 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐊᑐᕚ (ᔪᓚᐃ 25, 2003) -- ᐅᒻᒪᖅᑯᑎᓕᕆᓂᕐᓄᑦ ᒥᓂᔅᑕ, ᐃᐊᑦᕗᑦ ᐲᑰ ᐅᓪᓗᒥ ᐅᖃᖅᑐᕕᓂᖅ ᐱᒋᐊᖅᑐᖃᕐᒪᒡᒎᖅ ᓴᖅᑭᑦᑏᒋᐊᕐᓂᕐᒥᒃ ᐊᓄᕆᒧᑦ ᓄᓇᙳᐊᒃᓴᓂᒃ ᓄᓇᕗᒻᒥ, ᐱᕙᓪᓕᐊᔭᐅᔪᖅ ᓯᓚᓐᓂᐊᖅᑎᒃᑯᓐᓂ ᑲᓇᑕᐅᑉ ᐊᕙᑎᓕᕆᔨᒃᑯᖏᓐᓂ. ᑐᓴᖅᑕᐅᔪᒃᓴᙳᖅᑐᖅ ᑕᒪᓐᓇ ᓄᓇᙳᐊᒃᓴᖅ ᑐᓂᓯᓂᐊᕐᒪᑦ ᐃᑲᔪᖅᑐᐃᔪᒥᒃ ᒐᕙᒪᒃᑯᓐᓂ ᓴᖅᑭᔮᖅᑎᑦᑎᒋᐊᕐᓗᓂ ᐊᖏᓂᖅᓴᕐᔪᐊᖅ ᐊᐅᓚᑕᐅᓂᕆᔭᖓ ᐃᒻᒥᒃᑰᖓᓗᓂ ᓄᓇᕗᒻᒥ ᑕᒪᑐᒨᓇ ᐱᕙᓪᓕᐊᔭᐅᓂᐊᖅᑐᒥᒃ ᐊᓄᕆ ᐆᒻᒪᖅᑯᑎᓕᐅᖅᑕᐅᓂᖓ. “ᐊᓄᕆ ᐊᑭᑭᓛᑦᑎᐊᖑᒐᔭᕐᒪᑦ ᐊᒻᒪᓗ ᐃᕆᐸᓛᑦᑎᐊᖑᓗᓂ ᓴᖅᑭᑕᐅᕙᓪᓕᐊᔪᓂᒃ ᐆᒻᒪᖅᑯᑎᒋᔭᐅᕙᒃᑐᓂᒃ” ᒥᓂᔅᑕ ᐲᑰ ᐅᖃᖅᑐᕕᓂᖅ. “ᐱᕙᓪᓕᐊᑎᑦᑎᓂᖅ ᐸᕐᓇᐅᑎᐅᓂᐊᖅᑐᓂᒃ ᐊᑐᓕᖁᓪᓗᒋᑦ ᐊᓄᕆᒧᑦ ᐆᒻᒪᖅᑯᑎᓕᐅᖅᑕᐅᓯᒪᔪᑦ ᓄᓇᕗᒻᒥ ᐃᑲᔪᖅᑐᐃᓪᓚᕆᖕᓂᐊᕐᒪᑦ ᐅᕙᑦᑎᓐᓂ ᐃᓄᑑᓕᔪᓐᓇᕐᓂᑦᑎᓐᓂ ᓂᐅᕕᖅᐸᓪᓕᐊᓂᕐᓂᒃ ᐅᖅᓱᐊᓗᖕᓂᒃ ᐆᒻᒪᖅᑯᑎᓕᕆᕙᓪᓕᐊᓂᐊᖅᑐᓂᒃ ᓯᕗᓕᒃᓴᑦᑎᓐᓂ.” ᐊᓄᕆᒧᑦ ᓄᓇᙳᐊᒃᓴᖅ ᐱᒋᐊᖅᑎᑦᑎᓂᐊᕐᒪᑦ ᓄᑖᓂᒃ ᖃᐅᔨᓴᖅᑕᐅᕙᓪᓕᐊᓯᒪᔪᓂᒃ ᐊᒻᒪᓗ ᖃᓄᐃᓕᖓᓂᐊᕐᓂᖓᓄᑦ ᓯᓚᕗᑦ ᐱᓕᕆᔾᔪᑎᒃᓴᖏᓐᓂᒃ, ᐊᓄᕆᐅᑉ ᐆᒻᒪᖅᑯᑎᓕᐅᕈᓐᓇᕐᓂᖓ ᐃᔾᔪᐊᖅᓯᓯᒪᔾᔪᑎᒃᓴᖅ, ᓴᓇᔭᐅᓯᒪᔪᖅ ᓯᓚᓐᓂᐊᖅᑐᓕᕆᔨᒃᑯᓐᓂ ᑲᓇᑕᒥ. ᓄᑖᖅ ᖃᕆᑕᐅᔭᑦ ᑲᑎᑦᑎᓯᒪᔪᑦ ᐊᕐᕌᒍᐃᑦ 50ᓪᓗᐊᑦ ᑎᑎᕋᖅᑕᐅᓯᒪᓂᖏᑦ ᓯᓚᑦᑕ ᐱᕙᓪᓕᐊᓯᒪᓂᑯᖏᑦ ᓱᒃᑲᓗᓂ ᐊᒻᒪᓗ ᐊᑭᑭᓐᓂᖅᓴᕐᔪᐊᖑᓗᓂ ᐊᑐᖅᑕᐅᒡᒍᔪᒃᑯᑦ ᐊᓄᕆᒧᑦ ᓄᓇᙳᐊᓕᐅᖅᓯᒪᑎᓪᓗᒋᑦ. ᓄᓇᙳᐊᓕᐅᖅᑕᐅᔪᑦ ᐃᑲᔪᐃᓂᐊᕐᒪᑦ ᓄᓇᕗᑦ ᒐᕙᒪᒃᑯᖏᓐᓂᒃ ᖃᐅᔨᓪᓚᕆᒍᑎᐅᓗᓂ ᓇᓕᐊᑦ ᐃᓂᑦᑎᐊᕙᐅᓛᖑᔭᕆᐊᒃᓴᖏᓐᓂᒃ ᐊᓄᕆᒧᑦ ᑲᑎᖅᓱᐃᔾᔪᑎᐅᒋᐊᕐᓂᐊᖅᑐᑦ ᓄᓇᒋᔭᑦᑎᓐᓂ. “ᒐᕙᒪᒃᑯᕗᑦ ᐃᑲᔪᖅᑐᐃᓪᓚᕆᕐᒪᑕ ᑭᐆᑑ ᐊᖏᖃᑎᒌᖑᑎᐅᔪᒥᒃ ᒥᑭᒃᓕᒋᐊᖅᐹᓪᓕᖁᓪᓗᒋᑦ ᐅᖅᑰᓯᕙᓪᓕᐊᔾᔪᑎᐅᔪᑦ ᓄᓇᕐᔪᐊᑦᑎᓐᓄᑦ ᐊᒻᒪᓗ ᐃᑲᔪᖅᑐᐃᑦᑎᐊᖅᖢᑎᒃᑯᑦ ᑲᓇᑕᐅᑉ ᐃᓚᐅᔪᒪᑦᑎᐊᕐᓂᖓ ᒥᑭᒃᓕᕚᓪᓕᖁᓪᓗᒍ ᐆᖅᑰᓯᕙᓪᓕᐊᔾᔪᑎᐅᕙᒃᑐᑦ 2013 ᑎᑭᓚᐅᖏᓐᓂᖓᓂᒃ,” ᐲᑰ ᐅᖃᖅᑐᖅ. “ᖃᐅᔨᓇᓱᒃᐸᒃᓗᑕ ᑭᓯᐊᓂ ᐆᒻᒪᖅᑯᑎᓄᑦ ᐊᑐᖅᑕᐅᔪᓐᓇᕋᔭᖅᑐᓂᒃ ᐊᒻᒪᓗ ᐋᖅᑭᒃᓱᖅᑕᐅᕙᒃᓗᑎᒃ ᖃᓄᖅ ᐊᑐᖅᐸᒃᑕᕗᑦ ᐊᒻᒪᓗ ᐆᒻᒪᖅᑯᑎᒋᕙᒃᑕᕗᑦ, ᒥᑭᒃᓕᒋᐊᕈᑎᒋᔪᓐᓇᓕᑕᐃᓐᓇᕋᑦᑎᒍᑦ ᐅᖅᑰᓯᕙᓪᓕᐊᔾᔪᑎᐅᔪᑦ ᐊᒻᒪᓗ ᓴᖅᑭᔮᖅᑎᑦᑎᔾᔪᑎᒋᓗᑎᒍᑦ ᐅᕙᑦᑎᓐᓂᒃ ᐊᔪᖏᑦᑎᐊᕐᓂᑦᑎᓐᓂ ᓄᓇᕗᒻᒥ.” ᐊᓄᕆᒧᑦ ᓄᓇᙳᐊᒃᓴᖅ ᐱᒋᐊᖅᑕᐅᓂᐊᖅᑐᖅ ᐱᓕᕆᔭᐅᒋᐊᕐᓂᐊᕐᒪᑦ ᑲᓇᑕᐅᑉ ᐊᕙᑎᓕᕆᔨᒃᑯᖏᓐᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᐱᔭᕇᖅᑕᐅᒋᐊᕐᓂᐊᖅᖢᓂ ᐅᑐᐱᕆ, 2003ᒥ. ᑕᒪᑐᒥᖓ ᑐᓴᕆᐊᒃᑲᓐᓂᕈᒪᒍᕕᒃ ᑐᓴᕆᐊᕐᕕᒋᔪᓐᓇᖅᑕᐃᑦ: ᕕᐊᓐᑎ ᕼᐊᓗᓇᓐ ᑐᓴᖅᑕᐅᕙᓪᓕᐊᔭᕆᐊᖃᖅᑐᓕᕆᔨ ᐊᖏᔪᖅᑳᓕᕆᔨᓄᒃ ᐃᓗᐊᓂᓗ ᒐᕙᒪᓕᕆᔨᒃᑯᖏᓐᓄᑦ ᓄᓇᕗᑦ ᒐᕙᒪᒃᑯᖏᑦ (867) 975-6046 |