 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᒥᐃ 26, 2003) - ᐃᓕᖁᓯᓕᕆᔨᒃᑯᑦ ᐃᓕᓐᓂᐊᖅᑎᑦᓯᓚᐅᖅᐳᑦ ᑮᓇᐅᔭᓕᕆᓂᕐᒧᑦ ᑕᐃᒎᓯᓂᒃ ᐃᖃᓗᖕᓂ, ᒥᐃ 12-16, 2003-ᒥ. ᐃᓕᓐᓂᐊᕐᓂᐅᔪᖅ ᑲᑎᑎᑦᓯᕈᓘᔭᓚᐅᖅᐳᖅ ᑐᓵᔨᐅᔪᓂᒃ ᑐᑭᓕᐅᖅᑎᐅᔪᓂᒡᓗ ᐃᓚᖏᓐᓂ ᓄᓇᕗᒥᐅᑕᐅᔪᓂ ᐊᒻᒪ ᐃᓄᐃᓐᓇᖅᑐᑦ ᐅᖃᓯᓖᑦ ᐃᓚᐅᓚᐅᕆᕗᑦ. ᓄᓇᕘᑉ ᐅᖃᐅᓯᓕᕆᓂᕐᒧᑦ ᑲᒥᓯᓇᖓ, ᐃᕙ ᐋᕆᐊᖅ ᐃᓚᐅᖃᑕᐅᓚᐅᕆᕗᖅ ᐊᒻᒪ ᒪᕉᒃ ᐊᕙᑕᒃᑯᑦ ᐃᓕᖁᓯᓕᕆᔨᒃᑯᖏᓐᓂ ᐅᖃᖃᑎᖃᖃᑕᐅᓚᐅᕆᕗᑦ ᖃᓄᖅ ᐅᖃᐅᓯᓂᒃ ᑕᐃᒎᓯᓂᕐᒥᒃ ᐱᕙᓪᓕᐊᑎᑦᓯᔪᓐᓇᕐᓂᖏᓐᓂᒃ ᓄᓇᕕᖕᒥ. ᐱᔾᔪᑕᐅᓚᐅᖅᑐᖅ ᐃᓕᓐᓂᐊᖅᑎᑦᓯᓂᕐᒧᑦ ᓇᓗᓇᐃᕆᑲᓐᓂᕈᒪᓪᓗᑎᒃ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᑦ ᑮᓇᐅᔭᓕᕆᓂᕐᒧᑦ ᑕᐃᒎᓯᐅᕙᓚᐅᖅᑐᓂᒃ ᐊᑐᖅᑕᐅᓂᑯᕕᓃᑦ ᑭᖑᓂᕐᒥᒃ ᐊᒻᒪᓗ ᐊᖏᖃᑎᒌᒍᓐᓇᖁᓪᓗᒋᑦ ᑕᒪᐃᓐᓄᑦ ᓈᒻᒪᒋᔭᐅᔪᓂᒃ ᑕᐃᒎᓰᑦ ᐊᑐᖅᑕᐅᕙᓕᖅᑐᑦ ᓇᓂᑐᐃᓐᓇᖅ ᒐᕙᒪᒃᑯᓐᓄᑦ. ᑲᑎᒪᖃᑕᐅᓚᐅᖅᑐᑦ ᐅᖃᐅᓯᖃᓚᐅᕆᕗᑦ ᖃᓄᖅ ᐃᑲᔪᖅᑐᐃᑲᓐᓂᕈᓐᓇᕐᓂᖏᓐᓂᒃ ᑐᓵᔨᐅᔪᓂᒃ ᑐᑭᓕᐅᕆᔩᐅᔪᓂᒡᓗ ᐊᓯᖏᓐᓂᒡᓗ ᑕᖃᐅᖓ ᐃᓄᖕᓄᑦ ᐊᑐᓕᖅᑎᑦᓯᓇᓱᐊᕐᓗᑎᒃ ᑕᐃᒎᓯᓂᒃ ᐊᖏᕈᑎᒋᔭᐅᓚᐅᖅᑐᓂᒃ ᑲᑎᒪᑎᓪᓗᒋᑦ ᑕᒪᑐᒧᖓ. ᑕᒪᒃᑯᐊ ᐅᖃᐅᓰᑦ ᑕᐃᒎᓯᖏᑦ ᓂᐱᓕᐅᖅᑕᐅᓂᐊᖅᐳᑦ ᐊᒻᒪᓗ ᐃᓚᓕᐅᑎᔭᐅᓗᑎᒃ ᐊᓱᐃᓪᓛᒧᑦ, ᐃᓕᖁᓯᓕᕆᔨᒃᑯᑦ ᖃᐅᕆᑕᐅᔭᖓᓐᓄᑦ ᐃᓕᐅᖃᖅᑕᐅᕙᓪᓕᐊᔪᒧᑦ ᐅᖃᐅᓰᖅ ᑕᐃᒎᓯᖏᑦᑕ ᑐᑭᖏᑦ ᑐᖁᖅᑎᑕᐅᕙᓪᓕᐊᓂᖏᑦ “ᐋᕿᒃᓱᐃᕙᓪᓕᐊᓂᖅ ᐊᒻᒪᓗ ᐊᑕᐅᓯᖑᖅᑎᑦᓯᓇᓱᐊᕐᓂᖅ ᐃᓄᐃᑦ ᐅᖃᐅᓯᖓᓐᓂᒃ ᑕᐃᒎᓰᑦ ᐱᓪᓚᕆᒻᒪᕆᐅᕗᖅ ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᔪᓐᓇᕐᓂᐊᖅᑎᓪᓗᒍ ᑕᒪᐃᓐᓂᒃ ᐱᓕᕆᕝᕕᐅᔪᓂᒃ ᒐᕙᒪᒃᑯᓐᓂ,” ᐅᖃᖅᐳᖅ ᒥᓂᔅᑕᐅᔪᖅ ᐃᓕᖁᓯᓕᕆᔨᒃᑯᓐᓄᑦ. “ᑕᒪᒃᑯᐊ ᐃᓕᓐᓂᐊᕐᓂᐅᕙᒃᑐᑦ ᐃᑲᔪᕐᓂᖃᒻᒪᕆᖕᓂᐊᖅᐳᑦ ᑲᕙᒪᒃᑯᓐᓂ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᑦ ᐅᖃᕈᓐᓇᖅᑐᓂᒃ ᑐᑭᓯᐅᒪᑎᑕᐅᖏᓐᓇᕐᓗᑎᒃ ᖃᓄᐃᑦᑐᓂᒃ ᐱᓕᕆᐊᖃᕐᓂᑉᑎᓐᓂ,” ᐅᖃᖅᐳᖅ. ᐃᓚᒋᐊᕐᓗᒍᓗ ᑕᒪᑐᒧᖓ ᓄᑖᒧᑦ ᐅᖃᐅᓯᓕᕆᓂᕐᒧᑦ, ᑲᑎᒪᖃᑕᐅᓚᐅᖅᑐᑦ ᐅᖃᐅᓯᖃᓚᐅᕆᕗᑦ ᑕᒪᒃᑯᓂᖓ ᖃᐅᔨᓴᑲᓐᓂᕆᐊᖃᕐᓂᖏᓐᓂᒃ ᐃᓕᖁᓯᓕᕆᓂᕐᒧᑦ ᑕᐃᒎᓰ ᐊᒻᒪᓗ ᐱᖁᓯᕆᔭᐅᕙᒃᑐᑦ ᖃᐅᔨᒪᔭᐅᔪᑐᐃᓐᓇᐃᑦ ᐃᓚᖏᓐᓄᑦ ᐃᓐᓇᕐᓄᑦ ᐅᓗᕆᐊᓇᖅᑐᒥᓕᕐᓂᖏᓐᓂᒃ ᐊᓯᐅᔨᔭᐅᑐᐃᓐᓇᕆᐊᖃᓕᕐᒪᑕ. ᐃᓕᖁᓯᓕᕆᔨᒃᑯᑦ ᑕᐃᒪᓐᓇᓴᐃᓐᓇᖅᓱᓕ ᐃᓕᓐᓂᐊᖅᑎᑦᓯᑲᓐᓂᕈᒪᕗᑦ ᑲᔪᓰᓐᓇᕐᓂᐊᖅᑐᓂᒃ ᓴᖏᓕᖅᑎᑦᓯᕙᓪᓕᕈᑎᐅᓂᐊᖅᑐᓂᒃ ᐃᓄᒃᑎᑐᑦ ᐃᓄᐃᓐᓇᖅᑎᑐᓪᓗ ᐊᐅᓚᔾᔪᑕᐅᓂᐊᖅᑐᓂᒃ ᒐᕙᒪᒃᑯᓐᓂ. ᑐᑭᓯᒋᐊᑲᓐᓂᕈᒪᒍᕖᑦ ᐅᖃᓗᒍᓐᓇᖅᐳᑎᑦ ᐅᕗᖓ: ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ, ᐅᖄᓚᕕᒋᓗᒍ ᐱᓂ ᕋᒻᕚᓪᑦ ᑐᓴᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᔨ ᐃᓕᖅᑯᓯᓕᕆᔩᑦ, ᐅᖃᐅᓯᓕᕆᓂᖅ, ᐃᓐᓇᑐᖃᓕᕆᓂᖅ, ᐅᕕᒃᑲᓕᕆᓂᕐᓗ (867) 975-5509 |