 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᓴᓂᑭᓗᐊᖅ, ᓄᓇᕗᑦ(ᔫᓂ 19, 2003)-ᓄᓇᕗᑦ ᒐᕙᒪᖏᑦᑕ ᐊᐅᓚᑦᑎᔨᖏᑦ ᒥᓂᔅᑕᐃᑦ ᐱᐊᓂᕌᑖᖅᐳᑦ ᒪᕐᕉᖕᓂᑦ ᐅᓪᓘᓐᓂᑦ ᐸᕐᓇᐅᑎᖃᕐᓂᕐᒧᑦ ᑲᑎᒪᓂᖃᖅᑐᑎᒃ, ᕿᒥᕐᕈᓪᓗᑎᒃ ᐱᓕᕆᐊᕆᓂᐊᖅᓯᒪᔭᒥᓂᒃ ᐱᖁᖅᐸᓪᓕᐊᔾᔪᑎᖏᓐᓂᒃ ᒐᕙᒪᒃᑯᑦ ᑕᐅᑐᒐᖃᖅᑐᓂᒃ ᐃᑲᔪᖅᑕᐅᔾᔪᑎᒋᔪᒪᔭᖏᓐᓂᒃ ᐊᒻᒪᓗ ᐱᒍᒪᔭᖏᓐᓂᒃ ᓄᓇᕗᒥᐅᑦ. ᑲᑎᒪᓪᓗᑎᒃ ᓂᒋᖅᐸᓯᖕᓂᖅᐹᒦᑦᑐᓂᒃ ᓄᓇᓕᐊᓂᒃ ᓴᓂᑭᓗᐊᑉ, ᑖᒃᑯᐊ ᐊᐅᓚᑦᑎᔩᑦ ᑕᐅᑐᒐᖃᖅᑲᐅᔪᑦ ᖃᓄᖅ ᐱᓕᕆᖃᑎᖃᕐᓂᕐᒥᓂᒃ ᒐᕙᒪᑐᖃᒃᑯᓐᓂᒃ, ᑭᐅᔾᔪᑎᒋᓪᓗᒋᑦ ᐃᑲᔪᖅᑕᐅᔾᔪᑕᐅᒋᐊᖃᖅᑐᓂᒃ ᓄᓇᓕᖕᓄᑦ ᐊᒻᒪᓗ ᐱᕙᓪᓕᐊᓂᐅᔪᓂᒃ ᐊᒻᒪᓗ ᐊᒃᓱᕉᑕᐅᒋᐊᖃᖅᑐᓂᒃ ᐃᓕᓐᓂᐊᖅᑐᓕᕆᓂᕐᒧᑦ. ᐱᔾᔪᑎᒋᓪᓗᒋᑦ ᐱᓕᕆᖃᑎᒌᖕᓂᕐᒧᑦ ᐱᖃᑎᒌᖕᓂᖏᑦ ᓄᓇᕗᑦ-ᒐᕙᒪᑐᖃᒃᑯᑦ ᑖᒃᑯᐊ ᐊᐅᓚᑦᑎᔩᑦ ᖁᕕᐊᓱᓚᐅᖅᑐᑦ ᑐᓴᖅᑎᑦᑎᒋᐊᒃᓴᖅ ᐱᕙᓪᓕᐊᓂᐅᔪᓂᒃ ᑖᒃᑯᐊ ᒐᕙᒪᑐᖃᒃᑯᑦ ᐃᓕᑕᖅᓯᕙᓪᓕᐊᓂᖏᓐᓂᒃ ᓈᒻᒪᙱᑦᑐᓂᒃ ᒫᓐᓇ ᑮᓇᐅᔭᖅᑖᖅᑎᑦᓯᔾᑕᐅᕙᒃᑐᑦ. ᐱᔾᔪᑎᒋᓪᓗᒋᑦ ᐅᑭᐅᖅᑕᖅᑐᒥᐅᑦ ᐃᑲᔪᖅᑎᒌᓕᓚᐅᕐᓂᖏᑦ ᐊᑕᐅᓯᐅᓪᓗᑎᒃ ᐊᒻᒪ ᐃᑲᔪᖅᓱᖅᑕᐅᓚᐅᖅᑐᑎᒃ ᑲᓇᑕᐅᑉ ᐊᕕᒃᑐᖅᓯᒪᓂᖏᑦᑕ ᒐᕙᒪᖏᓐᓄᑦ, ᑖᒃᑯᐊ ᒐᕙᒪᑐᖃᒃᑯᑦ ᐅᖃᐅᓯᖃᕆᐊᓕᓚᐅᖅᑐᑦ ᓇᓂᓯᒐᓱᐊᖅᑐᑎᒃ ᐋᖅᑭᒋᐊᕈᑕᐅᔪᓐᓇᖅᑐᓂᒃ ᑮᓇᐅᔭᖅᑖᖅᑎᑦᓯᔾᔪᑕᐅᕙᒃᑐᓂᒃ. ᑖᒃᑯᐊ ᒫᓐᓇ ᐊᑐᖅᑕᐅᔪᑦ ᑮᓇᐅᔭᖅᑖᖅᑎᑦᑎᔾᔪᑏᑦ ᒪᓕᖕᒪᑕ ᑭᓯᐊᓂ ᐅᓄᕐᓂᖏᓐᓂᒃ ᐃᓄᐃᑦ ᐊᒻᒪᓗ ᐃᓕᑕᖅᓯᓯᒪᒐᑎᒃ ᐊᔾᔨᐅᖏᑦᑐᓂᒃ ᐊᑭᖃᖃᑦᑕᕐᓂᖏᓐᓂᒃ ᐱᔨᑦᓯᕋᐅᑕᐅᔪᑦ ᓄᓇᕗᒥ ᐊᒻᒪᓗ ᐅᑭᐅᖅᑕᖅᑐᖏᓐᓂ ᑲᓇᑕᐅᑉ. ᒥᓂᔅᑕᐃᑦ ᐅᓂᒃᑳᕐᕕᐅᓚᐅᕐᒥᔪᑦ ᓄᓇᕗᑦ ᐱᕙᓪᓕᐊᓂᕆᔭᖏᓐᓂᒃ ᓴᖅᑭᑎᑕᐅᓯᒪᔪᓂᒃ ᐊᔭᐅᖅᑕᐅᓪᓗᑎᒃ ᒐᕙᒪᑐᖃᒃᑯᑦ ᑮᓇᐅᔭᖅᑕᖃᒃᑲᓐᓂᕆᐊᖃᕐᓂᖓᓂᒃ ᐱᔨᑦᓯᕋᑦᓯᐊᕈᑎᒃᓴᒃᑲᓐᓂᕐᓂᒃ ᓄᓇᕗᒥ ᐅᖃᐅᓯᕐᓄᑦ ᐃᓕᑕᕆᔭᐅᓯᒪᔪᑎᒍᑦ. ᐅᖃᓕᒪᖃᑎᒋᒻᒪᕆᒃᑐᒋᑦ ᑲᓇᑕᒥ ᐱᖅᑯᓯᑐᖃᓕᕆᔩᑦ, ᐊᐅᓚᑦᑎᔩᑦ ᒥᓂᔅᑕᖏᑦ ᓂᕆᐅᑦᓯᐊᓂᖅᓴᐅᓕᖅᑐᑦ ᐱᐅᓯᕚᓪᓕᖅᓯᒪᔪᒥᒃ ᐊᖏᖃᑎᒌᒍᑎᖃᕐᓂᐊᕐᓂᖏᓐᓂᒃ ᓴᖅᑭᔮᖅᑎᑦᓯᔾᔪᑕᐅᓂᐊᖅᑐᓂᒃ ᐃᓄᐃᑦ ᖃᐅᓯᖏᓐᓂᒃ ᓄᓇᕗᒥ. ᑖᒃᑯᐊ ᐊᐅᓚᑦᑎᔩᑦ ᖁᕕᐊᓱᓚᐅᖅᑐᑦ ᒐᕙᒪᑐᖃᒃᑯᑦ ᐊᖏᖃᑎᒌᒐᓱᐊᕈᑎᒋᒃᑲᓐᓂᕐᓂᐊᖅᑕᖏᓐᓂᒃ ᐊᒻᒪᓗ ᕿᒥᕐᕈᓗᒋᑦ ᑕᒪᒃᑯᐊ ᓱᓕ ᐅᖃᐅᓯᐅᒋᐊᓖᑦ ᐊᑐᓕᖅᑎᑕᐅᔾᔪᑎᖏᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ. ᓄᓇᕗᒥ ᐊᐅᓚᑦᑎᔩᑦ ᐅᖃᐅᓯᖃᓚᐅᕐᒥᔪᑦ ᐊᑲᐅᙱᓕᐅᕈᑕᐅᔪᓂᒃ ᐱᓕᕆᖃᑎᒌᖕᓂᖏᓐᓄᑦ ᒐᕙᒪᑐᖃᒃᑯᑦ ᐱᖃᑎᒋᓪᓗᒋᑦ. ᐃᓱᒫᓘᑕᐅᓗᐊᓚᐅᖅᑐᖅ ᒫᓐᓇᒫᖅ ᐃᓱᒪᓕᐅᕈᑕᐅᓚᐅᖅᑐᖅ ᒐᕙᒪᑐᖃᒃᑯᓐᓄᑦ ᐅᓄᖅᓯᒋᐊᖅᑕᐅᓂᖏᑦ ᑕᒪᒃᑯᐊ ᑭᖑᒃᐸᒐᓱᐊᖅᑕᐅᔪᑦ ᐃᒪᖏᓐᓂ ᓄᓇᕗᑦ, ᓄᓇᕗᒥᐅᑕᐅᙱᑦᑐᓄᑦ. ᑖᒃᑯᐊ ᓄᓇᕗᑦ ᒐᕙᒪᖏᑦ ᑐᓴᖅᑎᑦᑎᓂᐊᖅᑐᑦ ᑭᒃᑯᑐᐃᓐᓇᕐᓂᒃ ᒫᓐᓇᒫᖅ ᑕᒪᓐᓇ ᖃᓄᐃᓕᐅᕈᑕᐅᓂᐊᕐᓂᖓᓂᒃ. ᓴᖅᑭᑎᑦᓯᒐᓱᐊᕐᓂᖅ ᐃᑲᔪᖅᑕᐅᔾᔪᑎᒋᒋᐊᖃᖅᑕᖏᓐᓂᒃ ᓄᓇᓖᑦ ᓯᕗᓪᓕᐅᔾᔭᐅᓯᒪᓚᐅᕐᒥᔪᖅ ᐅᖃᓕᒪᐅᑕᐅᔪᓂ. ᐊᐅᓚᑦᑎᔩᑦ ᐊᖏᖃᑎᒌᒃᑐᑦ ᑲᔪᓯᑎᑦᓯᔪᒪᓪᓗᑎᒃ ᐊᑐᓕᖅᑎᑕᐅᔾᔪᑎᖏᓐᓂᒃ ᓯᐊᒻᒪᒃᑎᕆᓂᕐᒧᑦ ᐊᑐᐊᒐᑦ. ᓯᕗᓂᒃᓴᒥ ᑐᓴᖅᑎᑦᑎᔾᔪᑕᐅᓂᐊᖅᑐᑦ ᑕᑯᒃᓴᐅᑎᑦᑎᓂᐊᖅᑐᑦ ᑖᒃᑯᐊ ᒐᕙᒪᒃᑯᑦ ᓴᖅᑭᑎᑦᓯᔪᒪᓂᖏᓐᓂᒃ ᐱᓕᕆᐊᕆᓂᐊᖅᓯᒪᔭᒥᓂᒃ ᓂᕈᐊᖅᑕᐅᓯᒪᓂᕐᒥᓂᒃ. ᐊᐅᓚᑦᑎᔩᑦ ᕿᒥᕐᕈᓚᐅᕐᒥᔪᑦ ᐃᒡᓗᑖᖅᑎᑦᓯᖃᑦᑕᕐᓂᕐᒧᑦ ᐊᑐᐊᒐᕐᓂᒃ ᐅᓄᖅᓯᒋᐊᕈᒪᓪᓗᒋᑦ, ᒪᓂᒪᓂᖅᓴᐅᔪᒪᓪᓗᒋᓪᓗ ᓇᖕᒥᓂᕆᔭᐅᔪᓐᓇᖅᑐᑦ. ᑎᓕᐅᕆᓯᒪᔪᑦ ᒐᕙᒪᒃᑯᑦ ᐊᖓᔪᖅᑲᐅᑎᖏᓐᓂᒃ ᐋᖅᑭᒃᓱᐃᖁᓪᓗᒋᑦ ᐋᖅᑭᑦᑎᐊᖅᓯᒪᓂᖅᓴᐅᔪᓂᒃ ᐃᒡᓗᓄᑦ ᐊᑐᖅᑐᐊᕐᓂᕐᒧᑦ ᐊᑭᓖᔾᔪᑕᐅᕙᒃᑐᑦ ᐋᖅᑭᒃᓯᒪᔾᔪᑎᖏᓐᓂᒃ, ᐃᒃᐱᒍᓱᖕᓂᖅᓴᐅᓂᐊᖅᑐᓂᒃ ᐊᑭᓖᔪᓐᓇᖅᑐᑦ ᒪᓕᒡᓗᒋᑦ ᐊᒻᒪᓗ ᖃᓄᖅ ᐱᐅᑎᒋᓂᖏᑦ, ᐱᐅᖏᑎᒋᓂᖏᑦ ᐃᒡᓗᐃᑦ ᐊᑐᖅᑐᐊᖅᑕᐅᔪᑦ. ᓂᕆᐅᒍᒥᓇᖅᐳᖅ ᑕᒪᒃᑯᐊ ᖃᓄᐃᓕᐅᕈᑕᐅᒋᐊᖅᑐᑦ, ᐃᓚᖃᕐᓗᑎᒃ ᐊᑭᓃᕐᒧᑦ ᐃᑲᔫᑕᐅᔪᓂᒃ, ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᓇᖕᒥᓂᖅᑖᕈᑕᐅᔪᓐᓇᖁᓪᓗᒋᑦ. ᐃᓕᓐᓂᐊᖅᑐᓕᕆᓂᖅ ᐱᖓᔪᒋᔭᐅᓚᐅᖅᑐᑦ ᑕᐅᑐᒐᖏᓐᓂᒃ ᑖᒃᑯᐊ ᐊᐅᓚᑦᑎᔩᑦ ᐃᖕᒥᒃᑯᑐᐊᖅ ᑲᑎᒪᓂᖃᖅᑎᓪᓗᒋᑦ. ᒪᓕᒃᑕᐅᓯᒪᔭᕆᐊᓖᑦ ᐃᓕᓐᓂᐊᖅᑐᓕᕆᓂᕐᒧᑦ ᕿᒥᕐᕈᔭᐅᓚᐅᖅᑐᑦ ᐱᔾᔪᑎᒋᓪᓗᒋᑦ ᐃᓕᓐᓂᐊᖅᑏᑦ ᐃᓕᑉᐸᓪᓕᐊᑎᒋᓂᖏᑦ, ᐃᓕᓐᓂᐊᖅᑎᑦᓯᔾᔪᑎᒃᓴᓂᒃ ᓴᖅᑭᑎᑦᓯᕙᓪᓕᐊᓂᖅ, ᐅᖃᐅᓰᑦ ᐃᓕᓐᓂᐊᖅᑎᑦᑎᔾᔪᑕᐅᔪᑦ ᐊᒻᒪᓗ ᐃᖅᑲᓇᐃᔮᕆᔭᐅᖏᓐᓇᕐᓂᐊᖅᑐᓂᒃ ᐃᓕᓐᓂᐊᕐᓂᖅ ᐃᓕᑕᕆᔭᐅᔾᔪᑎᖃᕆᐊᖃᖅᑐᓂᒃ. ᒥᓂᔅᑕᐃᑦ ᓴᖅᑭᑎᑦᓯᔪᒪᑦᓯᐊᖅᐳᑦ ᓄᓇᓕᖕᓂ ᐃᓕᓴᐃᔨᐅᔪᑦ ᐃᓕᓐᓂᐊᖅᑎᑕᐅᓂᖏᑦ ᐊᒻᒪᓗ ᐃᓕᓐᓂᐊᖅᑎᑦᓯᔾᔪᑎᒃᓴᓂᒃ ᐱᕙᓪᓕᐊᑎᑦᓯᓂᖅ ᐱᕈᖅᐸᓪᓕᐊᔾᔪᑕᐅᓂᖓᓂᒃ ᐱᕙᓪᓕᐊᑎᑕᐅᓂᖓᓄᑦ ᓄᓇᕗᒥ ᐃᓕᓐᓂᐊᖅᑐᓕᕆᔾᔪᑕᐅᔪᑦ. |