 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᑲᖏᖅᖠᓂᖅ, ᓄᓇᕗᑦ, ᒫᔾᔨ 26, 2003 -- ᐱᒻᒪᕆᐅᔪᖅ ᖃᓄᐃᓕᐅᕈᑕᒋᐊᖅᑐᖅ ᓴᖅᑭᑎᑦᑎᔾᔪᑕᐅᕙᓪᓕᐊᓪᓗᓂ ᑮᓇᐅᔭᓕᐅᕈᑕᐅᔪᓐᓇᖅᑐᓄᑦ ᐱᕙᓪᓕᐊᑎᑦᑎᓂᕐᒧᑦ ᐸᕐᓇᐅᑏᑦ ᓄᓇᕗᒧᑦ ᐱᐊᓂᒃᑕᐅᓚᐅᖅᑐᑦ ᓴᖅᑭᑎᑕᐅᓪᓗᑎᒃ ᓯᕗᒧᑦ 11, ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᐱᕙᓪᓕᐊᑎᑦᑎᓂᕐᒧᑦ ᐸᕐᓇᐃᓗᓂ ᑲᑎᒪᕕᒡᔪᐊᕐᓂᖅ, ᓴᖅᑭᓚᐅᖅᑐᖅ ᑲᖏᖅᖠᓂᕐᒥ ᑕᒫᓂ ᐱᓇᓱᐊᕈᓯᐅᑉ ᓄᙳᒋᖅᑲᐅᔭᖓᓂ. ᑕᒪᓐᓇ ᑲᑎᒪᕕᒡᔪᐊᖅᑎᑦᓯᓂᖅ ᐃᓚᐅᑎᑦᑎᓚᐅᖅᑐᖅ 140-ᓂᒃ ᓄᓇᕗᓕᒫᒦᙶᖅᑐᓂᒃ. ᐅᓪᓗᓂ ᐱᖓᓱᓂᒃ ᑖᒃᑯᐊ ᑲᑎᒪᔭᖅᑐᖃᑕᐅᓯᒪᔪᑦ ᓇᓗᓇᐃᔭᐃᓚᐃᖅᑐᑦ ᐊᒡᕕᐊᕈᑕᐅᕙᒃᑐᓂᒃ ᐊᒻᒪᓗ ᓴᖅᑭᑎᑦᑎᔪᓐᓇᖅᑐᑎᒃ ᐊᒃᖢᐃᓕᕈᑎᒃᓴᖏᓐᓂᒃ ᓄᓇᕗᑦ. ᐱᓕᕆᖃᑎᒌᖕᓂᖅ ᐊᒥᓲᓗᐊᙱᓪᓗᓂ, ᕿᒥᕐᕈᕙᖕᒪᑕ ᖃᓄᐃᓕᐅᕈᑕᐅᓂᐊᖅᑐᓂᒃ ᓄᓇᓂ, ᐃᓄᖕᓄᑦ, ᓄᓇᓖᑦ ᑮᓇᐅᔭᓕᐅᕈᑎᒋᒐᓱᐊᖅᑕᖏᓐᓂᒃ ᐊᒻᒪᓗ ᐊᕕᒃᑐᖅᓯᒪᓂᐅᔫᑉ ᐊᒻᒪᓗ ᐊᒃᓱᕉᓴᒍᑕᐅᕙᒃᑐᑦ ᐊᑐᓃᖅᑐᓄᑦ ᐃᓄᖕᓄᑦ, ᓄᓇᓕᖕᓄᑦ ᐊᒻᒪᓗ ᒐᕙᒪᒃᑯᓐᓄᑦ. ᐃᑲᔪᖅᑎᒌᒃᑐᓄᑦ ᑮᓇᐅᔭᖅᑑᑎᒃᓴᖃᖅᑎᑕᐅᓪᓗᑎᒃ ᓄᓇᕗᑦ ᒐᕙᒪᖏᓐᓄᑦ, ᓄᓇᕗᑦ ᑐᙵᕕᒃᑯᓐᓄᓪᓗ ᐊᒻᒪᓗ ᐃᓄᓕᕆᔨᑐᖃᒃᑯᓐᓄᑦ, ᑕᒪᓐᓇ ᑲᑎᒪᕕᒡᔪᐊᕐᓂᖅ ᐃᓚᒋᓚᐅᖅᑕᖓ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐱᕙᓪᓕᐊᑎᑕᐅᓂᖏᓐᓄᑦ ᐸᕐᓇᒃᓯᒪᔾᔪᑎᓕᐅᕐᓂᖅ ᐱᒋᐊᖅᑎᑕᐅᓚᐅᖅᑐᑦ ᐊᕐᕌᓂ ᓴᖅᑭᑎᑦᑎᓪᓗᑎᒃ ᐃᑲᔪᖅᑎᒌᒃᑐᓂᒃ ᐱᓕᕆᖃᑎᒌᖕᓂᐊᖅᑐᓂᒃ ᐃᓚᓂᖃᖅᑐᓂᒃ, ᑖᒃᑯᐊ ᐃᑲᔫᑎᒻᒪᕆᓚᐅᖅᑐᑦ ᓴᖅᑭᑎᑕᐅᓂᖏᓐᓄᑦ ᑖᒃᑯᐊ ᓄᓇᕗᒥ ᑮᓇᐅᔭᓕᐅᕈᑎᖃᕐᓂᕐᒧᑦ ᐸᕐᓇᐅᑎᒃᓴᑦ. “ᐱᓕᕆᒍᒪᓂᖏᑦ ᑲᑎᒪᔭᖅᑐᖅᓯᒪᔪᑦ ᐅᖃᖃᑦᑕᓚᐅᖅᑐᑦ ᑕᒪᓐᓇ ᐱᒻᒪᕆᐅᓂᖓᓂᒃ ᑕᒪᑐᒧᖓ ᐅᖃᐅᓯᐅᔪᒧᑦ ᑐᕌᖓᑎᓪᓗᒍ ᓄᓇᕗᓕᒫᒧᑦ,” ᐅᖃᖅᑲᐅᔪᖅ ᐃᑯᐱᒃᑐᓕᕆᔨᒃᑯᓐᓄᑦ ᒥᓂᔅᑕ ᐅᓛᔪᒃ ᐊᑭᓱᒃ. “ᑕᒪᓐᓇ ᐸᕐᓇᐅᑦ ᐃᓚᓕᐅᑎᑎᑦᓯᓯᒪᓕᖅᑐᖅ ᓄᑖᓂ ᐅᖃᐅᓯᐅᓚᐅᖅᑐᓂᒃ ᐊᒻᒪᓗ ᐃᓱᒪᒋᔭᐅᔪᓂᒃ ᑐᓴᖅᑕᐅᓚᐅᖅᑐᓂᒃ ᑐᓴᕋᑎᒌᖕᓂᖃᖅᑎᓪᓗᒋᑦ ᐊᕐᕌᓂ.” “ᐱᒻᒪᕆᐅᓂᖓ ᐱᓕᕆᖃᑎᒌᖕᓂᐅᑉ ᓇᓗᒋᔭᐅᓚᐅᙱᑦᓯᐊᖅᑐᖅ ᐊᐅᓚᓂᖃᑦᓯᐊᕐᓂᖓᓂᒃ ᑲᑎᒪᕕᒡᔪᐊᖅᑐᓂ, ‘ᐅᖃᖅᑲᐅᔪᖅ ᐹᓪ ᖃᓗᔾᔭᖅ, ᓄᓇᕗᑦ ᑐᙵᕕᒃᑐᖅ ᐊᖓᔪᖅᑳᖓᑦᑕ ᑮᓇᐅᔭᓕᕆᓂᕐᒧᑦ. “ᐃᓄᐃᑦ ᑲᑐᔾᔨᖃᑎᒌᑦ, ᓇᖕᒥᓂᖅ ᐱᓕᕆᕕᖃᖅᑐᑦ ᐊᒻᒪᓗ ᒐᕙᒪᒃᑯᑦ ᑮᓇᐅᔭᐃᕈᑎᖃᕈᒪᔪᐃᓐᓇᐃᑦ ᐱᕈᖅᐸᓪᓕᐊᔾᔪᑕᐅᓂᐊᖅᑐᓂᒃ ᓴᙱᓂᖅᓴᒥᒃ ᓄᓇᕗᒥ ᑮᓇᐅᔭᓕᐅᕈᑎᒃᓴᓂᒃ ᐃᑲᔫᑎᓂᐊᖅᑐᓂᒃ ᐃᓄᖏᓐᓄᑦ ᓄᓇᓖᑦ. ᑕᒪᑐᒧᖓ, ᓄᓇᕗᑦ ᑐᙵᕕᒃᑯᑦ ᑲᑎᒪᑎᑦᓯᒃᑲᓐᓂᕐᓂᐊᖅᑐᑦ ᓯᐊᕈᒃᑲᓐᓂᖅ ᑕᒫᓂ ᐊᕐᕌᒍᒥ ᐅᖃᐅᓯᖃᕐᓂᐊᕐᓗᑎᒃ ᐊᔾᔨᐅᖏᑦᑐᒃᑯᑦ ᐃᑲᔫᑕᐅᒋᐊᓕᖕᓂᑦ ᐃᓄᖕᓄᑦ ᒥᑭᔪᓂᒃ ᓇᖕᒥᓂᖅ ᐱᓕᕆᕕᖃᖅᑐᓄᑦ.” ᑕᒪᓐᓇ ᓯᕗᒻᒧᑦ ᑮᓇᐅᔭᓕᐅᕈᑎᒃᓴᓂᒃ ᐸᕐᓇᐃᔾᔪᑎᓂᒃ ᑲᑐᔾᔨᓪᓗᑎᒃ ᐱᓕᕆᐊᖃᖅᑐᑦ ᐊᑐᕐᓂᐊᖅᑐᑦ ᑐᑭᓯᒋᐊᕈᑎᒃᓴᓂᒃ ᑖᑦᓱᒪᙵᑦ ᑲᑎᒪᕕᒡᔪᐊᕐᓂᕐᒥᑦ ᐊᒻᒪᓗ ᐊᓯᖏᓪᓗ ᖃᐅᔨᓴᕈᑕᐅᔪᑦ ᐸᕐᓇᒍᑕᐅᕙᓪᓕᐊᓪᓗᑎᒃ ᑭᖑᓪᓕᖅᐹᒥ ᓴᖅᑭᑎᑕᐅᓂᐊᖅᑐᒧᑦ ᐸᕐᓇᐅᒻᒧᑦ. ᑖᓐᓇ ᐸᕐᓇᐅᑕᐅᔪᖅ ᓴᖅᑭᑎᑕᐅᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᓄᙳᐊᓂ ᒪᐃ, ᕿᒥᕐᕈᔭᐅᓚᐅᖅᑎᓪᓗᒋᑦ ᐊᒻᒪᓗ ᐊᖏᕈᑕᐅᓚᐅᖅᑎᓪᓗᒋᑦ ᓄᓇᕗᑦ ᑐᙵᕕᒃ ᑲᑎᒪᔨᖏᓐᓄᑦ ᐊᒻᒪᓗ ᓄᓇᕗᒥ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. ᑕᒃᑯᐊ ᓯᕗᒻᒧᑦ ᑮᓇᐅᔭᓕᐅᕈᑎᒃᓴᓂᒃ ᐸᕐᓇᐃᔾᔪᑎᓂᒃ ᑲᑐᔾᔨᓪᓗᑎᒃ ᐱᓕᕆᐊᖃᖅᑐᑦ ᑲᑎᒪᔨᖃᐅᖅᑐᑦ ᐅᖓᑖᓂ 20 ᑲᑐᔾᔨᖃᑎᒌᓂᒃ, ᑭᒡᒐᖅᑐᐃᔪᑦ ᐊᔾᔨᒌᙱᑦᑐᓂᒃ ᓇᖕᒥᓂᖅ ᐱᓕᕆᕕᖃᖅᑐᓂᒃ ᐊᒻᒪᓗ ᐃᓚᐅᓂᖃᕈᒪᔪᓂᒃ. ᐃᒃᓯᕙᐅᑕᕐᒧᑦ ᐃᓚᒋᔭᐅᔪᑦ ᓄᓇᕗᑦ ᒐᕙᒪᖏᑦ, ᓄᓇᕗᑦ ᑐᙵᕕᒃᑯᑦ ᑎᒥᖓᑦ, ᐱᓕᕆᐊᖃᖅᑐᑦ ᓴᖅᑭᑦᑎᒍᒪᓪᓗᑎᒃ ᑐᑭᓯᐅᒪᖃᑎᒌᒍᑕᐅᓂᐊᖅᑐᓂᒃ ᓄᓇᕗᒥᐅᑦ ᐊᒃᓱᕉᓴᒍᑎᒋᕙᒃᑕᖏᓐᓂᒃ ᐅᓪᓗᒥ ᑮᓇᐅᔭᓕᐅᕈᑎᖃᕋᓱᐊᕐᓂᒃᑯᑦ ᐊᒻᒪᓗ ᐊᓯᐊᒎᕈᑕᐅᔪᓐᓇᖅᑐᓂᒃ ᐱᕈᖅᐸᓪᓕᐊᑎᑦᓯᓂᕐᒧᑦ ᐊᒻᒪᓗ ᐋᖅᑭᐅᒪᔾᔪᑎᒃᓴᓂᒃ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ: ᐅᓪᓗᕆᐊᖅ ᕼᐋᓐᓴᓐ-ᑲᒨ ᑐᑭᒧᐊᒃᑎᑦᑎᔨ ᓇᒥᓂᖅ ᐱᓕᕆᕕᖃᕐᓂᕐᒧᑦ ᑮᓇᐅᔭᓕᐅᕈᑕᐅᒐᓱᐊᖅᑐᓄᓪᓗ ᓄᓇᕗᑦ ᑐᖓᕕᒃᑯᑦ ᐅᖃᓘᑖ: (867) 975-4900 ᓱᑲᒃᑐᒃᑯᑦ: (867) 975-4949 ᕉᓯᐊᕆ ᑮᓇᐃᓐᓇᖅ ᐃᑲᔪᖅᑎᐊ ᑐᒡᓕᐊᑕ ᒥᓂᔅᑕ ᐃᑯᐱᒃᑐᓕᕆᔨᒃᑯᑦ ᐅᖃᓘᑖ: (867) 975-5925 ᓱᑲᑦᑐᒃᑯᑦ: (867) 975-5984 |