 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ, ᒪᐃ 29, 2003 - ᕼᐋᑭᖅᑎ ᔪᐊᑕᓐ ᑐᑐ ᐊᑎᓕᐅᕈᑕᐅᓯᒪᔪᖅ ᓄᓇᕗᑦ ᒐᕙᒪᖏᓐᓄᑦ - ᐃᑲᔪᖅᕋᓱᐊᕈᑕᐅᓪᓗᓂ ᑭᒃᑯᓕᒫᓄᑦ. “ᐊᑎᓕᐅᕈᑎᖃᖅᑐᒍᑦ ᐃᓚᒋᔭᐅᓕᖅᑎᑦᑐᒍ ᓄᓇᕗᒥ ᒪᓕᒍᒥᓇᖅᑐᓄᑦ, ᑕᒪᒃᑯᐊ ᑕᑯᒃᓴᐅᑎᑕᐅᕙᒃᑐᑦ ᐊᑭᓐᓇᕐᒥᐅᑕᕐᓄᑦ ᑕᑯᒃᓴᖅᑎᑕᐅᒋᐊᓕᓚᐅᖅᑐᓄᑦ ᖃᑦᓯᑲᓪᓚᐅᓕᖅᑐᑦ ᑕᖅᑮᑦ,” ᐅᖃᖅᑲᐅᔪᖅ ᓯᕗᓕᖅᑎ ᐹᓪ ᐅᑲᓕᖅ. ᑖᒃᑯᐊ ᑲᓇᑕᒥ ᕼᐋᑭᖅᑏᑦ ᑎᒍᓯᓚᐅᕐᒪᑕ, ᐃᓅᓯᒪᔪᒥᒃ ᐊᒻᒪᓗ ᐱᕈᖅᓯᒪᔪᒥᒃ ᓄᓇᕘᓕᖅᑐᒥ, ᐱᕕᒃᓴᖃᖅᑎᑦᑎᖅᑲᐅᖕᒪᑦ, ᐊᑎᓂᓗ ᑐᓂᓪᓗᒍ ᑕᓪᓕᒪᒋᔭᖏᓐᓄᑦ ᐊᑭᓐᓇᕐᒥᐅᑕᓕᐊᕆᔭᐅᓂᐊᖅᑐᓄᑦ ᓴᖅᑭᑎᑕᐅᔪᓂᒃ ᑖᑦᓱᒧᖓ ᒐᕙᒪᐅᔪᒧᑦ. “ᔪᐊᑕᓐ ᐃᓚᓕᐅᑎᔪᖅ ᐊᑐᓃᖅᑐᓄᑦ, ᐅᕙᑦᑎᓐᓂᒃ ᓇᓗᖅᑯᑎᒍᓐᓃᕈᑎᒋᕙᒃᑕᑦᑎᓐᓄᑦ ᐊᒻᒪᓗ ᐱᓕᕆᔾᔪᑎᒋᓕᕈᓐᓇᖃᑦ ᐊᒃᓱᕉᓴᒍᑎᒋᒋᐊᖃᖅᑕᑦᑎᓐᓄᑦ ᓴᖅᑭᖃᑦᑕᖅᑐᓄᑦ. ᐊᔪᙱᓐᓂᖏᑦ ᓯᑯᒥ ᐊᒻᒪᓗ ᓴᙱᓂᖓ ᐃᓕᖅᑯᓯᖓᑕ ᔪᐊᑕ ᐃᓚᒋᓕᐅᑎᕈᑕᐅᖕᒪᑕ,” ᐅᖃᖅᑐᖅ ᐅᑲᓕᖅ. ᒪᓕᒍᒥᓇᖅᑐᓂᒃ ᐊᑭᓐᓇᕐᒥᐅᑕᐃᑦ ᑐᓂᐅᖅᑲᐅᑕᐅᓚᐅᖅᑐᑦ ᑕᖅᑮᑦ ᑲᑦᓯᑲᓪᓚᐅᓕᖅᑐᑦ, ᐃᓕᓐᓂᐊᕐᕕᖕᓄᑦ, ᐋᓐᓂᐊᕐᕕᖕᓄᑦ, ᐸᓖᓯᒃᑯᓐᓄᑦ, ᐃᖅᑲᖅᑐᐃᕕᖕᓄᑦ ᐊᒻᒪᓗ ᒐᕙᒪᒃᑯᑦ ᐊᓪᓚᒡᕕᖏᓐᓄᑦ, ᕼᐊᒻᓕᒃᑯᑦ ᐊᓪᓚᒡᕕᖏᓐᓄᑦ ᐊᒻᒪᓗ ᒪᓕᒐᓕᐅᖅᑏᑦ ᐊᓪᓚᒡᕕᖏᓐᓄᑦ ᓄᓇᕗᓕᒫᒥ. ᐱᒋᐊᕐᓂᖓᓂ ᑕᒪᒃᑯᐊ ᐊᑭᓐᓇᕐᒥᐅᑕᐃᑦ ᐃᒪᖃᖅᑐᑦ ᖃᐅᔨᒪᔭᐅᑦᓯᐊᖅᑐᒥᒃ ᓈᓚᐅᓯᕆᔨᒥᒃ ᒫᑎᓕᓐ ᐊᓚᒃᑲᕆᐊᓪᓚᒃ, ᖃᕆᓴᐅᔭᒃᑯᑦ ᐅᐊᔭᓕᕆᔨ ᔪᐊᔾ ᒥᑦᑐᒃ, ᐊᒻᒪ ᐃᓄᐃᑦ ᐃᑲᔪᖅᑎᖏᑦ ᑐᒡᓕᖏᑦᑕ ᒥᓂᔅᑕᐃᑦ. ᐱᐅᔪᒥᒃ ᑭᐅᒍᑕᐅᖃᑦᑕᕐᓂᖏᑦ ᑕᒪᒃᑯᐊ ᐊᑭᓐᓇᕐᒥᐅᑕᐃᑦ ᓇᓗᓇᐃᖅᓯᖕᒪᑕ ᑖᒃᑯᐊ ᒪᓕᒍᒥᓇᖅᑐᑦ ᐆᒃᑑᑎᑦᓯᐊᕙᐃᑦ ᐱᐅᓯᕚᓪᓕᖅᑎᑦᓯᖃᑦᑕᕐᒪᑕ ᐃᓅᖃᑎᒌᓂᒃ ᐊᒻᒪᓗ ᐱᒻᒪᕆᐅᓂᖓ ᖃᓄᐅᓕᐅᕐᓂᓕᒫᕗᑦ ᐱᕕᒃᓴᖃᕐᕕᖃᑦᑎᐊᖁᓪᓗᒍ ᓄᓇᕗᑦ, ᓯᕗᓕᖅᑎ ᐅᖃᖅᑲᐅᔪᖅ. “ᐱᒻᒪᕆᐅᓂᖅᐹᖅ, ᒪᓕᒍᒥᓇᖅᑐᑦ ᐱᑕᖃᖅᑎᖃᑦᑕᖅᑕᖏᑦ ᒪᒃᑯᒃᑐᖁᑎᑦᑎᓐᓄᑦ. ᐊᐱᕆᒐᔭᕈᕕᑦ ᓇᓪᓕᐊᓂᑐᐃᓐᓇᖅ ᓱᕈᓯᕐᒥᑦ ᓄᓇᕗᒥ ᐱᔾᔪᑎᒋᓪᓗᒍ ᔪᐊᑕᓐ ᐊᒻᒪᓗ ᖃᐅᔨᑲᐅᑎᒋᓂᐊᖅᑐᑎᑦ ᑖᓐᓇ ᒪᓕᒍᒥᓇᕆᔭᐅᓂᖓ.” ᐅᖃᖅᑲᐅᔪᖅ ᐅᑲᓕᖅ. ᑖᓐᓇ ᔪᐊᑕᓐ ᑐᑐᒥᒃ ᐊᑭᓐᓇᕐᒥᐅᑕᓕᐅᕐᓂᖅ ᓴᖅᑭᓐᓂᐊᖅᑐᖅ ᐱᓇᓱᐊᕈᓯᐅᓂᐊᖅᑐᓂ ᐊᒥᓲᙱᑦᑐᓂ ᐊᒻᒪᓗ ᐊᓯᖏᑎᑐᑦ ᒪᓕᒍᒥᓇᖅᑐᑦ ᐊᑭᓐᓇᕐᒥᐅᑎᑐᑦ, ᑐᓂᐅᖅᑲᐅᑕᐅᓂᐊᖅᑐᑦ ᓄᓇᕗᓕᒫᒧᑦ. ᑐᓴᖃᑦᑕᐅᑎᓕᕆᔩᑦ ᐅᖃᕐᕕᖃᕈᓐᓇᖅᑐᑦ: ᕕᓐᑎ ᕼᐋᓗᓇᓐ ᓄᓇᕗᑦ ᒐᕙᒪᖏᑦᑕ ᑐᓴᒐᒃᓴᓕᕆᔨᖏᑦ (867) 975-6046 |