 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓄᐃᑦ, ᓄᓇᕗᑦ, ᔫᓂ 16, 2003 - ᓯᕗᓕᖅᑎ ᐹᓪ ᐅᑲᓕᖅ ᐊᒻᒪᓗ ᓴᐃᒪᓐ ᒥᖅᑯᓵᖅ ᐃᒃᓯᕙᐅᑕᖓᑦ ᖁᓪᓕᖅ ᑯᐊᐳᕇᓴᒃᑯᑦ, ᑐᓴᖅᑭᑎᑦᑎᕗᑦ ᐅᓪᓗᒥ ᑖᓐᓇ ᐊᖓᔪᖅᑳᖓᑦ ᑎᒃᑯᐊᖅᑕᐅᓯᒪᓕᕐᓂᖓᓂᒃ ᓯᕗᓕᖅᑎᐅᓂᐊᕐᓗᓂ ᓄᑖᒧᑦ ᑯᐊᐳᕇᓴᒧᑦ, ᑖᒃᑯᐊ ᐱᓕᕆᐊᖃᖅᑎᑕᐅᔪᑦ ᑐᑭᒧᐊᒍᑎᓂᒃ ᐊᒻᒪᓗ ᐊᐅᓚᑦᑎᔾᔪᑎᓂᒃ ᒫᓐᓇ, ᓯᕗᓂᒃᓴᒥᓗ ᐆᒻᒪᖅᑯᑎᒋᒋᐊᖃᖅᑕᖏᓐᓂᒃ ᓄᓇᕗᑦ. ᓵᑯ ᐃᐊᓪᕆᑦ ᐳᓱᖑᓄᓂᑭ ᒍᓗᐃᑭᓂᖁ ᐅᓪᓗᒥ ᐃᖅᑲᓇᐃᔭᕆᐊᓯᖅᑲᐅᔪᖅ, ᐃᓇᖐᔪᖅ ᔭᐃᒥ ᐸᓛᕈᑎ ᐊᖓᔪᖅᑳᖑᑲᐃᓐᓇᖅᓯᒪᔪᖅ ᑲᔪᓯᓯᒪᓂᐊᖅᑐᖅ ᐊᖓᔪᖅᑳᖑᑲᐃᓐᓇᕐᓗᓂ ᓄᓇᕗᒥ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᓐᓄᑦ. “ᓄᓇᕗᑦ ᐃᑲᔪᖅᓱᐃᒻᒪᕆᖕᒪᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ Kyoto Accord ᒥᑭᓪᓕᒋᐊᕈᑕᐅᒐᓱᐊᖅᑐᖅ ᓴᓗᒪᐃᑦᑐᖅ ᓯᓚᒨᖅᐸᓪᓕᐊᓂᖏᓐᓄᑦ ᐊᒻᒪᓗ ᐱᓕᕆᐊᒃᓴᑦᑎᓐᓂᒃ ᐱᓕᕆᐊᖃᕈᒪᒐᑦᑕ. ᖁᕕᐊᓱᒻᒪᕆᒃᐳᖓ ᑖᓐᓇᑐᑦ ᒥᔅᑕ ᐃᐊᓪᕆᑦ ᖃᐅᔨᒪᓂᖃᒻᒪᕆᒃᑐᖅ ᐊᖏᖅᓯᒪᖕᒪᑦ ᐃᖅᑲᓇᐃᔭᖃᑕᐅᓂᐊᕐᓗᓂ ᐅᕙᑦᑎᓐᓄᑦ ᐊᒻᒪᓗ ᓯᕗᓕᖅᑎᐅᓗᓂ, ᑕᒪᓐᓇ ᐱᑕᖃᕆᐊᖃᕐᓂᐊᕐᒪᑦ ᐋᖅᑭᒋᐊᕆᕙᓪᓕᐊᑎᓪᓗᑕ ᖃᓄᖅ ᐊᑐᖃᑦᑕᕐᓂᐊᕐᓂᑦᑎᓐᓂᒃ ᐊᒻᒪᓗ ᓴᖅᑭᑎᑦᓯᓯᒪᓂᐊᕐᓂᑦᑎᓐᓂᒃ ᐆᒻᒪᖅᑯᑎᖃᕈᑕᐅᔪᓂᒃ ᓄᓇᕗᒥ,” ᓯᕗᓕᖅᑎ ᐅᑲᓕᖅ ᐅᖃᖅᑲᐅᔪᖅ. ᒥᔅᑕ ᐊᐃᓪᕆᑦ ᑎᑭᑦᑐᖅ ᓄᓇᕗᒧᑦ ᐊᖓᔪᖅᑳᖑᓯᒪᒻᒪᕆᒃᑐᓂ ᒐᕙᒪᒃᑯᓐᓂ. ᐃᖅᑲᓇᐃᔭᖅᓯᒪᔪᖅ ᔫᑳᓐᒥ, ᓄᓇᑦᓯᐊᕐᒥ, ᒪᓂᑑᕙᒥ ᐊᒻᒪᓗ ᓯᓯᑳᑦᓱᕗᐊᓐ ᒐᕙᒪᖏᓐᓄᑦ. 1993-ᒥᓂᒃ, ᐊᖓᔪᖅᑳᖑᓯᒪᔪᖅ ᑖᒃᑯᓄᖓ ᓇᖕᒥᓂᕆᔭᐅᔪᓄᑦ Alwarid & Associates, ᐊᐅᓚᑦᑎᔨᐅᓂᕐᒧᑦ ᓇᖕᒥᓂᕆᔭᐅᔪᑦ. ᔫᑳᓐ ᒐᕙᒪᖏᓐᓃᑦᑐᓂ, ᒥᔅᑕ ᐊᐃᓪᕆᑦ ᐊᖓᔪᖅᑳᖑᓚᐅᖅᑐᖅ ᔫᑳᓐᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓂ ᐊᒻᒪ ᔫᑳᓐ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᑦ. ᐊᖓᔪᖅᑳᕆᔭᐅᓚᐅᖅᑐᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᓐᓄᑦ ᐊᒻᒪᓗ ᐃᓚᒋᔭᐅᓪᓗᓂ ᑲᑎᒪᔨᓄᑦ. ᑖᒃᑯᐊ ᓄᓇᕗᑦ ᒐᕙᒪᖏᑦ ᐋᖅᑭᒃᓯᓯᒪᖕᒪᑕ ᖁᓪᓕᖅ ᑯᐊᐳᕇᓴᒃᑯᓐᓂᒃ ᑕᐃᒪᙵᓂᒃ ᐊᐃᐳᕈ 1, 2003. ᒪᕐᕉᖕᓂᑦ ᐊᑖᓂᒥᐅᑕᖃᕐᓂᐊᖅᑐᖅ. ᓄᓇᕗᒥ ᐆᒻᒪᖅᑯᑎᓕᕆᓂᖅ ᓴᖅᑭᑎᑦᓯᔨᐅᓂᐊᖅᑐᖅ, ᐱᑕᖃᖅᑎᑦᑎᓗᑎᒡᓗ ᐅᐊᔭᓅᖅᑐᓂᒃ ᐊᒻᒪᓗ ᓄᓇᕗᒥ ᐅᖅᓱᐊᓗᓕᕆᔩᑦ ᐱᓕᕆᐊᖃᕐᓂᐊᖅᑐᑦ ᐊᐃᐳᕈ 1, 2004-ᒥ ᓂᐅᕕᖅᑎᐅᓗᑎᒃ, ᐊᒡᔭᖅᓯᔨᐅᓗᑎᒃ, ᑐᖅᑯᖅᓯᒪᑎᑦᑎᔨᐅᓗᑎᒃ, ᐊᒡᔭᖅᑐᐃᔨᐅᓗᑎᒃ, ᓂᐅᕈᑎᖃᖅᑎᐅᓗᑎᒡᓗ ᐅᖅᓱᐊᓗᖕᓂᑦ. “ᓄᓇᕗᑦ ᓴᒃᑯᐃᕙᓪᓕᐊᒋᐊᖃᕐᒪᑦ ᑕᑎᖃᐃᓐᓇᕐᓂᕐᒥᑦ ᐅᖅᓱᐊᓗᒃᑐᖅᑐᓂᒃ. ᓴᖅᑭᑎᑦᓯᓚᐅᖅᑐᒍᑦ ᖁᓪᓕᖅ ᑯᐊᐱᕇᓴᒃᑯᓐᓂᒃ ᓴᖅᑭᔮᖅᑎᑦᑐᒪᓪᓗᒋᑦ ᐊᓯᐊᒎᕈᑕᐅᔪᓐᓇᖅᑐᑦ ᐆᒻᒪᖅᑯᑎᓄᑦ, ᓴᖅᑭᑎᑦᑎᓗᓂ ᐊᔾᔨᒋᙱᑦᑕᖓᓂᒃ ᐊᐅᓚᑦᑎᔾᔪᑎᓂᒃ ᐊᒻᒪᓗ ᓇᓗᓴᐃᑦᓯᐊᕐᓗᒋᑦ ᐊᑭᒻᒪᕆᐅᕙᒃᑐᑦ ᐆᒻᒪᖅᑯᑎᖃᕈᑎᖏᓐᓄᑦ ᓄᓇᕗᑦ,” ᐅᖃᖅᑲᐅᔪᖅ ᐆᒻᒪᖅᑯᑎᓕᕆᓂᕐᒧᑦ ᒥᓂᔅᑕ ᐃᑦ ᐱᑯ. “ᒐᕙᒪᒃᑯᑦ ᐱᑕᖃᖅᑎᑦᑎᔨᑑᖕᒪᑕ ᐅᐊᔭᓅᖅᑐᓂᒃ ᐊᒻᒪᓗ ᐊᒡᔭᖅᑐᐃᔨᐅᓪᓗᑎᒃ, ᐱᑕᖃᖅᑎᑦᑎᔨᐅᓪᓗᑎᒡᓗ ᐅᖅᓱᐊᓗᒃᓴᓂᒃ. ᑕᐃᒪᐃᒻᒪᑦ ᖁᓪᓕᖅ ᑯᐊᐳᕇᓴᒃᑯᑦ ᐊᔾᔨᐅᖏᑦᑐᒥᒃ ᐱᕕᒃᓴᖃᖅᐳᑦ ᐊᒻᒪ ᐱᓕᕆᐊᒃᓴᖃᖅᐳᑦ ᐅᔾᔨᖅᑐᖅᑎᐅᓗᑎᒃ, ᐅᖃᐅᔾᔨᒋᐊᖅᑎᐅᓗᑎᒃ ᐊᒻᒪᓗ ᐋᖅᑭᒋᐊᕆᔨᐅᓗᑎᒃ ᐆᒻᒪᖅᑯᑏᑦ ᐊᑐᖅᑕᐅᓂᖏᓐᓄᑦ ᓄᓇᕗᒥ. ᐱᓕᕆᖃᑎᒋᔪᒪᓂᐊᖅᐸᕋ ᒥᔅᑕ ᐊᐃᓪᕆᑦ ᑕᒪᑐᒥᖓ ᑎᒍᓯᕙᓪᓕᐊᑎᓪᓗᑕ ᐊᒃᓱᕉᑎᒃᓴᒥᒃ.” ᐅᖃᖅᑲᐅᔪᖅ ᒥᔅᑕ ᒥᖅᑯᓵᖅ. ᑐᑭᓯᒋᐊᒃᑲᓐᕈᒪᒍᕕᑦ ᐅᖄᓚᕕᒋᓗᒍ: (867) 975-6001 |