 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2003) - ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕ ᐲᑕ ᕿᓚᕝᕙᖅ ᐅᑉᓗᒥ ᓴᕿᑎᑦᓯᕗᖅ ᐊᔾᔨᒌᖏᑦᑐᓂᒃ ᑐᓴᒐᒃᓴᓂᒃ ᐊᑐᖅᑕᐅᓂᐊᖅᑐᓂᒃ ᓇᓗᓇᐃᕈᑎᐅᓂᐊᖅᑐᓄᑦ ᓄᓇᕘᒥᐅᑕᐅᔪᓄᑦ ᖃᓄᐃᑦᑐᓂᒃ ᐱᓕᕆᐊᕆᔭᐅᓂᐊᖅᑐᓂᒃ ᐊᑐᖅᑕᐅᓂᐊᕐᓂᖏᓐᓂᒃ ᐅᕙᓂ ᐃᑲᔫᓯᐊᖅᑖᕆᔭᐅᕙᒃᑐᓄᑦ. ᑐᙵᕕᒋᔭᐅᔪᖅ, ᐊᔾᔨᙳᖅᑎᒍᑦ ᑕᑯᒃᓴᐅᑎᑕᐅᔪᖅ ᓄᓇᕗᒥᐅᑦ ᐱᓕᕆᖃᑎᒌᖕᓂᕐᒧᑦ ᑕᐱᕇᙳᖅᑐᑦ, ᐅᑯᓅᓇ ᐃᒪᐃᓕᓯᒪᖕᒪᑦ: “ᐊᒥᖃᖃᑎᒌᖕᓂᖅ ᓴᙱᓂᕐᒧᑦ, ᐱᓕᕆᐊᖃᑦᓯᐊᕐᓂᖅ ᐱᓕᕆᐊᕆᔭᐅᔪᒃᓴᓂᒃ”. “ᐅᑉᐱᕈᓱᒃᑲᒪ ᐱᓪᓚᕆᐊᓂᖓᓂᒃ ᑕᒪᑐᒥᖓ ᑐᓴᖅᑎᑦᓯᒋᐊᖅᓴᖅ ᐃᓄᖁᑎᒋᔭᑉᑎᓐᓄᑦ ᑕᒪᒃᑯᓂᖓ ᐊᔾᔨᒌᖏᑦᑐᓂᒃ ᐱᓕᕆᐊᕆᔭᐅᔪᓐᓇᖅᑐᓂᒃ ᐊᑐᐃᓐᓇᐅᑎᑕᐅᔪᑦ ᑕᒪᒃᑯᑎᒎᓇᖅ ᐃᑲᔫᓯᐊᖅᑖᕆᔭᐅᕙᒃᑐᓄᑦ,” ᒥᓂᔅᑕ ᕿᓚᕝᕙᖅ ᐅᖃᖅᐳᖅ. “ᑐᓴᖅᑎᑕᐅᓚᐅᕋᑉᑕ ᖃᐅᔨᓴᖅᐸᓪᓕᐊᑎᓪᓗᒋᑦ ᐃᑲᔫᓯᐊᖅᑖᕆᔭᐅᕙᒃᑐᓄᑦ ᐱᓕᕆᐊᕆᔭᐅᔪᓄᑦ ᐃᓄᐃᑦ ᐊᒥᓱᑦ ᑐᑭᓯᐅᒪᖏᓐᓂᖏᓐᓂᒃ ᐅᕝᕙᓘᓐᓃᑦ ᖃᓄᐃᑦᑐᓂᒃ ᐊᑐᐃᓐᓇᐅᓂᖏᓐᓂᒃ ᑕᒪᑐᒧᖓ ᐃᑲᔪᖅᑕᐅᔪᓐᓇᕐᓂᖏᓐᓄᑦ. ᐅᒃᐱᕈᓱᒃᑲᒪ ᑕᒪᒃᑯᑎᒎᓇᖅ ᐱᓕᕆᐊᕆᔭᐅᓂᐊᖅᑐᑎᒍᑦ ᐱᓪᓚᕆᐅᔾᔪᑎᒋᔭᐅᓂᐊᕐᒪᑕ ᐱᓕᕆᐊᕆᒍᒪᔭᑉᑎᓐᓄᑦ ᐊᒻᒪᓗ ᑐᕋᕐᓂᕆᓇᓱᐊᖅᑕᑉᑎᓐᓄᑦ ᐅᕙᓂ ᑕᐃᔭᐅᓚᐅᖅᑐᓂ ᕿᙵᐅᒻᒥ ᑎᓕᔨᔾᔪᑏᐅᓚᐅᖅᑐᓂᒃ ᓇᓗᓇᐃᕆᒍᓐᓇᖁᑉᓗᑕ ᐃᓄᖁᑎᑉᑎᓐᓄᑦ ᐱᓕᕆᐊᕆᔭᐅᔪᓐᓇᖅᑐᓂᒃ ᐊᑐᐃᓐᓇᐅᕝᕕᐅᔪᓐᓇᖁᑉᓗᒋᑦ ᐃᑲᔪᖅᑐᐃᒐᓗᐊᖅᑎᓪᓗᑕ ᓇᖕᒥᓂᖅ ᐱᒋᐊᓕᕈᑎᒃᓴᖏᓐᓄᑦ ᐃᓄᓯᖏᓐᓂᒃ.” ᑐᓴᒐᒃᓴᐃᑦ ᓴᑯᑕᐅᔪᑦ ᐅᑉᓗᒥ ᐃᓚᓕᐅᑎᓯᒪᕗᑦ ᑐᑭᓯᐅᒪᔾᔪᑎᒃᓴᓂᒃ ᑕᒪᑐᒧᖓ ᐃᑲᔫᓯᐊᖅᑖᕆᔭᐅᕙᖕᓂᕐᒧᑦ ᐅᖃᓕᒫᒐᒃᓴᐃᑦ ᐊᒻᒪᓗ ᑕᓪᓕᒪᓂᒃ ᑐᑭᓯᐅᒪᔾᔪᑎᒃᓴᒧᑦ ᐅᖃᓕᒫᒐᕋᓛᓂᒃ. ᑐᑭᓯᐅᒪᔾᔪᑎᒃᓴᓄᑦ ᐅᖃᓕᒫᒐᕋᓛᑦ ᓇᓗᓇᐃᖅᓯᒪᕗᑦ ᐱᓕᕆᐊᕆᔭᐅᔪᓐᓇᖅᑐᑦ ᐃᓐᓇᕐᓄᑦ, ᐱᓕᕆᐊᕆᔭᐅᔪᓐᓇᖅᑐᑦ ᐃᑲᔪᖅᑐᐃᓂᕐᒧᑦ ᓄᑕᖃᓂᒃ, ᐃᓕᓐᓂᐊᕈᑎᒃᓴᓄᑦ ᐱᓕᕆᐊᕆᔭᐅᔪᒪᔪᓄᑦ, ᐃᓚᐅᓂᕐᒧᑦ ᐊᒻᒪᓗ ᐱᓕᕆᔩᐅᔪᓄᑦ ᐱᔪᓐᓇᕐᓂᖃᓂᖏᓐᓄᑦ ᐊᒻᒪᓗ ᖃᓄᖅ ᐱᓕᕆᐊᖃᕆᐊᖃᕐᓂᖏᓐᓄᑦ, ᐊᒻᒪᓗ ᓱᓇᑐᐃᓐᓇᕐᓄᑦ ᐱᓕᕆᐊᕆᔭᐅᔪᓐᓇᖅᑐᓄᑦ ᑐᓴᐅᒪᔾᔪᑏᑦ. ᑕᒪᒃᑯᐊ ᑐᑭᓯᒐᒃᓴᐃᑦ ᑕᒪᐃᓐᓄᑦ ᑐᓂᐅᖃᖅᑕᐅᓂᐊᖅᐳᑦ ᐃᑲᔫᓯᐊᖅᑖᖅᑐᓕᕆᔨᒃᑯᑦ ᑎᑎᕋᕐᕕᖏᓐᓄᑦ ᓄᓇᕘᒥ ᐊᒻᒪᓗ ᐊᓯᖏᓐᓄᑦ ᑐᕋᖓᔪᑦ ᑕᒪᑐᒧᖓ ᐊᑐᐃᓐᓇᐅᑎᑕᐅᓂᐊᕆᓪᓗᑎᒃ. ᒥᓂᔅᑕ ᐲᑕ ᕿᓚᕝᕙᖅ ᐅᖃᓚᐅᕆᕗᖅ ᑕᒪᒃᑯᐊ ᐅᖃᓕᒫᒐᕋᓛᑦ ᑐᓴᒐᒃᓴᓄᑦ ᑕᒪᐃᓐᓄᑦ ᐃᒡᓗᖁᑎᖃᖅᑐᓄᑦ ᓄᓇᕗᒥᐅᓗᒃᑖᓄᑦ ᑐᓂᐅᖃᖅᑕᐅᓂᐊᕐᓂᖏᓐᓂᒃ ᐃᑲᔫᖅᓯᐊᖅᑖᖅᑐᓕᕆᓂᐅᑉ ᒥᒃᓵᓄᑦ. “ᖁᕕᐊᓱᓪᓚᕆᒃᐳᖓ ᑐᕋᕐᓂᕆᔭᑉᑎᓐᓂᒃ ᑕᒪᑐᒧᖓ ᐱᓕᕆᐊᖃᕈᒪᓂᑉᑎᓐᓂᒃ ᐊᒻᒪᓗ ᓂᕆᐅᒃᐳᖓ ᐱᓗᐊᖅᑐᒥᒃ ᓄᓇᕗᒥᐅᑦ ᐃᑲᔫᓯᐊᖅᑖᖅᐸᒃᑐᑦ ᑐᓴᐅᒪᔾᔪᒥᔪᓐᓇᕐᓂᐊᕐᒪᑕ ᐊᒻᒪᓗ ᐃᑲᔪᖅᑕᐅᔾᔪᒥᒍᓐᓇᕐᓂᐊᕐᒪᑕᓗ,” ᐅᖃᖅᐳᖅ. “ᑭᒃᑯᑐᐃᓐᓇᕐᓄᑦ ᑐᓴᖅᑎᑦᓯᕙᖕᓂᐊᖅᐳᖓ ᖃᓄᐃᓕᐅᖅᐸᓪᓕᐊᓂᖏᓐᓂᒃ ᑕᒪᑐᒧᖓ ᐊᑐᐃᓐᓇᐅᓕᕌᖓᑕ.” ᐊᕌᒍᑕᒫᑦ ᐊᑐᓂ ᐃᒡᓗᒥᐅᖃᑎᒌᑦ 6,000 ᓄᓇᕗᒥᐅᑦ, ᐃᓄᖁᑎᖃᖅᖢᓂ 15,000-ᓂᒃ ᐃᑲᔫᓯᐊᖅᑖᖅᑕᕐᒪᑕ. ᐃᑲᔫᓯᐊᖅᑖᕐᑕᕐᓂᖅ ᐃᓚᓕᐅᑎᓯᒪᖕᒪᑦ ᓂᖃᐃᓱᕐᓂᕐᒧᑦ, ᐃᓐᓇᐃᑦ ᓇᖕᒥᓂᖅ ᐃᒡᓗᖁᑎᖃᖅᑐᑦ ᐅᖅᓱᐊᓗᖕᒧᑦ ᐃᑲᔫᓯᐊᖅᑕᖅᑕᕐᒪᑕ, ᐅᑭᐅᖅᑕᖅᑐᒥᐅᑕᐅᓂᖏᓐᓄᑦ ᐃᓐᓇᐃᑦ ᐃᑲᔫᓯᐊᖅᑕᖅᑕᕐᓂᖏᑦ, ᐸᐃᕆᕝᕕᓕᕆᔨᑦ ᐃᑲᔫᓯᐊᖅᑖᕐᑕᕐᒪᑕ, ᐊᒻᒪᓗ ᐱᓕᕆᐊᒃᓴᓄᑦ ᐊᓯᔾᔨᖅᐸᓪᓕᐊᓂᕐᒧᑦ ᐃᑲᔫᓯᐊᖅᑖᖅᑎᑦᓯᖃᑦᑕᕐᓂᖅ ᐃᓕᓐᓂᐊᕈᑕᐅᔪᒃᓴᐅᔪᓄᑦ. ᑐᑭᓯᒋᐊᑲᓐᓂᕈᒪᒍᑉᓯ ᐅᖃᓗᒍᓐᓇᖅᐳᓯ: Wende Halonen - ᒧᑦ ᓄᓇᕘᑉ ᒐᕙᒪᒃᑯᖏᓐᓄᑦ ᑐᓴᐅᒪᔪᓕᕆᔨ (867) 975-6046 ᑐᓴᐅᒪᔪᓕᕆᓂᖅ |