 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᒪᐃ 2, 2003) -- ᓴᓪᓖᑦ ᕿᑭᖅᑕᖓᓂ ᑐᑦᑐᒥᓂᕐᓂᒃ ᓂᐅᕕᐊᑦᓴᑦᓴᓂᒃ ᑐᑦᑐᓕᐊᕐᓂᐅᖃᑦᑕᖅᑐᖅ ᐊᕐᕋᒍᑕᒫᑦ, ᑕᖅᑭᕆᓚᐅᖅᑕᑎᓐᓂ ᐱᔭᕇᓚᐅᖅᑐᖅ, ᑲᔪᓯᓂᖃᑦᓯᐊᓚᐅᕐᐳᖅ ᑮᓇᐅᔾᔭᓴᕐᕕᐅᓯᐊᖅᑐᒻᒪᕆᐅᓪᓗᓂᓗ, ᐅᖃᖅᑐᖅ ᐃᑯᐱᒃᑐᓕᕆᔨᒃᑯᑦ ᒥᓂᔅᑕᖓ ᐅᓛᔪᒃ ᐊᑭᓱᒃ. ᓴᓪᓕᕐᒥᐅᑕᐃᑦ 61-ᖑᔪᑦ, 98 ᐳᓴᓐᖑᓪᓗᑎᒃ ᐃᓄᓪᓚᑦᑖᑦ, ᐃᖅᑲᓇᐃᔭᓚᐅᕐᐳᑦ ᓂᕿᑦᓴᕐᓯᐅᑎᓪᓗᒋᑦ, ᐃᖅᑲᓇᐃᔭᖅᑐᓄᑦ ᑮᓇᐅᔭᖅᑖᑦᓴᒫᖑᓪᓚᑦᑖᓚᐅᖅᑐᑦ $500,000. ᓄᐊᑕᐅᓚᐅᖅᑎᓪᓗᒋᑦ ᓂᖀᑦ, ᑐᑦᑐᒥᓃᑦ ᓂᕿᓕᕆᕕᖓᒎᖅᑎᑕᐅᓕᓚᐅᖅᑐᑦ ᔫᕈᑉᒥ ᑲᑐᔾᔨᖃᑎᒌᒻᒪᕆᒋᔭᖏᑎᒍᑦ ᐸᐃᒃᐹᖁᑎᑖᕐᓯᒪᔪᑑᔪᑦ ᓯᓚᕐᔪᐊᒥ ᐊᒡᒍᐃᓂᕐᒧᑦ. 250,000 ᐸᐅᓐᓂᒃ ᐅᖁᒪᐃᓐᓂᓖᑦ ᑐᑦᑐᒥᓃᑦ ᐊᐅᓪᓚᖅᑎᑕᐅᓕᓚᐅᕆᕗᑦ ᖃᖏᕐᖠᓂᕐᒧᑦ ᑭᕙᓪᓕᕐᒥ ᐅᑭᐅᖅᑕᖅᑐᒥ ᓂᕿᓕᕆᕕᖓᓄᑦ ᓂᕿᓕᐊᖑᒋᐊᒃᑲᓐᓂᕆᐊᖅᑐᖅᑐᑎᒃ ᐊᐅᓪᓚᖅᑎᑕᑦᓴᒫᖑᓕᖅᑎᑕᐅᓪᓗᑎᓪᓗ ᓄᓇᕐᔪᐊᓕᒫᒧᑦ ᓂᐅᕐᕈᑎᖃᖃᑦᑕᐅᑎᓕᕆᔨᒃᑯᑎᒍᑦ ᓂᐅᕕᐊᑦᓴᓐᖑᖅᑎᑕᐅᓪᓗᑎᒃ. ᑕᒪᓐᓇ ᓴᖅᑮᑲᓐᓂᓚᐅᖅᑐᖅ ᐃᑲᓇᐃᔮᑦᓴᓂᑦ 