 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᑭᙵᐃᑦ, ᓄᓇᕗᑦ (ᔫᓂ 14, 2003) - ᓯᕗᓕᖅᑎ ᐹᓪ ᐅᑲᓕᖅ ᐊᒻᒪᓗ ᐃᑯᐱᒃᑐᓕᕆᔨᒃᑯᑦ ᒥᓂᔅᑕᖓᑦ ᐅᓛᔪᒃ ᐊᑭᓱᒃ, ᒪᓕᒐᓕᐅᖅᑎ, ᓂᒋᐊᓄᑦ ᕿᑭᖅᑖᓘᑉ, ᐅᓪᓗᒥ ᐃᓂᒃᓴᒥᒃ ᐳᓯᓯᑦᓂᐊᖅᑐᑦ ᐱᒋᐊᕈᑕᐅᓂᐊᕐᓗᓂ ᓴᓇᔭᐅᕙᓪᓕᐊᓂᖓᓄᑦ ᓄᑖᖅ ᓄᓇᓕᖕᓂ ᐃᓕᓐᓂᐊᕐᕕᒃᓴᖅ ᑭᙵᕐᓂ, ᐅᓄᖅᓯᒋᐊᕈᑕᐅᓂᐊᖅᑐᖅ ᐃᓕᓐᓂᐊᕐᓂᕐᒧᑦ ᐊᒻᒪᓗ ᐃᓕᑉᐸᓪᓕᐊᔪᓐᓇᕐᓂᖏᓐᓄᑦ ᓄᓇᓖᑦ. ᑖᓐᓇ ᓄᑖᖅ ᐊᒻᒪᓗ ᐊᖏᓪᓕᒋᐊᖅᑕᐅᓂᖓ ᓄᓇᕗᒥ ᓯᓚᑦᑐᖅᓴᕐᕖᑦ ᐃᒡᓗᖁᑎᖏᑦ ᐊᒥᓱᓂᒃ ᐊᑑᑎᖃᕐᓂᐊᖅᑐᖅ ᓴᓇᙳᐊᕐᕕᖃᕐᓗᓂ, ᓈᒪᔪᓂᓪᓗ ᖃᕆᓴᐅᔭᒃᑯᕕᖃᕐᓗᓂ, ᕿᔪᓕᕆᕕᖃᕐᓗᓂ, ᓂᕿᓕᐅᕐᕕᖃᕐᓗᓂ ᐊᒻᒪᓗ ᒪᕐᕉᖕᓂᑦ ᐃᒡᓗᕈᒦᓯᖕᓂᑦ ᑲᑎᒪᕕᐅᔪᓐᓇᖅᑐᓂᒃ ᑖᒃᑯᐊ ᓯᓚᑦᑐᖅᓴᕐᕕᐅᑉ ᐱᓕᕆᕕᒋᔪᓐᓇᖅᑕᖏᑦ ᐱᓕᕆᖃᑎᖃᕐᓗᑎᒃ ᐊᔾᔨᒌᙱᑦᑐᓂᒃ ᑲᑐᔾᔨᖃᑎᒌᓂᒃ ᐊᒻᒪᓗ ᑎᒥᐅᔪᓂᒃ ᓄᓇᓕᖕᓂ ᐱᑕᖃᖅᑎᑦᑎᔾᔪᑕᐅᓗᑎᒃ ᓄᓇᓕᖕᓂ ᐱᒋᐊᖅᑕᐅᔪᓂᒃ ᐃᓕᓐᓂᐊᕈᑎᒃᓴᓂᒃ. “ᐃᒡᓗᓕᐅᕐᓂᖅ ᑕᐃᒪᓐᓇ ᐊᖏᑎᒋᔪᒥᒃ ᓄᓇᓕᖕᓂ ᐃᓕᓐᓂᐊᕐᕕᒃᓴᒥᒃ ᑭᙵᕐᓂ ᐃᑲᔪᖅᓱᐃᔪᖅ ᒐᕙᒪᒃᑯᑦ ᓯᐊᒻᒪᒃᑎᕆᓂᕐᒧᑦ ᐊᑐᐊᒐᖏᓐᓂᒃ, ᑖᒃᑯᐊ ᒐᕙᒪᒃᑯᑦ ᐊᐅᓚᔾᔪᑎᖏᓐᓂᒃ ᖃᓂᓪᓕᒋᐊᕆᔪᑦ ᐃᓄᖕᓄᑦ,” ᐅᖃᖅᑐᓂ ᓯᕗᓕᖅᑎ ᐅᑲᓕᖅ. “ᐱᑕᖃᖅᑎᑦᓯᓂᖅ ᒪᓂᒪᓂᖅᓴᓂᒃ ᐃᓕᓐᓂᐊᕈᑕᐅᔪᓐᓇᖅᑐᓂᒃ ᐊᒻᒪᓗ ᐱᔨᖅᓯᕋᐅᑎᓂᒃ ᓄᓇᓕᐅᔪᓂ ᑐᓂᓯᖕᒪᑕ ᓄᓇᕗᒥᐅᑦ ᐃᑲᔪᖅᓱᖅᑕᐅᔾᔪᑎᒋᒋᐊᖃᖅᑕᖏᓐᓂᒃ ᓴᙱᒃᑎᑉᐸᓪᓕᐊᖁᓪᓗᒋᑦ ᐊᑐᓃᖅᑐᑦ ᐱᔪᓐᓇᕐᓂᖏᑦ ᐊᒻᒪᓗ ᐃᑲᔫᑎᖁᓪᓗᒍ ᐱᕈᖅᐸᓪᓕᐊᔾᔪᑕᐅᓂᐊᖅᑐᓂᒃ ᐱᔪᓐᓇᖅᓯᕙᓪᓕᐊᓂᖏᓐᓄᑦ ᓄᓇᓕᐅᔪᑦ.” ᑖᓐᓇ ᓄᑖᖅ ᐃᒡᓗ ᐱᔪᓐᓇᖅᑎᑦᓯᓂᐊᖅᑐᖅ ᓄᓇᕗᒥ ᓯᓚᑦᑐᖅᓴᕐᕕᖕᒥᑦ ᐃᖅᑲᓇᐃᔭᖅᑏᑦ ᐃᓕᓐᓂᐊᖅᑎᑦᓯᔪᓐᓇᕐᓗᑎᒃ ᐅᖃᓕᒫᕆᐅᖅᓴᓂᕐᒥᑦ, ᑎᑎᕋᕆᐊᖅᓴᓂᕐᒥ, ᐃᓐᓇᕐᓄᑦ ᐃᓕᓐᓂᐊᕈᑕᐅᒐᔪᒃᑐᓂᒃ, ᓇᔾᔨᔪᑦ ᓂᕿᑦᓯᐊᕙᓕᕆᔭᐅᓂᖏᓐᓄᑦ ᐊᒻᒪᓗ ᐊᖏᕐᕋᒥ ᐱᓕᒻᒪᒃᓴᒋᐅᒃᓴᓂᕐᒧᑦ. ᑖᒃᑯᐊ ᐊᒥᓱᓂᒃ ᐊᑑᑎᖃᕐᓂᖏᑦ ᓴᓇᙳᐊᒐᓕᕆᓂᕐᒧᑦ ᐃᑲᔪᖅᓱᐃᓂᐊᖅᑐᖅ ᐃᓕᓐᓂᐊᕈᑕᐅᓂᖏᓐᓂᒃ ᓴᓇᙳᐊᕐᓂᖅ ᖃᓄᐃᑦᑐᑐᐃᓐᓇᕐᓂᒃ ᐊᒻᒪᓗ ᑎᑎᕋᐅᔭᕐᓂᕐᒥᑦ ᑎᑭᓪᓗᒍ ᓴᕕᕋᔭᖕᓂᑦ ᓴᓇᓂᖅ ᑕᑯᒥᓇᐅᑎᓂᒃ ᓲᕐᓗ ᐊᒡᒐᖕᒦᑦ, ᐅᔭᒦᑦ, ᑲᑭᖅᑯᐊᑦ ᐊᓯᖏᓪᓗ. ᐊᔾᔨᒌᙱᑦᑐᓂᒃ ᐃᓕᓐᓂᐊᕈᑎᒃᓴᖅᑕᖃᓂᐊᕐᒥᔪᖅ ᐊᕐᕌᒍᑕᒫᑦ. “ᑖᓐᓇ ᐃᒡᓗ ᐱᑕᖃᖅᑎᑦᓯᓂᐊᖅᑐᖅ ᐃᓕᓐᓂᐊᕈᑕᐅᑲᐃᓐᓇᕈᓐᓇᖅᑐᓂᒃ ᐊᒻᒪᓗ ᐃᓕᑕᐅᔪᒪᔪᓄᑦ ᐊᓯᐊᒎᕕᒃᓴᓂᒃ ᐊᒻᒪᓗ ᐱᕕᒃᓴᖃᒃᑲᓐᓂᓕᖅᑎᓪᓗᒍ ᐃᖅᑲᓇᐃᔭᕈᓐᓴᕐᓂᖏᑦ ᑭᙵᕐᒥᐅᑦ.” ᐅᖃᖅᑐᓂ ᒥᓂᔅᑕ ᕿᓚᕝᕙᖅ, “ᑕᒪᑐᒨᓇ ᐃᑲᔪᕈᓐᓇᕐᓂᐊᖅᑐᑦ ᐱᕈᖅᐸᓪᓕᐊᓂᖓᓄᑦ ᑮᓇᐅᔭᐅᓕᐅᕈᑕᐅᔪᓐᓇᖅᑐᑦ ᓄᓇᓕᖕᓂ.” “ᑖᓐᓇ ᐊᖏᓪᓕᒋᐊᖅᑕᐅᓂᖓ ᓄᓇᕗᒥ ᓯᓚᑦᑐᖅᓴᕐᕕᐅᑉ ᐃᓕᓐᓂᐊᕐᕕᖓ ᐃᓚᒋᔭᖓ ᒐᕙᒪᒃᑯᑦ ᐸᕐᓇᐅᑎᖏᑦᑕ ᐅᖃᐅᓯᖃᕐᓕᐊᕐᓗᑎᒃ ᑕᒪᒃᑯᐊ ᐅᖃᐅᓯᒃᓴᓂᒃ ᐃᓱᒫᓘᑕᐅᓯᒪᔪᑦ ᐅᖃᐅᓯᐅᖃᑦᑕᖅᑐᑦ ᐃᓐᓇᐃᑦ ᐃᓕᓐᓂᐊᕈᑎᖏᓐᓄᑦ ᐊᒻᒪᓗ ᐃᓕᓐᓂᐊᕈᑎᒃᓴᓄᑦ,” ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕ ᒪᓃᑦᑐᖅ ᑖᒻᓴᓐ ᐅᖃᖅᑲᐅᔪᖅ. “ᑐᓴᖃᑎᒌᖃᑎᖃᕐᓂᒃᑯᑦ ᐱᖃᑎᒋᓪᓗᒍ ᓄᓇᓕᒃ, ᓄᓇᕗᒥ ᓯᓚᑦᑐᖅᓴᕐᕕᒃ ᐋᖅᑭᒃᓱᐃᔪᓐᓇᖅᑐᑦ ᐊᑐᖅᑕᐅᔪᓐᓇᖅᑐᓂᒃ ᐅᖃᓕᒫᕆᐅᒃᓴᓂᕐᒧᑦ, ᑎᑎᕋᕆᐅᖅᓴᓂᕐᒧᓪᓗ, ᐃᓐᓇᐃᑦ ᐃᓕᓐᓂᐊᕈᑎᒋᒐᔪᒃᓴᑕᖏᓐᓄᑦ, ᐊᔪᕈᓐᓃᖅᓴᓂᕐᒧᑦ ᐊᒻᒪᓗ ᐃᖅᑲᓇᐃᔮᕇᓐᓇᕐᓂᐊᖅᑐᒥᒃ ᐃᓕᓐᓂᐊᖅᐸᓪᓕᐊᓂᖅ ᒪᓕᒃᑐᓂᒃ ᐃᑲᔪᖅᑕᐅᔾᔪᑎᒋᒋᐊᖃᖅᑕᖏᓐᓂᒃ ᓄᓇᕗᒥᐅᑦ ᐊᒻᒪᓗ ᐊᖏᓪᓕᒋᐊᕈᓐᓇᕐᓗᒋᑦ ᑮᓇᐅᔭᓕᐅᕈᑎᒋᔪᓐᓇᖅᑕᓂ.” ᑖᓐᓇ ᐃᓐᓇᕐᓄᑦ ᐃᓕᓐᓂᐊᕐᕕᒃᓴᖅ ᒪᑐᐃᕐᕕᒃᓴᖃᖅᑐᖅ ᐅᑭᐊᒃᓵᖓᓂ 2004. ᑐᓴᖃᑦᑕᐅᑎᓕᕆᔩᑦ ᐅᖃᕐᕕᖃᕈᓐᓇᖅᑐᑦ: ᕕᓐᑎ ᕼᐋᓗᓇᓐ (867) 975-6046 ᐊᔾᔨᙳᐊᖅ ᐊᒧᔭᐅᔪᓐᓇᖅᑐᑦ ᖃᕆᓴᐅᔭᕐᒥᑦ ᐅᕙᙵᑦ www.gov.nu.ca |