 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ, ᔪᓚᐃ 8, 2003 - ᓄᑖᖅ ᒪᓕᒐᖅ ᒥᑭᓕᕚᓕᑎᑦᑎᖑᓱᑉᐳᖅ ᐊᑭᖃᕆᐊᖃᕐᑐᓂᒃ ᐊᒻᒪᓗ ᓱᑲᓕᓂᕐᓴᐅᓕᕐᓗᓂ ᐊᑭᓖᔪᑕᐅᔭᕆᐊᖃᕐᑐᑦ ᓱᕈᓯᕐᓄᓐ ᑐᕚᖃᕐᐸᑦᑐᓄᓐ ᐃᑲᔫᑎᒋᔭᕆᐊᖃᕐᑐᓂᒃ ᓄᓇᖃᓕᕐᑐᓂᒃ ᓇᒥᑐᐃᓐᓇᖅ ᑳᓇᑕᒥ, ᐅᖃᕐᑐᖅ ᒪᓕᒐᓕᕆᓂᕐᒧᓐ ᒥᓂᔅᑕ ᐹᓪ ᐅᑲᓕᖅ. ᑲᑐᔨᖃᑎᒌᓂᐅᔪᖅ ᐃᑲᔫᑎᒋᔭᕆᐊᖃᕐᑐᓄᓐ ᑎᓕᔭᐅᔪᓄᓐ ᒪᓕᒐᖅ ᐱᔭᕆᐊᑭᓕᑎᑦᑎᑲᓐᓂᖁᖅ ᐊᖁᑕᐅᔭᕆᐊᖃᕐᑐᓂᒃ, ᐱᔭᕆᐊᑭᓐᓂᕐᓴᐅᓕᕐᑐᓂ ᐊᒻᒪᓗ ᐊᑭᑭᓂᕐᓴᐅᓕᕐᑐᓂ ᐱᓇᓱᓐᓂᐊᕐᓗᓂ ᐅᕙᓘᓂᓐ ᐊᓯᔩᔪᒪᓗᓂ ᓱᕈᓯᕐᓄᓐ ᐃᑲᔫᑕᐅᕙᑦᑐᓂᒃ ᐊᕿᑦᑕᐅᓯᒪᔪᓂᒃ ᐃᖃᕐᑐᐃᔨᒃᑯᑦ ᐃᒪᐃᓕᖓᓐᓂᖃᑦ ᓇᒥᑐᐃᓐᓇᕐᑐᒐᓗᐊᒥ ᓄᓇᖃᓕᕐᓂᖃᑦ ᑳᓇᑕᒥ. ᐅᑦᑐᑎᒋᓗᒍ, ᑖᓇᓕ ᐱᓇᓱᐊᕐᑐᖅ ᓴᕿᕆᐊᖃᔭᒍᓐᓂᕐᑐᖅ ᐃᖃᕐᑐᐃᕕᒻᒧᓐ. ᑭᓯᐊᓂ ᑖᓇ ᐱᓇᓱᐊᕐᑐᖅ ᑐᓂᓯᑐᐃᓐᓇᕈᓐᓇᕐᓯᔪᖅ ᑐᑭᓯᔭᐅᔭᕆᐊᖃᕐᑐᓂᒃ ᐊᒻᒪᓗ ᑎᑎᕋᕐᓗᓂ ᑎᑎᕋᕐᕕᒋᔭᕆᐊᓕᓐᓂᒃ. ᑖᓇ ᐃᓚᒌᓄᓐ ᐃᑲᔪᕐᑐᐃᓂᕐᒧᓐ ᐊᓪᓚᕕᖓ ᐊᕿᓯᒪᓂᐊᖁᖅ ᑐᑭᓯᒋᐊᕐᕕᐅᔪᓐᓇᕐᓗᓂ ᐊᒻᒪᓗ ᑎᑎᖃᓂᒃ ᐊᐅᓚᑎᑦᑎᖃᑕᕐᓗᓂ ᐊᓯᖏᓐᓄᓐ ᐱᓕᕆᖃᑕᐅᔪᓄᓐ. ᓄᑖᑦ ᑎᑎᕋᕐᕕᒋᔭᕆᐊᓖᑦ ᐊᒻᒪᓗ ᖃᓅᖅ ᑎᑎᕋᕐᕕᒋᔭᕆᐊᖃᕐᒪᖔᑕ ᐊᕿᓱᕐᑕᐅᓯᒪᓕᖁᑦ ᐊᒻᒪ ᐃᓄᑦᑎᑐᖓᓕᕐᑎᓯᒪᓪᓗᑎᒃ, ᑕᐃᒪᐃᒍᓐᓇᑎᑦᑎᖑᓱᑉᐳᑦ ᐃᖏᕋᓯᒋᐊᕐᑎᑦᑎᓕᕐᓗᓂ ᓄᑕᕐᒥᒃ ᒪᓕᒐᕐᒥᒃ. ᑖᓇ ᓄᑖᖅ ᒪᓕᒐᖅ ᓴᕿᑲᓐᓂᖁᖅ ᐊᒻᒪᓗ ᑭᖑᕖᓗᓂ ᐃᑲᔫᑎᒋᔭᕆᐊᖃᕐᑐᓂᒃ ᑎᓕᔭᐅᔪᑎᒥᒃ ᒪᓕᒐᕐᒥᒃ. “ᐅᓇ ᒪᓕᒐᖅ ᐃᑲᔪᖑᓱᑉᐳᖅ ᐃᒪᐃᓕᖓᑎᑦᑎᓪᓚᕆᓪᓗᓂ ᓱᕈᓰᑦ ᓄᓇᕗᒻᒦᑐᑦ, ᐊᒥᓱᒻᒪᕆᐅᓪᓗᑎᓪᓗ ᓇᒥᑐᐃᓐᓇᕐᑐᓄᓐ ᐃᑲᔪᕐᑕᐅᔭᕆᐊᖃᕐᓂᖏᓐᓄᓐ ᑎᓕᔭᐅᓯᒪᔪᓄᓐ, ᑖᑯᐊᓗ ᐃᑲᔪᕐᑕᐅᔭᕆᐊᖃᖑᓱᒻᒪᑕ ᑕᐃᒪᐃᒋᐊᖃᕐᑐᓂᓗ,: ᐅᖃᕐᑐᓂ ᐅᑲᓕᖅ, ᓯᕗᓕᕐᑎᐅᔪᖅ. ᐊᕕᑦᑐᕐᓯᒪᔪᓂ ᐊᒻᒪᓗ ᓄᓇᑦᓯᐊᓂ ᓯᕗᓕᕐᑎᐅᔪᑦ ᐊᖏᖃᑎᒌᓚᐅᕐᒪᑕ ᐊᕋᓂ ᐊᓯᔩᔪᒪᓪᓗᑎᒃ ᑲᑐᔨᓗᑎᒃ ᐃᑲᔫᑎᐅᖃᑕᕐᑐᑦ ᒪᓕᒐᖓᓂᒃ ᑳᓇᑕᓕᒫᒥ ᐱᔭᕆᐊᑲᓐᓂᕐᓴᐅᓕᕋᔭᕐᒪᓐ ᑕᒪᑯᓄᖓ ᐃᑲᔪᕐᑕᐅᔭᕆᐊᓕᓐᓄᓐ ᐃᖃᕐᑐᐃᕕᑎᒍᑦ ᑎᓕᔭᐅᓯᒪᔪᓄᓐ. “ᒪᓕᒐᖅ ᐃᑲᔪᖑᓱᑉᐳᖅ ᓱᕈᓯᕐᓂᒃ, ᒥᑭᓕᕚᓕᑎᑦᑎᓗᓂ ᐃᖃᕐᑐᐃᕕᒻᒧᓐ ᐊᑭᖃᕆᐊᖃᕐᓂᖏᓐᓂᒃ ᐊᒻᒪᓗ ᐊᐅᓚᓂᕆᕙᑦᑕᖓ ᐱᔭᕆᐊᑭᓐᓂᕐᓴᐅᓕᕐᓗᓂ. ᑕᒪᓐᓇ ᐱᔭᕆᐊᑲᓐᓂᕐᓴᐅᔪᖅ ᑐᑭᖃᖁᖅ ᑕᒪᑯᐊ ᕿᑐᖓᖃᕐᑐᑦ ᐃᓄᑐᐊᑦ ᐱᔪᒪᓂᕐᓴᐅᓕᕐᓂᐊᕐᒪᑕ ᐃᑲᔫᓯᐊᕆᔭᕆᐊᖃᕐᑕᒥᓐᓂᒃ ᕿᑐᕐᖓᒥᓐᓄᓐ, ᑐᕙᖃᓗᐊᖏᓂᕐᓴᐅᓕᕐᓗᑎᒃ ᐃᓄᓕᕆᔨᒃᑯᑦ ᐃᑲᔫᓯᐊᖃᑕᓂᕐᒥᒃ,” ᐅᑲᓕᖅ ᐅᖃᕐᑐᓂ. ᓴᕿᔪᑕᐅᔪᖅ ᒪᓕᒐᖅ ᐃᑲᔪᕐᑐᐃᒻᒪᓐ ᕿᖓᐅᒻᒥᒃ ᐊᖏᕈᑕᐅᓯᒪᓂᖓᓄᓐ ᐊᕿᓯᔭᕆᐊᖃᕐᓂᕐᒧᓐ ᖃᐅᓄᐃᓕᐅᕈᑕᐅᓂᐊᕐᑐᓂᒃ ᐊᒻᒪ ᐱᔨᓯᕈᑕᐅᓂᐊᕐᑐᓂᒃ ᓈᒪᑑᔪᓂᒃ, ᑐᑭᓯᓇᕐᑐᓂᒃ, ᐱᔭᕆᐊᑭᑦᑑᔪᓂᒃ ᐊᒻᒪ ᒪᓕᑦᑕᐅᔭᕆᐊᖃᕐᑐᓂ. ᐃᓛᑯᑦ ᐊᕕᑦᑐᕐᓯᒪᔪᑦ ᐊᒻᒪ ᓄᓇᓯᐊᑦ ᐊᔨᒌᐸᓗᒻᒥᒃ ᐊᖏᖃᑎᒌᓯᒪᕗᑦ ᒪᓕᒐᕐᒥᒃ. ᑕᒪᓐᓇ ᑕᐃᒪᐃᓕᖓᐸᑦ ᐃᒪᐃᒍᓐᓇᑎᑦᑎᖑᓱᒻᒪᓐ ᐃᑲᔫᑕᐅᔭᕆᐊᖃᕐᑐᑦ ᐅᐊᑦᑎᔭᐅᔪᓐᓇᕐᓯᓗᑎᒃ ᑳᓇᑕᓕᒫᒥ. ᑐᑭᓯᒋᐊᑲᓂᕐᕕᓴᖅ ᐅᖃᓚᓗᓂ ᐅᐊᓐᑎ ᕼᓗᓐᓇᓐ ᓄᓇᕗᑦ ᒐᕙᒪᖓᑕ ᑐᓴᐅᒪᖃᑦᑕᐅᑎᓕᕆᔨᖏᓐ (867) 975-6046 |