 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᕐᒃᑲᓗᐃᑦ, ᓄᓇᕗᑦ (ᔪᓚᐃ 31, 2003) - ᒐᕙᒪᒃᑯᑦ ᓄᓇᕗᒻᒥ ᓇᓗᓇᐃᖅᓯᓯᒪᔪᑦ ᑭᖑᓪᓕᖅᐹᒥ ᐱᔨᑦᑎᕈᑎᐅᓂᐊᖅᑐᓂᒃ ᓯᐊᒻᒪᖅᑎᑕᐅᓂᐊᖅᑐᓂᒃ ᒐᕙᒪᑦᑎᓐᓄᑦ. ᑭᖑᓂᐊᒍᑦ ᐅᓪᓛᒃᑯᑦ ᒥᓂᔅᑕᐃᑦ ᑲᑎᒪᓂᖃᓚᐅᖅᑎᓪᓗᒋᑦ ᓯᕗᓕᖅᑎ ᐸᐅᓗᓯ ᐅᑲᓕᖅ ᑲᖏᖅᖠᓂᕐᒦᓚᐅᕐᒪᑦ ᐊᒻᒪᓗ ᖃᒪᓂᖅᑐᐊᒥ ᐅᓐᓄᓴᒃᑯᑦ ᑐᓴᖅᑎᑦᑎᓪᓗᓂ ᒫᓐᓇᐅᔪᖅ ᓯᐊᒻᒪᖅᑎᕆᓂᕐᒧᑦ ᐃᓱᒪᓕᐅᕈᑎᐅᔪᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪᓗ ᓄᓇᓕᓐᓂ ᑭᒡᒐᑐᖅᑎᐅᔪᓂᑦ. ᒐᕙᒪᒃᑯᑦ ᐊᖓᔪᖅᑳᖃᕝᕕᖃᕐᓂᐊᖅᑐᑦ ᐃᓘᓇᖏᓐᓂᒃ ᐊᐅᓚᑕᓕᒫᒥᓂᑦ ᓄᓇᕗᒻᒥ ᐆᒪᖅᑯᑎᓕᕆᔨᒃᑯᑦ ᑯᐊᐳᕇᓴᓐᑯᑦ ᖃᒪᓂᖅᑐᐊᒥ ᓄᐃᑦᑎᓪᓗᑎᒃ ᑲᑎᑦᑐᒋᑦ 15-ᓂᑦ ᓄᑖᓂᒃ ᐃᖅᑲᓇᐃᔮᓂᑦ ᓄᓇᓕᓕᒪᓂ. ᑕᓪᓕᒪᑦ ᐃᖅᑲᓇᐃᔮᖑᔪᑦ ᑐᓂᔭᐅᓚᐅᖅᑐᑦ ᖃᒪᓂᖅᑐᐊᒧᑦ ᐊᕐᕌᒍᕋᑖᖅᑎᓪᓗᒍ ᑕᒪᓐᓇ ᐋᖅᑭᒃᑎᕆᓕᖅᑭᕐᓂᐅᔪᖅ ᐱᕕᖃᑦᑎᑦᑎᓂᐊᖅᑐᖅ ᐅᕙᑦᑎᓐᓂᒃ ᐃᑲᔪᖅᓱᐃᓗᑕ ᖃᒪᓂᖅᑐᐊᒥᐅᑕᓂᒃ, ᐊᑑᑎᓗᑕ ᐱᔭᕆᐊᖃᑦᑕᑎᓐᓄᑦ ᓯᐊᒻᒪᖅᑎᕆᓂᕐᒧᑦ ᓄᓇᓕᓐᓄᑦ ᐱᔭᒃᓴᓂᑦ ᐊᒻᒪᓗ ᐱᕙᓪᓕᐊᓗᑕ ᑐᕚᕆᔭᒃᓴᒧᑦ, ᐊᑭᑐᓗᐊᖏᑦᑐᒧᑦ, ᓴᓗᒪᔪᒧᑦ ᐆᒻᒪᖅᑯᑎᒥᒃ ᓄᓇᕗᓕᒫᒥ,” ᐅᖃᑦᑐᓂ ᐅᑲᓕᖅ. “ᓂᕆᐅᑦᑎᐊᖅᐳᖓ ᒫᓐᓇᐅᔪᖅ ᓅᑉᐸᓪᓕᐊᒋᐊᔅᓴᖅ ᐊᓯᖏᓐᓄᑦ ᓯᕗᓪᓕᐅᑎᔭᒃᓴᓄᑦ ᐱᓕᕆᐊᒃᓴᖏᓐᓄᑦ ᒐᕙᒪᐅᑉ.” `ᑕᓐᓇ ᐋᖅᑭᒃᑎᕆᓕᖅᑭᓐᓂᐅᔪᖅ ᑭᒃᑯᑐᐃᓐᓇᕐᓄᑦ ᐆᒪᖅᑯᑎᖃᑦᑎᑦᑎᓂᕐᓂᒃ ᓴᖅᑭᖅᓯᓂᐊᕐᒪᑦ ᑐᑦᑕᖅᕕᐅᔪᒥᒃ ᐊᓪᓚᕕᒻᒥ ᖁᕐᓕᖅ ᐅᖅᓱᐊᓗᒻᒧᑦ ᑯᐊᐳᕇᓴᓐᑯᓐᓂᑦ ᑲᖏᖅᖠᓂᕐᒥ. ᒫᓐᓇᐅᔪᖅ ᐃᖅᑲᓇᐃᔭᕐᓂᐅᔪᖅ ᐅᖅᓱᐊᓗᓕᕆᔨᒃᑯᓐᓂ ᓱᕐᕋᔾᔮᖏᒻᒥᔪᖅ ᑕᕝᕙᓂ ᓄᓇᓕᐅᔪᒥ. ᖁᕐᓕᖅ ᐆᒻᒪᖅᑯᑎᒧᑦ ᑯᐊᐳᕇᓴᓐᑯᑦ ᐱᒻᒪᕆᒻᒥᒃ ᐃᓕᖅᑯᓯᖃᕐᓂᐊᕐᒪᑕ ᐃᑲᔪᖅᑐᐃᓗᑎᒃ ᒐᔭᒪᒃᑯᓐᓂᑦ ᐊᑑᑎᑎᓪᓗᒋᑦ ᑲᐃᐅᑑ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᖏᕈᑎᒥ ᐱᓕᕆᐊᖑᓂᐊᖅᓯᒪᔪᑦ. ᑯᐊᐳᕇᓴᒃᑯᑦ ᐱᓕᕆᐊᒃᓴᖓ ᓇᓂᓯᒋᐊᖃᒻᒪᑕ ᐊᑐᙱᓂᖅᓴᐅᓂᕐᒥᒃ ᐆᒻᒪᖅᑯᑎᒥᒃ, ᐱᔪᓐᓇᖅᓯᕚᓕᕐᓗᑎᒃ, ᐊᑐᙱᓗᐊᖅᑎᑦᑎᕙᓪᓕᐊᓗᑎᒃ ᐊᒻᒪᓗ ᓇᓂᓯᓗᑎᒃ ᖃᓄᖅᑑᕈᑎᒃᓴᓂᒃ ᐅᖅᓱᐊᓗᓕᕆᓂᕐᒧᑦ ᑕᒪᓐᓇ ᓵᓚᖃᕐᓂᐊᕐᓇᑐᐃᓐᓇᖅᑐᖅ, ᐃᑲᔪᖅᑐᐃᔪᖅ ᓄᓇᕗᒻᒥᐅᑕᓂᒃ ᐊᒻᒪᓗ ᑲᐃᐅᑑ ᐊᖏᕈᒻᒥᒃ,” ᐅᖃᑦᑐᓂ ᐄᑐᐊᖅ ᐲᑯ, ᒥᓂᔅᑕ ᑲᒪᒋᔭᖃᑦᑐᖅ ᖁᕐᓕᖅ ᐆᒻᒪᖅᑯᑎᒧᑦ ᑯᐊᐳᕇᓴᓐᒧᑦ ᐊᒻᒪᓗ ᐃᓚᒋᔭᖏᓐᓄᑦ ᖃᖏᖅᖠᓂᕐᒥ ᒪᓕᒐᓕᐅᖅᑎᐅᔪᖅ ᒪᓃᑐᖅ ᑖᒻᓴᓐ ᐊᖏᖃᑎᖃᑦᑐᓂ ᐃᓱᒪᓕᐅᕈᑎᐅᔪᕉᖅ ᑮᓇᐅᓕᕆᓂᕐᒧᑦ ᑐᑭᖃᑦᑎᐊᕐᒪᑦ ᓄᓇᕘᒧᑦ ᐊᒻᒪᓗ ᑐᕌᖓᑦᑎᐊᖅᑐᓂ ᐱᔪᒪᔭᖏᓐᓄᑦ ᓄᓇᒋᔭᖓᑕ. “ᑲᖏᖅᖠᓂᒥᐅᑦ ᖃᐅᔨᒪᑎᑕᐅᓚᐅᖅᑐᑦ ᑕᒪᑐᒧᖓ ᐃᓱᒪᓕᐅᕈᑎᐅᔪᒧᑦ ᐊᒪᓗ ᓂᐱᕗᑦ ᑐᓴᖅᑕᐅᓗᓂ,” ᐅᖃᑦᑐᓂ ᑖᒻᓴᓐ. ᓅᑎᕆᓂᖅ 15-ᖑᔪᓂᒃ ᐃᖅᑲᓇᐃᔮᓂᒃ ᖃᒪᓂᖅᑐᐊᒧᑦ ᐅᖓᑕᐅᔾᔨᔪᖅ ᐸᕐᓇᑕᐅᓂᕆᓚᐅᖅᓯᒪᔭᖓᓂᒃ ᓯᕗᓪᓕᖅᐹᒥ ᓯᐊᒻᒪᖅᑎᕆᓕᖅᑲᑕ ᑖᒃᓱᒧᖓ ᓄᓇᓕᐅᔪᒧᑦ ᐊᒻᒪᓗ ᐊᒥᓲᓂᖏᑦ ᐃᒪᓐᓇᐅᓕᖅᑐᑦ ᐃᖅᑲᓇᐃᔮᑦ ᓯᐊᒻᒪᖅᑎᕆᓂᕐᒧᑦ ᓄᓇᓕᓐᓄᑦ ᐱᔭᒃᓴᓂᒃ ᓄᓇᕗᓕᒫᒥ ᑲᑎᑦᑐᒋᑦ 451. ᖃᒪᓂᖅᑐᐊᑉ ᒪᓕᒐᓕᐅᖅᑎᖓ ᒋᓕᐊᓐ ᒪᑲᓚᐃᓐ ᑐᙵᓱᒃᑎᑎᓪᓗᓂ ᑐᓴᕋᔅᓴᐅᔪᒥᒃ ᓯᐊᒻᒪᖅᑎᕆᓂᕐᒧᑦ ᖃᒪᓂᖅᑐᐊᒧᑦ. “ᑖᓐᓇ ᒐᕙᒪᐅᔪᖅ ᐊᑑᑎᓂᕋᑦᑐᒍ ᑐᓂᓂᐊᓂᕋᓚᐅᖅᓯᒪᔭᒥᓂᑦ ᐃᑲᔪᕈᒪᓗᓂ ᑲᑐᔾᔨᖃᑎᖃᓪᓗᓂ ᐃᑲᔫᓯᐊᖑᔪᓂᒃ ᑕᕝᕙᖓᑦ ᓄᑖᒥᒃ ᒐᒪᕙᐅᔪᒥᒃ ᓄᓇᕗᓕᒫᒥ.” ᓯᕗᓕᖅᑎ ᐅᑲᓕᖅ ᖁᔭᓐᓇᒦᓚᐅᕐᒥᔪᖅ ᖁᕐᓕᖅ ᐆᒻᒪᖅᑯᑎᒧᑦ ᑯᐊᐳᕇᓴᒃᑯᑦ ᑲᑎᒪᔨᖏᓐᓂᑦ ᐃᑲᔪᖅᑐᐃᓂᖏᓐᓄᑦ ᐊᒻᒪᓗ ᐃᑲᔪᖅᓯᓂᖏᓐᓄᑦ ᐊᑐᓕᖅᑎᑦᑎᑎᓪᓗᒋᑦ ᑕᒪᑐᒥᖓ ᓯᐊᒻᒪᖅᑎᕆᓂᕐᒥᒃ ᓄᓇᓕᓐᓄᑦ ᐱᔭᒃᓴᓂᑦ ᐸᕐᓇᒍᑎᑎᒍᑦ. -30- ᖁᕐᓕᖅ ᐆᒻᒪᖅᑯᑎᒧᑦ ᑯᐊᐳᕇᓴᒃᑯᑦ ᓇᓗᓇᐃᖅᓯᒪᔭᖓ ᐱᖃᓯᐅᑎᓯᒪᔪᑦ: ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕆᑦ: ᐱᐅᓪ ᑲᓚᐃ, ᑐᓴᕋᖅᓴᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎᒧᑦ, ᐊᓪᓚᒡᕕᐊ (867) 975-5059, ᐅᖄᓛᐅᑎᖓ ᑕᒫᓂᖅᑭᔪᖅ(867) 975-1317 |