18-ᓂᒃ. “ᖁᕕᐊᓱᒻᒪᕆᑉᐳᖓ ᑲᔪᓯᑦᓯᐊᕈᓐᓇᓚᐅᕐᓂᖓᓂᒃ ᓴᓪᓖᑦ ᕿᑭᖅᑕᖓᓂ ᑐᑦᑐᒥᓂᖅᑖᕋᐊᕐᓂᐅᓚᐅᖅᑐ ᓂᐅᕕᐊᑦᓴᖅᓴᓂᒃ. ᑐᑦᑐᒥᓂᖅᑖᕋᓱᐊᕐᓂᐅᔪᖅ ᐃᓄᓪᓚᑦᑖᓂᒃ ᐊᒥᓱᒻᒪᕆᓐᓂᒃ ᐃᖅᑲᓇᐃᔮᖑᓚᐅᕐᐳᖅ ᐊᒻᒪᓗ ᐱᕈᕐᐸᓪᓕᐊᖏᓐᓇᖅᑐᓂ ᐊᕐᕌᒍᑕᒫᑦ,” ᐅᖃᖅᑐᖅ ᒥᓂᔅᑕ ᐊᑭᓱᒃ. ᑐᑦᑐᓕᐊᖅᑎᑦᓯᒋᐊᓐᖓᖃᑦᑕᓯᓚᐅᖅᑐᑦ 1994-ᒥ ᓴᓪᓖᑦ ᕿᑭᖅᑕᖓᑕ ᑐᑦᑐᖏᓐᓂᒃ ᐅᓄᕐᓯᓗᐊᖅᑎᓯᑦᑕᐃᓕᑎᑦᓯᒍᒪᓪᓗᑎᒃ, ᒫᓐᓇᓕ ᓇᓚᐅᑦᓵᖅᑕᐅᓯᒪᔪᑦ 61,000-ᖏᓐᓃᒋᐊᖏᑦ. ᑲᑎᕆᓃᑦ ᐊᒥᓱᓐᖑᓗᐊᑲᓴᓚᐅᕐᓯᒪᒻᒪᑕ ᕿᑭᖅᑕᒥ ᓂᕐᔪᑏᓪᓗ ᐊᓯᖏᓐᓂᒃ ᓄᖒᑦᓯᕙᓪᓕᐊᓕᓚᐅᕐᒪᑦ. ᑐᑦᑐᓕᐊᖅᑎᑦᓯᖃᑦᑕᕐᓂᖅ ᐊᐅᓚᑕᐅᔪᖅ ᓴᓪᓕᕐᓂ ᓇᒻᒥᓂᖃᖅᑑᔪᒧᑦ ᐱᕙᓪᓕᐊᑎᑦᓯᔨᐅᔪᒧᑦ. ᑐᑦᑐᓕᐊᖅᑎᑦᓯᓂᐅᖃᑦᑕᖅᑐᖅ ᐊᕐᕌᒍᑕᒫᑦ ᖁᓚᕐᓇᕈᓐᓃᑎᑦᓯᓯᒪᓕᕐᐳᖅ ᑲᑎᕆᓃᑦ ᐊᒥᓱᓐᖑᓗᐊᔾᔮᖑᓐᓃᕆᐊᖏᑦ ᑭᖑᕝᕕᖅᑕᐅᑎᑦᓯᐊᑐᐃᓐᓇᓚᖓᓕᕆᐊᖏᑦ ᐃᑲᔪᕐᓂᖃᕐᓗᓂ ᒪᑭᒪᐅᑕᐅᒃᑲᓐᓂᕈᓐᓇᓕᖅᑐᓂᓗ ᑮᓇᐅᔭᖅᑎᒍᑦ, ᐃᓕᖅᑯᓯᖏᓐᓄᑦ ᐱᖅᑯᓯᖏᓐᓄᓪᓗ ᓄᓇᕗᑦᒥᐅᑦ ᐃᑲᔫᑎᖃᕐᓂᐊᕆᓪᓗᓂ. ᑐᑦᑐᒥᓂᖅᑖᕐᓂᐅᒐᓱᐊᖃᑦᑕᑐᕐᓗ ᓄᖅᑭᐅᕐᕕᖏᓐᓂᒃ ᓴᐳᒻᒥᕐᓯᒍᑎᒋᓂᐊᕐᐹ. ᐊᐅᓚᑦᓯᔨᒻᒪᕆᐅᔪᑦ ᐊᐅᓚᑦᓯᖃᑦᑕᖅᑐᑦ ᑐᑦᑐᒥᓂᖅᑖᕋᓱᐊᕐᓂᕐᒥᒃ ᖃᓄᖅᑑᕆᐊᒃᑲᓐᓂᕈᑎᖃᕐᓂᐊᕐᐳᑦ ᖃᐅᔨᓴᕐᓗᑎᒃ ᐆᒃᑐᕈᑕᐅᒍᒪᔪᓂᒃ ᐱᒻᒪᕆᐅᓂᖏᓐᓂᒃ ᓴᖅᑭᖅᑕᐅᑲᓐᓂᕈᓐᓇᖅᑐᑦ ᑕᕝᕙᓐᖓᑦ ᐊᐅᓚᔭᕇᖅᑐᒥᒃ ᐊᒥᓕᕆᓂᖅ ᐃᓚᐅᓪᓗᓂ, ᐊᒦᑦ ᐃᖃᖅᑎᕋᔭᕈᖅᑎᑕᐅᒍᓐᓇᕐᓂᖏᑦ, ᓇᔾᔪᐃᑦ ᐊᒻᒪᓗ ᖃᖅᑯᓛᑦ ᓂᐅᕕᐊᑦᓴᐅᒍᓐᓇᕐᓂᖏᑦ ᓄᓇᕐᔪᐊᒥ ᓂᐅᕐᕈᑎᖃᖅᑎᓄᑦ ᐊᒻᒪᓗ ᑐᑦᑐᒥᓃᑦ ᓄᓇᕐᔪᐊᒧᑦ ᓂᐅᕐᕈᑕᐅᖃᑦᑕᖅᑐᑦ ᐊᖏᔪᕈᕐᐸᓪᓕᕈᑎᒋᒐᔭᖅᑕᖏᑦ. “ᑕᒪᓐᓇ ᐆᑦᑐᕋᐅᑕᐅᒍᒪᔪᖅ ᐊᑐᑦᓯᐊᑲᓐᓂᕈᑕᐅᒍᓐᓇᕋᔭᕐᒥᒻᒪᑦ ᑐᑦᑐᒥᓂᕐᓄᑦ ᓂᐅᕕᐊᑦᓴᓕᐊᓄᑦ. ᑮᓇᐅᔭᑎᒍᑦ ᐃᑲᔪᕆᐊᒃᑲᓐᓂᕈᑕᐅᒍᓐᓇᒥᒻᒪᑦ ᐊᒻᒪᓗ ᐊᓯᕙᖅᑎᓄᑦ ᐃᖅᑲᓇᐃᔮᖃᕐᓂᕐᒥᒃ ᐃᓱᒪᑦᓴᕐᓯᐅᕈᑕᐅᒃᑲᓐᓂᕈᓐᓇᕐᒪᑦ ᐃᓕᖅᑯᓯᓂ ᐊᑐᕐᓗᒍ,” ᐅᖃᖅᑐᖅ ᒥᓂᔅᓴ ᐊᑭᓱᒃ. ᑐᑭᓯᒋᐊᒃᑲᓂᕐᕕᑦᓴᖅ, ᐅᖄᓚᓗᑎᑦ: ᑭᐅᕆ ᒪᒃᑯᓘᔅᑭ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᐊᖏᔪᖅᑳᖅ, ᐃᑯᐱᒃᑐᓕᕆᔨᒃᑯᓐᓂ ᐅᖃᓚᐅᑖ: (867) 975-5929 ᓱᒃᑲᔪᒃᑰᕈᑖ: (867) 975-5980 kmccluskey@gov.nu.ca |