖃᑎᒌᒐᓱᐊᖅᑎᓪᓗᒋᑦ ᑕᑯᒃᓴᐅᑎᑕᐅᓚᐅᖅᑐᖅ ᑐᑑᑉ ᐊᔪᙱᓐᓂᖓ ᐱᙳᖃᑕᐅᓪᓗᓂ ᓄᓇᕐᔪᐊᕐᒥᐅᓄᑦ, ᐃᓚᒋᔭᐅᓪᓗᓂ ᑲᓇᑕᒥ ᕼᐋᑭᖅᑎᓄᑦ, ᐅᔭᒥᒃᑖᓚᐅᖅᑐᑦ ᓯᐅᕙᒥᒃ. “ᑖᒃᑯᓇᓂ Brandon Wheat Kings ᐱᓕᕆᐊᕆᓚᐅᖅᑕᕋ ᐅᐸᐅᑎᖃᑦᑕᖅᓱᖓ ᐊᒻᒪᓗ ᐴᖅᓯᔨᐅᒐᓱᐊᖅᑐᖓ. ᓄᓇᕐᔪᐊᓂ ᕼᐋᑭᓕᐅᑎᔪᖃᖅᑎᓪᓗᒍ ᐱᓕᕆᐊᖃᓚᐅᖅᑐᖓ ᓄᖅᑲᖅᑎᑦᓯᒐᓱᐊᖅᑎᐅᓪᓗᖓ ᐊᑭᕋᑦᑕ ᐴᖅᑎᑦᓯᒐᓱᐊᕐᓂᖏᓐᓂᒃ,” ᐅᖃᖅᑲᐅᔪᖅ ᑐᑐ. ᑐᑐ ᐊᓐᓂᑭᑦᑐᕆᐊᕐᓂᐊᖅᑐᖅ ᑖᒃᑯᓇᓂ Nashville Predators ᐱᓕᒻᒪᒋᐅᖅᓴᕕᖏᓐᓂ ᔫᓂᐅᓕᖅᐸᑦ. ᑖᒃᑯᐊ NorTerra Group of Campanies ᑕᒪᒃᑯᐊ ᓇᖕᒥᓂᖅ ᐱᓕᕆᕕᓖᑦ ᑲᑐᔾᔨᔪᑦ ᐃᑲᔪᖅᓱᐃᔪᑦ “ᑑᑦᒧᑦ” ᐅᑭᐅᖅᑕᖅᑐᒥ ᐅᖃᓕᒪᒋᐊᖅᑐᕐᓂᖏᓐᓄᑦ. ᑖᒃᑯᐊ NorTerra Group ᑲᒻᐸᓂᐅᔪᑦ ᑭᒡᒐᖅᑐᐃᔪᑦ ᐃᓄᕕᐊᓗᖕᓂᑦ ᐅᐊᓕᓂᐅᑉ ᐅᑭᐅᖅᑕᖅᑐᐊᓂ ᐊᒻᒪᓗ ᓄᓇᓯ ᑯᐊᐳᕇᓴᒃᑯᑦ, ᑭᒡᒐᖅᑐᐃᔨᔪᑦ ᓄᓇᕗᒥᑦ. ᐃᓅᓪᓗᓂ ᑲᖏᖅᖠᓂᕐᒥᐅᖅ, ᑐᑐ ᓇᒥᓂᖃᖃᑕᐅᔪᖅ ᓄᓇᓯ ᑯᐊᐳᕆᓴᒃᑯᓐᓂᒃ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ: ᐱᑦᑐᕇᓇ ᒪᒃᑕᓐᓂᐅᓪ (780) 721-9924 |