 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐸᖕᓂᖅᑑᖅ, ᓄᓇᕗᑦ (ᔫᓂ 30, 2003) – ᐸᖕᓂᖅᑑᒥᐅᑦ ᐃᑲᔪᖅᑕᐅᒻᒪᕆᓐᓂᐊᕐᐳᑦ ᓄᑦᑎᕐᓯᕕᐅᓂᐊᖅᑎᓪᓗᒋᑦ 23-ᓄᑦ ᐃᖅᑲᓇᐃᔮᑦᓴᓄᑦ. ᓯᕗᓕᖅᑎ ᐹᓪ ᐅᑲᓕᖅ ᐸᖕᓂᖅᑑᒧᓪᓗ ᒪᓕᒐᓕᐅᖅᑎ ᐲᑕ ᕿᓚᕝᕙᖅ ᑐᓴᖅᑎᓯᓚᐅᕐᐴᒃ ᓄᓇᖓᓐᓂ ᓂᕆᕕᔾᔪᐊᕐᓂᖃᖅᑎᓪᓗᒋᑦ ᐊᒥᓱᒻᒪᕆᐊᓗᐃᑦ ᐸᖕᓂᖅᑑᒥᐅᑦ ᐅᐸᑦᓯᒪᓪᓗᑎᒃ. “ᑕᕝᕙᓂ ᓄᓇᖃᖅᑐᑦ ᕿᓄᐃᓵᕈᓐᓇᑦᓯᐊᕐᓯᒪᓚᐅᕐᒪᑕ ᐅᑕᖅᑭᓪᓗᑎᒃ ᐊᖏᕈᑎᒋᓯᒪᔭᑦᑎᓐᓂᒃ ᓄᓇᓕᓐᓄᑦ ᓯᐊᒻᒪᖅᑎᕆᓂᐊᕐᓂᑦᑎᓐᓂᒃ ᒐᕙᒪᒃᑯᑦ ᐱᓕᕆᕕᖏᓐᓂᒃ. ᖁᕕᐊᓱᑉᐳᖓ ᑐᓴᖅᑎᑦᓯᒋᐊᖅ ᐅᑕᖅᑭᓂᓯ ᐊᓂᒍᕐᒪᑦ ᐃᖅᑲᓇᐃᔮᑦᓴᖅᑕᖃᕐᓂᐊᓗᕐᑐᓂᓗ ᓄᑖᓂᒃ ᑮᓇᐅᔾᔭᑦᓴᐅᑎᑦᓴᖅᑕᖃᒃᑲᓂᕐᓂᐊᓗᕐᑐᓂᓗ ᐸᖕᓂᖅᑑᒥ”, ᐅᖃᖅᑐᖅ ᐅᑲᓕᖅ. ᐊᑐᓕᑦᓴᐅᑎᒋᓗᓂ ᓯᕗᓕᖅᑎᐅᑉ ᑲᒪᒋᔭᖓ ᐊᐅᓚᑦᓯᔩᑦ ᒐᕙᒪᓕᕆᔨᒃᑯᓪᓗ ᓄᑦᑎᕆᕙᓪᓕᐊᓂᐊᓕᕐᑐᑦ ᐱᖓᓲᔪᖅᑐᓂᒃ ᐃᖅᑲᓇᐃᔮᑦᓴᓂᒃ ᑭᒡᓕᓯᓂᐊᖅᑏᑦ ᖃᐅᔨᓇᓱᐊᕐᓂᒧᓪᓗ ᐱᓕᕆᕕᖏᓐᓂᒃ. ᓄᑦᑎᖅᑕᐅᓂᐊᕐᒥᔪᑦ 9-ᖑᔪᑦ ᐃᖅᑲᓇᐃᔮᑦ ᐃᑯᐱᒃᑐᓕᕆᔨᒃᑯᓐᓂᒃ, ᑖᒃᑯᓇᓂ ᓯᑕᒪᑦ ᐃᓐᓂᓯᒪᓐᖏᑦᑐᑦ. ᐃᑯᐱᒃᑐᓕᕆᔨᒃᑯᓂᑦᑕᐅᖅ ᓄᑦᑎᖅᑕᐅᓂᐊᕐᒥᔪᑦ ᐃᖅᑲᓇᐃᔮᑦ ᐃᖃᓗᓕᕆᓂᕐᒧᑦ ᓇᑦᓯᕋᓱᓐᓂᒧᓪᓗ ᐱᓕᕆᐊᑦ. ᐃᓕᓐᓂᐊᕐᓂᓕᕆᔨᒃᑯᑦ ᐊᖏᕈᑎᖃᕐᓯᒪᒻᒥᔪᑦ ᓅᑦᓯᓛᕐᓂᐊᕐᓂᕋᕐᓯᒪᓪᓗᑎᒃ ᓯᑕᒪᐅᔪᖅᑐᓂᒃ ᐃᖅᑲᓇᐃᔮᓂᒃ ᐸᖕᓂᖅᑑᒧᑦ. ᖃᐅᔨᔭᐅᓇᓱᐊᕐᓂᐊᖅᑐᑦ ᑭᑑᒻᒪᖔᑕ ᐃᖅᑲᓇᐃᔮᑦ ᐊᐅᔭᐅᓚᖓᔪᖅ. “ᑖᒃᑯᐊ ᐃᖅᑲᓇᐃᔮᒃᓴᑦ ᑮᓇᐅᔭᓕᐅᕈᑕᐅᒃᑲᓐᓂᕈᓐᓇᓚᖓᓂᖏᓪᓗ ᓄᓇᑦᑎᓐᓂ ᐱᕙᓪᓕᐅᑎᒻᒪᕆᐅᓚᖓᔪᑦ,” ᐅᖃᖅᑐᖅ ᕿᓚᕝᕙᖅ. “ᑕᐃᒃᑯᐊ ᓄᑦᑎᓂᐊᖅᑐᑦ ᐸᖕᓂᖅᑑᒧᑦ ᑐᓐᖓᓱᑦᑎᑕᐅᓂᐊᕐᑐᑦ ᓄᓇᓕᒻᒧᑦ ᓄᓇᓕᓪᓗ ᐊᑐᐃᓐᓇᕈᕐᓴᐃᒌᕐᓯᒪᓪᓗᓂ ᐋᖅᑭᑦᓯᒪᒋᐊᒃᑲᓐᓂᕈᑎᑦᓴᕆᒍᓐᓇᖅᑕᖏᓐᓂᒃ ᓄᓇᕗᑦ.” ᑕᓐᓇ ᐅᖃᐅᓯᐅᔪᖅ ᓯᕗᒧᐊᒋᐊᒃᑲᓐᓂᐅᑕᐅᕗᖅ ᒐᕙᒪᒃᑯᑦ ᓄᑦᑎᕆᓛᕐᓂᐊᕐᓯᒪᓂᕆᓯᒪᔭᖓᓂᒃ ᐃᖅᑲᓇᐃᔮᓂᒃ ᓯᐊᒻᒪᖅᑎᕆᓗᑎᒃ ᐊᖏᕈᑎᒋᓯᒪᔭᕐᒥᓄᑦ ᖃᓪᓕᑲᓐᓂᕈᑕᐅᕗᖅ ᐸᖕᓂᖅᑑᒧᑦ, ᐅᓪᓗᒥ ᐅᖃᐅᓯᐅᔪᖅ 71-ᓐᖑᕈᑕᐅᕗᖅ ᓄᓇᖓᓐᓂ ᐃᖅᑲᓇᐃᔮᑦ ᓄᑦᑎᖅᑕᐅᓯᒪᓕᕐᑐᑦ ᓯᐊᒻᒪᖅᑎᕆᑎᓪᓗᒋᑦ ᐃᖅᑲᓇᐃᔮᓂᒃ. ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᖄᓚᕕᒋᔪᓐᓇᖅᑕᐃᑦ: ᕕᐅᓪ ᒃᓚᐃ ᑐᓴᕋᑦᓴᓕᕆᔨᖓ ᓯᕗᓕᖅᑎᐅᑉ (867) 975-5059 ᐊᓪᓚᕝᕕᖓ (867) 975-1317 ᖃᖓᑦᑕᕐᑎᑕᐅᓯᒪᔪᒃᑯᑦ ᐅᖄᓚᐅᑖ |