 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᔪᓚᐃ 8, 2003) – ᐊᖏᖃᑎᒌᒍᑎᖃᓕᕐᐳᑦ ᑖᒃᑯᐊ ᑲᓇᑕᐅᑉ ᒐᕙᒪᖓᓂᒃ ᑮᓇᐅᔭᖃᕐᑎᑦᓯᖃᑕᕐᓂᐊᕐᓗᑎᒃ ᑭᒃᑯᓕᒫᓄᑦ ᒐᕙᒪᐅᔪᓄᑦ ᐊᒻᒪ ᓄᓇᕗᒥ ᐊᔪᐃᓐᓈᕆᐊᑲᕐᓂᕐᓂᕐᒧᑦ ᑲᑎᒪᔨᖏᑎᒍᑦ. ᑕᒪᒃᑯᐊ ᐊᖏᐅᑕᐅᓯᒪᔪᑦ ᐋᖅᑭᒃᓯᒪᕗᑦ ᒪᓕᒃᑕᐅᔭᕆᐊᖃᓲᖑᒃᒪᑕ ᑮᓇᐅᔭᖃᕐᑎᑕᐅᓂᐊᕐᓂᖏᓐᓄᑦ ᐊᖏᖃᑎᒌᒐᓱᐊᕐᓂᖃᓕᕌᖓᑕ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᓄᓇᑖᕐᓂᕐᒥᒃ ᑕᒪᓐᓇ ᐱᓕᕆᐊᖑᓂᐊᓕᕐᑎᑦᓗᒍ ᓄᓇᕗᒥ ᓄᓇᑖᕐᓂᐅᑉ ᐊᖏᐅᑎᖓᓂᒃ ᐊᑐᓕᕐᑎᑦᓯᕙᑦᓕᐊᓂᒃᑯᑦ ᑳᓐᑐᕌᒃᑰᕐᑐᖅ. ᑕᒪᓐᓇ ᖃᐅᔨᒃᑲᐅᑕᐅᖃᐅᔪᖅ ᐅᑉᓗᒥ ᔫ ᑯᓄᒃᒧᑦ, ᑖᓐᓇ ᐊᐅᓚᑦᓯᔨᒻᒪᕆᒋᔭᐅᔪᖅ ᐊᖏᖃᑎᒌᒐᓱᐊᕐᑎᖏᓐᓄᑦ ᓄᓇᕗᑦ ᑐᙵᕕᒃᑯᑦ ᐊᒻᒪ ᑕᐃᕕᑦ ᐊᕿᐊᕈᖅ, ᐊᐅᓚᑦᓯᔨᒻᒪᕆᒋᔭᐅᔪᖅ ᐊᖏᖃᑎᒌᒐᓱᐊᕐᑎᖏᓐᓄᑦ ᓄᓇᕗᑦ ᒐᕙᒪᖓᓄᑦ. ᑖᓐᓇ ᐊᖏᖃᑎᒌᒍᑦ ᐊᑎᓕᐅᕐᑕᐅᖃᑕᐅᔪᖅ ᐅᑉᓗᒥ ᓄᓇᕗᑦ ᒐᕙᒪᖓᓄᑦ, ᓄᓇᕗᑦ ᑐᙵᕕᒃᑯᓐᓄᑦ ᑖᒃᑯᓄᖓᓗ ᐃᓄᓕᕆᔨᒃᑯᓐᓄᑦ ᑲᓇᑕᒥ. "ᑖᓐᓇ ᐊᖏᖃᑎᒌᒍᑕᐅᒧᖅ ᐃᓚᖓ ᐊᑦᑕᕐᓇᕐᑐᑰᕈᓐᓇᕐᓱᓂᐅᔪᖅ. ᑕᒪᒃᑯᐊ ᒐᕙᒪᐅᔪᑦ ᐊᐅᓚᑦᓱᓐᓇᕐᓂᐊᕐᒪᑕ ᐊᑲᐅᔪᒥᒃ ᐊᑦᓱᖏᕐᓯᒪᑦᓯᐊᕐᑐᒥᒃᓗ ᐱᓕᕆᖃᑎᖃᕐᑎᑦᓗᒋᑦ ᑲᓇᑕᐅᑉ ᒐᕙᒪᖓᓂᒃ ᓄᓇᕗᑦᓗ ᒐᕙᒪᖓᓂᒃ ᓯᕕᑐᔪᒧᑦᓗ ᑕᒪᓐᓇ ᐋᖅᑭᒃᓯᒪᔪᑕᐅᓂᐊᕐᒪᑦ ᑕᒪᒃᑯᐊᓗ ᖃᓄᐃᓕᐅᐸᑦᓕᐊᓂᐅᓕᕐᑐᑦ ᖃᐅᔨᒪᓇᕐᓗᑎᒃ ᖁᓕᓄᑦ ᐊᕐᕌᒍᓄᑦ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᐃᓕᖓᔪᑦ ᓄᓇᑖᕐᓂᕐᒥᒃ," ᐅᖃᓚᐅᕐᑐᖅ ᑯᓄᑦ. "ᑕᒪᓐᓇ ᐊᖏᐅᑕᐅᔪᖅ ᐱᓪᓚᕆᐅᕗᖅ ᐊᑲᐅᖏᓕᐅᕈᑎᓂᒃ ᐲᕐᓯᒃᒪᑦ ᑕᒪᒃᑯᓄᖓ ᑭᒃᑯᓕᒫᓄᑦ ᒐᕙᒪᒋᔭᐅᔪᓄᑦ ᓯᕗᓂᕐᓴᒧᑦᓗ ᐸᕐᓇᑕᐅᔪᓐᓇᕐᓂᐊᓕᕐᒪᑦ," ᐅᖃᓚᐅᕐᑐᖅ ᐊᕿᐊᕈᖅ. ᓄᓇᕗᒥ ᓄᓇᑖᕐᓂᕐᒥᒃ ᐊᑐᓕᕐᑎᑦᓯᕙᑦᓕᐊᓂᖅ ᑕᒪᓐᓇ ᑮᓇᐅᔭᖃᕐᑎᑕᐅᓲᑯᒃᒪᑦ ᑲᓇᑕᐅᑉ ᒐᕙᒪᖓᓄᑦ ᒪᓕᒃᐅᓗᓂ ᑖᓐᓇ ᑳᓐᑐᕌᕆᔭᐅᔪᖅ ᐊᑐᕐᑕᐅᓲᖅ ᐊᑐᓕᕐᑎᑦᑕᐅᕙᑦᓕᐊᓂᖓᓄᑦ ᓄᓇᑖᕐᓂᕐᒧᑦ ᐊᖏᐅᑕᐅᓯᒪᔫᑉ (ᐊᑐᓕᕐᑎᑦᓯᕙᑦᓕᐊᓂᕐᒧᑦ ᓄᓇᑖᕐᓂᕐᒥᒃ ᑳᓐᑐᕌᒃᑯᑦ) ᑕᒪᓐᓇ ᐊᑐᓕᓚᐅᕐᓯᒪᔪᖅ ᔪᓚᐃ 9, 1993ᒥ. ᑕᒪᓐᓇ ᑳᓐᑐᕌᕆᔭᐅᔪᖅ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᑕᐃᒪᐃᖏᓐᓇᕐᓂᐊᖏᑐᖅ. ᑭᓯᐊᓂᓕ, ᑕᒪᓐᓇ ᑮᓇᐅᔭᖃᕐᑎᑕᐅᓂᐅᖃᑕᕐᑐᖅ ᓄᓇᑖᕐᓂᕐᒥᒃ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᓄᑖᕈᑎᑕᐅᔭᕆᐊᖃᕐᒪᑦ ᐸᕐᓇᑕᐅᓲᖑᓂᖓ ᒪᓕᒃᑕᐅᓗᓂ. ᒫᓐᓇᓕ, ᐱᒋᐊᖓᐅᑕᐅᓚᐅᕐᑐᖅ ᓄᓇᑖᕐᓂᕐᒥ ᐊᖏᐅᑕᐅᓚᐅᕐᑐᖅ, ᐅᑉᓗᒥ ᐃᓱᓕᒻᒪᑦ. ᑕᒪᒃᑯᐊ ᒪᓕᒃᑕᐅᔭᕆᐊᖃᕐᑐᑦ ᒪᓕᒃᑕᐅᓗᑎᒃ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᑳᓐᑐᕌᖓᓂ ᓄᓇᕗᒥ, ᓄᓇᕗᑦ ᑐᙵᕕᒃᑯᑦ, ᐃᓄᓕᕆᔨᑐᖃᒃᑯᑦᓗ ᐊᖏᖃᑎᒌᒐᓱᐊᕐᓂᒃᑯᑦ ᑮᓇᐅᔭᖃᕐᑎᑕᐅᔭᕆᐊᖃᕐᒪᑕ ᐊᕐᕌᒍᒧᑦ ᐊᑕᐅᓯᕐᒧᑦ. ᑕᒪᓐᓇ ᓄᑖᖑᓂᐊᕐᑐᖅ ᐱᕙᑦᓕᐊᔭᐅᓂᐊᕐᑐᖅ ᑮᓇᐅᔭᖃᕐᑎᑕᐅᓗᓂ, ᐱᒋᐊᕐᓗᓂ ᔪᓚᐃ 9, 2003, ᓱᓕ ᐊᖏᖅᑕᐅᓯᒪᖏᒻᒪᑦ. ᓄᓇᕗᑦ ᑐᙵᕕᒃᑯᑦ ᐊᒻᒪ ᓄᓇᕗᑦ ᒐᕙᒪᖓᑦ ᖁᕕᐊᓱᒃᐳᑦ ᑖᒃᑯᐊ ᑲᓇᑕᐅᑉ ᒐᕙᒪᒃᑯᖏᑦ ᒫᓐᓇ ᑕᒪᑐᒧᖓ ᐸᕐᓇᐃᕐᒪᑕ ᓄᑖᒥᒃ ᐊᖏᖃᑎᒌᒐᓱᐊᕐᑎᑖᕐᓕᐊᕐᓗᑎᒃ ᐳᕐᑐᓂᕐᓴᒃᑯᑦ ᑕᒪᓐᓇ ᑲᔪᓯᑦᓯᐊᖁᑉᓗᒍ ᐊᖏᖃᑎᒌᒐᓱᐊᖃᑕᕐᓂᐅᔪᖅ ᐅᑉᓗᒥᒧᑦ ᑕᒪᓐᓇ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᑳᓐᑐᕌᖑᔪᖅ ᐊᖑᒻᒪᑎᑦᓯᐊᖁᑉᓗᒍ. ᑕᒪᒃᑯᐊ ᐃᓚᐅᓗᑎᒃ ᓯᕕᑐᔪᒧᑦ ᑮᓇᐅᔭᖃᑎᑕᐅᖃᑕᖁᑉᓗᒋᑦ ᑭᒃᑯᓕᒫᓄᑦ ᒐᕙᒪᐅᔪᑦ ᐊᔪᐃᓐᓈᕆᐊᖃᓂᕐᓂᕐᒧᑦᓗ ᑲᑎᒪᔨᐅᔪᑦ, ᓱᓕᑕᐅᖅ ᒐᕙᒪᖓᑦ ᓄᓇᕗᑦ ᐊᑐᓕᕐᑎᑦᓯᕙᑦᓕᐊᓂᕐᒧᑦ ᑮᓇᐅᔭᖃᕐᑎᓯᓂᕐᒧᑦ ᐊᒻᒪ ᑮᓇᐅᔭᖃᕐᑎᑦᓯᓂᕐᒧᑦ ᓯᕗᒧᐊᒃᓴᕐᑕᐅᓯᐊᖁᑉᓗᒍ ᑕᒪᓐᓇ ᐃᓄᐃᑦ ᐃᑲᓇᐃᔭᕐᑎᑕᐅᔭᕆᐊᖃᕐᓂᖏᑦ ᒐᕙᒪᒃᑯᓐᓂ ᒪᓕᒃᓗᒍ ᒪᓕᒐᖓ ᓄᓇᑖᕐᓂᐅᑉ ]ᓇᓴᐅᑎᓕᒃ 23ᒥᒃ. "ᑕᒪᓐᓇ ᐊᖏᐅᑕᐅᓯᒪᔪᖅ ᐱᓕᕆᖃᑎᖃᕐᓂᐊᕐᓂᕐᒧᑦ ᑲᓇᑕᐅᑉ ᒐᕙᒪᖓᓂᒃ ᑕᒪᓐᓇ ᑐᑭᓯᒪᔭᐅᑦᓯᐊᕆᐊᖃᕐᒪᑦ ᐊᑐᓕᕐᑎᑕᐅᔭᕆᐊᖃᕐᓂᖓ ᒪᓕᒐᖓᑕ ᓈᓴᐅᑎᓕᒃ 23ᒥᒃ ᓄᓇᑖᕐᓂᒃᑯᑦ," ᐅᖃᓚᐅᕐᑐᖅ ᑯᓄᒃ. ᑭᒃᑯᓕᒫᓄᑦ ᒐᕙᒪᐅᔪᑦ ᑕᒪᒃᑯᐊ ᐅᑯᐊᖑᒪᑕ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕗᒥ ᐃᒪᓕᕆᓂᕐᒧᑦ ᑲᑎᒪᔨᖏᑦ, ᓄᓇᕗᒥ ᐊᒃᑐᕐᑕᐅᓂᐊᕐᓂᕐᒧᑦ ᐃᑲᔫᓯᐊᕕᒃᓴᓕᕆᔩᑦ ᑲᑎᒪᔨᖏᑦ, ᓄᓇᕗᒥ ᐸᖅᓇᐃᔩᑦ ᐊᒻᒪ ᓄᓇᕗᒥ ᐊᑲᐅᖏᓕᐅᕈᑎᖃᓕᕐᑐᓄᑦ ᐋᖅᑭᒃᓱᐃᔨᖏᑦ. -30- ᑐᓴᕆᐊᑲᓐᓂᕐᕕᒃᓴᐃᑦ ᐅᑯᐊ: ᔭᓐ ᐲᓐᐳᕆᑦᔨ ᐳᕐᑐᓂᕐᓴᓂᒃ ᒪᓕᒐᓂᒃ ᖃᐅᔨᒪᔨ ᓄᓇᕗᑦ ᑐᙵᕕᒃᑯᑦ (867) 979-4915 ᓃᓄ ᕙᐃᓅᔅᑭ ᓄᓇᕗᑦ ᒐᕙᒪᖓᑕ ᑐᓴᒐᒃᓴᓕᕆᔨᖓᑦ (867) 975-6001 |