 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᒫᔾᔨ 28, 2003) - ᒥᓂᔅᑕ ᐱᓕᕆᐊᖃᖅᑐᖅ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᑭᐅᓪᕙᓐ ᐃᖕ ᑎᒃᑯᐊᖅᓯᔪᖅ ᓄᑖᓂᒃ ᐃᖃᓗᐃ ᐃᒡᓗᓕᕆᔨᖏᑦᑕ ᑲᑎᒪᔨᒋᓂᐊᖅᑕᖏᓐᓂᒃ ᑕᒪᒃᑯᐊ ᐊᐅᓚᑕᐅᑦᓯᐊᖁᓪᓗᒋᑦ ᓴᖅᑭᑎᑕᐅᓯᒪᒋᐊᓖᑦ ᐃᒡᓗᖃᖅᑎᑦᓯᓂᕐᒧᑦ ᐊᖓᔪᖅᑳᖃᕐᕕᖕᒥ. ᑖᒃᑯᐊ ᓄᑖᑦ ᑲᑎᒪᔩᑦ ᐃᓇᖐᔪᑦ ᑲᑎᒪᔨᐅᑲᐃᓐᓇᖅᑐᓂᒃ ᑎᒃᑯᐊᖅᑕᐅᓚᐅᖅᑐᑦ ᓄᙳᐊᓂ ᕕᕝᕗᐊᕆ. ᐊᑖᒍᑦ ᐃᒡᓗᓕᕆᔨᕐᔪᐊᒃᑯᑦ ᐱᖁᔭᖏᑎᒍᑦ, ᒥᓂᔅᑕ ᐱᔪᓐᓇᐅᑎᖃᕐᒪᑦ ᑎᒃᑯᐊᖅᓯᔪᓐᓇᖅᑐᓂ ᑲᑎᒪᔨᓂᒃ ᐃᖃᓗᐃᑦ ᐃᒡᓗᓕᕆᔨᖏᑦᑕ ᑲᑎᒪᔨᖏᓐᓂ. “ᖁᕕᐊᓱᒻᒪᕆᒃᑐᖓ ᐊᒥᓲᓂᖏᓐᓂᒃ ᑲᑎᒪᔨᕈᖁᔭᐅᓚᐅᖅᑐᑦ ᐅᕙᓐᓅᖅᑕᐅᔪᑦ ᓂᕈᐊᖅᓯᕐᓂᕐᒧᑦ ᑲᑎᒪᔨᖃᓛᓄᑦ,” ᒥᓂᔅᑕ ᐃᖕ ᐅᖃᖅᑲᐅᔪᖅ. “ᑖᒃᑯᐊ ᓄᑖᑦ ᑲᑎᒪᔩᑦ ᑭᒡᒐᖅᑐᐃᔪᑦ ᐊᔾᔨᒌᙱᑦᑐᓂᒃ ᐃᓄᖕᓂᑦ, ᖃᓪᓗᓈᓂᓪᓗ, ᐊᕐᓇᓂᒃ, ᐊᖑᑎᓂᓪᓗ ᐊᒻᒪᓗ ᓇᖕᒥᓂᖅ ᐊᖏᕐᕋᖃᖅᑐᓂᒃ ᐊᒻᒪᓗ ᐃᒡᓗᓕᕆᔨᒃᑯᓐᓂ ᐊᑐᖅᑐᐊᖅᑎᓂᒃ. ᓇᓗᙱᓚᖓ ᑖᒃᑯᐊ ᓄᑖᑦ ᑲᑎᒪᔩᑦ ᐱᓕᕆᑦᓯᐊᕐᓂᐊᖅᑐᑦ, ᐱᒻᒪᕆᐅᑎᑦᑎᓗᑎᒃ ᐊᒻᒪᓗ ᐱᑦᓯᐊᕐᓗᑎᒃ ᐃᒡᓗᖃᖅᑎᑦᓯᓂᕐᒧᑦ ᐃᑲᔫᑕᐅᔪᓂᒃ ᓄᓇᓕᐊᓐᓄᑦ ᐃᖃᓗᐃᑦ.” ᑖᒃᑯᐊ ᓄᑖᑦ ᑲᑎᒪᔩᑦ ᐃᓚᖃᖅᑐᑦ: ᓲᓴᓐ ᒑᑦᓇ ᐃᒃᓯᕙᐅᑕᐅᓪᓗᓂ, ᐹᓖᓐ ᐊᓖᖕᒐ, ᑏᕕᑦ ᐋᓐᒍᕉᕝ, ᓯᑏᕝ ᕗᕇᐅᓪ, ᐋᓂ ᔪᐊᓂ, ᓴᐃᒪᓐ ᓇᑖᖅ ᐊᒻᒪᓗ ᒋᐅᓴ ᐅᓂᖅᓯᐅᒐᖅ. “ᑕᑯᓂᐊᕈᒪᕗᖓ ᐃᑲᔫᑎᒋᓂᐊᖅᑕᖏᓐᓂᒃ ᑖᒃᑯᐊ ᓄᑖᑦ ᑲᑎᒪᔩᑦ ᐃᒡᓗᓕᕆᔨᕐᔪᐊᒃᑯᓐᓄᑦ ᐱᓕᕆᐊᒃᓴᒥᓂᒃ ᐱᖠᕿᐊᖃᖅᑎᓪᓗᒋᑦ ᐃᒡᓗᖃᖅᑎᑦᓯᓂᕐᒥᑦ ᐃᖃᓗᖕᒥᐅᓂᒃ,” ᐃᓚᒋᐊᕆᓪᓗᓂ ᒥᓂᔅᑕ ᐃᖕ. ᑕᒪᓐᓇ ᑎᒃᑯᐊᕆᓂᖅ ᐱᒋᐊᕐᓂᐊᖅᑐᖅ ᐊᐃᐳᕈ 1, 2003 ᐊᒻᒪᓗ ᐊᑯᓂᐅᑎᒋᓂᖃᕐᓂᐊᖅᑐᖅ ᐊᕐᕌᒎᖕᓂᑦ ᒪᕐᕉᖕᓂᑦ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ ᒍᕆᔅ ᓚᓛᓐ ᐊᓪᓚᒡᕕᐊ ᒥᓂᔅᑕᐅᑉ ᐱᓕᕆᐊᖃᖅᑑᑉ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓄᑦ (867) 975-5076 |