 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᒪᐃ 23, 2003) - ᐃᑯᐱᒃᑐᓕᕆᔨᒃᑯᑦ ᒥᓂᔅᑕᖓᑦ ᐅᓛᔪᒃ ᐊᑭᓱᒃ ᐅᓪᓗᒥ ᐅᖃᖅᑲᐅᕗᖅ ᑲᓇᑕᒥ ᓂᕿᓂᒃ ᖃᐅᔨᓴᐃᔨᓂᒃ ᐊᔭᐅᕆᖁᓪᓗᒋᑦ ᑲᓇᑕᒥ ᑕᐅᑦᓰᖃᑕᐅᕙᒃᑐᓂᒃ ᐲᖅᑕᐅᖁᓗᒋᑦ ᓄᓇᐅᑉ ᐊᓯᐊᓄᑦ ᓄᑎᕆᔪᓐᓇᖏᓐᓂᕐᒥᑦ ᐃᓘᓐᓇᖏᓐᓄᑦ ᓄᓇᕗᒥ ᑐᒃᑐᓂᒃ, ᐅᒥᖕᒪᖕᓂᓪᓗ ᓴᓇᓯᒪᔪᓂᒃ. ᐊᒥᐊᓕᑲᒃᑯᑦ ᓂᕿᓂᒃ ᐱᕈᖅᓰᔨᓕᕆᔨᖏᑦ ᐋᖅᑭᒃᓯᓚᐅᖅᓯᒪᖕᒪᑕ ᓄᖅᑲᖅᑎᑕᐅᔾᔪᑎᓂᒃ ᐃᓘᓐᓇᖏᓐᓂᒃ ᑲᓇᑕᒥ ᐱᕈᖅᑐᓂᒃ ᓂᕆᕙᒃᑐᓂᒃ ᓂᕐᔪᑎᓂᒃ ᐊᒻᒪ ᓴᓇᔭᐅᓯᒪᔪᓂᒃ ᑕᒪᒃᑯᐊ ᐃᓚᖏᓐᓂ ᒪᐃ 21, 2003 ᐅᖃᐅᔾᔭᐅᒐᒥᒃ ᐃᒻᒧᒃᓯᐅᒐᕐᒥᒃ ᐊᑕᐅᓯᕐᒥᒃ ᐅᐊᖕᓇᖓᓂᒃ ᐃᐅᕘᑕ ᖃᐅᔨᔭᐅᓚᐅᕐᒪᑦ ᐋᓐᓂᐊᖃᕐᓂᖓᓂᒃ ᓲᕐᓗ ᓯᓇᐅᑦᓯᓇᖅᑐᖅ (ᐱᖦᖤᖏᓴᖅᑐᑦ) ᖃᕆᓴᕐᓂᒃ ᐊᑦᑐᐃᕙᒃᑐᑦ. ᖃᓄᐃᓕᐅᕆᐊᕐᓂᖏᑦ ᐊᓯᖏᑦᑕ ᑲᓇᑕᒥ ᑕᐅᖅᓰᖃᑎᖃᖃᑦᑕᕐᓂᕐᒧᑦ ᐃᑲᔪᖅᐸᒃᑐᑦ ᖃᓄᐃᓕᐅᕆᐊᕈᑎᖃᑲᐅᖅᑐᓚᐅᖅᑐᑦ ᐊᒻᒪᓗ ᓄᓇᐅᑉ ᐊᓯᐊᓄᑦ ᓄᒃᑎᕆᖃᑦᑕᕐᓂᖅ ᓄᖅᑲᖅᑎᑕᐅᓯᒪᓂᖓᑦ ᑲᓇᑕᒥ ᐱᕈᖅᑐᓂᒃ ᓂᕆᔪᑦ ᓂᕐᔪᑏᑦ ᓇᒥᑐᐃᓐᓈᓕᕐᒪᑦ. ᐱᔾᔪᑎᒋᓪᓗᒋᑦ ᑐᒃᑐᐃᑦ, ᐅᒥᖕᒪᐃᓪᓗ ᓴᓇᔭᐅᕙᖕᒪᑕ ᓄᓇᕗᒥ ᓂᕿᓕᕆᕕᖕᓂ, ᐱᕈᖅᓰᕕᐅᙱᑐᒥᓗ ᓂᕿᓂᒃ ᐱᔭᐅᓯᒪᓪᓗᑎᒃ ᓄᓇᑐᐃᓐᓇᕐᒥᑦ ᐅᐸᒃᑕᐅᒐᔪᙱᑦᑐᓂᒃ ᐊᒻᒪᓗ ᓴᓂᓕᖃᔾᔮᒐᑎᒃ ᐃᒻᒧᒃᓯᐅᒐᕐᓂᒃ, ᓰᐲᓪᓗ ᐊᓯᖏᓪᓗ, “ᐅᖃᖅᑐᖅ ᒥᓂᔅᑕ ᐅᓛᔪᒃ ᐊᑭᓱᒃ. ᑕᒪᓐᓇ ᐱᒻᒪᕆᐅᖕᒪᑦ ᐅᖃᐅᓯᒃᓴᖅ ᓄᓇᕗᒧᑦ ᐱᔾᔪᑎᒋᓪᓗᒋᑦ ᑕᒪᑐᒪ ᑕᑭᓪᓕᒋᐊᖅᓯᒪᓂᖓ ᓄᖅᑲᖅᑎᑦᑎᓯᒪᓂᐅᑉ ᑕᒪᒃᑯᓂᖓ ᐊᒃᑐᐃᓂᐊᕐᒪᑦ ᑭᕙᓪᓕᕐᒥ ᓂᕿᓕᕆᕕᖕᒥᑦ ᑲᖏᖅᖠᓂᕐᒥ, ᕿᑎᕐᒥᐅᑦ ᓂᕿᓕᕆᕕᐊᓂᓪᓗ ᐃᖃᓗᒃᑑᑦᑎᐊᒥ. ᐅᖓᑖᓄᑦ $400,000 ᑕᐅᖅᓰᖃᑎᖃᖃᑦᑕᕐᓂᒃᑯᑦ ᔭᒐᐃᔭᐅᓯᒪᔪᑦ ᐊᒻᓗ ᑎᑭᒍᓐᓇᖅᑐᑎᒃ 20-ᓄᑦ ᐃᖅᑲᓇᐃᔭᖅᑎᓄᑦ ᐊᒃᑐᖅᑕᐅᒐᔭᖅᑐᓄᑦ. “ᐃᑲᔪᖅᓱᑦᓯᐊᖅᑕᕗᑦ ᐱᓕᕆᐊᕆᒐᓱᐊᖅᑕᖏᑦ ᑭᕙᓪᓕᕐᒥ ᓂᕿᓕᕆᔩᑦ, ᑭᑎᕐᒥᐅᑦ ᓂᕿᓕᕆᕕᖓᑦ ᐊᒻᒪᓗ ᓄᓇᕗᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐲᖅᑕᐅᑎᑦᑎᒐᓱᐊᖅᑎᓪᓗᒋᑦ ᑐᒃᑐᐃᑦ ᐊᒻᒪᓗ ᐅᒥᖕᒪᐃᑦ ᓂᕿᖏᓐᓂᒃ ᐊᑖᒍᑦ ᑖᑦᓱᒪ ᓄᖅᑲᖅᑎᑦᑎᓯᒪᔾᔪᑕᐅᔫᑉ,” ᒥᓂᔅᑕ ᐊᑭᓱᒃ ᐅᖃᖅᑲᐅᔪᖅ. ᐱᓕᕆᐊᕆᔭᐅᕙᓪᓕᐊᓕᖅᑐᖅ ᐲᖅᑎᑦᑎᔾᔪᑕᐅᒐᓱᐊᖅᑐᑦ ᓄᓇᕗᑦ ᓂᕿᖁᑎᖏᑦ ᐃᓚᑎᑕᐅᖁᓇᒋᑦ ᓄᖅᑲᖓᑎᑕᐅᔪᓄᑦ. ᑐᑭᓯᒋᐊᒃᑲᓐᓂᕈᒪᒍᕕᑦ: ᑭᐅᕆ ᒪᑲᓚᔅᑭ ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ ᐃᑯᐱᒃᑐᓕᕆᔨᒃᑯᑦ, ᓄᓇᕗᑦ ᒐᕙᒪᖏᑦ ᐅᖃᓘᑖ: (867) 975-5929 ᓱᑲᑦᑐᒃᑯᑦ (867) 975-5980 |