 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᒪᐃ 2, 2003) - ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᖏᑦ ᐃᓕᓴᕆᔭᐅᔾᔪᑎᑖᖅᑎᑦᓯᓚᐅᕐᒪᑕ ᒪᕐᕉᓐᓂᒃ ᐊᕐᓈᓐᓂᒃ ᓯᕗᓪᓕᕐᐹᒥ ᐃᓕᓴᕐᓯᓂᐊᕐᐳᑦ ᐊᕐᕌᒍᑕᒫᕐᓯᐅᑕᐅᓂᐊᓕᖅᑐᒥᑦ ᐃᓕᓴᕆᔭᐅᔾᔪᒻᒥᒃ ᐃᓄᒃᑎᑐᑦ/ᐃᓄᐃᓐᓇᑐᓪᓗ ᐅᖃᐅᓯᓕᕆᓂᕐᒧᑦ. ᐃᓕᓴᕆᔭᐅᔾᔪᑎᑖᖑᑎᑕᐅᔪᖅ ᓄᓇᕗᑦᒥᐅᓄᑦ ᐳᐃᒍᖅᑕᐅᑦᑕᐃᓕᒪᑎᑦᓯᖃᑦᑕᖅᑐᓄᑦ ᐊᑐᖅᑕᐅᒋᐊᒃᑲᓂᖅᑎᑦᓯᖃᑦᑕᖅᑐᓄᓪᓗ ᐃᓄᐃᑦ ᐅᖃᐅᓯᖏᓐᓂᒃ ᐃᓕᖅᑯᓯᕐᒥᑎᒍᑦ. ᒍᐊᓐ ᐅᕼᐅᑲᒃ ᐃᖃᓗᑦᑑᑎᐊᕐᒥᐅᑕᖅ ᐃᓕᓴᕆᔭᐅᔾᔪᑎᑖᓚᐅᕐᐳᖅ ᐃᓄᐃᓐᓇᖅᑐᖅ ᐅᖃᐅᓯᓕᕆᓂᕐᒧᑦ ᑐᓂᔭᐅᔾᔪᑎᖃᖅᑐᓂ ᐃᓄᐃᓐᓇᖅᑐᑦ ᐅᖃᐅᓯᓕᕆᓂᕐᒧᑦ ᐋᖅᑭᑦᓱᐃᓯᒪᓂᖓᓂᒃ ᓯᕗᓪᓕᐹᑦᓯᐊᒥ ᓴᓇᔭᐅᒋᐅᖅᑎᓪᓗᒋᑦ ᐅᖃᐅᓰᑦ ᑐᑭᖏᑦ. ᐃᓕ ᕼᐃᒋᓐᔅ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᓚᐅᖅᑐᖅ ᐊᑐᖅᑕᐅᒋᐊᒃᑲᓂᖅᑎᑦᓯᖃᑦᑕᑎᓪᓗᒍ ᐱᕙᓪᓖᓯᒪᑎᓪᓗᒍᓗ ᐃᓄᒃᑑᓂᕐᒥᒃ ᐃᓕᓐᓂᐊᖅᑎᒥᓂᒃ ᐃᖃᓗᓐᓂ ᔫᒥ ᐃᓕᓐᓂᐊᕐᕕᒻᒥ. ᑖᒃᑯᐊ ᑕᒪᒃᑮᒃ ᐊᓯᖏᑎᒍᑦ ᐃᑲᔪᖃᑦᑕᕐᓯᒪᒻᒥᔫᒃ ᐳᐃᒍᖅᑕᐅᑦᑕᐃᓕᒪᑎᑦᓯᖃᑦᑕᖅᑐᑎᒃ ᐊᑐᖅᑕᐅᒋᐊᒃᑲᓐᓂᖅᑎᑦᓯᖃᑦᑕᖅᑐᑎᓪᓗ ᐃᓄᐃᑦ ᐅᖃᐅᓯᖏᓐᓂᒃ. ᐃᓕᓴᕆᔭᐅᔾᔪᑎᑖᓚᐅᖅᑑᒃ ᑐᓂᔭᐅᓪᓗᑎᒃ ᐃᓄᒃᑎᑐᑦ ᐅᖃᐅᑦᑎᓐ ᐱᓇᓱᐊᕈᓯᖓᓂ (ᐅᖃᐅᓯᓕᕆᓂᕐᒧᑦ ᐱᓇᓱᐊᕈᓯᖅ) ᐊᐃᑉᐳᓘ 27, 2003. “ᑖᒃᑯᐊ ᑐᓐᓂᖅᑯᑕᐅᔫᒃ ᐃᑲᔪᕐᓯᒪᓂᓖᒃ ᒐᕙᒪᒃᑯᑦ ᐃᓕᖅᑯᓯᓕᕆᔨᖏᑦ ᑲᒪᔪᒃᓴᒫᖑᓯᒪᓂᖏᓐᓂᒃ ᐳᐃᒍᖅᑕᐅᑦᑕᐃᓕᒪᑎᑦᓯᓂᕐᒧᑦ ᐊᑐᖅᑕᐅᒋᐊᒃᑲᓂᖅᑎᑦᓯᓂᕐᒧᓪᓗ ᐃᓄᐃᑦ ᐅᖃᐅᓯᖓᓐᓂᒃ, ᑭᓯᐊᓂ ᑖᒃᑯᑑᓗᑕ ᑲᔪᓯᑎᒍᓐᓇᖏᓐᓇᑦᑎᒍ. ᓄᓇᓕᒃ ᐊᑐᕋᓱᐊᑐᐊᕐᐸᑦ ᑕᒪᓐᓇ ᑲᔪᓯᑦᓯᐊᕈᓐᓇᕐᒪᑦ. ᖃᐅᔨᓚᐅᕐᐳᒍᑦ ᐊᒥᓱᒻᒪᕆᐊᓗᐃᑦ ᓴᓐᖏᓕᖅᑎᑦᓯᓯᒪᒻᒪᑕ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐃᓄᒃᑐ/ᐃᓄᐃᓐᓇᑐᓪᓗ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᑎᑖᖃᑦᑕᓂᐊᖅᑐᑦ ᑕᐃᒫᒃ ᐃᑲᔪᕐᓯᒪᓂᖃᖃᑦᑕᕆᐊᖃᕐᓂᐊᕐᐳᑦ,” ᐅᖃᖅᑐᖅ ᐲᑕ ᕿᓚᕝᕙᖅ, ᐃᓕᖅᑯᓯᓕᕆᔨᒃᑯᓐᓄᑦ ᒥᓂᔅᑕ. ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᑎᑖᖅᑎᑦᓯᓂᖅ ᑐᕌᖓᑎᑕᐅᕗᖅ ᑲᔪᖏᕐᓴᕆᐊᒃᑲᓐᓂᕈᒪᓪᓗᒋᑦ ᐊᒥᓲᓂᕐᓴᐃᑦ ᐊᑐᕆᐊᒃᑲᓐᓂᖁᓪᓗᒋᑦ ᐃᓄᒃᑐᑦ/ᐃᓄᐃᓐᓇᑐᓪᓗ ᐅᖃᐅᓯᕐᒥᓐᓂᒃ ᔭᒐᑦᑕᐃᓕᒪᑎᑦᓯᒋᐊᒃᑲᓐᓂᒃᓯᒪᖁᓪᓗᒋᑦ. ᒥᓂᔅᑕ ᐲᑕ ᕿᓚᕝᕙᖅ, ᐊᐃᑉᐳᓘ 27ᒥ ᑐᓂᓯᓚᐅᖅᑐᖅ ᐃᓄᐃᓐᓇᖅᑐᑦ ᐃᓕᓴᕆᔭᐅᔾᔪᒻᒥᒃ ᒍᐊᓐ ᐅᕼᐅᑲᕐᒧᑦ ᐃᖃᓗᒃᑑᑦᑎᐊᑉ ᐱᓐᖑᐊᕐᕕᖓᓂ ᑲᑎᒍᑕᐅᓯᒪᓪᓗᓂ, ᑕᐃᑲᓃᖃᑎᒋᓪᓗᓂᐅᒃ ᑮᓇᐅᔭᓕᕆᓂᕐᒧᑦ ᒥᓂᔅᑕ ᑭᐅᕙᓐ ᐃᖕ. ᒪᓕᒐᓕᐅᖅᑎ ᐃᖃᓗᒃᑑᑦᑎᐊᒧᑦ. ᒥᓂᔅᑕ ᑐᓂᓯᓚᐅᕐᒥᔪᖅ ᐃᓄᒃᑐᑦ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᒻᒥᒃ ᐃᓕ ᕼᐃᒋᓐᔅ-ᒧᑦ ᔫᒥ ᐃᓕᓐᓂᐊᕕᒻᒥ ᒪᐃ 2-ᖑᑎᓪᓗᒍ, ᑕᐃᑲᓃᖃᑕᐅᓪᓗᓂ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᒪᓃᑦᑐᖅ ᑖᒻᓴᓐ. ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᖏᑦ ᑐᓂᓯᒍᒫᕐᓂᐊᕐᒥᔪᑦ ᐃᓄᒃᑐᑦ ᐃᓄᐃᓐᓇᑐᓪᓗ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᑎᓂᒃ ᐊᕐᕌᒎᑉᐸᑦ ᐅᖃᐅᓯᓕᕆᓂᐅᑉ ᐱᓇᓱᐊᕈᓯᕆᓕᕐᒥᑉᐸᐅᒃ. ᓂᕈᐊᕋᑦᓴᓐᖑᖅᑎᑦᓯᒍᑏᑦ ᐊᐃᑦᓯᕐᕕᐅᔪᓐᓇᖅᑐᑦ ᐅᖄᓚᓗᑎᑦ ᐊᑭᖃᓐᖏᑦᑐᒧᑦ 1-866-934-2035-ᒧᑦ ᖃᕆᓴᐅᔭᒃᑯᓘᓐᓃᑦ ᑎᑎᕋᕐᓗᑎ ᑐᕌᕈᑎᖓ cley@gov.nu.ca. ᑐᑭᓯᒋᐊᒃᑲᓂᕐᕕᑦᓴᖅ, ᐅᖄᓚᓗᑎᑦ: ᐱᐊᓂ ᕌᒻᕘᑦ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᐊᖏᔪᖅᑳᖅ ᒐᕙᒪᒃᑯᑦ ᐃᓕᖅᑯᓯᓕᕆᔨᖏᓐᓂ (867) 979-5509 |