 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐊᑐᕚ, ᐊᓐᑎᕆᔪ, (ᔪᓚᐃ 14, 2003) - ᓄᓇᕗᑦ ᓯᕗᓕᐅᖅᑎᖓᑦ ᐸᓪ ᐅᑲᓕᖅ ᑲᑎᖃᑎᖃᓚᐅᖅᐳᖅ ᐊᒥᐊᓕᑲᐃᑦ ᑭᒡᒐᖅᑐᖅᑎᖓᓐᓂᒃ ᐃᓱᒫᓗᑎᒋᔭᒥᓂᒃ ᐅᖃᐅᓯᖃᖅᖢᓂ ᐱᔾᔪᑎᓕᒃ ᒪᑐᔭᐅᓂᖓᑕ ᐊᒥᐊᓕᑲᐃᑦ ᓄᓇᖁᑎᖏᓐᓄᑦ ᑕᒪᒃᑯᐊ ᓂᐅᕕᖅᑕᐅᕙᓚᐅᕐᓂᖏᓐᓂᒃ ᐅᒥᖕᒪᐃᑦ ᐊᒻᒪ ᑐᒃᑐᐃᑦ ᓂᕿᖏᓐᓂᒃ. ᐅᑲᓕᖅ ᑲᑎᖃᑎᖃᓚᐅᕆᕗᖅ ᑭᒡᒐᖅᑐᖅᑎᒥᒃ ᐸᓪ ᓴᓗᓯᒥᒃ ᐊᒥᐊᓕᑲᐃᑦ ᑭᒡᑕᖅᑐᕐᕕᖓᑦᑕ ᑎᑎᕋᕐᕕᖓᓐᓂ ᐊᑐᕚᒥ ᐅᖃᖃᑎᖃᕆᐊᖅᑐᖅᖢᓂ ᖃᓄᖅ ᐊᒃᑐᐊᓂᖃᕐᓂᐊᕐᓂᖓᓂᒃ ᓄᖃᖅᑎᑕᐅᓂᖏᓐᓂᒃ ᑕᒪᐃᓐᓂᒃ ᑲᓇᑕᒥᐅᑦ ᐃᕕᖕᓂᖅ ᓂᕆᕙᒃᑐᓂᒃ ᓂᔾᔪᑎᖏᓐᓂᒃ ᐊᒻᒪᓗ ᐊᓯᖏᑦ ᓂᔾᔪᑎᑦ ᐱᕈᖅᓯᐊᕆᔭᐅᕙᒃᑐᑦ ᐊᒻᒪᓗ ᖃᐅᔨᔭᐅᓚᐅᖅᑐᒥᒃ ᐊᑕᐅᓯᕐᒥᒃ ᑐᒃᑐᕙᖕᓂᒃ ᖃᐅᔨᕝᕕᐅᓚᐅᖅᑐᖅ ᐊᓐᓂᐊᕐᓇᖅᑐᒥᒃ bovine spongiform encephalopathyᖑᓂᕋᖅᑕᐅᔪᖅ ᐅᕝᕙᓘᓐᓃᑦ ᖃᐅᔨᒪᔭᐅᔪᖅ ᑐᒃᑐᕙᐃᑦ ᐊᓐᓂᐊᖅᑕᕆᕙᒃᑕᖏᓐᓂᒃ ᐊᓪᐳᑕᒥᑦ ᓂᔾᔪᑎᓂᒃ ᐱᕈᖅᓰᕝᕕᖓᓐᓂ. ᐅᖃᓕᖅ ᑐᓴᖅᑎᑦᓯᓚᐅᕆᕗᖅ ᑕᒪᐃᓐᓂᒃ ᐊᖏᖅᓂᕆᓚᐅᖅᑕᖏᓐᓂᒃ ᐃᓱᒪᒋᔭᐅᓯᒪᔪ ᑲᓇᑕᐅᑉ ᓄᓇᖁᑎᖏᓐᓂ ᐊᒻᒪᓗ ᐅᑭᐅᖅᑕᖅᑐᒥᒃ ᒥᓂᔅᑕᒋᔭᐅᔪᓂᒃ ᑕᒪᐃᓐᓂᒃ, ᐊᖏᖃᑎᒌᓚᐅᖅᐳᖅ ᐃᒻᒪᓵᖅ ᐊᕋᒍᓕᒫᖅᓯᐅᑎᖓᓐᓂᒃ ᓯᕗᓕᐅᖅᑎᐅᔪᖅ ᑲᑎᒪᔾᔪᐊᕐᓂᖃᖅᑎᓪᓗᒋᑦ Prince Edward Islandᒥ, ᐊᒻᒪᓗ ᐅᐱᓐᓂᖃᓚᐅᖅᐳᖅ ᑕᒪᒃᑯᐊ ᒐᕙᒪᓕᕆᔨᐅᕙᒃᑐᑦ ᐃᓂᖏᖅᓯᓯᒪᖔᓕᕐᒪᑕ ᖃᐅᔨᓴᖅᑎᔾᔪᐊᑎᒍᑦ ᖃᓄᐃᓕᐅᖅᐸᖕᓂᖏᓐᓂᒃ ᑕᒪᓐᓇᓗ ᑐᓐᖓᕕᒋᔭᐅᖕᒪᑦ ᐱᔾᔪᑎᒋᔭᖓᓐᓄᑦ ᑕᒪᑐᒧᖓ ᒪᑐᓯᓂᕐᒥᒃ ᐊᒥᐊᓕᑲᐃᑦ ᓄᓇᖁᑎᖏᓐᓄᑦ ᓂᕿᓂᒃ ᓄᖃᖅᑎᑦᓯᓂᕐᒥᒃ. “ᐊᒥᐊᓕᑲᐃᑦ ᑭᒡᒐᖅᑐᖅᑎᖓᑦ ᑕᒪᑐᒥᖓ ᑐᓴᕈᒪᒻᒪᕆᓚᐅᖅᐳᖅ ᐊᒻᒪᓗ ᐃᑲᔪᖅᑐᐃᓪᓚᕆᓚᐅᖅᐳᖅ ᐱᔾᔪᑎᒋᓪᓗᒍ ᓄᓇᕗᑉ ᐃᓱᒫᓗᑎᒋᔭᖏᓐᓂᒃ ᑕᒪᑐᒧᖓ,” ᐅᖃᓚᐅᖅᐳᖅ ᐅᖃᓕᖅ. ᐅᖃᓕᖅ ᓇᓗᓇᐃᕆᓚᐅᕆᕗᖅ ᖃᓄᖅ ᐅᖓᓯᖕᓂᕆᔭᖓᓐᓂ ᓄᓇᔾᔪᐊᑎᒍᑦ ᑕᐅᑐᒃᖢᒍ ᐊᒻᒪᓗ ᓇᔪᑐᐃᓐᓇᖅ ᐃᖏᕋᒐᔭᖃᑦᑕᕐᓂᖏᓐᓂᒃ ᓂᕐᔪᑏᑦ ᐊᒥᓱᑦ ᒪᑯᐊ ᐅᒥᖕᒪᐃᑦ ᐊᒻᒪᓗ ᑐᒃᑐᐃᑦ. ᑐᑭᓯᒋᐊᖅᑎᑦᓯᓯᐊᓚᐅᖅᐳᖅ ᑖᑉᓱᒧᖓ ᐊᒥᐊᓕᑲᐃᑦ ᑭᒡᒐᖅᑐᖅᑎᖓᓐᓄᑦ ᓄᓇᓕᔾᔪᐊᒧᑦ ᑕᒪᒃᑯᐊ ᐅᑭᐅᖅᑕᖅᑐᒥ ᓂᕐᔪᑏᑦ ᓂᕆᔭᐅᕙᒃᑐᑦ ᐊᒃᑐᐊᓂᖃᖏᓪᓚᕆᖕᒪᑕ ᓂᔾᔪᑎᒋᔭᐅᔪᓂᒃ ᖃᓪᓗᓈᓄᑦ, ᓂᕿᖁᑎᖏᓐᓂᒡᓘᓐᓃᑦ ᐅᕝᕙᓘᓐᓃᑦ ᑕᒪᒃᑯᓄᖓ ᓂᕿᓕᐅᕈᑎᓄᑦ ᐱᔾᔪᑎᒋᔭᐅᕙᒃᑐᓂᒃ ᖃᓄᑐᐃᓐᓇᖅ ᐊᒃᑐᓂᖃᖏᒻᒪᑕ. “ᑕᐃᒪᓕ ᖃᐅᔨᓴᕐᓂᔾᔪᐊᖅᑎᒍᑦ ᑐᓐᖓᕕᒋᔭᐅᕙᒃᑐᓂᒃ ᐱᔾᔪᑎᖃᕆᐊᖃᖏᓚᒍᑦ ᓄᖃᖅᑎᑦᓯᓂᕐᒥᒃ ᑲᓇᑕᐅᑉ ᓂᕿᖁᑎᖏᓐᓂᒃ ᐊᒥᐊᓕᑲᐃᑦ ᓄᖃᑐᑎᖏᓐᓄᑦ ᐊᒻᒪᓗ ᖃᐅᔨᑎᑦᓯᓇᓱᐊᕋᒪ ᐃᒪᐃᑦᑐᒥᒃ ᐱᔾᔪᑎᑦᓴᖃᖏᓪᓚᕆᖕᓂᖏᓐᓂ ᐃᓚᐅᑎᑕᐅᒋᐊᖏᓐᓂᒃ ᑐᒃᑐᐃᑦ ᐊᒻᒪᓗ ᐅᒥᖕᒪᐃᑦ ᓂᕿᖏᓐᓂᒃ ᓄᐅᕈᑎᖃᖃᑦᑕᕐᓂᕐᒧᑦ ᓄᖃᖅᑎᑦᓯᒋᐊᖓᓂ ᓯᕗᓪᓕᕐᒥ ᑕᐃᒪᐃᓕᐅᕆᐊᖃᓚᐅᖏᑲᓗᐊᕐᒪᑕ,” ᐅᖃᖅᐳᖅ ᐅᑲᓕᖅ. ᓄᓇᕗᒥ, ᑕᒪᓐᓇ ᑲᓇᑕᐅᑉ ᓂᕿᖁᑎᖏᓐᓂᒃ ᓄᖃᖅᑎᑦᓯᓂᖅ ᐊᒃᑐᐊᓂᖃᓪᓚᕆᖕᒪᑦ ᐅᑯᓄᖓ ᓂᕿᓕᐅᖅᑎᐅᔪᓂᒃ Kivalliq Arctic Foods ᑲᖏᖅᖠᓂᕐᒥ Kitikmeot Foods ᐃᖃᓗᒃᑑᑦᓯᐊᒥ. ᑕᒪᓐᓇ ᓂᕿᓂᒃ ᓄᓇᓕᔾᔪᐊᓄᑦ ᑭᐳᒃᑕᐅᑎᓂᖅ ᐊᑯᓂ ᓄᖃᖔᖅᑎᑕᐅᒃᐸᑦ, ᓂᕿᓂᒃ ᐊᐅᓚᖅᑎᑦᓯᖃᑦᑕᕐᓂᖅ ᓂᐅᕈᑎᒋᔭᐅᓂᐊᕐᓗᑎᒃ ᐊᓯᐅᔨᓂᐊᕐᒪᑕ ᐊᑭᖃᖅᑐᒥᒃ $500,000.00ᓂᒃ ᐊᒻᒪᓗ 20 ᐱᓕᕆᔨᐅᔪᑦ ᓄᖃᖅᑎᑕᐅᑐᐃᓐᓇᕆᐊᖃᕐᓂᐊᕐᒪᑕ. ᑲᑎᒪᓂᐅᔪᖅ ᐃᓚᒋᔭᐅᓚᐅᖅᐳᖅ ᐃᓚᖏᓐᓂ ᑕᒪᑐᒧᖓ ᑲᒪᒋᔭᐅᓇᓱᐊᖅᑐᖅ ᓯᕗᓕᐅᖅᑎᒧᑦ ᓄᖃᖅᑎᑦᓯᓇᓱᐊᖅᖢᓂ ᓂᖀᑦ ᐊᐅᓚᖅᑎᑕᐅᕙᖕᓂᖏᓐᓄᑦ ᓄᓇᕗᒥᓐᖔᖅᑐᑦ ᓂᔾᔪᑎᖁᑎᖓᓂᒃ. ᓯᕗᓕᐅᖅᑎ ᐃᑲᔪᖅᑐᖅᑕᐅᓂᕐᒥᓂᒃ ᓴᓚᖅᓴᖅᓯᒪᓚᐅᖅᐳᖅ ᐅᐊᖕᓇᖅᖠᕐᒥᐅᑕᐃᑦ ᓯᕗᓕᐅᖅᑎᖏᓐᓂᒃ ᑕᒪᑐᒥᖓ ᖃᐅᔨᑎᑦᓯᓇᓱᐊᖅᑎᓪᓗᒋᑦ ᐊᒻᒪᓗ ᐊᐃᕙᔾᔪᑎᒋᔭᐅᑎᓪᓗᒋᑦ ᐅᒥᖕᒪᐃᑦ ᐊᒻᒪᓗ ᑐᒃᑐᐃᑦ ᓂᕿᖁᑎᖏᑦ ᐃᓕᑕᕆᔭᐅᓯᒪᖁᓪᓗᓂᔾᔪᑦ ᐊᓐᓂᐊᖃᖏᓐᓂᖏᓐᓂᒃ ᑕᒪᑐᒥᖓ ᓂᔾᔪᑏᑦ ᐊᓐᓂᐊᖅᑖᕆᕙᒃᑕᖏᓐᓂᒃ. ᑐᑭᓯᒋᐊᑲᓐᓂᕈᒪᒍᔅᓯ ᐅᕗᖓ ᖃᐅᔨᒋᐊᕈᓐᓇᖅᐳᓯ: ᓂᓄ ᕕᔅᓂᐅᔅᑭ ᐊᐅᓚᑦᓯᔨᓄᑦ ᐊᒻᒪᓗ ᒐᕙᒪᐃᑦ ᑕᐱᕇᒃᖢᑎᒃ ᐱᓕᕆᖃᑎᒌᓂᖏᓐᓄᑦ ᑐᓴᐅᒪᑎᑦᓯᔨ (867) 975-6001 |