 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᖃᒪᓂᑦᑐᐊᖅ, ᓄᓇᕗᑦ(ᔫᓂ 4, 2003) - ᐊᒃᕕᒃᑐᖅᓯᒪᓂᐅᔪᓂ ᓯᕗᓕᖅᑎᐅᔪᑦ ᐊᑎᓕᐅᕈᑎᖃᕐᓂᐊᖅᑐᑦ ᐅᑭᐅᖅᑕᖅᑐᒥ ᐃᑲᔪᖅᑎᒌᖕᓂᕐᒧᑦ ᐊᖏᖃᑎᒌᒍᑎᓂᒃ, ᓴᙱᒃᑎᑉᐹᓪᓕᕈᓐᓇᖁᓪᓗᒋᑦ ᓂᓪᓕᐊᓂᖏᑦ ᐅᑭᐅᖅᑕᖅᑐᐊᓂ ᑲᓇᑕᐅᑉ ᐱᓕᕆᐊᖃᖅᑎᓪᓗᒋᑦ ᑲᓇᑕᒨᖓᔪᓂᒃ. ᓯᕗᓕᖅᑎ ᐅᑲᓕᖅ ᑐᓴᖅᑎᑦᓯᖅᑲᐅᔪᖅ ᑖᒃᑯᓂᖓ ᐊᖏᖃᑎᒌᒍᑎᓂᒃ ᓄᓇᕗᑦ ᒪᓕᒐᓕᐅᕐᕕᐊᓂ, ᒫᓐᓇᐅᔪᖅ ᑲᑎᒪᓂᖃᖅᑐᑦ ᓄᓇᓕᐊᓂ ᖃᒪᓂᑦᑐᐊᑉ. ᑕᒪᓐᓇ ᐊᑎᓕᐅᕆᓂᖅ ᓴᖅᑭᓐᓂᐊᖅᑐᖅ ᓯᑦᑏᕝᕙᒥ ᑕᒫᓂ ᐊᕐᕌᒍᒥ ᑲᑎᑎᓪᓗᒋᑦ ᐃᖃᓗᒃᑑᑦᑎᐊᓂ. ᓯᕗᓕᖅᑎ ᓯᑏᕙᓐ ᑳᒃᕖ ᓄᓇᑦᓯᐊᕐᒥᑦ ᐊᒻᒪᓗ ᑎᓂᔅ ᐱᓐᑎ ᔫᑳᓐ ᐊᕕᒃᑐᖅᓯᒪᓂᐊᓂᒃ ᐃᓚᓕᐅᑎᓂᐊᖅᑑᒃ ᑕᒪᓐᓇ ᐊᑎᓕᐅᕈᑕᐅᑎᓪᓗᒍ. “ᐱᓕᕆᖃᑎᒌᒍᒪᓂᖅ ᒪᓕᖕᒪᑦ ᐊᔾᔨᒌᓂᒃ ᐃᓱᒫᓘᑎᖃᕐᓂᖏᓐᓂᒃ ᐅᑭᐅᖅᑕᖅᑐᒥᐅᑦ ᐊᔾᔨᐅᖏᑎᓪᓗᒋᑦ ᐊᕕᒃᑐᖅᓯᒪᓂᐅᔾᔪᓯᖏᑦ ᑲᓇᑕᒥ. ᐊᒥᓲᖕᒪᑕ ᑭᖑᓂᑦᑎᓐᓂ ᖃᓄᐃᓕᐅᕈᑎᒋᓯᒪᔭᕗᑦ, ᓄᓇᐃᑦ ᓇᒦᓐᓂᖏᑦ ᐊᒻᒪᓗ ᐃᓕᖅᑯᓯᕗᑦ ᐃᑲᔪᖅᑎᒌᒍᑎᒋᖃᑦᑕᖅᓯᒪᔭᕗᑦ, ᑕᒪᒃᑯᐊ ᖁᒡᕙᕆᐊᕈᒪᒐᑦᑎᒍ ᐱᒋᐊᖅᓯᒪᓂᖓ ᐊᒻᒪᓗ ᐃᑲᔪᖅᑎᒌᖕᓂᕗᑦ ᐱᕈᖅᐸᓪᓕᐊᑎᓪᓗᒋᑦ ᓄᑖᓄᑦ ᐃᓚᐅᕝᕕᒋᔪᒪᓂᐊᖅᑕᑦᑎᓐᓄᑦ” ᐅᖃᖅᑲᐅᒧᖅ ᐅᑲᓕᖅ. ᓴᙱᓂᖓ ᑲᑐᔾᔨᖃᑎᒌᖕᓂᐅᑉ ᑕᑯᒃᓴᐅᒻᒪᕆᓚᐅᖅᑐᖅ ᐱᒋᐊᙵᕐᓂᖓᓂ ᑕᒪᑐᒪ ᐊᕐᕌᒎᑉ ᑖᒃᑯᐊ ᒐᕙᒪᑐᖃᒃᑯᑦ ᑐᓂᓯᑎᓪᓗᒋᑦ ᖄᖓᒍᑦ $60 ᒥᓕᔭᓂᒃ ᐅᑭᐅᖅᑕᖅᑐᒨᖅᑐᓂᒃ ᐃᓚᒋᓪᓗᓂᐅᒃ ᑖᒃᑯᐊ ᐋᓐᓂᐊᖅᑐᓕᕆᔾᔪᑕᐅᔪᑦ ᓄᑖᕈᕆᐊᖅᑕᐅᓂᖏᓐᓄᑦ ᐊᖏᖃᑎᒌᒍᑎᓂᒃ. “ᑕᑯᒃᓴᐅᑎᑦᑎᓯᒪᔪᒍᑦ ᓴᙱᓂᖓᓂᒃ ᐅᖃᓕᒪᓂᐅᑉ ᐊᑕᐅᓯᕐᒥᑦ ᓂᐱᖃᖅᑐᑕ ᐊᒻᒪᓗ ᑲᔪᓯᓯᔾᔪᑎᒋᓂᐊᕋᑦᑎᒍ ᐊᔭᐅᕐᓗᑕ ᑭᒡᒐᖅᑐᐃᓂᐊᕋᑦᑕ ᑕᒪᒃᑯᓄᖓ ᐃᓱᒫᓘᑕᐅᔪᓄᑦ ᐅᑭᐅᖅᑕᖅᑐᐊᓄᑦ ᑲᓇᑕᐅᑉ. ᑖᓐᓇ ᐊᖏᖃᑎᒌᒍᑦ ᐋᖅᑭᒃᓯᓂᐊᕐᒪᑦ ᐃᑲᔪᖅᑎᒌᒡᓗᑕ ᐱᓕᕆᖃᑎᒌᒍᑎᒋᓂᐊᖅᑕᑦᑎᓐᓂᒃ ᑮᓇᐅᔭᓕᐅᕈᑎᖃᕋᓱᐊᕐᓂᒃᑯᑦ, ᒐᕙᒪᓕᕆᓂᖅ ᐊᓯᔾᔨᖅᐸᓪᓕᐊᓂᖏᑎᒍᑦ, ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᕙᑎᓕᕆᓂᖅ, ᐃᓅᓯᓕᕆᓂᕐᒧᓪᓗ ᐊᑐᐊᒐᕐᓂᒃ,” ᐅᖃᖅᑲᐅᔪᖅ ᐅᑲᓕᖅ. “ᑕᓐ ᐊᖏᖃᑎᒌᒍᑦ ᖁᒡᕙᕆᐊᕆᓂᐊᖅᑐᖅ ᐱᓕᕆᖃᑎᒌᖕᓂᑦᑎᓐᓂᒃ ᓄᓇᕗᑦ ᓴᓂᓕᕇᒃᑎᓪᓗᒋᑦ ᒐᕙᓚᓕᕆᓂᒃᑯᑦ ᐊᒻᒪᓗ ᐊᖓᔪᖅᑲᐅᑎᑎᒍᑦ, ᐱᕙᓪᓕᐊᑎᑦᓯᑎᓪᓗᑕ ᐊᒻᒪᓗ ᖁᒡᕙᕆᐊᕆᑎᓪᓗᑕ ᖃᓄᐃᓕᐅᕆᐊᕈᑎᒃᓴᑦᑎᓐᓂᒃ ᐱᔾᔪᑎᒋᓗᒋᑦ ᑕᒪᒃᑯᐊ ᐃᓱᒫᓘᑎᖃᕐᕕᕗᑦ, ᐊᑐᓕᕐᓗᑕ ᑮᓇᐅᔭᓕᐅᕈᑎᖃᕐᕕᒋᔪᓐᓇᖅᑕᑦᑎᓐᓂᒃ, ᐃᑲᔪᖅᓱᐃᓗᑕ ᐊᒃᕕᑐᖅᓯᒪᔪᓅᖓᔪᓂᒃ, ᑲᓇᑕᒥ, ᓄᓇᕐᔪᐊᓂᓗ ᐃᓚᐅᕝᕕᒋᔪᒪᔭᑦᑎᓐᓂ,” ᐅᖃᖅᑲᐅᔪᖅ ᓯᕗᓕᖅᑎ ᐅᑲᓕᖅ. ᑖᒃᑯᐊ ᐅᑭᐅᖅᑕᖅᑐᒥ ᓯᕗᓕᖅᑏᑦ ᒫᓐᓇᒫᖅ ᐋᖅᑭᒋᐊᕆᒃᑲᓐᓂᓚᐅᖅᑐᑦ ᒫᓐᓇ ᐱᓕᕆᖃᑎᒌᖃᑦᑕᕐᓂᕐᒥᓂᒃ ᐋᖅᑭᒃᓱᐃᓪᓗᑎᒃ ᑎᑎᖅᑲᓂᒃ ᒐᕙᒪᑐᖃᒃᑯᓐᓅᕐᓂᐊᖅᑐᓂᒃ ᐱᓕᖃᑎᒋᑦᓯᐊᕈᒪᓪᓗᑎᒍ ᑲᓇᑕ ᐃᓚᐅᒐᔭᕐᓂᖓᓂᒃ ᐊᒥᐊᓕᑲᒃᑯᑦ ᐅᓇᑕᖅᑐᒃᓴᖏᑦᑕ ᐱᓕᕆᐊᕆᔪᒪᔭᖓᓄᑦ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ: ᓇᐸᑦᓯ ᑯᓗᓛᖅ ᓄᓇᕗᑦ ᒐᕙᒪᖏᑦᑕ ᑐᓴᒐᒃᓴᓕᕆᔨᖏᑦ (867) 975-6048 |