 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᔫᓂ 20, 2003) - ᐋᓐᓂᐊᖃᕐᓇᖏᑦᑐᓕᕆᔾᔨᒃᑯᑦ, ᐃᓄᓕᕆᔨᒃᑲᓪᓗ ᐃᑦ ᐱᑯ ᐅᓪᓗᒥ ᓇᓗᓇᐃᖅᑐᒍ ᐱᒋᐊᖅᑎᑦᓯᕗᖅ ᑖᒃᑯᓂᖓ ᐃᑲᔪᕈᑎᑦ ᐃᓄᖕᓄᑦ ᐅᖓᓯᒃᑐᒥ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑎᒃᓴᓂᒃ ᓄᓇᕗᒥ. ᑖᓐᓇ ᐃᑲᔫᑕᐅᔪᖅ ᐱᓕᕆᐊᖅ ᐱᐅᓯᕚᓪᓕᕈᑕᐅᓂᐊᖅᑐᖅ ᒪᓂᒪᕕᐅᓂᖅᓴᐅᓕᕐᓗᑎᒃ ᐋᓐᓂᐊᖅᑐᓕᕆᔭᐅᔾᔪᑎᓄᑦ ᓄᓇᕗᒥᐅᑦ ᐊᖏᕐᕋᖃᕐᕕᖕᒥᓂ ᓄᓇᓕᖕᓂ. “ᓄᓇᕗᑦ ᒐᕙᒪᖏᑦ ᐱᕈᖅᐸᓪᓕᐊᑎᑦᓯᓂᐊᖅᓯᒪᖕᒪᑕ ᖃᓄᐃᙱᑦᓯᐊᕐᓗᑎᒃ ᓄᓇᓕᖕᓂᑦ. ᐃᑲᔪᕈᑎᑦ ᐃᓄᖕᓂᑦ ᐅᖓᓯᒃᑐᒥᑦ ᑐᑭᖃᖅᑐᖅ ᐊᖅᑯᑎᖃᖅᑲᓐᓂᕐᓂᐊᕐᓂᖏᓐᓂᒃ ᐃᑲᔪᖅᑕᐅᔾᔪᑎᒃᓴᖏᓐᓄᑦ ᐃᓄᐃᑦ ᐅᖓᓯᒃᑐᒦᑦᑐᑦ ᐊᒻᒪᓗ ᑕᒪᓐᓇ ᑕᐃᒪᐃᑦᑎᑦᓯᔪᓐᓇᖅᑐᖅ ᐱᓕᕆᐊᖑᔪᖅ,” ᒥᓂᔅᑕ ᐱᑯ ᐅᖃᖅᑲᐅᔪᖅ. “ᑐᕌᖅᑕᕗᑦ ᐱᐅᓯᕚᓪᓕᖁᓪᓗᒍ ᒪᓂᒪᒋᐊᖃᕐᓂᖏᑦ ᐊᒻᒪᓗ ᐱᐅᔫᒋᐊᖃᕐᓂᖏᑦ ᐋᓐᓂᐊᖅᑐᓕᕆᔾᔪᑕᐅᔪᑦ ᓄᓇᕗᒥᐅᓄᑦ.” ᑖᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑎᒃᓴᑦ ᐱᐅᓯᕚᓪᓕᕈᑕᐅᓂᐊᖅᑐᑦ ᐋᓐᓂᐊᖅᑐᓕᕆᔾᔪᑕᐅᔪᑦ ᐅᓄᖅᓯᒋᐊᕐᓗᒋᑦ ᑕᑯᔭᐅᖃᑦᑕᕐᓂᖏᑦ ᐋᓐᓂᐊᖅᑐᑦ ᖃᐅᔨᒪᔪᓄᑦ ᐃᓗᐊᖅᓴᐃᔨᒻᒪᕆᖕᓄᑦ ᐊᒻᒪᓗ ᓄᓇᓕᖏᑦᑕ ᐋᓐᓂᐊᖅᑐᓕᕆᔩᑦ ᐊᒻᒪᓗ ᐅᓄᖅᓯᒋᐊᕐᓗᒋᑦ ᐱᔨᑦᓯᕋᕈᑕᐅᔪᑦ ᓯᓚᑖᓂᒃ ᐃᓗᐊᖅᓴᐃᔨᒻᒪᕆᖕᓄᑦ ᐊᔾᔨᒌᙱᑦᑐᓂᒃ ᖃᐅᔨᒪᔨᑕᐅᔪᑦ ᓄᓇᓕᖕᓂ ᐃᑲᔪᕈᓐᓇᕐᓗᑎᒃ. ᐱᐅᓯᕚᓪᓕᕈᑕᐅᓂᐊᖅᑐᖅ ᐃᓗᐊᖅᓴᖅᑕᐅᕙᒃᑐᓄᑦ ᑕᑯᓴᕋᐃᑕᐅᔪᓐᓇᖅᓯᓗᑎᒃ ᐃᓗᐊᖅᓴᐃᔨᒻᒪᕆᖕᓄᑦ ᐊᒻᒪᓗ ᖃᓄᖅ ᐃᓱᒪᒋᔭᐅᓂᖏᓐᓂᒃ ᐊᒻᒪᓗ ᐃᓗᐊᖅᓴᖅᑕᐅᓂᖅᓴᐅᔪᓐᓇᓕᕐᓗᑎᒃ ᐊᖏᕐᕋᖃᕐᕕᒋᒐᔪᒃᓴᖏᓐᓂ. ᑖᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑎᒃᓴᓂᒃ ᐱᐅᓯᕚᓪᓕᕈᑕᐅᓂᐊᕐᒥᔪᑦ ᑲᒪᒋᔭᐅᓵᓕᓂᖅᓴᐅᔪᓐᓇᕐᓗᑎᒃ, ᐅᑕᖅᑭᑯᑕᒋᐊᖃᙱᓪᓗᑎᒃ, ᐃᖏᕐᕋᓂᐅᔭᕆᐊᖃᖅᑐᓄᑦ ᓄᓇᓖᑦ ᐊᓯᖏᓐᓄᑦ ᐃᓗᐊᖅᓴᖅᑕᐅᔭᖅᑐᕐᓗᓂ ᐊᒻᒪᓗ ᐃᓄᓕᕆᔭᐅᔭᖅᑐᕐᓗᓂ. ᐊᑐᓂ ᓄᓇᓕᐅᔪᓂ ᐊᑕᔾᔪᑎᖃᖅᑐᓂᒃ ᑖᒃᓂᖓ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ, ᐃᓄᐃᑦ ᓄᓇᓕᖕᓂ ᐃᓕᓐᓂᐊᖅᑎᑕᐅᓯᒪᓕᖅᑐᑦ ᑖᒃᑯᓂᖓ ᑲᒪᔾᔪᑎᓂᒃ ᑲᒪᔨᐅᓪᓗᑎᒃ. ᐃᓕᓐᓂᐊᕈᑎᒋᓚᐅᖅᑕᖏᑦ ᐃᓚᖃᖅᑐᑦ ᐃᓕᓐᓂᐊᖅᑎᑦᑐᒋᑦ ᐃᓕᓐᓂᐊᖅᑎᑦᓯᖃᑦᑕᕐᓂᐊᖅᑐᑦ ᐊᒻᒪᓗ ᑲᔪᓯᓯᒪᓗᒍ ᐃᓕᓐᓂᐊᕈᑕᐅᒃᑲᓐᓂᖃᑦᑕᕆᐊᖃᕐᓂᖓ ᐊᑐᕐᓗᒋᑦ ᑕᒪᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑏᑦ. ᑕᒪᒃᑯᐊ ᑲᒪᔨᐅᔪᑦ ᐋᖅᑭᒃᓱᐃᔨᐅᓪᓗᑎᒃ ᐃᓂᖃᖅᑐᑦ ᑕᓚᕖᓴᖃᕐᕕᐅᔪᓂᒃ ᐋᓐᓂᐊᕐᕕᖕᓂ. ᐱᓕᕆᐊᖃᖅᑐᑦ ᑕᒪᒃᑯᓇᓂ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑎᒃᓴᓂ ᑲᒪᔨᐅᔪᑦ ᐱᕈᖅᐸᓪᓕᐊᑎᑦᓯᖁᓪᓗᒋᑦ ᓄᓇᕗᒥ ᐃᓄᖕᓂᑦ ᑲᒪᒍᓐᓇᖅᑐᓂᒃ. ᐱᓕᕆᐊᖃᖃᑕᐅᖕᒥᔪᑦ ᐃᓗᐊᖅᓴᐃᔨᐅᕙᒃᑐᑎᒃ ᐃᓕᖅᑯᑎᓯᑐᖃᒃᑯᑦ ᐃᓄᖕᓄᑦ ᐅᒃᐱᕆᔭᐅᔪᓂᒃ. “ᐅᒃᐱᕈᓱᒃᑲᒪ ᑖᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑧ ᐊᖅᑯᑎᒋᔭᐅᓕᕐᓂᐊᕐᓂᖏᓐᓂᒃ ᐃᓗᐊᖅᓴᐃᔾᔪᑕᐅᓗᑎᒃ.” ᒥᓂᔅᑕ ᐱᑯ ᐅᖃᖅᑲᐅᔪᖅ. ᐅᓄᖅᓯᒋᐊᕐᓂᖓ ᐊᑐᖅᑕᐅᖃᑦᑕᕐᓂᖓᑕ ᑖᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑏᑦ, ᑮᓇᐅᔭᖅᑐᓗᐊᕈᓐᓃᕈᑕᐅᓂᐊᖅᑐᑦ ᐊᒻᒪᓗ ᐱᐅᓯᕚᓪᓕᕈᑕᐅᓗᑎᒃ ᐃᓗᐊᖅᓴᖅᑕᐅᖃᑦᑕᕐᓂᖏᓐᓄᑦ ᓄᓇᕗᒥᐅᑦ.” ᐱᕙᓪᓕᐊᑎᑕᐅᓂᖓ ᑖᒃᑯᐊ ᑕᓚᕖᓴᒃᑯᑦ ᐋᓐᓂᐊᖅᑐᓕᕆᔾᔪᓄᑦ ᐊᑕᔾᔪᑎᒃᓴᓂᒃ ᐃᑲᔪᖅᓱᖅᑕᐅᓚᐅᖅᑐᑦ ᑲᓇᑕᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐊᖅᑯᑎᒋᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᑲᔪᖅᑎᒌᒍᑕᐅᔪᑦ. ᓄᓇᕗᑦ ᒐᕙᒪᖏᑦ ᑐᓂᔭᐅᓚᐅᖅᑐᑦ $3.47-ᒥᓕᔭᓐ ᑖᒃᑯᓇᓂᖓᑦ ᐊᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᑲᔪᖅᑎᒌᒃᑐᓄᑦ ᑖᒃᑯᓇᙵᑦ $7.4 ᒥᓕᔭᓂᒃ ᐱᐅᓯᕚᓪᓕᕈᑕᐅᒋᐊᖃᓯᑐᓄᑦ ᐊᒻᒪᓗ ᐊᖏᓪᓕᒋᐊᕈᑎᒃᓴᓄᑦ ᓄᓇᕗᒥ. ᒫᓐᓇᐅᔪᖅ ᑕᒪᒃᑯᐊᓂ ᑕᓚᕖᓴᒃᑯᑦ ᐋᓐᓂᐊᖅᑐᓂᒃ ᐃᑲᔪᕐᓂᕐᒧᑦ ᐊᑕᔾᔪᑏᑦ ᐱᑕᖃᓕᖅᑐᑦ 15-ᓂ ᓄᓇᓕᐅᔪᓂ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ ᐅᖃᕐᕕᒋᓗᒍ: ᕕᑎ ᕼᐋᓗᓇᓐ ᓄᓇᕗᒥ ᑐᓴᖓᒃᓴᓕᕆᔩᑦ (867) 975-6046 |