 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ, (ᔪᓚᐃ 16, 2003) - ᐊᓐᓂᐊᖃᕐᓇᖏᑦᑐᓕᕆᔨᒃᑯᑦ ᒥᓂᔅᑕᖓᑦ ᐃᐊᑦ ᐲᑯ ᑎᒃᑯᐊᖅᓯᔪᖅ ᐱᓕᕆᖃᑎᒌᒃᑎᐅᓂᐊᖅᑐᓂᒃ ᓄᓇᕗᒻᒥ ᐱᒋᐊᖅᑎᑦᑎᔾᔪᑎᐅᓗᑎᒃ ᐃᒻᒥᓃᖅᑎᑦᑎᑦᑕᐃᓕᒪᔾᔪᑎᑦ ᓄᓇᒋᔭᑦᑎᓐᓂ. ᒪᓕᒐᓕᐅᖅᑏᑦ ᑲᔪᓯᑎᑦᑎᓚᐅᖅᑐᑦ ᓂᕈᐊᖅᖢᑎᒃ ᑕᒪᑐᒥᖓ ᒫᔾᔨᒥ ᑲᑎᒪᑎᓪᓗᒋᑦ ᐃᑲᔪᖅᑐᐃᓪᓚᕆᖕᓂᕋᖅᖢᑎᒃ ᐱᒋᐊᖅᑕᐅᓂᐊᖅᑐᒥᒃ. “ᐊᒃᑐᖅᑕᐅᓯᒪᕝᕕᖃᖅᑐᐃᓐᓇᐅᒐᑦᑕ ᖃᓄᑐᐃᓐᓇᖅ ᐃᒻᒥᓃᖅᓯᒪᔪᖃᖅᑎᓪᓗᒍ” ᒥᓂᔅᑕ ᐲᑯ ᐅᖃᖅᑐᖅ. “ᐃᓐᓇᖅᑕ ᖃᐅᔨᒪᓂᕆᔭᖏᑦ, ᐱᖅᑯᓯᕆᔭᑦᑕ ᓴᙱᓂᕆᔭᖏᑦ ᐊᒻᒪᓗ ᐊᔪᖏᓐᓂᕆᔭᐅᔪᑦ ᐊᒻᒪᓗ ᐱᔾᔪᑎᐅᔪᓐᓇᖅᑐᑦ ᓄᓇᕗᒻᒥᐅᓂᒃ ᐊᑐᖅᑕᐅᖏᓐᓇᖅᓯᒪᔪᑦ ᐱᓕᕆᕙᓪᓕᐊᑎᓪᓗᒋᑦ ᐃᓚᒌᓂᒃ ᐊᒻᒪᓗ ᓄᓇᓕᖕᒥᐅᓂᒃ ᐃᑲᔫᑎᐅᓂᐊᕐᒪᑦ ᑕᒪᓐᓇ ᐅᕙᑦᑎᓐᓂ ᐱᓕᕆᕙᓪᓕᐊᓕᖅᑎᓪᓗᑕ ᐱᒻᒪᕆᖕᓂᒃ ᐃᒻᒥᓃᖅᑎᑦᑎᑦᑕᐃᓕᒪᔾᔪᑎᐅᒋᐊᕐᓂᐊᖅᑐᓂᒃ ᐊᒻᒪᓗ ᓄᓇᓕᖕᒥᐅᑦ ᒪᒥᓴᖅᐸᓪᓕᐊᔾᔪᑎᒃᓴᖏᓐᓂᒃ.” ᑖᒃᑯᐊ ᐱᓕᕆᖃᑎᒌᖑᓂᐊᖅᑐᑦ ᓯᐊᒻᒪᒃᓯᒪᓗᑎᒃ ᐊᑭᓴᖅᑐᐃᔨᐅᒋᐊᕐᓂᐊᕐᒪᑕ ᓄᓇᕗᒻᒥᐅᑦ ᓄᓇᓕᖏᓐᓂᒃ, ᒪᒃᑯᒃᑐᖏᓐᓂᒃ, ᐃᓐᓇᖁᑎᒋᔭᖏᓐᓂᒃ, ᒪᒥᓴᐃᔨᓂᒃ, ᐃᓕᓐᓂᐊᖅᑎᓂᒃ ᐊᒻᒪᓗ ᐃᖅᑲᖅᑐᐃᔪᓕᕆᔨᓂᒃ. ᐃᓄᒋᔭᐅᓂᐊᖅᑐᑦ ᐱᓕᕆᖃᑎᒌᖑᓂᐊᖅᑐᓂᒃ ᐅᑯᐊ: ᓄᐊᒪᓐ ᖁᒻᒧᐊᒃᑐᖅ ᐸᖕᓂᖅᑑᒥᐅᑕᖅ; ᐳᕋᐃᐊᓐ ᓯᒥᐅᓂ ᒥᑦᑎᒪᑕᓕᖕᒥᐅᑕᖅ ᐃᒃᓯᕙᐅᑕᐅᖃᑕᐅᓂᐊᖅᑐᖅ; ᒦᑲ ᐊᕐᓇᑳᖅ ᐸᖕᓂᖅᑑᒥᐅᑕᖅ; ᐊᐃᑐᕆᐊᓐ ᑕᒍᕐᓈᖅ ᖃᒪᓂᑦᑐᐊᕐᒥᐅᑕᖅ; ᐳᓇᑕᑦ ᓴᐅᒥᒃ ᖃᖏᖅᖠᓂᕐᒥᐅᑕᖅ; ᑐᕇᓴ ᑲᒃᑭᐊᓐᓂᐅᓐ ᑯᒑᕐᕈᖕᒥᐅᑕᖅ; ᐹᑉ ᑯᑯᓇ ᐅᖅᓱᖅᑑᕐᒥᐅᑕᖅ; ᐊᐃᒥ ᐊᕼᐅᒋᓇᖅ ᖁᕐᓗᖅᑐᕐᒥᐅᑕᖅ ᐊᒻᒪᓗ ᑲᐅᑕᖅ ᔫᓯᐱ ᐃᒃᐱᐊᕐᔪᖕᒥᐅᑕᖅ. ᓄᓇᓕᖕᒥᐅᓂᒃ ᑐᓴᖅᑎᑦᑎᕙᓪᓕᐊᔾᔪᑎᐅᓗᑎᒃ ᑲᑎᔾᔪᑎᐅᓂᐊᖅᑐᑦ ᐱᒋᐊᖅᑕᐅᕙᓪᓕᐊᓂᐊᕐᒪᑕ ᓄᓇᕗᒻᒥ ᐱᒋᐊᕐᕕᖃᕐᓗᑎᒃ ᐋᒡᒌᓯᐅᑉ ᕿᑎᖓᓂᒃ ᓯᑎᐱᕆᐅᑉ ᕿᑎᓪᓗᐊᖓᓄᑦ. ᑕᓴᖅᑎᑦᑎᔾᔪᑎᐅᒋᐊᕐᓂᐊᖅᑐᑦ ᐃᓂᒃᓴᖃᖅᑎᑦᒋᐊᕐᓂᐊᕐᒪᑕ ᐱᓕᕆᔨᐅᓂᐊᖅᑐᓂᒃ ᐱᓕᕆᖃᑎᖃᑦᑎᐊᒻᒪᕆᖁᓪᓗᒋᑦ ᓄᓇᕗᒻᒥᐅᓂᒃ ᖃᐃᔨᓴᐃᒋᐊᖁᓪᓗᒋᑦ ᐱᔾᔪᑎᐅᖃᑦᑕᖅᑐᖅ ᐃᒻᒥᓃᕈᑎᐅᓕᖅᐸᒃᑐᑦ ᓄᓇᕗᒻᒥ ᐊᒻᒪᓗ ᐅᖃᐅᔾᔪᖅᑐᐃᒋᐊᕈᓐᓇᖁᓪᓗᒋᑦ ᑐᓴᕈᒥᓇᖅᑐᐃᖅ ᐃᑲᔪᖅᑐᐃᒋᐊᕐᓂᐊᖅᑐᑦ ᐃᒻᒥᓃᖅᑎᑦᑎᑦᑕᐃᓕᒪᓂᕐᓄᑦ ᐊᒻᒪᓗ ᓄᓇᓖᑦ ᒪᒥᓴᖅᐸᓪᓕᐊᔾᔪᑎᒃᓴᖏᓐᓄᑦ. ᐃᒻᒥᓃᖅᑎᑦᑎᑦᑕᐃᓕᒪᔾᔪᑎᑦ ᐊᒻᒪᓗ ᓄᓇᓕᖕᒥᐅᑦ ᒪᒥᓴᖅᐸᓪᓕᐊᔾᔪᑎᒃᓴᖏᑦ ᐱᒋᐊᖅᑕᐅᖅᑳᕆᐊᕈᒪᓪᓚᕆᖕᒪᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂ ᐊᒻᒪᓗ ᐃᓄᓕᕆᔨᒃᑯᓐᓂ ᒪᓕᒃᓗᑎᒃ ᐅᐃᕈᔾᔪᑎᑦ ᐊᒻᒪᓗ ᐃᓱᒪᕐᓕᐅᕈᑎᐅᖃᑦᑕᖅᑐᑦ ᖃᓄᖅᑑᕈᑎᖏᓐᓂᒃ. -30- ᑐᓴᒃᑲᓐᓂᕈᒪᒍᔅᓯ ᑕᒪᑐᒪᐅᑉ ᒥᒃᓵᓄᑦ ᑐᓴᕆᐊᕈᓐᓇᖅᐳᓯ: ᕕᐊᓐᑎ ᕼᐊᓘᓇᓐ ᑐᓴᐅᒪᑎᑦᑎᔨ ᐊᖏᔪᖅᑳᓕᔩᑦ ᒐᕙᒪᓕᕆᔩᓪᓗ ᓄᓇᕗᑦ ᒐᕙᒪᒃᑯᖏᑦ (867) 975-6046 |